សាលាក្ដីខ្មែរក្រហមគ្រោងនឹងប្រកាសសាលក្រម ដែលនឹងកំណត់ពីការដាក់ទោស ឌុច នៅក្នុងរយៈពេលពីរខែទៀត។ ឌុចត្រូវកាត់ទោសដោយអង្គជំនុំជម្រះសាលាដំបូង កាលពីខែវិច្ឆិកា ឆ្នាំមុន។
លោក គង់ សុឋានរិទ្ធ រាយការណ៍ជូនពីទីក្រុង ភ្នំពេញដូចតទៅ៖
ការកំណត់ពីការដាក់ទោស ឌុច ដែលគេកំពុងរង់ចាំបំផុតនោះ នឹងត្រូវប្រកាសជាសាធារណៈ ក្នុងពេលឆាប់ៗនេះ។ អង្គជំនុំជម្រះសាលាដំបូងរបស់សាលាក្ដីខ្មែរក្រហម បានកំណត់នៅថ្ងៃច័ន្ទនេះថា ការប្រកាសសាលក្រមក្នុងការកាត់ទោស អតីតប្រធានគុកទួលស្លែងដ៏ទារុណកម្មរូបនេះ នឹងធ្វើឡើងនៅថ្ងៃទី២៦ ខែកក្កដា គឺនៅក្នុងរយៈពេលពីរខែទៀត។
កាំង ហ្គិចអ៊ាវ ហៅ ឌុច អាយុ៦៧ឆ្នាំ ត្រូវបានចោទប្រកាន់ក្នុងសំណុំរឿងលេខ០០១ពីបទឧក្រិដ្ឋ កម្មសង្រ្គាម ឧក្រិដ្ឋកម្មប្រឆាំងមនុស្សជាតិ ឧក្រិដ្ឋកម្មនៃការធ្វើទារុណកម្ម និងមនុស្សឃាត ដែលទាក់ទងទៅនឹងការធ្វើទារុណកម្ម និងការសម្លាប់អ្នកទោសយ៉ាងតិចចំនួន១២៣៧៣នាក់។ ឌុច ត្រូវកាត់ទោសអស់រយៈពេលចំនួន៧៧ថ្ងៃ ចាប់តាំងពីខែមិនាមកម៉្លេះ។
លោក ឡាស អលសិន មន្រ្ដីផ្នែកទំនាក់ទំនងកិច្ចការច្បាប់របស់សាលាក្ដីខ្មែរក្រហមមានប្រសាសន៍ថា ពេលម៉ោងជាក់លាក់នៃការប្រកាសសាលក្រមឌុចនោះ មិនទាន់ត្រូវបានកំណត់នៅឡើយ ហើយក្នុងពេលនេះ អង្គជំនុំជម្រះសាលាដំបូងកំពុងធ្វើកិច្ចការបញ្ចប់លើសាលក្រមឌុច។
“យើងកំពុងធ្វើការបញ្ចប់នូវអ្វីៗទាំងអស់ ប៉ុន្ដែយើងរំពឹងថា រហូតដល់ថ្ងៃទី២៦ ខែកក្កដា អ្វីៗនឹងរៀបរយជា ស្រេច ដើម្បីប្រកាសសាលក្រមបាន"។
ដូច្នេះការប្រកាសសាលក្រម ឌុច នឹងត្រូវប្រព្រឹត្តទៅ ៨ខែ ក្រោយពីការកាត់ទោស។ លោក រាជ សម្បត្តិ ប្រធានផ្នែកទំនាក់ទំនងកិច្ចការសាធារណៈរបស់សាលាក្ដីខ្មែរក្រហម មានប្រសាសន៍ថា អង្គជំនុំជម្រះសាលាដំបូងត្រូវការពេលវេលាដើម្បីឲ្យសាលក្រម ដែលកំណត់ទោសឌុចនោះ នឹងអាច ទទួលយកបានពីគ្រប់ភាគីទាំងអស់។ ហើយគម្រោងការនៃការប្រកាសសាលក្រម ឌុច នេះនឹង ក្លាយជាដំណឹងល្អមួយសម្រាប់ជនរងគ្រោះ ដោយរបបខ្មែរក្រហម។
“កិច្ចការនេះ គឺជាកិច្ចការប្រវត្តិសាស្រ្ដ ដែលទាមទារឲ្យមានពេលវេលាគ្រប់គ្រាន់ដើម្បីធ្វើការហ្នឹងឲ្យ គេទទួលស្គាល់។ ដោយឡែក យើងយល់ថា ព័ត៌មានដែលចេញផ្សាយនៅថ្ងៃនេះ ទាក់ទងនឹងកាល បរិច្ឆេទហ្នឹង វានឹងអាចធ្វើឲ្យមនុស្សជាច្រើនដែលបានរង់ចាំព័ត៌មានហ្នឹងនឹងមានសេចក្ដីសប្បាយ រីករាយ "។
ឌុចគឺជាអតីតអ្នកទទួលខុសត្រូវជាន់ខ្ពស់របស់ពួកខ្មែរក្រហមម្នាក់ដែលត្រូវកាត់ទោសមុនគេ ក្នុងចំ ណោមជនសង្ស័យចំនួន៥នាក់ ដែលត្រូវចាប់ខ្លួនទាក់ទងនឹងការបង្កឲ្យប្រជាជនខ្មែរស្លាប់អស់ជិត២ លាននាក់។
សេចក្ដីជូនដំណឹងពីការប្រកាសសាលក្រម ឌុច នេះ ធ្វើឡើងមួយថ្ងៃប៉ុណ្ណោះ មុនការបើកកិច្ចប្រជុំ ក្នុងទីក្រុងញូយ៉ក ជាមួយប្រទេសម្ចាស់ជំនួយ ដើម្បីរៃអង្គាសប្រាក់ សម្រាប់គាំទ្រដល់ប្រតិបត្តិការ របស់សាលាក្ដីខ្មែរក្រហម ខណៈដែលខាងភាគីសហប្រជាជាតិនៅក្នុងសាលាក្ដី នឹងត្រូវអស់លុយ នៅក្នុងរង្វង់ខែ កញ្ញាខាងមុខ រីឯភាគីកម្ពុជាបានអស់លុយសម្រាប់បំពេញប្រតិបត្តិការរបស់ខ្លួន ទៅហើយ។
សហគមន៍អន្ដរជាតិបានសម្រេចផ្ដល់នូវទឹកប្រាក់ចំនួនជាង៨៧លានដុល្លារអាមេរិក សម្រាប់ឲ្យសាលាក្ដីខ្មែរក្រហម បន្ដប្រតិបត្តិការរបស់ខ្លួនរហូតដល់ឆ្នាំ២០១១ ក៏ប៉ុន្ដែប្រទេសជាច្រើនពុំទាន់បានសន្យាផ្ដល់នូវទឹកប្រាក់ប៉ុន្មាននៅឡើយនោះទេ។
លោក ឡាស អលសិន មន្រ្ដីផ្នែកទំនាក់ទំនងកិច្ចការច្បាប់របស់សាលាក្ដីខ្មែរក្រហម បញ្ជាក់ថា ការជូនដំណឹងពីប្រកាសសាលក្រម ឌុចមិនជាប់ពាក់ព័ន្ធទៅនឹងកិច្ចប្រជុំនេះទេ គឺជាសេចក្ដីសម្រេចរបស់អង្គជំនុំជម្រះសាលាដំបូង។
សហព្រះរាជអាជ្ញាទាំងពីររូបរបស់សាលាក្ដីខ្មែរក្រហមធ្លាប់បានទាមទារឲ្យអង្គជំនុំជម្រះសាលា ដំបូងផ្ដន្ទាទោស ឌុចឲ្យបានធ្ងន់ធ្ងរជាទីបំផុត ហើយលោកវីលាម ស៊្មីត សហព្រះរាជអាជ្ញាបរទេស បានទទូចថា ឌុចគួរតែត្រូវផ្ដន្ទាទោសឲ្យជាប់គុក យ៉ាងតិចចំនួន៤០ឆ្នាំដែរ។ ក៏ប៉ុន្ដែនៅថ្ងៃបញ្ចប់នៃការកាត់ទោស កាលពីខែវិច្ឆិកា ឌុចបានអង្វរឲ្យសាលាដំបូងធ្វើការដោះលែង ឲ្យខ្លួនមានសេរីភាពឡើងវិញ៕