លោកកឹម សុខាត្រូវបានដោះលែងពីការឃុំឃាំងក្នុងផ្ទះ
មេដឹកនាំគណបក្សប្រឆាំង លោក កឹម សុខា ត្រូវបានតុលាការសម្រេចដកបំរាមពីការឃុំឃាំងក្នុងផ្ទះ។ នេះបើយោងតាមសេចក្តីប្រកាសរបស់សាលាដំបូងរាជធានីភ្នំពេញ ដែលចេញផ្សាយនៅថ្ងៃព្រឹកថ្ងៃអាទិត្យទី១០ ខែវិច្ឆិកា នេះ ហើយត្រូវបានបញ្ជាក់ប្រាប់ VOA ដោយអ្នកនាំពាក្យតុលាការក្រុងភ្នំពេញ លោក អ៊ី រិន។
សេចក្តីប្រកាសបញ្ជាក់ថា ជនត្រូវចោទ ឈ្មោះ កឹម សុខា ត្រូវបានចៅក្រមស៊ើបសួរសម្រេចបន្តដាក់ឲ្យស្ថិតនៅក្រោមការត្រួតពិនិត្យតាមផ្លូវតុលាការ ដោយត្រូវជាប់កាតព្វកិច្ចចំនួនបី គឺមិនត្រូវចេញក្រៅព្រំប្រទល់ដែនដីកម្ពុជា មិនត្រូវធ្វើសកម្មភាពនយោបាយ និងត្រូវឆ្លើយតបនឹងការកោះហៅពីគ្រប់សមត្ថកិច្ច។
- ដោយ ស៊ុន ណារិន
របាយការណ៍ជាវីដេអូ៖ សមត្ថកិច្ចចម្រុះរាប់រយនាក់ដែលមាននគរបាល ប៉េអឹម និងទាហាន ដែលប្រដាប់ដោយកាំភ្លើងវែងនិងខ្លី នៅថ្ងៃសៅរ៍នេះ បានបិទផ្លូវឆ្លងកាត់ចូលទៅព្រំដែនប៉ោយប៉ែតអស់រយ:ពេលប្រមាណ១០ម៉ោង មុននឹងបើកឲ្យដំណើរការជាធម្មតាវិញនៅម៉ោងប្រមាណ៤រសៀល។ ការរឹតបន្តឹងសន្តិសុខនេះធ្វើឡើង ក្នុងពេលដែលលោកសម រង្ស៊ី មេដឹកនាំគណបក្សសង្រ្គោះជាតិដែលត្រូវបានតុលាការកំពូលរំលាយ មានគម្រោងវិលត្រឡប់មកកម្ពុជាវិញតាមច្រកព្រំដែនប៉ោយប៉ែតនៅថ្ងៃសៅរ៍នេះ។
- ដោយ ម៉ែន គឹមសេង
ពលរដ្ឋខ្មែរអាមេរិកាំងធ្វើបាតុកម្មគាំទ្រមាតុភូមិនិវត្តន៍លោកសម រង្ស៊ី
អាកាសធាតុ នៅរដ្ឋធានីវ៉ាស៊ីនតោនត្រជាក់ស្ទើរកកគឺមានកម្រិត ២អង្សារសេ កាលពីថ្ងៃសុក្រប៉ុន្តែមិនបានរារាំងពលរដ្ឋខ្មែរអាមេរិកាំង ដែលគំាទ្រគណបក្សង្គ្រោះជាតិជិត ១០០នាក់ មកជួបជុំគ្នាតវ៉ានៅក្បែរវិមានរដ្ឋសភាទេ។ ពួកគេសម្តែងការគាំទ្រដំណើរមាតុភូមិនិវត្តន៍របស់មេដឹកនាំគណបក្សប្រឆាំង ដែលប្តេជ្ញាទៅស្តារលទ្ធិប្រជាធិបតេយ្យឡើងវិញ។
លោកស្រីណាឡែន ស្មីត អ្នករូបចំបាតុកម្មមួយរូប បានបញ្ជាក់ប្រាប់វីអូអេថា៖
«លោកប្រធានស្តីទីសមរង្ស៊ីហើយនឹងបងប្អូនយើងជាច្រើនដែលរស់នៅសហរដ្ឋអាមេរិកនិងប្រទេសផ្សេងៗ គាត់បានអញ្ជើញទៅមាតុភូមិនិវត្តន៍ដូច្នេះយើងនៅ សមរភូមិក្រោយក៏យើងអត់នៅស្ងៀមដែរគឺយើងត្រូវធ្វើបាតុកម្មដើម្បីទាមទារដូចពួកគាត់ដែរ។ ពួកគាត់ទាមទារលទ្ធិប្រជាធិបតេយ្យនៅស្រុកខ្មែរយើងនៅទីនេះក៏គាំទ្រយើងក៏ទាមទារដែរ»។
លោកសមរង្ស៊ីប្រធានស្តីទីគណបក្សសង្គ្រោះជាតិដែលបានរស់នៅនីរទេសខ្លួនក្រៅប្រទេសតាំងពីឆ្នាំ២០១៥ បានប្រកាសដឹកនាំមន្ត្រីបក្សវិលត្រឡប់ចូលមាតុភូមិវិញដើម្បីស្តារលទ្ធិប្រជាធិបតេយ្យនិងនីតិរដ្ឋ។ លោកបានគំរាមចាប់លោកនាយករដ្ឋមន្ត្រីហ៊ុន សែន យកទៅកាត់ទោស ដោយសារតែការដឹកនាំក្នុងរយៈពេលជាង៣០ឆ្នាំមកនេះ បានធ្វើឱ្យប្រទេសកម្ពុជាខូចខាតធនធានធម្មជាតិ បាត់បង់អធិបតេយ្យភាពនិងពុករលួយបក្សពួកនិយម។
- ដោយ កាន់ វិច្ឆិកា
លោកសម រង្ស៊ីទៅដល់ប្រទេសម៉ាឡេស៊ីក្រោយបរាជ័យគម្រោងចូលប្រទេសថៃ
លោក សម រង្ស៊ី មេដឹកនាំអតីតគណបក្សប្រឆាំងបានទៅដល់ទីក្រុងគូឡាឡាំពួ ប្រទេសម៉ាឡេស៊ីនៅរសៀលថ្ងៃសៅរ៍នេះ ដោយមានក្រុមសហការីរបស់លោកមួយចំនួនចាំទទួលនៅទីនោះ។ នេះបើតាមសារដែលបង្ហោះលើទំព័រហ្វេសប៊ុករបស់អ្នកស្រី មូរ សុខហួរ អនុប្រធានគណបក្សប្រឆាំង។
អ្នកស្រី មូរ សុខហួរ បានបង្ហោះសារលើទំព័រហ្វេសប៊ុករបស់អ្នកស្រី នារសៀលថ្ងៃសៅរ៍នេះដោយភ្ជាប់នឹងរូបថតរបស់លោក សម រង្ស៊ី និងសហការី រួមមានលោក អេង ឆៃអ៊ាង ផង ថា លោក សម រង្ស៊ី បានទៅដល់ទីក្រុងគូឡាឡាំពួ ប្រទេសម៉ាឡេស៊ី នៅថ្ងៃសៅរ៍នេះ ដោយជោគជ័យ។
ក្នុងវីដេអូដែលលោក សម រង្ស៊ី និយាយទៅកាន់ក្រុមអ្នកសារព័ត៌មាននៅទីក្រុងគូឡាឡាំពួ លោកមិនបានបញ្ជាក់ថា តើលោកនឹងចាកចេញពីប្រទេសម៉ាឡេស៊ីពេលណានោះទេ ហើយលោកក៏មិនឆ្លើយនឹងសំណួររបស់អ្នកសារព័ត៌មានពាក់ព័ន្ធនឹងគម្រោងបន្ទាប់របស់លោកដែរ។