ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

អ្នក​តាត់តែង​ច្បាប់​បើក​ការ​ប្រជុំ​បី​ប្រទេស​ស្តី​អំពី​ការ​អភិវឌ្ឍ


រដ្ឋសភានៃប្រទេសកម្ពុជា។
រដ្ឋសភានៃប្រទេសកម្ពុជា។

ភ្នំពេញ៖ នៅ​ថ្ងៃពុធ​នេះ​ លោក​ហេង សំរិន ប្រធាន​រដ្ឋ​សភា បាន​លើក​ទឹក​ចិត្ត​ដល់​សមាជិក​សភា​កម្ពុជា ឡាវ​ និង​វៀតណាម​ឲ្យ​ធ្វើ​ការ​ពិភាក្សា​គ្នា​ឱ្យ​បាន​ហ្មត់​ចត់​លើ​គោល​នយោបាយ ​និង​យន្តការ​អភិវឌ្ឍ​តំបន់​ត្រី​កោណ​របស់​រដ្ឋាភិបាល​ទាំង​បី សំដៅ​ទាក់​ទាញការ​វិនិយោគ​ឱ្យ​បាន​ច្រើន​មក​កាន់​តំបន់​ត្រី​កោណ​នេះ។

កិច្ច​ប្រជុំ​ប្រចាំ​ឆ្នាំ​លើក​ទី២​របស់​រដ្ឋ​សភា​កម្ពុជា ឡាវ​ និង​វៀតណាម រយៈ​ពេល​២​ថ្ងៃ ​បាន​ចាប់​ផ្តើម​ពិភាក្សា​លើ​គម្រោងរដ្ឋាភិបាល​របស់​ខ្លួន ស្តី​អំពី​ការ​អភិវឌ្ឍតំបន់​ត្រី​កោណ។ តំបន់​ត្រី​កោណ​តាំង​នៅ​ចន្លោះ​ព្រំដែន​នៃ​ប្រទេស​ទាំងបី រូមមាន កម្ពុជា ដែលមាន​ខេត្ត​ស្ទឹងត្រែង ខេត្ត​មណ្ឌលគីរី និង​ខេត្ត រតនគីរី ប្រទេស​ឡាវ ដែលមាន​ខេត្ត​អាត់តាពើ ខេត្ត​សារាវ៉ាន់ និង​ខេត្ត​សេកុង និង​ប្រទេស​វៀតណាម ដែល​មាន​ខេត្ត​ដាក់លាក ខេត្ត​ដាក់ណុង ខេត្ត​ចាឡៃ និង​ខេត្តកន្ទុំ។

លោក​ហេង សំរិន ប្រធាន​រដ្ឋ​សភា​កម្ពុជា បាន​ថ្លែង​បើក​កិច្ច​ប្រជុំ​ប្រចាំ​ឆ្នាំ​លើក​ទី​២​របស់​គណៈកម្មការ​កិច្ច​ការ​បរទេស​របស់​រដ្ឋ​សភា​នៃ​ប្រទេស​ទាំង​៣។ សុន្ទរកថា​នោះ​សង្កត់​ធ្ងន់​ថា ​គោលនយោបាយ និង​យន្តការ​សម្រាប់​ការ​អភិវឌ្ឍ​តំបន់​ត្រីកោណ ដែល​ត្រូវ​បាន​ដាក់​ចេញ​ដោយ​រដ្ឋាភិបាល​ ត្រូវ​តែ​ស៊ី​សង្វាក់​ និង​ដើរ​ស្រប​គ្នា​ជា​មួយ​ស្ថាប័ន​នីតិ​ប្បញ្ញត្តិ។ លោក​ហេង សំរិន​ថ្លែង​ថា៖

«សភា​ទាំង​បី គឺ​ជា​កម្លាំង​ចលករ​មិន​អាច​ខ្វះ​បាន​ក្នុង​ការ​ជំរុញ​ឱ្យ​មាន​ប្រសិទ្ធ​ភាពក្នុង​ការ​អនុវត្ត​ ដោយ​រដ្ឋាភិបាល​នៃ​ប្រទេស​ទាំង​បី ដើម្បី​ឆ្លើយ​តប​ទៅ​នឹង​តម្រូវ​ការ​ជាក់​ស្តែង​របស់​ប្រជា​ពលរដ្ឋ​ដែល​រស់​នៅ​ក្នុង​តំបន់​ត្រី​កោណ ជា​ពិសេស​ការ​ប្រឈម​ទាំង​ឡាយ​ដែល​ត្រូវ​ដោះ​ស្រាយ​តាម​នីតិ​វិធី​ច្បាប់»។

លោក​ហេង សំរិន បាន​បញ្ជាក់​ថា ក្នុង​តួនាទី​ជា​តំណាង​រាស្ត្រកម្ពុជា​ជំរុញ​ឱ្យ​រដ្ឋាភិបាល និងអ្នក​វិនិយោគ​ទុន​ក្នុង ​និង​ក្រៅ​ប្រទេស​ដាក់​ទុន​វិនិយោគ​សាធារណៈ ឬឯកជន​នៅ​ក្នុង​តំបន់ ​ដើម្បី​កាត់​បន្ថយ​ភាពក្រីក្រ​របស់​ប្រជា​ពលរដ្ឋ​នៅ​ក្នុង​តំបន់​ត្រី​កោណ។

លោក​ហេង សំរិន បាន​បន្ត​ថា កិច្ច​ប្រជុំ​នេះ​បាន​ផ្តល់​ឱកាស​ដល់​សមាជិក​សភា​នៃ​ប្រទេស​ទាំង​បី ​ធ្វើ​ការ​ផ្លាស់​ប្តូរ​ព័ត៌មាន ចែក​រំលែក​បទពិសោធន៍ និងជួយ​ជំរុញ​ឱ្យ​រដ្ឋាភិបាល​បន្ត​អនុវត្ត​កិច្ច​ព្រម​ព្រៀង​នៃប្រទេស​ទាំង​បី ដោយ​អភិវឌ្ឍ​តំបន់​ត្រី​កោណ​ឆ្ពោះ​ទៅ​រក​យុទ្ធ​សាស្ត្រ​កាត់​បន្ថយ​ភាព​ក្រីក្រ ទប់​ស្កាត់​ការ​ជួញ​ដូរ​គ្រឿង​ញៀន ឧក្រិដ្ឋ​កម្ម​ឆ្លង​ដែន និង​ជំងឺឆ្លង​នៅ​ក្នុង​តំបន់ ព្រម​ទាំង​កសាងរចនា​សម្ព័ន្ធ​ផ្លូវ​គមនាគមន៍ និង​ការ​កសាង​សមត្ថភាព​ធនធាន​មនុស្ស​ជូន​ប្រជា​ពលរដ្ឋ ​ដែល​កំពុង​រស់​នៅ​ក្នុង​តំបន់​ត្រី​កោណ​ប្រកប​ដោយ​ប្រសិទ្ធិ​ភាព​ខ្ពស់។

កាល​ពី​ខែ​វិច្ឆិកា ឆ្នាំ​២០០៩ លោក​នាយក​រដ្ឋ​មន្ត្រី​នៃ​ប្រទេស​កម្ពុជា ឡាវ និង​វៀតណាម បាន​សន្យា​ជំរុញ​ការ​អភិវឌ្ឍ​តំបន់​ត្រី​កោណ​ឱ្យ​ដើរ​តួ​នាទី​សំខាន់​ ក្នុង​ការ​លើក​ស្ទួយ​ការ​អភិវឌ្ឍ​រវាង​ប្រទេស​ទាំង​បី​ដែល​ត្រូវ​តែ​ធ្វើ​ការ​ឱ្យ​ខ្លាំង​ឡើង​ថែម​ទៀត ដើម្បី​អភិវឌ្ឍ​តំបន់​សេដ្ឋកិច្ច​ ជាពិសេស​ពង្រីក​កិច្ច​សហ​ប្រតិបត្តិការ​ក្នុង​វិស័យ​ទេសចរណ៍ ការ​បណ្តុះ​បណ្តាល​ពាណិជ្ជកម្ម និង​ហិរញ្ញវត្ថុ។

ប្រទេស​ជប៉ុន​បាន​សន្យា​ផ្តល់​ជំនួយ​២០​លាន​ដុល្លា​រអាមេរិក សម្រាប់​ការ​អភិវឌ្ឍ​តំបន់​ត្រី​កោណ​នេះ​ ដែល​ប្រទេស​កម្ពុជា និង​ឡាវ​ត្រូវ​ទទួល​បាន​៧,៥​លាន​ដុល្លារអាមេរិកដូចគ្នា​ និង​ប្រទេស ​វៀតណាម ចំនួន​៣,៥​លាន​ដុល្លារអាមេរិក ហើយ​១,៥​លាន​ដុល្លារអាមេរិក​ទៀត​សម្រាប់​សិក្សា​ការ​ត​ភ្ជាប់​ផ្លូវ​ថ្មី​នៅ​ក្នុង​តំបន់​ត្រី​កោណ​នៃ​ប្រទេស​ទាំង​បី។

XS
SM
MD
LG