ភ្ជាប់​ទៅ​គេហទំព័រ​ទាក់ទង

មូលនិធិ​រូបិយវត្ថុ​អន្តរជាតិ​ IMF​ ព្រមាន​ទ្វីប​អាស៊ី​អំពី​ការ​ផ្ទុះ​ឡើងវិញ​នូវ​វិបត្តិ​សេដ្ឋកិច្ច​


ទ្វីប​អាស៊ី​ អាច​ជួប​ប្រទះ​ទៅ​នឹង​ការ​ផ្ទុះ​ឡើង​នូវ​វិបត្តិ​សេដ្ឋកិច្ច​សារ​ជា​ថ្មី​ម្តង​ទៀត​នា​ពេល​អនាគត​ ប្រសិន​បើ​ប្រទេស​ទំាងឡាយ​ក្នុង​ទ្វីប​នេះ​មិន​ចាប់ផ្តើម​កែទម្រង់​មូលដ្ឋាន​ទ្រទ្រង់​សេដ្ឋកិច្ច​របស់ខ្លួន​ទេ​នោះ។​ នេះ​ជា​ការ​ព្រមាន​របស់​លោក​ Dominique​ Strauss​ Kanh​ នាយក​គ្រប់គ្រង​នៃ​មូលនិធិ​រូបិយវត្ថុ​អន្តរជាតិ​ IMF​ នៅ​ក្នុង​សិន្និសិទ​សេដ្ឋកិច្ច​ក្នុង​ទ្វីប​អាស៊ី​ ដែល​រៀបចំ​ឡើង​នៅ​ទីក្រុង​ ដែជុន​ នៃ​ប្រទេស​កូរ៉េ​ខាងត្បូង។

សន្និសិទ​អន្តរជាតិ​រយៈពេល​២​ថ្ងៃ​ ដែល​ចាប់ផ្តើម​កាល​ពី​ថ្ងៃ​ច័ន្ទ​ហើយ​បាន​បញ្ចប់​នៅ​ថ្ងៃ​អង្គារ​នេះ​ ផ្តោត​ការ​ពិភាក្សា​លើ​ប្រធានបទ​ “ទ្វីប​អាស៊ី​ក្នុង​សតវត្សរ៍​ទី​២១​ ដំណើរ​ឆ្ពោះ​ទៅ​មុខ”។

លោក​ Dominique​ Strauss​ Kanh​ បាន​លើក​ឡើង​ថា​ វិបត្តិ​សេដ្ឋកិច្ច​ទ្វីប​អាស៊ី​ ដែល​អាច​កើត​មាន​នា​ពេល​ខាង​មុខ​នោះ​អាច​បណ្តាល​មក​ពីភាព​ចលាចល​រូបិយវត្ថុ​នៅ​ទ្វីប​អឺរ៉ុប ដែល​កើត​ឡើង​ពី​វិបត្តិ​នៅ​ប្រទេស​ក្រិច​ កំណើន​យឺតយ៉ាវ​ជាង​មុន​នៃ​សេដ្ឋកិច្ច​ពិភពលោក​ ដែល​នឹង​ធ្វើ​ឲ្យ​ការ​នាំចេញ​របស់​ទ្វីប​អាស៊ី​ទៅ​កាន់​អឺរ៉ុប​ស្រុតចុះ​ និង​ហានិភ័យ​នៃ​ការ​ធ្លាក់ចុះ​នៃ​លំហូរ​ប្រាក់​វិនិយោគ​ពី​បរទេស​ ឬ​ការ​កើនឡើង​ខ្ពស់​ពេក​នៃ​លំហូរ​ប្រាក់​វិនិយោគ​ពី​បរទេស​ ដែល​អាច​ប៉ះពាល់​ដល់​អត្រា​ប្តូរប្រាក់​និង​បង្ក​ឱ្យ​មាន​អតិផរណា​ប្រាក់​ក្នុង​ស្រុក។

លោក​ Dominique​ និយាយ​ថា​ បណ្តា​ប្រទេស​ក្នុង​ទ្វីប​អាស៊ី​ត្រូវតែ​ប្រុងប្រៀប​ខ្លួន​ដើម្បី​ទប់ទល់​នឹង​បញ្ហា​ប្រឈម​ទំាងនេះ។

"ពិភពលោក​កំពុងតែ​ផ្លាស់ប្តូរ​ហើយ​ ហើយ​មធ្យោបាយ​ដែល​ទ្វីប​អាស៊ី​បាន​ប្រើ​ដើម្បី​ទាញ​យក​កំណើន​និង​ភាព​រីកចំរើន​ដល់​សេដ្ឋកិច្ច​របស់​ខ្លួន​នោះ​ក៏​ផ្លាស់ប្តូរ​ដែរ។​ ការ​ផ្លាស់ប្តូរ​ទំាងនេះ​ប្រហែល​ជា​ប៉ះពាល់​ទៅដល់​ដំណើរការ​សេដ្ឋកិច្ច​របស់​ទ្វីប​អាស៊ី​នៅ​ឆ្នាំ​ខាងមុខ។​ មាន​ន័យ​ថា​ អ្នក​បង្កើត​គោល​នយោបាយ​ត្រូវតែ​ព្យាយាម​ទប់ទល់​នឹង​ការ​ជ្រួលច្របល់​ជា​អវិជ្ជមាន។​ ដូច្នេះ​ ទ្វីប​អាស៊ី​ចាំបាច់​ត្រូវតែ​ធ្វើ​កិច្ចការ​ដែល​អាច​ធ្វើ​ឲ្យ​កំណើន​មាន​តុល្យភាព​ឡើងវិញ"។

អាស៊ី​គឺ​ជា​ទ្វីប​ដែល​ធំ​ជាង​គេ​ និង​មាន​ប្រជាជន​ច្រើន​ជាង​គេ​បំផុត។​ ទ្វីប​នេះ​មាន​ ៤៧​ ប្រទេស​ ដែល​មាន​ប្រជាជន​សរុប​ប្រហែល​ ៤​ ពាន់​លាន​នាក់​ ដែល​តំណាង​ឲ្យ​ ៦០%​ នៃ​ប្រជាពលរដ្ឋ​សរុប​ក្នុង​ពិភពលោក។​ ចាប់តំាង​ពី​ពាក់​កណ្តាល​ឆ្នាំ​ ២០០៨​ មក​ សេដ្ឋកិច្ច​របស់​ទ្វីប​អាស៊ី​បាន​រងគ្រោះ​យ៉ាង​ខ្លំាង​ដោយសារ​វិបត្តិ​ហិរញ្ញវត្ថុ​សាកល​ដែល​ផ្ទុះឡើង​នៅ​សហរដ្ឋ​អាមេរិក។​ ប៉ុន្តែ​ ទ្វីប​នេះ​កំពុង​ងើប​ឡើង​ពី​វិបត្តិ​នេះ​លឿន​ជាង​គេ។​ មូលនិធិ​រូបិយវត្ថុ​អន្តរជាតិ​បាន​ព្យាករ​ថា​ នៅ​ឆ្នាំ​ ២០៣០​ ទ្វីប​អាស៊ី​នឹង​ក្លាយ​ជា​តំបន់​ដែល​មាន​សេដ្ឋកិច្ច​ធំ​បំផុត​នៅ​ក្នុង​ពិភពលោក។

លោក​ Jeung​ Hyun​ Yoon​ រដ្ឋមន្ត្រី​យុទ្ធសាស្ត្រ​និង​ហិរញ្ញវត្ថុ​កូរ៉េ​ខាង​ត្បូង​បាន​ថ្លែង​ថា​ នៅ​ពេល​ដែល​សេដ្ឋកិច្ច​របស់​អាស៊ី​មាន​កំណើន​លូតលាស់​នោះ​ ផល​ចំណេញ​ពី​សេដ្ឋកិច្ច​ក៏​កាន់​តែ​មិន​មាន​តុល្យភាព។​ ជាក់ស្តែង​ បច្ចុប្បន្ន​នេះ​ប្រជាជន​ ២៤%​ នៃ​ប្រជាជន​សរុប​ ៤​ ពាន់​លាន​នាក់​ក្នុង​ទ្វីប​អាស៊ី​ កំពុង​រស់​នៅ​ជា​មួយ​នឹង​ភាព​ក្រីក្រ​ ហើយ​អត្រា​នៃ​ភាព​ក្រីក្រ​ក្នុង​ប្រទេស​នីមួយៗ​ ​កំពុង​គំរាម​ដល់​ស្ថេរភាព​សេដ្ឋកិច្ច​របស់​អាស៊ី។

ដូច្នេះ​លោក​នាយក​ Dominique​ Strauss​ Kanh​ បញ្ជាក់​បន្ថែម​ថា​ កិច្ចការ​ដែល​ទ្វីប​អាស៊ី​ត្រូវ​ធ្វើ​ជា​ចំាបាច់​នោះ​មាន​ដូចជា​ ការ​ពង្រឹង​សំណាញ់​សុវត្ថិភាព​សង្គម​ ឬ​ធ្វើ​ឲ្យ​ប្រជាជន​ក្នុង​ប្រទេស​មាន​ជីវភាព​ធូរធារ​ ធ្វើ​ឲ្យ​ប្រសើរ​ឡើង​នូវ​ហេដ្ឋា​រចនាសម្ព័ន្ធ​ដើម្បី​ទាក់ទាញ​ការ​វិនិយោគ​ និង​ការ​ពង្រីក​វិស័យ​ហរិញ្ញវត្ថុ​ដែល​អាច​បំរើ​សេចក្តី​ត្រូវការ​របស់​ប្រជាជន​ទូទៅ​និង​វិនិយោគគិន។

សន្និសិទ​នេះ​មាន​ការ​ចូលរួម​ពី​ថ្នាក់ដឹកនាំ​សេដ្ឋកិច្ច​នៃ​បណ្តា​ប្រទេស​ក្នុង​តំបន់​អាស៊ី​ សរុប​ចំនួន​ ៣០០​ នាក់។​ ក្នុងនោះ​ក៏​មាន​លោក​ គាត ឈន់ ​ឧប​នាយក​រដ្ឋ​មន្រ្តី​និង​រដ្ឋ​មន្រ្តី​សេដ្ឋកិច្ច​និង​ហិរញ្ញវត្ថុ​កម្ពុជា​ លោក​ អូន ព័ន្ធមោនីរ័ត្ន​ រដ្ឋ​លេខាធិការ​សេដ្ឋកិច្ច​និង​ហិរញ្ញវត្ថុ​ លោក​ ជា ចាន់ទោ​ អគ្គទេសាភិបាល​ធនាគារ​ជាតិ​ និង​លោក​ ស៊ំ សន្និសិត​ អគ្គ​នាយក​ធនាគារ​ជាតិ​ផង​ដែរ។​ ក៏​ប៉ុន្តែ​មន្រ្តី​ខ្មែរ​ទាំង​អស់​មិន​បាន​ផ្តល់​យោបល់​ណា​មួយ​ទៅ​លើ​ការ​ព្រមានពី​បញ្ហា​ប្រឈម​ក្នុង​ទ្វីប​អាស៊ី​នេះ​ទេ។

នៅ​ក្នុង​វេទិកា​សួរ​ដេញដោល​អំពី​បញ្ហា​ប្រឈម​របស់​អាស៊ី​កាល​ពី​ថ្ងៃច័ន្ទ​នៃ​សន្និសិទ​នោះ​ លោក​ Eiji Hirano​ អនុប្រធាន​នាយក​ប្រតិបត្តិ​នៃ​សាជីវកម្ម​សេវាកម្ម​ហិរញ្ញវត្ថុ​តូយ៉ូតា​ នៃ​ប្រទេស​ជប៉ុន​ដែល​ជា​ប្រទេស​មហា​អំណាច​សេដ្ឋកិច្ច​លំដាប់​លេខ​១​នៅ​អាស៊ី​ និង​លេខ​២​ក្នុង​ពិភពលោក​បាន​និយាយ​ថា​ សេដ្ឋកិច្ច​របស់​ទ្វីប​អាស៊ី​ទំនង​ជា​មាន​សេ្ថរភាព​តែ​ក្នុង​រយៈពេល​ខ្លី​ប៉ុណ្ណោះ​ ប៉ុន្តែ​ទ្វីប​នេះ​អាច​ប្រឈម​នឹង​អស្ថេរភាព​ក្នុង​រយៈពេល​មធ្យម​និង​វែង។​ ដូច្នេះ​ អ្វី​ដែល​ទ្វីប​អាស៊ី​ត្រូវ​យកចិត្ត​ទុកដាក់​នោះ​គឺ​ ការ​បង្កើន​តម្រូវការ​ក្នុង​ស្រុក។​ នៅ​ក្នុង​កិច្ច​ពិភាក្សា​តុ​មូល​អំពី​ការ​នាំមុខ​កំណើន​សេដ្ឋកិច្ច​ពិភពលោក​នៅ​ថ្ងៃ​អង្គារ​ លោក​ Chhong​ Soo​ Kim​ អភិបាល​ ធនាគារ​កណ្តាល​កូរ៉េ​ខាងត្បូង​ បាន​ប្រាប់​ពី​វិធីសាស្ត្រ​ជម្រុញ​តម្រូវការ​ក្នុងស្រុក។

"ជា​ទូទៅ​ផ្សារ​របស់​សេដ្ឋកិច្ច​អាស៊ី​មិន​ធំ​ពេក​នោះ​ទេ​ ដូច្នេះ​អ្វី​ដែល​អាច​បង្កើន​នូវ​តម្រូវការ​នៅ​ក្នុង​ស្រុក​បាន​នោះ​គឺ​អាច​ធ្វើ​ឡើង​តាម​រយៈ​ការ​ជម្រុញ​ការ​វិនិយោគ​នៅ​ក្នុង​វិស័យ​ធនធាន​មនុស្ស​ ហេត្ថា​រចនាសម្ព័ន្ធ​ វិស័យ​ផ្សេងៗ​ទៀត​ដែល​និង​ពង្រឹង​ឥទ្ធពល​របស់​ប្រទេស​អាស៊ី​ ហើយ​ធ្វើ​ឱ្យ​សេដ្ឋកិច្ច​មាន​តុល្យភាព"។

ប៉ុន្តែ​ លោក​ Tharman​ Shanmugaratnam​ រដ្ឋមន្ត្រី​ហិរញ្ញវត្ថុ​សិង្ហបុរី​បាន​និយាយ​ថា​ អ្វី​ដែល​ជា​បញ្ហា​នៅ​ពេល​នេះ​ គឺ​ទ្វីប​អាស៊ី​ត្រូវ​គិត​គូរ​ពី​បង្កើន​ផលិតផល​ ដោយ​ការ​នាំចូល​នូវ​បច្ចេកវិទ្យា​ថ្មីៗ​ ដែល​អាច​ឲ្យ​ទ្វីប​អាស៊ី​រក្សា​បាន​កំណើន​សេដ្ឋកិច្ច​ខ្ពស់។

លោក​ Haruhiko​ Kuroda​ ប្រធាន​ធនាគារ​អភិវឌ្ឍន៍​អាស៊ី​ ADB​ បាន​លើក​ឡើង​ថា​ ការ​រក្សា​ឲ្យ​បាន​កំណើន​ខ្ពស់​ ជាពិសេស​ដូច​ប្រទេស​ចិន​នោះ​ ប្រហែល​ជា​ពិបាក​នឹង​ធ្វើ​បាន​នៅ​ក្នុង​ប្រទេស​តូចៗ​ជា​ច្រើន​នៅ​ក្នុង​តំបន់​អាស៊ី។​ ដូច្នេះ​ ដើម្បី​រក្សា​និរន្តភាព​សេដ្ឋកិច្ច​ សំណាញ់​សុវត្ថិភាព​សង្គម​ ជា​ការ​ចំាបាច់​ណាស់​សម្រាប់​ប្រទេស​ទំាងនោះ។

ទន្ទឹម​នឹង​នោះ​ អ្នក​ជំនាញ​សេដ្ឋកិច្ច​យល់​ឃើញ​ដូច​គ្នា​ថា​ កញ្ចប់​ថវិកា​បំរុង​អន្តរជាតិ​ ដើម្បី​ប្រើប្រាស់​ដើម្បី​ជួយ​សង្គ្រោះ​ប្រទេស​ដែល​មាន​វិបត្តិ​ក៏​ចំាបាច់​ផង​ដែរ។​ ភាព​ក្រីក្រ​និង​អតុល្យភាព​នៃ​កំណើន​ក្នុង​ចំណោម​ប្រទេស​នៃ​ទ្វីប​អាស៊ី​ ក៏​ជា​ក្តី​កង្វល់​មួយ​សម្រាប់​ការ​អភិវឌ្ឍន៍​សេដ្ឋកិច្ច​របស់​ទ្វីប​អាស៊ី​ផងដែរ។

ថ្នាក់ដឹកនាំ​នៃ​ប្រទេស​អភិវឌ្ឍន៍​និង​ប្រទេស​ដែល​មាន​ចំណូល​ទាប​ ដែល​បាន​ចូលរួម​ក្នុង​កិច្ច​ពិភាក្សា​នោះ​និយាយ​ថា​ ការ​បង្កើន​លទ្ធភាព​ប្រកួត​ប្រជែង​ដើម្បី​ជម្រុញ​ការ​នំាចេញ​និង​ការ​វិនិយោគ​ ការ​បណ្តាក់​ទុន​វិនិយោគ​ក្នុង​វិស័យ​អប់រំ​ និង​បង្កើត​សំណាញ់​សុវត្ថិភាព​សង្គម​ឲ្យ​បាន​រឹងមាំ​ នឹង​ជួយ​កាត់​បន្ថយ​ហានិភ័យ​បង្ក​ពី​គម្លាត​ភាពក្រីក្រ​នេះ។

លោក​ Dominique​ Strauss​ Kanh​ នៃ​មូលនិធិ​រូបិយវត្ថុ​អន្តរជាតិ​និយាយ​ថា​ ដើម្បី​សម្រេច​បាន​គោលដៅ​ទំាងអស់​ខាង​លើ​ បណ្តា​ប្រទេស​ទ្វីប​អាស៊ី​ ត្រូវ​បង្កើន​កិច្ច​សហប្រតិបត្តិការ​ឲ្យ​បាន​ច្រើន​ថែម​ទៀត​ ទៅ​លើ​ការ​បង្កើត​គោលនយោបាយ​សេដ្ឋកិច្ច​និង​ ការ​ធ្វើ​កំណែ​ទម្រង់​ហិរញ្ញវត្ថុ​ជា​ដើម៕

XS
SM
MD
LG