ភ្ជាប់​ទៅ​គេហទំព័រ​ទាក់ទង

ក្រុម​អ្នកវិភាគ៖ ព្រះមហាក្សត្រ​ជាច្រក​តែមួយគត់​សម្រាប់​លើកលែង​ទោស​ជន​ជាតិថៃ​៧នាក់

  • សុខ ខេមរា

តំណាង​​រាស្ត្រ​ថៃ​​ ​Panich Vikitsreth​ ​និង ​​មេ​ដឹក​នាំ​​ក្រុម​​អាវ​លឿង ​Veera​ Somkwamkid​ ​​ដែល​ត្រូវ​ចាប់ឃុំ​ខ្លួន​ក្នុង​ ប្រទេស​កម្ពុជា​រង់ចាំ​ការ​កាត់​ទោស។

ភ្នំពេញ៖ លោកនាយក​រដ្ឋមន្ត្រី ​ហ៊ុន សែន​បាន​មាន​ប្រសាសន៍​ទាក់​ទង​នឹង​ការ​ចាប់​ខ្លួន​ជន​ជាតិ​ថៃ​ឆ្លង​ដែន​ប្រាំពីរនាក់​ថា៖ «គ្មាន​នរណា​មួយ​មក​អាច​ធ្វើ​អន្តរាគមន៍​បានទេ។​ រឿងនេះ​ជា​រឿង​តុលាការ​ហើយ ​បន្ទាប់​ពីនោះ​ចាំ​និយាយ​គ្នា​ទៀត​ ប៉ុន្តែ​ច្បាប់​គឺ​ច្បាប់។​ តុលាការ​គឺ​តុលាការ។​ មិន​ អាច​រដ្ឋាភិបាល​ទៅ​បង្គាប់​បញ្ជា​អញ្ចេះ​អញ្ចុះ​សម្រួល​គ្នា​ជា​នយោបាយ​អញ្ចេះ​ដើម្បី​បង្គាប់​តុលាការ​អញ្ចុះ​គឺ​អត់​ទេ»។

ទោះបី​លោក​នាយក​រដ្ឋមន្ត្រី​ហ៊ុន​ សែន​នៃ​ប្រទេស​កម្ពុជា​បាន​ថ្លែង​យ៉ាង​ដូច្នេះ ដោយ​ទំនង​ជា​បិទ​ផ្លូវ​អន្តរាគមន៍​មួយ​អន្លើ​ចំពោះ​ការ​ដោះ​លែង​ជន​ជាតិ​ថៃ​៧ នាក់​ដែល​ត្រូវ​ចាប់​ខ្លួន​ពី​បទ​លបឆ្លង​ដែន​ខុស​ច្បាប់​ក៏​ពិតមែន​ តែ​ក្រុម​អ្នក​វិភាគ ក្នុង​ប្រទេស​កម្ពុជា​សម្លឹង​ឃើញថា​ការ​លើក​លែង​ទោស​ដោយ​ព្រះ​មហាក្សត្រ ខ្មែរ​តាមរយៈ​សំណើរ​ នាយក​រដ្ឋមន្ត្រី​ខ្មែរ​ក្រោយ​ ពេល​តុលាការ​កាត់​ទោស​អាច ជា​ច្រក​ផ្លូវមួយ​ដែល​អាច​មាន​ការ​ចរចា​គ្នា​រវាង​ប្រទេស​ទាំងពីរ​ជា​ថ្មី។

នាយក​រដ្ឋមន្ត្រី​ថៃ​លោក​ អាប់ភីស៊ីត​ វីចាជីវ៉ា​បាន​ទទូច​ឱ្យ​កម្ពុជា​ដោះលែង​ជនជាតិ​ថៃ​៧នាក់​មាន​តំណាងរាស្រ្ត​ថៃ​ម្នាក់​ទទួល​បន្ទុក​កិច្ចការ​ព្រំដែន​គឺ​លោក ផានីច​ វីគិតស្រេត ​ដែល​ត្រូវ​ចាប់ខ្លួន​កាល​ពី​ថ្ងៃ​២៩​ធ្នូ​ក្រោយ​ពី​បាន​ចូលមក​ក្នុង ទឹកដី​កម្ពុជា​ខុសច្បាប់​ក្នុង​ស្រុក​អូរជ្រៅ​ខេត្ត​បន្ទាយ​មានជ័យ។​ តែ​អន្តរាគមន៍ ទាំងឡាយ​រាប់ទាំង​ទស្សនកិច្ច​របស់​រដ្ឋមន្ត្រី​ការ​បរទេស​ថៃ ​កាសិត ភីរម្យ​ ផង​ត្រូវ​បរាជ័យ​ដោយ​សារ​មេដឹកនាំ​កម្ពុជា​អះអាង​ថា​រឿងក្តី​នេះ​ត្រូវ​សម្រេច​ដោយ តុលាការ។

លោក ​បណ្ឌិត​ រស់ ​ចន្ត្រាបុត្រ​ នៃ​រាជបណ្ឌិត​សភា​កម្ពុជា​និង​ជា​អ្នកប្រវត្តិសាស្រ្ត​ខ្មែរ​មួយរូប​បាន​អះអាង​ថា​ ការ​ចរចា​ពី​រឿង​ដោះលែង​ជនជាតិ​ថៃ​ ឬ​ដើម្បី​ភ្ជាប់​ទំនាក់​ទំនង​ជា​ធម្មតា​ឡើង​វិញ​រវាង​ប្រទេស​ទាំងពីរ ​អាច​ធ្វើ​ទៅបាន​សម្រេច ទំនង​ជា​ក្រោយ​ពេល​ដែល​តុលាការ​កាត់​ទោស​រួច។

«តាម​ទស្សនៈ​ខ្ញុំ​គឺ​ថា​ ដំណាក់​កាល​ទីមួយ​ត្រូវ​តែ​ឆ្លងកាត់​តុលាការ។​តុលាការ កាត់ទោស​ហើយ​ នៅ​ពេលនោះ​ហើយ​ដែល​តាម​សេចក្តីស្នើ ​ដើម្បី​គេ​ហៅ​ថា មិត្តភាព​នៃ​ប្រទេស​ទាំងពីរ​ហ្នឹង​គឺ​សម្តេច​តេជោ​ហ៊ុន សែន​លោក ​ជា​នាយក រដ្ឋមន្ត្រី​ លោក​នឹង​ធ្វើការ​ស្នើសុំ​ដើម្បី​ស្នើសុំ​ព្រះមហាក្សត្រ​ ដើម្បី​សុំឱ្យ​លោក លើកលែង​ទោស​ឱ្យ​រួច​ខ្លួន​ទៅ​វិញ»។

លោក ​បណ្ឌិត​ ​សុខ ទូច​ សាកល​វិទ្យាធិការ​នៃ​សាកល​វិទ្យាល័យ​ខេមរៈ​ បានអះ អាង ​ដែរថា​កម្ពុជា​គួរ​បញ្ចប់​ការកាត់ទោស​ជនជាតិ​ថៃ​ជា​មុន​តាម​ផ្លូវ​តុលាការ​ មុន នឹង​បើក​កិច្ច​ចរចា​ការទូត​ណាមួយ​ទាក់ទង​នឹង​ការ​លើក​លែង​ទោស។

«ប៉ុន្តែ​កម្ពុជា​ក៏​គួរ​បង្ហាញ​អំពី​ឆន្ទៈ​របស់ខ្លួន​ដោយយក​ប្រព័ន្ធ​តុលាការ​ដើរ​ដោយ សុក្រិតភាព​ ក្រោយមក​សុំ​យើង​បើក​កិច្ច​ចរចា​ក្នុង​ភាព​នយោបាយ​ការទូត​ ដែល យើងដឹង​ហើយថា​ព្រះករុណា​ លោក​មាន​រាជានុសិទ្ធិ​លើកលែង​ទោស»។

អ្នកវិភាគ​ទាំងពីរ​បាន​អះអាង​ថា​ការ​ចាប់ខ្លួន​មក​ជម្រះទោស​គឺ​ជា​ការ​អនុវត្ត​ច្បាប់។ អ្នក​វិភាគ​ទាំងពីរ​បាន​រិះគន់​ដល់​អាជ្ញាធរ​ ថៃ​ថា​មិនបាន​ប្រើ​ប្រព័ន្ធ​ តុលាការ​ដូច​កម្ពុជា​ទេ​ តែ​បាន​ប្រើប្រាស់​អាវុធ​បាញ់​សម្លាប់​ពលរដ្ឋ​ខ្មែរ​ជារឿយៗ​នៅ​ពេល​គេ​ឆ្លងដែន​ទោះ​ខុស​ច្បាប់​ក្តី»។

ក្រុម​អ្នក​វិភាគខ្លះ​ទៀត​និយាយ​ថា​ការចាប់​ខ្លួន​ជនជាតិ​ថៃ​ប្រាំពីរ​នាក់​អាច​ជា​ការ​ព្រមាន​ដល់​ជនជាតិ​ថៃ​មួយ​ចំនួន​ដែល​ប៉ុនប៉ង​ប្រមូល​ផ្តុំ​ធ្វើការ​តវ៉ា​នៅតាម​ព្រំដែន​ជា​ពិសេស​ពេល​កម្ពុជា​ប៉ុនប៉ង​បើក​ច្រក​ព្រះវិហារ​ឡើងវិញ​កាលពី​ខែ​មុន។ គេ​បាន​រាយការណ៍​មក​ដែរ​ថា ​ភាគីថៃ​បរាជ័យ​ក្នុងការ​ទាមទារ​ឱ្យ​កម្ពុជា​យល់ព្រម​លើការ​គ្រប់គ្រង​រួមលើ​ផ្ទៃដី​ប្រទាញ​ ប្រទង់​នៅ​ក្បែរ​តំបន់​ប្រាសាទ​ ព្រះវិហារ។

ទោះ​ជា​យ៉ាងណា​ក៏​ដោយ​អ្នកវិភាគ​ខ្លះទៀត​និយាយ​ថា​ការ​ចាប់ខ្លួន​សមាជិក សភា​ថៃ​ម្នាក់នេះ​អាច​ឱ្យ​សភាថៃ​មាន​លេស​ពន្យា​ពេល​កាន់​តែយូរ​ទៀត​ក្នុង​ការ​ផ្តល់​សច្ចាប័ន​យល់ព្រម​លើ​ឯកសា​រព្រំដែន​ចំនួន​៣​រវាង​គណៈកម្មាការ​ចម្រុះ​ព្រំ ដែន​នៃ​ប្រទេស​ទាំងពីរ ​ដើម្បី​កំណត់​ខ្សែ​បន្ទាត់​ព្រំដែន​និង​បញ្ចប់​ការ​បោះ បង្គោល​ ព្រំដែន​ដែលមាន​ជម្លោះ​ជាច្រើន​ទសវត្សរ៍​មក​ហើយ​នោះ។

លោក ​រស់​ ចន្ត្រាបុត្រ​ និង​លោក ​សុខ ទូច​បាន​ចាត់​ទុកថា​ ករណី​ វិវាទ​ ព្រំដែន​រវាង​ថៃ​និង​កម្ពុជា​គឺ​ជា​ចំណាប់​ខ្មាំង​នយោបាយ ​របស់​អ្នក​នយោបាយ​ ថៃ ឬ​រវាង​ក្រុម​អាវ​លឿង​និង​ក្រុម​អាវ​ក្រហម​ដែល​យក​ បញ្ហា​ព្រំដែន​ជា​ការ​ឃោសនា យក​ការ​ចំណេញ​នយោបាយ​មុនការ​បោះឆ្នោត​ ជា​សកល​នៅ​ចុងឆ្នាំ​នេះ​ទៅ ​វិញ។

លោក​ រស់ ​ចន្ត្រាបុត្រ​ និង​លោក ​សុខ ទូច​ពុំ​បាន​បង្ហាញ​ជំនឿ​ថា​ទំនាក់​ទំនង ប្រទេស​ទាំងពីរ​ នឹង​រងផល​ប៉ះពាល់​ ដោយសារ​ករណី​ជនជាតិ​ថៃ​ ទាំង​ប្រាំពីរ នាក់​នេះ​ទេ ​ដោយ​បាន​បញ្ជាក់​ដូច​លោក​នាយក​រដ្ឋមន្ត្រី​ហ៊ុន សែន​ដែរ​ថា ​រឿង ជនជាតិ​ថៃ​៧នាក់​នេះ​គឺ​ជា​រឿង​នៃ​ក្រុម​មួយ​និង​ជា​រឿង​បុគ្គល។

លោក ​នាយក​រដ្ឋមន្ត្រី ​ហ៊ុន សែន​បាន​ព្រមាន​ថា​ រឿង​ជនជាតិ​ថៃ​៧នាក់​នេះ​ មិន គួរ​នាំ​ឱ្យ​ខូច​ទំនាក់​ទំនង​រវាង​ប្រទេស​ទាំងពីរ​ទេ។

«ខ្ញុំ​មិន​ធ្វើ​សេចក្តី​ថ្លែងការណ៍​ណាមួយ​ដែល​ជះឥទ្ធិពល​ដល់ការ​កាត់ក្តី​របស់​តុលាការ​ទេ សុំ​មេត្តា​យោគ​យល់ ​ហើយ​ក៏​សុំ​កុំ​ឱ្យ​មាន​បញ្ហាអី​ដល់​ទំនាក់​ ទំនង​ផ្សេង​ទៀត​។ ​រឿងនេះ​គឺ​ជា​រឿង​បុគ្គល​ដែល​បំពាន​តែ​ប៉ុណ្ណោះ»។

ស្ថានការណ៍​យោធា​ខ្មែរ-ថៃ​និង​ ទំនាក់​ទំនង​ ការទូត​ពុំ​ត្រូវ​គេ​ឃើញ​ថា​ មាន​ការ តាន​តឹង​ ឬ​ប្រែប្រួល​ ធ្ងន់ធ្ងរ​នៅ​ឡើយ​ទេ។

ឧត្តមសេនីយ៍​ ជាន់ខ្ពស់​មួយ​រូប​ប្រចាំការ​នៅ​ជួរមុខ​បាន​អះអាង​ ប្រាប់​វីអូអេ​ថា បញ្ហា​យោធា​ មាន​ការ​មិនចុះ​សម្រុង​គ្នា​តិចតួច​ប៉ុន្មាន​ថ្ងៃ​ចុងក្រោយ​នេះ​ ដោយ សារ​យោធា​កម្ពុជា​មិន​អនុញ្ញាត​ឱ្យ​ទាហាន​ថៃ​នាំ​អ្នកកាសែត​ចូលមក​ថត​រូបភាព ក្នុង​ទឹកដី​កម្ពុជា​នៅ​តំបន់​វត្ត​មួយ​កន្លែង​ក្បែរ​ប្រាសាទ​ព្រះវិហារ​ ហើយ​ស្ថានភាព​ប្រុង​ប្រយ័ត្ន​ផ្នែក​យោធា​មាន​សភាព​ខ្ពស់​ជាង​មុន៕

XS
SM
MD
LG