ភ្ជាប់​ទៅ​គេហទំព័រ​ទាក់ទង

អ្នកភូមិបឹងកក់​តវ៉ា​មួយ​សប្តាហ៍​នៅ​ទីលាន​ប្រជាធិបតេយ្យ


ក្មេងៗ​អង្គុយ​លើ​ដំបូល​​ផ្ទះ​ដែល​លិច​ទឹក​ ក្នុង​តំបន់​បឹងកក់។

ភ្នំពេញ៖ អ្នកភូមិ​បឹងកក់​បាន​បន្ដ​ការតស៊ូ​របស់​ខ្លួន​ទៀត​នៅ​ថ្ងៃច័ន្ទ​នេះ ​ដើម្បី​ស្វែងរក​ការដោះស្រាយមួយ​សមស្រប​សម្រាប់​ការបណ្ដេញ​ពួកគេ​ចេញពី​លំនៅដ្ឋាន។ ពួកគាត់​បាន​ចាប់ផ្ដើម​ធ្វើការ​តវ៉ារយៈ​ពេល​មួយសប្ដាហ៍​ដោយ​ទាមទារ​ឲ្យ​មានការ​ចរចា​ឡើង​វិញជាមួយ​ក្រុមហ៊ុន ​ស៊ូកាគូ អ៊ីន ​ដែល​ជា​ក្រុមហ៊ុនវិនិយោគ​និង​អភិវឌ្ឍន៍​តំបន់​បឹងកក់នេះ។

ការតវ៉ា​នេះ​ធ្វើឡើង​ដោយ​អ្នកភូមិ​ប្រមាណ​២០០នាក់​នៃ​តំបន់​បឹងកក់​ ទីដែល​មា​ន​ទំនាស់​ដ៏​ល្បីល្បាញ​ដោយ​បាន​ប្រមូល​ផ្តុំ​គ្នា​ធ្វើការ​តវ៉ា​ជាលើក​ដំបូង​នៅលើ​ទីលាន​ប្រជាធិបតេយ្យ​ក្រុងភ្នំពេញ។

ក្រុមហ៊ុន​ ស៊ូកាគូ អ៊ីន ​ទទួល​សិទ្ធិ​វិនិយោគ​នៅ​តំបន់​បឹងកក់​ដែល​មាន​ទំហំ​សរុប​១៣៣​ហិកតា​ដើម្បី​អភិវឌ្ឍ​តំបន់​ស្រូបទឹក​ជំនន់​ដ៏​ធំ​របស់​ក្រុង​ភ្នំពេញ​នេះ​ឲ្យ​ទៅ​ជា​មណ្ឌល​ពាណិជ្ជកម្ម​និង​សំណង់​ទំនើប។

ប្រជា​ពលរដ្ឋ​ចំនួន​ជាង​៤.០០០​គ្រួសារ​តម្រូវឲ្យ​ចាកចេញ​ពី​តំបន់​ដែល​ពួកគេ​កំពុង​រស់នៅ​ដោយផ្តល់​សំណង​ដែល​ពួកគេ​អះអាង​ថា​មិន​សមស្រប​ទៅតាម​តម្លៃ​ទីផ្សារ​នោះ​ទេ។

ការតវ៉ា​នឹង​ត្រូវ​អូស​បន្លាយ​រយៈពេល​ពេញ​មួយ​សប្តាហ៍​នេះ​ដើម្បី​ស្វែងរក​ដំណោះស្រាយ​មួយ​សមរម្យ​ដែល​ក្រុម​ប្រជាពលរដ្ឋ​ចង់​ឲ្យ​ក្រុមហ៊ុន​ទិញដី​របស់​ពួកគេ​នៅក្នុង​តម្លៃ​១.៥០០​ដុល្លារ​ក្នុងមួយ​ម៉ែត្រ​ការ៉េ​ ឬ​ក៏​ត្រូវ​ផ្តល់​ឲ្យ​ពួកគេ​នូវ​ដី​ទំហំ​១៥ហិកតា​សម្រាប់​ចែកគ្នា​រស់នៅ​ដើម្បី​ជៀស​វាង​ការចាកចេញ​ពី​តំបន់​ជម្លោះនេះ។

អ្នកស្រី​សំ វណ្ណា តំណាង​សហគមន៍​បឹងកក់​មួយ​បាន​និយាយ​ទៅកាន់​ក្រុម​អ្នកយកព័ត៌មាន​ដោយ​ទទូច ឲ្យ​មាន​ការចរចា​រកដំណោះស្រាយ​សម្រាប់​ក្រុម​ប្រជាពលរដ្ឋ។

«សូម​ឲ្យ​គាត់​ចុះ​មក​ចរចា​ជាមួយ​ប្រជាពលរដ្ឋ​យើង​ក្នុង​តំបន់​បឹងកក់។ ចំណុច​ទីមួយ​បើសិន​ជា​គាត់​មិន ចរចា​តម្លៃ​ក្នុង​មួយម៉ែត្រ​ក្រឡា ​១.៥០០ ​ដុល្លារទេ ​ពួកយើង​ខ្ញុំ​នឹង​សុំ១៥ ​ហិកតា ​ដើម្បី​ធ្វើការ​អភិ​វឌ្ឈន៍ ដោយ​ខ្លួនឯង។ យើង​ខ្ញុំ​នឹង​សុខចិត្ត​ស្លាប់​នៅ​ក្នុង​តំបន់​បឹងកក់​នេះ​តែម្ដង»។

តំបន់​បឹងកក់​មាន​ភូមិ​ចំនួន​ប្រាំពីរ ​ប្រជាពលរដ្ឋ​ប្រមាណ​ជា២.០០០គ្រួសារ​នៅក្នុង​ចំណោម​ជាង ៤.០០០​គ្រួសារ​បាន​យល់ព្រម​ចាកចេញ​ថ្វីបើ​ពួកគេ​អះអាង​ថា​សំណង​សម្រាប់​ពួកគេ​មិនបាន​សមរម្យ​គឺ​ពួកគេ​ទទួល​បាន​ផ្ទះល្វែង​ទំហំ​ បួន គុណ​នឹង​ដប់ពីរ​ម៉ែត្រ​ ឬក៏​ទទួល​បាន​ជាប្រាក់​សំណង​ចំនួន​៨.០០០ និង​ ២.០០០.០០០រៀល ​។

ក្រុម​អ្នកភូមិ​ដែល​ក្រាញ​ននៀល​បាន​លើកឡើង​ថា​ពួកគេ​ចង់​បន្ត​រស់នៅ​ទីនេះ​ដោយសារ​តែ​ទីតាំង​ថ្មី​មាន​ចម្ងាយ​រហូត​ទៅដល់​ជាង​២០​គីឡូម៉ែត្រ​ពី​ទីតាំង​សព្វថ្ងៃ។

អ្នកភូមិ​លើកឡើង​ថា​ទីតាំង​ថ្មី​ពុំមាន​សាលារៀន ​គ្មាន​មន្ទីរពេទ្យ​និង​ធ្វើឲ្យ​ពួកគេ​ពិបាក​និង​ស្វែងរក​មុខរបប​សម្រាប់​ចិញ្ចឹមជីវិត។

ក្រម​អ្នកតវ៉ា​បាន​ស្រែក​ដាក់​ឧបករណ៍​បំពង​សំឡេង​ស្វែងរក​ជំនួយ​ពី​លោក​នាយក​រដ្ឋមន្រ្តី​ហ៊ុន សែន ​ដែល​នេះ​ គឺជា​ការដង្ហោយ​ហៅ​ដោយ​ពុំមាន​ការធ្វើ​អន្តរាគមន៍​ណាមួយ​នោះទេ។ ពួកគេ​អំពាវនាវ​ស្វែងរក​ជំនួយ​ពី​អតីត​ព្រះមហាក្សត្រ​នរោត្តម​ សីហនុ ​និង​មេដឹកនាំ​ពី​បណ្តា​ប្រទេស​មួយ​ចំនួន​ ដូចជា ​សហរដ្ឋអាមេរិក ​ជប៉ុន ​វៀតណាម​ ចិន​ និង​ប្រទេស​មួយ​ចំនួន​ទៀត​ដើម្បី​ជួយ​ដល់​ពួកគេ​តាម​រយៈ​ការលើក​ត្រដាង​ទង់ជាតិ​នៃ​ប្រទេស​ទាំងនោះ។

លោក​ប៉ា សុជាតិវង្ស អភិបាល​រង​ក្រុងភ្នំពេញ ​ដែល​ទទួល​បន្ទុក​កិច្ចការ​នេះ​ មិនអាច​ទាក់ទង​សុំសេចក្តី​បំភ្លឺ​បាន​ទេ។​ដោយឡែក​លោក​ឡៅ វ៉ាន់​ ដែល​ជា​នាយក​ប្រតិបត្តិ​ក្រុមហ៊ុន ​ស៊ូកាគូ អ៊ីន ​មាន​ប្រសាសន៍ថា​ នេះ​ជាការ​ទូរស័ព្ទ​ច្រឡំ​លេខ។

ប្រជាពលរដ្ឋ​នៅ​តំបន់​បឹងកក់​បាន​លើក​ឡើង​ថា​ ពួកគេ​នឹង​ព្យាយាម​ស្វែងរក​ការចរចា​ជាមួយ​ក្រុមហ៊ុន ​និង​រដ្ឋាភិបាល​ដើម្បី​ដោះស្រាយ​បញ្ហា​បណ្តេញ​ចេញនេះ​និង​ដើម្បី​ទទួល​បាន​ការអភិវឌ្ឍ​មួយ​នៅ​ហ្នឹង​កន្លែង។

ក៏​ប៉ុន្តែ​លោក​អ៊ុច ឡេង​ មន្រ្តី​កម្មវិធី​ដីធ្លី​របស់​អង្គការ​ការពារ​សិទ្ធិមនុស្ស​ADHOC​ អះអាង​ថា លោក​មិនមាន​ជំនឿថា​ ក្រុមហ៊ុន ​និងរដ្ឋាភិបាល ​នឹង​ធ្វើអន្តរាគមន៍​សម្រាប់​ដោះស្រាយ​បញ្ហានេះ​ទេ។

យោងតាម​របាយការណ៍​ប្រចាំ​ឆ្នាំ២០១០​ស្តី​អំពី​បញ្ហា​ដីធ្លី​របស់​អង្គការ​ADHOC ​បង្ហាញថា​ប្រជាពលរដ្ឋ​ជិត​៣០.០០០គ្រួសារ ​បាន​ទទួល​រងគ្រោះ​ដោយសារ​តែ​ទំនាស់​ដីធ្លី​នៅ​ទូទាំង​ប្រទេស​កម្ពុជា៕

XS
SM
MD
LG