ភ្ជាប់​ទៅ​គេហទំព័រ​ទាក់ទង

តំណាងរាស្ត្រ៖​ ទាហាន​ការពារ​ព្រំដែន​វៀតណាម​ល្បាត​ក្នុងដី​ខ្មែរ


លោក​ស្រី​ថាក់​ ឡាក់នី​តំណាង​រាស្រ្ត​គណបក្ស​សម​​រង្ស៊ី​ មណ្ឌល​កំពង់ចាម​ បាន​ចុះ​ទៅ​ពិនិត្យ​មើល​បង្គោល​ព្រំដែន​លេខ​ ១២៥​​​ រវាង​ កម្ពុជា​ និង​ វៀតណាម​​ក្នុង​ពេល​កន្លង​មក។ បញ្ហា​​កំណត់​ព្រំដែន​រវាង​កម្ពុជា​និង​វៀតណាម​​ជា​ចំណុច​រសើប​មួយ​នៅ​ក្នុង ​នយោបាយ​ក្នុង

ទាហាន​ការពារ​ព្រំដែន​វៀត​ណាម​បាន​មក​រារាំង​ក្រុមអ្នក​តំណាង​រាស្រ្ត​គណបក្ស​ប្រឆាំង​នៅ​លើ​ទឹកដី​របស់​ប្រទេស​កម្ពុជា។​ ​ការ​រារាំង​នេះ​ បាន​ធ្វើឡើង​ក្រោយ​ពីអ្នក​តំណាង​រាស្រ្ត​ទាំង​នោះ​បាន​ចុះ​ទៅ​មើល​បង្គោល​ព្រំដែន​លេខ​១០៣​ ​លេខ១០៨​ ​និងលេខ​១០៩​ នៅ​ស្រុក​មេមត់​ ​ខេត្ត​កំពង់ចាម។ ​បន្ទាប់​ពី​បាន​ពិនិត្យ​មើល​បង្គោល​ទាំង​នោះ​ ​លោក​សុន ឆៃ​ ដែល​បាន​ដឹកនាំ​ក្រុម​អ្នក​តំណាងរាស្ត្រ​គណបក្ស​ប្រឆាំង​ ​បាន​និយាយ​ថា​ ​ការ​បោះ​បង្គោល​ព្រំដែន​និង​តម្រុយ​បង្គោល​ព្រំដែន​នេះ​បាន​ធ្វើ​ឲ្យបាត់​បង់​ ផ្ទៃដី​កម្ពុជា​ចំនួន​១៧​ភូមិ។

សាក្សី​ឃើញ​ផ្ទាល់​ភ្នែក​ និង​អ្នក​តំណាង​រាស្រ្ត​គណបក្ស​ប្រឆាំង​ ​នៅ​ថ្ងៃអង្គារ​នេះ​ ​បាន​និយាយ​ថា ​ទាហាន​ការពារ​ព្រំដែន​ប្រមាណ​ជាង​១០​នាក់​ ​ប្រដាប់​ដោយ​អាវុធ​ ​បាន​មក​រារាំង​អ្នក​តំណាងរាស្រ្តគណបក្ស​ប្រឆាំង​ ​ដែល​បាន​ដឹកនាំ​គណបក្ស​ប្រតិភូ​ទៅមើល​ការបោះ​តម្រុយ​ ​និង​ការបោះ​បង្គោល​ព្រំដែន​រវាង​ប្រទេស​កម្ពុជា​ និង​ប្រទេស​វៀតណាម។

លោក​សុន ឆៃ​ ​ដែល​បាន​ដឹកនាំ​ក្រុម​អ្នក​តំណាងរាស្រ្ត​គណបក្ស​ប្រឆាំង​ចំនួន​១៩រូប​ទៅ​មើល​តម្រុយ​បង្គោល​ព្រំដែន​នោះ​ ​បាន​និយាយា​ថា​ ការ​រារាំង​នេះ​បាន​ធ្វើ​ឡើង​នៅ​ជិត​ច្រក​ព្រំដែន​មួយ​ ដែល​មាន​ឈ្មោះ​ថា​ ​ច្រក​ព្រំដែន​ដូនរ័ត្ន​ មាន​ទីតាំង​នៅ​ស្រុក​មេមត់ ​ខេត្ត​កំពង់ចាម។

លោក​បាន​មាន​ប្រសាសន៍​ថា​ ​ទាហាន​ការពារ​ព្រំដែន​វៀតណាមបាន​ឆ្លង​ចូល​មក​ទឹកដី​ប្រទេស​កម្ពុជា​ ដើម្បី​មក​រារាំង​អ្នក​តំណាង​រាស្រ្ត​គណបក្ស​ប្រឆាំង​ដែល​មាន​បំណង​ចុះ​ទៅ​ពិនិត្យ​មើល​បង្គោល​ព្រំដែន​លេខ​១០៣​ ​ក៏​ប៉ុន្តែ​ទោះ​ជា​យ៉ាងណា​ក៏ដោយ​ពុំមា​នសេចក្តី​រាយ​ការណ៍​អំពី​ការ​ប្រើប្រាស់​អំពើ​ហិង្សា​ដាក់គ្នា​ទៅវិញ​ទៅមក​រវាង​ភាគី​ទាំងពីរ​ទេ។

លោក​សុន ឆៃ ​បាន​មាន​ប្រសាសន៍​ថា​ ​នេះ​គឺជា​ចរិត​ឈ្លានពាន​របស់​វៀតណាម​ ដែល​ធ្លាប់​បាន​ធ្វើ​មកលើ​ប្រទេស​កម្ពុជា។

«ខ្ញុំថា​ ​នេះ​គឺជា​ចរិត​ដែល​គេ​ធ្លាប់​ធ្វើ​មក​ ​ដោយសារ​គេ​ធា្លប់​បាន​លើក​ទ័ព​ឈ្លាន​ពាន​ទឹកដី​យើង​ ​ហើយ​ធ្លាប់​បាន​លើក​បន្តុប​មន្រ្តី​យើង​ ​តូច​ ​ធំ។ គេ​ ប្រហែល​នឹក​ថា​ ​គេ​នៅតែ​ជា​ចៅហ្វាយ​ដាច់ថ្លៃ​របស់​ប្រជា​ពលរដ្ឋ​ខ្មែរ​យើង​ ដែល​ជា​លក្ខណៈ​ប្រមាថ​ទៅ​ដល់​ជាតិ​សាសន៍​យើង​ទៅ​ដល់​ អធិបតេយ្យភាព»។

បន្ទាប់ពី​បាន​ចុះ​ទៅ​ពិនិត្យ​បង្គោល​ព្រំដែន​លេខ​១០៨ ​ លេខ​១០៩ ​និង​ការបោះ​តម្រុយ​បង្គោល​ព្រំដែន​លេខ​១០៣ ​ដែល​មាន​ទីតាំង​នៅ​ស្រុក​មេមត់​ ​ខេត្ត​កំពង់ចាម​ ​លោក​សុន ឆៃ​បាន​ថ្លែងប្រាប់ ​VOA​ សំឡេង​សហរដ្ឋ​អាមេរិកតាម​រយៈ​ទូរស័ព្ទ​មក​ថា​ ​ការ​បោះ​បង្គោល​ព្រំដែន ​និង​ការបោះ​តម្រុយ​បង្គោល​ព្រំដែន​នេះបាន​ធ្វើ​ឲ្យ​ដីធ្លី​របស់​ប្រជា​ពលរដ្ឋ​ចំនួន​១៧​ភូមិ​ បាន​បាត់បង់។

«ភូមិ​យ៉ាង​តិចណាស់​ចំនួន​១៧​ ​នៅ​ក្នុង​ស្រុក​មេមត់​ ​ក្នុងនោះ​នៅ​ក្នុង​ឃុំរូង​ ​មាន​ប្រាំភូមិ​ ​ឃុំច័ន្ទមូល​ ​មាន​ប្រាំពីរ​ភូមិ​ ​ហើយ​ឥឡូវ​ទៅ​ជា​ក្នុង​ទឹកដី​វៀតណាម​ហើយ»។

លោក​ម៉េក រ៉េត ​អាយុ​៤៧ឆ្នាំ​ ​រស់​នៅ​ភូមិ​ដា​កណ្តោល​ ​ឃុំដា​ ​ស្រុក​មេមត់​ ​បាន​និយាយ​ថា​ ចម្ការ​ស្វាយ​របស់​លោក​ចំនួន​ពីរ​ហិចតា​ត្រូវបាន​វៀតណាម​រំលោភ​យក​ ​ក្រោយ​ពី​បាន​បោះបង្គោល​ព្រំដែន​នេះ។

«ខ្ញុំមាន​អារម្មណ៍​ស្តាយ​ណាស់​ ​ព្រោះ​ខ្ញុំ​មានតែ​ដី​ប៉ុណ្ណឹង​ ​ហើយ​គេយក​អស់​អញ្ចឹង។​ ​ខ្ញុំ​អត់​មាន​អ្វី​ឲ្យ​កូន​ធ្វើទេ​ ​អស់រលីង។ ខ្ញុំ​ឈឺចាប់​ណាស់​អត់​មាន​ដី​កន្លែង​ណា​ផង។​ ​ខ្ញុំ​មាន​តែ​ដី​មួយ​កន្លែង។ ​បើ​គេ​យក​អស់​អញ្ចឹង​ ​ហើយ​គ្រួសារ​ខ្ញុំ​មាន​ការ​លំបាក​វេទនា​ខ្លាំង​មែនទែន​បង»។

វីអូអេ​ទាក់ទង​មន្រ្តី​ស្ថានទូត​វៀតណាម​ប្រចាំ​ប្រទេស​កម្ពុជា​ តែ​ពុំ​អាច​ជួប​បានទេ​នៅ​ថ្ងៃអង្គារ​នេះ។

ក៏ប៉ុន្តែ​ទោះជា​យ៉ាងណា​ក៏ដោយ​ ​ក៏លោក​ទេស​រដ្ឋមន្រ្តី​ ​វ៉ា គឹមហុង​ ​មន្រ្តី​ទទួល​បន្ទុក​កិច្ចការ​ព្រំដែន​របស់​រដ្ឋាភិបាល​ បាន​ស្តី​បន្ទោស​ថា​ អ្នក​តំណាងរាស្រ្ត​គណបក្ស​ប្រឆាំង​គ្មាន​ជំនាញ​ខាង​កិច្ចការ​ព្រំដែន​ទេ។

លោក​វ៉ា គឹមហុង​បាន​និយាយ​ថា​ ​ការ​បោះបង្គោល​ព្រំដែន ​និង​តម្រុយ​បង្គោល​ព្រំដែន​នេះ​ ​មិន​បាន​ធ្វើ​ឲ្យ​បូរណភាព​ទឹកដី​របស់​ប្រទេស​កម្ពុជា​បាន​បាត់បង់​ទេ។

លោក​បាន​មាន​ប្រសាសន៍​ថា​ ​ប្រទេស​ទាំង​ពីរ​ត្រូវការ​តែ​ខ្សែ​បន្ទាត់​ព្រំដែន​មួយ​ឲ្យ​បាន​ច្បាស់លាស់​ ​នា​ពេល​ខាង​មុខនេះ។

«ពាក្យ​ថា​ ​និយមន័យ​បាត់បង់​ ​តើយក​ទៅ​ប្រៀបធៀប​នឹង​អ្វី​ ​បើយើង​មិនទាន់​បាន​បោះបង្គោល​ព្រំដែន​ ​មិនទាន់​ធ្វើ​ខណ្ឌ​ព្រំសីមា​ផង?​ ម៉េច​យើង​ដឹង​ថា ​បាត់​ត្រង់​ណា​អីត្រង់​ណា?​ ​យើង​បាត់​បាន​ លុះត្រាតែ​យើង​មាន​ខ្សែ​ព្រំដែន​ ​ហើយ​វា​អត់​មាន​ខ្សែ​ព្រំដែន។​ កុំ​ច្រឡំ​ខ្សែ​ព្រំដី​របស់​ប្រជាជន​ ​ចម្ការ ស្វាយចន្ទី​ ​ចម្ការ​ដំឡូង។ ​ព្រំដែន​នៅលើ​ផែនទី​របស់​ក្រុម​ភូមិសាស្រ្ត​អាស៊ាន​ ដែល​ជា​ផែនទី​យោង​ ដែល​យើង​យក​មក​ប្រើ»។

ប្រទេស​កម្ពុជា​មាន​ព្រំដែន​គោក​ជាប់​ជាមួយ​និង​ប្រទេស​វៀត​ណាម​ប្រមាណ​២៧០​គីឡូម៉ែត្រ​ ហើយ​ប្រទេស​ទាំងពីរ​ ​ទើបតែ​បោះ​បង្គោល​ព្រំដែន​ប្រមាណ​ជាង​២០០​បង្គោល​តែប៉ុណ្នោះ​ ​នៅក្នុង​ចំណោម​បង្គោល​សរុប​ចំនួន​៣៧៥​បង្គោល។

ប្រទេស​ទាំងពីរ​បាន​សន្យា​ថា​ ​នឹង​បោះ​បង្គោល​ព្រំដែន​នេះ​ឲ្យ​ចប់​សព្វគ្រប់​នៅ​ឆ្នាំ២០១២​ ​ខាងមុខ​នេះ៕

XS
SM
MD
LG