លោក ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានដាក់បញ្ជាជាថ្មីម្តងទៀតឲ្យក្រុមនគរបាលពង្រឹងការត្រួតពិនិត្យលើជនបរទេសដែលស្នាក់នៅក្នុងប្រទេសកម្ពុជាដោយខុសច្បាប់។
ថ្លែងក្នុងពិធីប្រកាសលទ្ធផលដកហូតឯកសាររដ្ឋបាលកម្ពុជាមិនប្រក្រតីពីជនបរទេសក្នុងក្រសួងមហាផ្ទៃនៅថ្ងៃពុធនេះ លោក ស ខេង បានប្រាប់ដល់ក្រុមមន្ត្រីនគរបាលជាន់ខ្ពស់ជាច្រើនរូបនៅក្នុងនោះថា ជនបរទេសណាដែលមិនសហការជាមួយអាជ្ញាធរដើម្បីបំពេញលក្ខខណ្ឌសម្រាប់ការរស់នៅស្របច្បាប់នោះទេ ពួកគេនឹងមិនត្រូវអនុញ្ញាតឲ្យបន្តរស់នៅក្នុងប្រទេសកម្ពុជានោះទេ។
«ចំពោះជនប្រភេទនេះ ទោះបីមានមូលហេតុណាក៏ដោយ យើងមិនអាច យើងគ្មានជម្រើសអ្វីក្រៅពីការអនុវត្តន៍តាមវិធានការច្បាប់នោះឡើយ មានន័យថា អ្នកទាំងនោះ មិនអាចរស់នៅក្នុងព្រះរាជាណាចក្រកម្ពុជាស្របច្បាប់បានឡើយ ឬក៏អាចនិយាយថា មិនអាចរស់នៅក្នុងព្រះរាជាណាចក្រកម្ពុជាបានឡើយ»។
ការលើកឡើងរបស់លោករដ្ឋមន្ត្រីក្រសួងមហាផ្ទៃខ្មែរស្របពេលដែលក្រុមនគរបាលបានរកឃើញថា មានជនបរទេសជិតបីម៉ឺនគ្រួសារ ស្មើនឹងចំនួនមនុស្សជិត១១ម៉ឺននាក់កំពុងស្នាក់នៅក្នុងប្រទេសកម្ពុជាដោយខុសច្បាប់ក្នុងរយៈពេលយូរ។ ក្នុងចំណោមជនបរទេសដែលកំពុងរស់នៅខុសច្បាប់ក្នុងប្រទេសកម្ពុជានេះមានជនជាតិវៀតណាមចំនួនជិត៧ម៉ឺននាក់។ ក្រៅពីនោះមានជនជាតិឡាវ ថៃ ភូមា ចិននិងម៉ាឡេស៊ី។ ក្រុមនគរបាលកម្ពុជាក៏បានដកហូតឯកសារពីពួកគេបានចំនួន៣៧៤៤១ច្បាប់។
នាយឧត្តមសេនីយ៍ គៀត ច័ន្ទថារិទ្ធ អគ្គនាយកនៅឯអគ្គនាយកដ្ឋានអន្តោប្រវេសន៍របស់ក្រសួងមហាផ្ទៃបានបញ្ជាក់ឲ្យដឹងថា តាមការធ្វើជំរឿនជនបរទេសបែបអន្តោប្រវេសន៍ចុងក្រោយ ក្រុមនគរបាលបានរកឃើញមានជនបរទេសចំនួន៤៩៦០៣គ្រួសារ ស្មើនឹងចំនួនមនុស្សជាង១៨២៦៧៣នាក់ដែលកំពុងរស់នៅស្របច្បាប់ក្នុងប្រទេសកម្ពុជា ក្នុងនោះមានជនជាតិវៀតណាមចំនួន ៤៩២២៦គ្រួសារ ស្មើនឹងមនុស្សចំនួន១៨២២៤២នាក់។
យ៉ាងណាក៏ដោយ អ្នកស្រី មូរ សុខហួរ អនុប្រធានអតីតគណបក្សសង្គ្រោះជាតិ ដែលត្រូវបានរំលាយ យល់ថា ស្ថិតិជនជាតិវៀតណាមដែលក្រសួងមហាផ្ទៃស្រង់បាននេះ គឺនៅមានចំនួនតិចនៅឡើយ។
«យើងវិញយើងនៅតែយល់ឃើញថា តួលេខនេះ ជាតួលេខទាបបំផុត ហើយព្រំប្រទល់យើងជាព្រំប្រទល់ដែលអត់អាចការពារបានទេ ចេញចូលស្រេចតែចិត្ត»។
កាលពីដើមកក្កដានេះ ក្រសួងមហាផ្ទៃ បានចេញសេចក្តីប្រកាសមួយ បញ្ជាក់ថា «ត្រូវបញ្ចប់ការទទួលពាក្យស្នើសុំជាជនបរទេសអន្តោប្រវេសន៍និងប័ណ្ណស្នាក់នៅអចិន្ត្រៃយ៍ចាប់ពីថ្ងៃទី១ ខែកក្កដា ឆ្នាំ២០១៩នេះតទៅ»។
ការប្រកាសឈប់ទទួលពាក្យស្នើសុំជាជនបរទេសអន្តោប្រវេសន៍នេះធ្វើឡើង បន្ទាប់ពីរដ្ឋាភិបាលកម្ពុជាបានកំណត់ឱសានវាទ ដើម្បីឲ្យពួកគេធ្វើការស្នើពាក្យជាជនអន្តោប្រវេសន៍និងទទួលបានប័ណ្ណស្នាក់នៅជាអចិន្ត្រៃយ៍កាលពីខែមករា ឆ្នាំ ២០១៩នេះ។
ទន្ទឹមពេលនឹងចេញប្រកាសនេះ មន្ត្រីទទួលបន្ទុកជនអន្តោប្រវេសន៍ ក៏បានបើកយុទ្ធនាការប្រមូលឯកសារមិនប្រក្រតី ដែលជនបរទេសបានកាន់កាប់ ដើម្បីបានស្នាក់នៅ និងរស់នៅក្នុងប្រទេសកម្ពុជា៕
