ភ្នំពេញ៖ ប្រទេសកម្ពុជា វៀតណាម ឡាវ បានប្ដេជ្ញារួមគ្នានៅល្ងាចថ្ងៃពុធនេះ ដើម្បីបង្កើនប្រសិទ្ធភាពប្រយុទ្ធប្រឆាំងការចរាចរណ៍គ្រឿងញៀនឆ្លងកាត់ព្រំដែនរួម។ ការប្ដេជ្ញាចិត្តនេះ ធ្វើឡើងនៅក្នុងកិច្ចប្រជុំប្រចាំឆ្នាំនៃប្រទេសទាំងបីក្នុងទីក្រុងភ្នំពេញ។
យោងតាមរបាយការណ៍របស់អាជ្ញាធរជាតិប្រយុទ្ធប្រឆាំងគ្រឿងញៀនរបស់ប្រទេសកម្ពុជាបានឲ្យដឹងថា ច្រកព្រំដែននិងអាកាសយានដ្ឋានអន្តរជាតិ កំពុងតែស្ថិតនៅជាគោលដៅយ៉ាងសំខាន់សម្រាប់ឧក្រិដ្ឋជនក្នុងការជួញដូរគ្រឿងញៀនឆ្លងកាត់ប្រទេស។
នៅក្នុងសេចក្តីថ្លែងការណ៍រួម ដែលអានដោយលោកឧត្តមសេនីយ៍ មឹក តារា អគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀនរបស់កម្ពុជាថា ប្រទេសទាំងបីបានជំរុញកិច្ចសហប្រតិបត្តិការគ្នាឲ្យកាន់តែរឹងមាំថែមទៀតសម្រាប់ការប្រឆាំងនឹងចរាចរណ៍គ្រឿងញៀន។
«អង្គប្រជុំបានឯកភាពជាឯកច្ឆន្ទជំរុញបន្ថែមទៀតនូវកិច្ចសហប្រតិបត្តិការត្រួតពិនិត្យគ្រឿងញៀនរវាងកម្ពុជា ឡាវ វៀតណាម ដើម្បីរួមវិភាគទានយ៉ាងសំខាន់លើការត្រួតពិនិត្យគ្រឿងញៀនទាំងនៅក្នុងតំបន់ និងនៅក្នុងពិភពលោក»។
សេចក្តីថ្លែងការណ៍ដដែលក៏បានសង្កត់ធ្ងន់បន្ថែមទៀតថា ប្រទេសទាំងបី និងបន្តប្តូរបទពិសោធគ្នាទៅវិញទៅមក ចែករំលែកព័ត៌មានឲ្យគ្នា សហការគ្នានៅក្នុងការស៊ើបអង្កេត និងបង្រ្កាបគ្រឿងញៀន។
សមាគមប្រជាជាតិអាស៊ីអាគ្នេយ៍ ហៅកាត់ថា អាស៊ាន ដែលមានដប់ប្រទេស នៅក្នុងនោះមានប្រទេសកម្ពុជា ឡាវ និងវៀតណាមផងដែរ បានកំណត់ទិសដៅទុកថា នៅឆ្នាំ២០១៥ ត្រូវតែលុបបំបាត់ឲ្យអស់នូវរាល់ទម្រង់នៃការជួញដូរគ្រឿងញៀននិងការប្រើប្រាស់គ្រឿងញៀននៅក្នុងសហគមន៍របស់ពួកខ្លួន។
លោក ស៊ូបាញ់ ស្រ៊ីធីរ៉ាត់ រដ្ឋមន្រ្តីទទួលបន្ទុកខុទុ្ទកាល័យនាយករដ្ឋមន្រ្តីនៃសាធារណរដ្ឋប្រជាមានិតឡាវ បានថ្លែងនៅក្រោយពីកិច្ចប្រជុំថា ដោយផ្អែកតាមការសម្រេចនៅថ្ងៃនេះ ប្រទេសទាំងបីត្រូវតែពន្លឿនកិច្ចសហប្រតិបត្តិការជាមួយគ្នាថែមទៀត ដើម្បីបោសសម្អាតការជួញដូរគ្រឿងញៀន។
«ចំណុចសំខាន់សម្រាប់យើងគឺថាតើយើងត្រូវបង្កើនកិច្ចសហប្រតិបត្តិការគ្នាយ៉ាងដូចម្តេច ពីព្រោះថាយើងនៅសល់តែប្រាំឆ្នាំទៀតទេដើម្បីធ្វើយ៉ាងណាឲ្យសមាគមអាស៊ីអាគ្នេយ៍ទៅជាតំបន់គ្មានគ្រឿងញៀន»។
លោកស៊ូបាញ់ មានប្រសាសន៍ថា មានគ្រឿងញៀនជាច្រើនត្រូវបានចរាចរឆ្លងកាត់ប្រទេស ឡាវ ដូចជាគ្រឿងញៀនប្រភេទ ATS ប្រភេទ ហេរ៉ូអ៊ីន គ្រឿងញៀនប្រភេទទឹកកក និងកូកាអ៊ីនមកពីទ្វីបអាមេរិកខាងត្បូងជាដើម។ ហើយគ្រឿងញៀនទាំងនេះ ត្រូវចរាចរចែកចាយនៅក្នុងតំបន់។
របាយការណ៍របស់អាជ្ញាធរជាតិប្រយុទ្ធប្រឆំាងគ្រឿងញៀនរបស់ប្រទេសកម្ពុជា បានបង្ហាញថា ឧក្រិដ្ឋជនគ្រឿងញៀនមិនត្រឹមតែប្រើប្រាស់ប្រទេសកម្ពុជា ជាកន្លែងឆ្លងកាត់នៃការជួញដូរគ្រឿងញៀនតែប៉ុណ្ណោះទេ ក៏ប៉ុន្តែក្រុមឧក្រិដ្ឋជនក៏បានព្យាយាមយកប្រទេសកម្ពុជាជាទីតាំងសម្រាប់ផលិតគ្រឿង ញៀន និងសម្រាប់ធ្វើការចែកចាយផងដែរ។
កិច្ចប្រជុំប្រចាំឆ្នាំរបស់ប្រទេសកម្ពុជា វៀតណាម និងឡាវ បានទទួលស្គាល់នូវគ្រោះថ្នាក់ចេញពីការប្រើប្រាស់គ្រឿងញៀន និងជំរុញឲ្យមានការផ្សព្វផ្សាយអប់រំដល់ប្រជាពលរដ្ឋរៀងៗខ្លួនអំពីគ្រោះថ្នាក់ដោយសារគ្រឿងញៀនព្រមទាំងជំរុញឲ្យមានការបង្កើតភូមិ ឃុំសុវត្ថិភាព ពីគ្រឿងញៀននៅតាមតំបន់ព្រំដែនរួមផងដែរ៕