ភ្ជាប់​ទៅ​គេហទំព័រ​ទាក់ទង

បាតុករ​​តវ៉ា​​​រឿង​​ទំនាស់​​ដី​ធ្លី​​បាន​​បិទ​​ផ្លូវ​​ជាតិ​​លេខ​​៤៨


ប្រជាពលរដ្ឋ​​ធ្វើ​ការ​តវ៉ា​ក្នុង​ទំនាស់​ដី​ធ្លី​មួយ។

ប្រជា​ពលរដ្ឋ​ស្រុក​ស្រែ​អំបិល​ខេត្ត​កោះ​កុង​បាន​សម្រេច​បិទ​ផ្លូវជាតិ​លេខ​៤៨​ដើម្បី​ប្រឆាំង​តវ៉ា​ជាមួយ​ក្រុម​ហ៊ុន​ហេង ហ៊ុយ​ កុំ​ឲ្យ​រំលោភ​យក​ដី​របស់​ពួក​គេ។ ការ​បិទ​ផ្លូវ​នេះបាន​ធ្វើ​ឡើង​រយៈ​ពេលជាង​បី​ម៉ោង​បណ្តាល​ឲ្យ​រថយន្ត​ច្រើន​រាប់​រយ​គ្រឿង​បាន​កក​ស្ទះ។​ ក៏ប៉ុន្តែ​ពុំ​មាន​អំពើ​ហិង្សា​កើត​ឡើង​ទេ​ ​នៅ​ពេល​ដែល​កម្លាំង​សន្តិសុខ​របស់​ក្រុម​ហ៊ុន​បាន​បំបែក​ក្រុម​ប្រជា​ពលរដ្ឋ​ឲ្យ​ចេញ​ពី​ផ្លូវ​ ដើម្បី​បើក​ចរាចរណ៍​ឡើង​វិញ។

ប្រជា​ពលរដ្ឋ​ប្រមាណ​ជាង​២០០​នាក់​ ​នៅ​ថ្ងៃ​សុក្រ​នេះ​ ​បាន​សម្រេច​បិទ​កំណាត់​ផ្លូវ​ជាតិ​លេខ​៤៨ ​នៃ​ស្រុក​ស្រែអំបិល​ ​ខេត្ត​កោះកុង​ ​ដើម្បី​ប្រឆាំង​តវ៉ា​ជំទាស់​និង​ក្រុម​ហ៊ុន​ហេង ហ៊ុយ​ ​ ​ក្រោយ​ពី​ក្រុមហ៊ុន​មួយ​នេះបាន​ចោទ​ប្រកាន់​ថា​ ​បាន​រំលោភ​យក​ដី​របស់​ប្រជា​ពលរដ្ឋ។

ការ​សម្រេច​បិទ​កំណាត់​ផ្លូវជាតិ​នេះ​ ​បាន​កើត​មាន​ឡើង​អស់​រយៈ​ពេល​ជាង​បី​ម៉ោង​បណ្តាល​ឲ្យ​រថយន្តជា​ច្រើន​រាប់រយ​គ្រឿង​ ​ដែល​បាន​ធ្វើដំណើរ​ពី​ភ្នំពេញ​ទៅ​ខេត្ត​កោះកុង​ និង​ពី​ខេត្ត​កោះកុង​ត្រឡប់​មក​ទីក្រុង​ភ្នំពេញ​វិញ​ ​បាន​កក​ស្ទះ។

បើ​តាម​សាក្សី​បាន​ឃើញ​ផ្ទាល់​ភ្នែក​ និង​មន្រ្តី​ឃ្លាំ​មើល​ការ​រំលោភ​សិទ្ធិ​មនុស្ស​បាន​និយាយ​ថា​ ​ក្រុម​សន្តិសុខ​របស់​ក្រុមហ៊ុន​ប្រមាណ​ជិត​៣០នាក់​ ​ព្រម​ទាំង​អ្នក​ធ្វើ​ដំណើរ​លើ​កំណាត់​ផ្លូវជាតិ​លេខ​៤៨​ ​បាន​សម្រេច​ចិត្ត​បុក​ទំលុះ​របាំង​បិទ​ផ្លូវ​របស់​ប្រជា​ពលរដ្ឋ​ ​ដែល​បាន​យក​គោយន្ត​ទៅ​អង្គុយ​ត្រៀប​ត្រា​នៅ​លើ​ដងផ្លូវ​ ​ ដើម្បី​សម្រួល​ឲ្យ​ចរាចរណ៍​ឡើង​វិញ។

លោក​អ៊ូច ឡេង ​មន្រ្តី​ដីធ្លី​របស់​សមាគម​សិទ្ធិ​មនុស្ស ​ADHOC​ ​បាន​ថ្លែង​ប្រាប់ ​VOA ​សំឡេង​សហ​រដ្ឋ​អាមេរិក​តាម​រយៈ​ទូរស័ព្ទ​ពី​កន្លែង​កើត​ហេតុ​មក​ថា​ ​ការ​ប៉ះ​ទង្គិច​គ្នា​នេះ​ ពុំ​បណ្តាល​ឲ្យ​ប្រជា​ពលរដ្ឋ​រង​របួស​នោះ​ទេ។

ក៏​ប៉ុន្តែ​ទោះ​ជា​យ៉ាង​ណា​ក៏ដោយ​ ​លោក​អ៊ូច ឡេង​ បាន​ស្តី​បន្ទោស​ចំពោះ​វិធានការ​នេះ​ ​ថា​បានប៉ះ​ពាល់ដល់​សិទ្ធិ​មនុស្ស។

«គាត់​ធ្វើការ​សម្រេច​របស់​គាត់​ ​គឺជា​ជម្រើស​ចុងក្រោយ​ ​ហើយ​ការ​ប្រើ​កម្លាំង​ប្រដាប់​អាវុធ​ ​ដែល​ដាក់​ពង្រាយ​ធ្វើបាប​ ​ដោយ​មិនមាន​សមត្ថ​កិច្ច​ណា​មួយ​ចេញ​មុខ​ដោះស្រាយ​នោះ ​គឺជា​រឿង​មួយ​ដែល​មិន​ចូល​រួម​ចំណែក​ក្នុង​ការ​ផ្តល់​យុត្តិធម៌​ជូន​ប្រជា​ពលរដ្ឋ ​ដែល​បាន​ទទួល​រងគ្រោះ​មួយ​ឆ្នាំ​ហើយ​មួយ​ឆ្នាំ​ទៀត»។

អ្នក​ស្រី​ផៅ យើង​ អាយុ​៣៥​ឆ្នាំ ​ប្រជា​ពលរដ្ឋ​នៅ​ភូមិ​ព្រែកជីក​ ​ ឃុំ​ជីខ​ក្រោម​ ​ស្រុក​ស្រែ​អំបិល​ បាន​និយាយ​ថា​ ​ការ​សម្រេច​ចិត្ត​បិទ​កំណាត់​ផ្លូវជាតិ​លេខ​៤៨​នេះ​ ​គឺ​ដើម្បី​ប្រឆាំង​ជំទាស់​ទៅ​នឹង​ក្រុមហ៊ុន​ហេង ហ៊ុយ ​ដែល​បាន​រំលោភ​យក​ដី​របស់​ប្រជា​ពលរដ្ឋ។

«យើង​បាន​បញ្ជាក់​ពី​គោល​បំណង​ចង់​បាន​ដីធ្លី​ហ្នឹង។​ ​ប្រសិន​បើ​យើង​អត់​ធ្វើ​អញ្ចឹង​ ​គឺ​អត់​មាន​ដំណោះ​ស្រាយ។​ យើង​ទាមទារ​ ​ទីមួយ​សុំ​ឲ្យ​គណៈ​អភិបាល​ខេត្ត​បញ្ឈប់​សកម្ម​ភាព​រាល់ការ​ឈូស​ឆាយ​របស់​លោក​ហេង ហ៊ុយ​ជា​បន្ទាន់​ ​ ហើយ​ទីពីរ​សុំ​ឲ្យ​គណៈ​អភិបាល​ខេត្តចេញ​ប្លង់​ប្រព័ន្ធ ​ជា​ប្លង់​កម្ម​សិទ្ធិ​របស់​ឯកជន​ ​ បុគ្គល​ម្នាក់ៗ​ ​ឲ្យ​បាន​គ្រប់​ចំនួន​៣៤​គ្រួសារ​ហ្នឹង»។

ក្រុម​ហ៊ុន​ហេង ហ៊ុយ​មាន​ផ្ទៃ​ដី​សរុប​ចំនួន​៧៧៩​ហិចតា​សម្រាប់​ធ្វើ​ការ​អភិវឌ្ឍន៍​ដាំ​ដើម​អំពៅ​ ​និង​ដើម​ ដំឡូង​មី​ ​នៅ​ស្រុក​ស្រែ​អំបិល​ ​ខេត្ត​កោះកុង។​ ​ក៏​ប៉ុន្តែ​ការ​អភិវឌ្ឍន៍​នេះ​ត្រូវ​បាន​ប្រជា​ពលរដ្ឋចោទ​ប្រកាន់​ថា​ ​បាន​ប៉ះពាល់​ដល់​សិទ្ធិ​លំនៅ​ដ្ឋាន​របស់​ពួក​គេ​ចំនួន​១០៩​ហិចតា​ ​ដែល​ជា​កម្ម​សិទ្ធិ​របស់​ប្រជា​ពលរដ្ឋ​ ​នៅឃុំ​ជីខ​ក្រោម​ចំនួន​៣១​គ្រួសារ។

លោក​ហេង ​ហ៊ុយ​ ប្រធាន​ក្រុមហ៊ុន​ហេង ហ៊ុយ ​បាន​ចោទ​ប្រកាន់​ថា​ ​ប្រជា​ពលរដ្ឋបាន​ព្យាយាម​រារាំង​ដល់​ការ​អភិវឌ្ឍន៍​របស់​ក្រុមហ៊ុន។​ ​លោក​បាន​និយាយ​ថា​ ​ក្រុមហ៊ុន​លោក​បាន​ទិញ​ដី​ស្រប​ច្បាប់​ ដើម្បី​ដាំ​ដើម​អំពៅ​ ​និង​ដើម​ដំឡូងមី។

កាល​ពី​ថ្ងៃ​ពុធ​ ​ដើម​សប្តាហ៍​នេះ​ ​សន្តិសុខ​របស់​ក្រុមហ៊ុន​ហេង ហ៊ុយ​បាន​ប៉ះ​ទង្គិច​គ្នា​មួយ​ឈុត​ជា​មួយ​នឹង​ប្រជា​ពលរដ្ឋ​ ​នៅ​ក្នុង​ខណៈ​ពេល​ដែល​ក្រុមហ៊ុន​នេះ​បាន​ព្យាយាម​ដឹក​ដំឡូងមី​ទៅដាំ​នៅ​លើ​ដី​របស់​លោក​ហេង ហ៊ុយ​ ​ហើយ​ហេតុ​ការណ៍​នេះ​បាន​ធ្វើ​ឲ្យ​ប្រជា​ពលរដ្ឋ​ចំនួន​ពីរ​នាក់​បាន​ទទួល​រង​របួស។

សម្ព័ន្ធ​អង្គការ​សង្គម​ស៊ីវិល​ ដែល​រួមមាន​គណៈ​កម្មាធិការ​ប្រព្រឹត្តកម្ម​ ​វេទិការ​អង្គការ​មិនមែន​រដ្ឋា​ភិបាលស្តីពី​កម្ពុជា​ ​បាន​ចេញ​សេចក្តី​ថ្លែង​ការណ៍​រួម​មួយ​ ដោយ​បាន​ចោទ​ប្រកាន់​ថា​ សកម្មភាពលោក​ហេង ហ៊ុយ ​ដែល​បាន​ដឹក​នាំ​កម្លាំង​ប្រដាប់​អាវុធ​ទៅ​ឈួស​ឆាយ​ដី​របស់​ប្រជា​ពលរដ្ឋ​ ​និង​វាយដុំ​ទៅ​លើ​ប្រជា​ពលរដ្ឋ​នោះថា​ ជា​ការ​រំលោភ​សិទ្ធិ​មនុស្ស​យ៉ាង​ធ្ងន់ធ្ងរ ​និង​ខុស​ទៅ​នឹង​ច្បាប់​ជាតិ​ទាំង​ស្រុង​ ហើយ​ត្រូវទទួល​ខុស​ត្រូវ​ចំពោះ​មុខ​ច្បាប់៕

XS
SM
MD
LG