ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

អ្នក​សហគមន៍​បឹង​កក់​ស្វះ​ស្វែង​ចង់​ជួប​អគ្គ​លេខាធិការ​សហ​ប្រជាជាតិ


លោក​ Ban Ki-moon ​នឹង​ធ្វើ​ទស្សនកិច្ច​រយៈពេល​ពីរ​ថ្ងៃ​នៅ កម្ពុជា ​ចាប់ផ្តើម​ពី​ថ្ងៃពុធ​នេះ​ ​លោក​នឹង​ជួប​ពិភាក្សា​ជាមួយ​ព្រះមហាក្សត្រ ​នរោត្តម ​សីហមុនី ​និង លោក​នាយក​រដ្ឋមន្ត្រី ​ហ៊ុន សែន​។
លោក​ Ban Ki-moon ​នឹង​ធ្វើ​ទស្សនកិច្ច​រយៈពេល​ពីរ​ថ្ងៃ​នៅ កម្ពុជា ​ចាប់ផ្តើម​ពី​ថ្ងៃពុធ​នេះ​ ​លោក​នឹង​ជួប​ពិភាក្សា​ជាមួយ​ព្រះមហាក្សត្រ ​នរោត្តម ​សីហមុនី ​និង លោក​នាយក​រដ្ឋមន្ត្រី ​ហ៊ុន សែន​។

ភ្នំពេញ៖ អ្នក​ភូមិ​នៅ​ក្នុង​សហគមន៍​បឹងកក់​ បាន​ស្វះ​ស្វែង​រក​ការ​ជួប​ជាមួយ​លោក​ Ban Ki-moon ​អគ្គលេខាធិការអង្គការ​សហ​ប្រជាជាតិ ​ដើម្បី​សម្តែង​ទុក្ខ​កង្វល់ ​និង​ការ​ព្រួយ​បារម្ភ​អំពី​ការ​បណ្តេញ​ចេញ​ដោយ​បង្ខំ ខណៈ​ពេល​ដែល​លោក​មក​បំពេញ​ទស្សនកិច្ច​នៅ​កម្ពុជា​ក្នុង​សប្តាហ៍​នេះ។

នៅ​ថ្ងៃច័ន្ទ​នេះ ​ប្រជា​ពលរដ្ឋ​សហគមន៍​បឹងកក់​ចំនួន​ជាង​១០០​នាក់​ បាន​ប្រមូល​ផ្តុំ​គ្នា​នៅ​ខាង​មុខ​ការិយាល័យ ​UNDP​ ដើម្បី​ស្នើ​សុំ​ជួប​ជាមួយ​លោក​ Ban Ki-moon​ អគ្គ​លេខាធិការ​អង្គការ​សហ​ប្រជាជាតិ​ ឱ្យ​ជួយ​ធ្វើ​អន្តរាគមន៍​ចំពោះ ​ការ​បណ្តេញ​ចេញ​ដោយ​បង្ខំ។

សំណើ​នេះ​ បាន​ធ្វើឡើង​ពីរ​ថ្ងៃ​មុន​ពេល​លោក​ Ban Ki-moon ​នឹង​ធ្វើ​ទស្សនកិច្ច​រយៈពេល​ពីរ​ថ្ងៃ​នៅ​កម្ពុជា ​ចាប់ផ្តើម​ពី​ថ្ងៃពុធ​នេះ​ ដែល​លោក​នឹង​ជួប​ពិភាក្សា​ជាមួយ​ព្រះមហាក្សត្រ ​នរោត្តម ​សីហមុនី ​និង​លោក​នាយក​រដ្ឋមន្ត្រី ​ហ៊ុន សែន​។

ប្រជា​ពលរដ្ឋ​នៅ​ក្នុង​សហគមន៍​បឹងកក់ ​បាន​បញ្ជាក់​នៅ​ក្នុង​ញត្តិ​ជូន​លោក​អគ្គ​លេខាធិការ​ Ban Ki-moon ថា​ ប្រជា​ពលរដ្ឋ​ចំនួន​៣.២០០​គ្រួសារ​នៅ​ក្នុង​សហគមន៍​បឹងកក់​ស្នើ​សុំ​ឯកឧត្តម​ជួយ​អន្តរាគមន៍​ទៅ​លោក​នាយករដ្ឋមន្ត្រី ​ហ៊ុន សែន​ ឱ្យ​បញ្ឈប់​ការ​បណ្តេញប្រជាពលរដ្ឋ​ចេញ​ពី​លំនៅដ្ឋាន​ និង​ដីធ្លី​ដោយ​បំពាន។

ញត្តិនេះ​ បាន​អំពាវនាវ​ដល់​លោក​អគ្គ​លេខាធិការ​អង្គការ​សហ​ប្រជាជាតិ​ឲ្យ​ជួយ​អន្តរាគមន៍​ជា​បន្ទាន់​ដល់​រាជ​រដ្ឋាភិបាល​កម្ពុជា ​ដើម្បី​ពង្រឹង​ច្បាប់​អន្តរជាតិ​នានា ​ជា​ពិសេស​សន្ធិ​សញ្ញា​ស្តី​ពី​សិទ្ធិ​សេដ្ឋកិច្ច ​សង្គមកិច្ច ​និង​វប្បធម៌ ​ព្រម​ទាំង​អនុសាសន៍​រួម​ស្តីពី​សិទ្ធិ​លំនៅដ្ឋាន​ និង​ការ​បណ្តេញ​ចេញ​ដោយ​បង្ខំ។

មន្ត្រី​អង្គការ​ UNDP ​បាន​ទទួល​យក​សំណើ​របស់​ប្រជាពលរដ្ឋ​សហគមន៍​បឹងកក់​និង​បាន​ថ្លែង​ថា ​សំណើ​នេះ​ នឹង​បញ្ចូន​ទៅ​ការិយាល័យ​របស់​លោក​ Ban Ki-moon។

អ្នក​ស្រី​ គង់ ចាន់ថា​ អាយុ​៤២​ឆ្នាំ​ រស់​នៅ​ក្នុង​ភូមិ ​២៤ ​នៃ​សហគមន៍​បឹងកក់​ បាន​បញ្ជាក់​ថា ​ប្រជា​ពលរដ្ឋ​ ទាំង​អស់​ចង់​ជួប​ជាមួយ​លោក​ Ban Ki-moon ​ឲ្យជួយ​រក​យុត្តិធម៌​ជូន​ប្រជា​ពលរដ្ឋ​បឹងកក់​ ដែល​រងគ្រោះ​ពី​ការ​បណ្តេញ​ចេញ​ដោយ​បង្ខំ។

«ខ្ញុំ​យក​ញាត្តិ​មក​ដាក់​នេះ​ មាន​គោលបំណង​ (ពួក​ខ្ញុំ​មាន​គំរាម​គំហែង​ការ​បណ្តេញ​ចេញ​ពី​មូលដ្ឋាន) សំណូមពរ​ឱ្យ​ឯកឧត្តម ​Ban Kimoon​ ជួយ​រក​យុត្តិធម៌​ឱ្យ​ពួកខ្ញុំ»។

អ្នកស្រី​ អ៊ឹង ណាវី ​អាយុ​៤៣​ឆ្នាំ ​រស់​នៅ​ក្នុង​ភូមិ​២៤​នៃ​សហគមន៍​បឹងកក់​ បាន​បញ្ជាក់​ថា ​ប្រជាពលរដ្ឋ​ នៅ​សហគមន៍​បឹងកក់​កំពុង​តែ​ជួប​ប្រទះ​នូវ​ការ​រងគ្រោះ​ និង​ការ​បណ្តេញ​ចេញព្រម​ទាំង​ចង់​ជួប​ជាមួយ​ លោក ​Ban Ki-moon​ ដើម្បី​ឱ្យ​លោក​ជួយ​ប្រជា​ពលរដ្ឋ​ទាំង​អស់ឱ្យ​រួចផុត​ពីការ​បណ្តេញ​ចេញ​ដោយ​បង្ខំ។

«ខ្ញុំ​នឹង​មាន​លទ្ធភាព​ជួប​ជាមួយ​លោក​អគ្គ​លេខាធិការ​ Ban Ki-moon ​ផ្ទាល់​តែម្តង​ ដើម្បី​ផ្តល់​ឯកសារ​ មួយ​ចំនួន​ជូន​លោក​ និង​រៀបរាប់​ប្រាប់​លោក​អំពី​បញ្ហា​ដែល​ខ្ញុំ​ប្រឈម​មុននឹង​ទុក្ខ​វេទនា​ ត្រូវ​បាន​គេ​រំលោភ​បំពាន​ និង​ការបណ្តេញ​ចេញ​ពី​ដី​លំនៅ​ដ្ឋាន​របស់​ពួក​ខ្ញុំ»។

ប្រជា​ពលរដ្ឋ​ បាន​លើក​បដា​ដោយ​បញ្ជាក់​ថា ប្រជា​ពលរដ្ឋ​នៅ​សហគមន៍​បឹងកក់​ស្ថិត​នៅ​ក្រោម​ការ​គំរាម​គំហែង​ទាមទារ​សុំ​ជួប​ជាមួយ​លោក​ Ban Ki-moon។

បដា​នេះ ​បាន​បន្ថែម​ថា​ សូម​លោក​ជួយ​ធ្វើ​អន្តរាគមន៍​ទៅ​លោក​សម្តេច​នាយក​រដ្ឋមន្ត្រី ​ហ៊ុន សែន ​ឱ្យបញ្ឈប់​ការ​បណ្តេញ​ និង​បញ្ឈប់​ការ​បណ្តេញ​ចេញ​ដោយ​បង្ខំ​ពី​ផ្ទះ​សម្បែង។

លោក​ Ban Ki-moon​ អគ្គ​លេខាធិការ​អង្គការ​សហប្រជាជាតិ​នឹង​មក​ធ្វើ​ទស្សនកិច្ច​នៅ​កម្ពុជា​នៅ​ថ្ងៃពុធ​ ដើម្បី​ជួប​ជាមួយ​ព្រះមហាក្សត្រ​ នរោត្តម​ សីហមុនី ​និង​លោក​នាយករដ្ឋមន្ត្រី​ហ៊ុន សែន។

នៅ​ក្នុង​អំឡុង​ពេល​ទស្សនកិច្ច​នេះ​ លោក​នឹង​ទស្សនា​សាលាក្តី​ខ្មែរ​ក្រហម​ សារៈមន្ទីរ​ប្រល័យ​ពូជ​ សាសន៍​ទួលស្លែង ​និង​មន្ទីរទេព្យ​មិត្តភាព​កម្ពុជា-សូរៀត ​នេះ​បើ​យោង​តាម​សេចក្តី​ថ្លែងការណ៍៕

XS
SM
MD
LG