លោកនាយករដ្ឋមន្ត្រីហ៊ុន សែន បានអះអាងថា វិស័យសារព័ត៌មាន ក្នុងប្រទេសកម្ពុជា កំពុងមានការរីកចម្រើនយ៉ាងឆាប់រហ័សប៉ុន្តែព្រមានពួកគេមិនឱ្យផ្សាយព័ត៌មានណាដែលឈានដល់បដិវត្តន៍ពណ៌ផ្តួលរំលំរដ្ឋាភិបាលទេ។
បើយោងតាមសារលិខិតរបស់លោកនាយករដ្ឋមន្ត្រីដែលបានផ្ញើជូន «វេទិកានិពន្ធនាយកសារព័ត៌មានកម្ពុជា» ដែលគ្រោងនឹងរៀបចំនៅថ្ងៃទី ២៥ ខែវិច្ឆិកា ខាងមុខបានចាត់ទុកថា វិស័យនេះជាអាវុធមុខពីរដែលអាចជួយកសាងប្រទេសជាតិផង តែក៏អាចបំផ្លាញសុខសន្តិភាពរបស់ជាតិបានផងដែរ។
លោក ហ៊ុន សែន បានបញ្ជាក់ថា៖
«យើងក៏ត្រូវមើលឃើញផងដែរថា សារព័ត៌មានពិតជាអាវុធមុខពីរ។ ប្រសិនបើការសេរីភាពប្រកបដោយវិជ្ជាជីវៈ និងក្នុងក្របខណ្ឌច្បាប់ សារព័ត៌មានពិតជាបានចូលរួមចំណែកក្នុងការជួយលើកស្ទួយលទ្ធិប្រជាធិបតេយ្យ ការគោរពសិទ្ធិមនុស្ស ការកសាងសន្តិភាព ស្ថិរភាពនយោបាយ និងការអភិវឌ្ឍប្រទេសជាតិ ប៉ុន្តែប្រសិនបើការប្រើប្រាស់សេរីភាពហួសព្រំដែនដោយបំពានច្បាប់ សារព័ត៌មានពិតជាបានបំផ្លាញលទ្ធិប្រជាធិបតេយ្យ បំផ្លាញសុខសន្តិភាព និងការអភិវឌ្ឍជាតិ ហើយរុញច្រានឲ្យប្រទេសធ្លាក់ក្នុងភ្លើងសង្គ្រាមយ៉ាងពិតប្រាកដ»។
សារលិខិតរបស់លោកនាយករដ្ឋមន្ត្រី ហ៊ុន សែន ចុះថ្ងៃទី ២៣ ខែវិច្ឆិកា ឆ្នាំ ២០១៧ បានសរសេរបន្ថែមថា៖
«រាជរដ្ឋាភិបាល នឹងមិនអនុញ្ញាតឲ្យមានការប្រើប្រាស់សេរីភាពតាមបែបអនាធិបតេយ្យដោយបំពានច្បាប់ ដើម្បីធ្វើបដិវត្តន៍ពណ៌ផ្តួលរំលំរាជរដ្ឋាភិបាលកម្ពុជា ស្របច្បាប់ជាដាច់ខាត»។
ក្រៅពីការព្រមាននេះលោក ហ៊ុន សែន បានអះអាងថា ដោយសារការបើកទូលាយសេរីភាពសារព័ត៌មាននៅកម្ពុជា បានធ្វើឲ្យវិស័យនេះមានការរីកចម្រើនយ៉ាងឆាប់រហ័ស ដែលរហូតមកដល់បច្ចុប្បន្ន មានអង្គភាពសារព័ត៌មានជាតិ និងអង្គភាពសារព័ត៌មានបរទេសដែលកំពុងធ្វើការផ្សព្វផ្សាយនៅក្នុងព្រះរាជាណាចក្រកម្ពុជាចំនួន៥៣០អង្គភាព។ ក្នុងនោះមានដូចជាកាសែតផ្សាយជាភាសាខ្មែរមានចំនួន ១៣៩អង្គភាព កាសែតផ្សាយជាភាសាបរទេសមានចំនួន ៤៣អង្គភាព ទស្សនាវដ្ដីមានចំនួន៣០៦អង្គភាព ព្រឹត្តិបត្រព័ត៌មានចំនួន៤២អង្គភាព។ ចំណែកវិទ្យុមានចំនួន២១១ស្ថានីយ ទូរទស្សន៍អនឡាញមានចំនួន៥៨អង្គភាព និងការិយាល័យតំណាងទីភ្នាក់ងារសារព័ត៌មាន ការិយាល័យតំណាងវិទ្យុ-ទូរទស្សន៍បរទេសប្រចាំការអចិន្ត្រៃយ៍មានចំនួន ២១អង្គភាពជាដើម។
ចាប់ពីខែកញ្ញាមក សារព័ត៌មាននៅកម្ពុជាត្រូវបានគេមើលឃើញថា ស្ថិតក្រោមការរឹតត្បិតដោយសារការប្រើច្បាប់ពន្ធដារ។ ស្ថាប័ន និងអង្គការជាតិ អន្តរជាតិមួយចំនួន ដែលការពារសេរីភាពព័ត៌មាន និងសិទ្ធិមនុស្សនៅជុំវិញពិភពលោក បានទទូចឲ្យរដ្ឋាភិបាលកម្ពុជាធ្វើឲ្យស្ថានភាពសេរីភាពព័ត៌មាន និងដំណើរការលទ្ធិប្រជាធិបតេយ្យត្រឡប់ទៅរកស្ថានភាពដូចដើមវិញ ក្រោយពីមានការបង្ក្រាបភ្លាមៗ និងជាបន្តបន្ទាប់ទៅលើស្ថាប័នផ្សាយព័ត៌មានឯករាជ្យមួយចំនួន។
កាលពីដើមខែកញ្ញា ម្ចាស់កាសែត The Cambodia Daily ដែលបានដំណើរការដោយពលរដ្ឋអាមេរិកាំងតាំងពីឆ្នាំ ១៩៩៣ បានបង្ខំចិត្តបិទទ្វាររបស់ខ្លួន ដោយសារខ្លួនគ្មានលទ្ធភាពបង់ពន្ធជាង ៦លានដុល្លារ ដែលខ្លួនចោទអាជ្ញាធរកម្ពុជាថា យកតួលេខមិនច្បាស់លាស់មកគាបសង្កត់ខ្លួន ហើយថា ចំណាត់ពន្ធដាររបស់អាជ្ញាធរមានចរិតនយោបាយ។
ក្នុងខែកញ្ញាដដែលនោះវិទ្យុអាស៊ីសេរី ដែលជាអង្គភាពព័ត៌មានឧបត្ថម្ភដោយសហរដ្ឋអាមេរិក បានចេញសេចក្តីថ្លែងការណ៍មួយ ប្រកាសផ្អាកដំណើរការការិយាល័យព័ត៌មានរបស់ខ្លួននៅរាជធានីភ្នំពេញមួយរយៈទាំងបង្ខំ។ ក្នុងសេចក្តីថ្លែងការណ៍នោះ វិទ្យុអាស៊ីសេរីចោទថា រដ្ឋាភិបាលកំពុងធ្វើទុក្ខបុកម្នេញបណ្ដាញសារព័ត៌មានឯករាជ្យ និងគូបដិបក្ខ នៅមុនការបោះឆ្នោតថ្នាក់ជាតិឆ្នាំ២០១៨។
ជាងនេះទៅទៀត វិទ្យុFM ក្នុងស្រុកជាច្រើនដែលផ្សាយបន្តកម្មវិធីពីសំឡេងសហរដ្ឋអាមេរិក (VOA) និងវិទ្យុសំឡេងប្រជាធិបតេយ្យ (VOD)ក៏ត្រូវបានហាមឃាត់។
ក្រុមមន្ត្រីរបស់សហរដ្ឋអាមេរិក និងប្រទេសប្រជាធិបតេយ្យផ្សេងទៀត បានធ្វើប្រតិកម្មយ៉ាងខ្លាំងចំពោះ ការបង្ក្រាបលើអង្គភាពផ្សព្វផ្សាយទាំងនេះ។ អ្នកស្រី Annika Ben David ឯកអគ្គរាជទូតស៊ុយអែត ទទួលបន្ទុកកិច្ចការសិទ្ធិមនុស្ស លទ្ធិប្រជាធិបតេយ្យ ដែលបានមកស្វែងយល់ពីស្ថានភាពនយោបាយនៅកម្ពុជាកាលពីខែតុលា បានទាមទារឲ្យអាជ្ញាធរកម្ពុជា បើកឲ្យមានលំហប្រជាធិបតេយ្យ ដូចដែលធ្លាប់មានពីមុនមក ហើយវិលត្រឡប់ទៅស្ថានភាពដែលមានសេរីភាពខ្លាំងឡើងវិញ និងមានការរឹតបន្តឹងតិចតួច សម្រាប់សង្គមស៊ីវិល និងប្រព័ន្ធផ្សព្វផ្សាយធ្វើប្រតិបត្តិការ។
តែទោះជាយ៉ាងណាក្តី បរិយាកាសនៃការរឹតបន្តឹងលើប្រព័ន្ធផ្សព្វផ្សាយសេរីត្រូវគេមើលឃើញថានៅតែបន្ត ហើយក៏មានការបង្រ្កាបលើអ្នកសារព័ត៌មានដែលធ្លាប់បម្រើការឲ្យវិទ្យុអាស៊ីសេរីផងដែរ។ ថ្មីៗនេះ អយ្យការអមតុលាការភ្នំពេញចោទប្រកាន់អតីតអ្នកសារព័ត៌មានវិទ្យុអាស៊ីសេរីពីររូប គឺលោកអ៊ួន ឈិន និងលោកយាង សុធារិនហៅយាងសុជាមេត្តា ពីបទ«ប្រគល់ឲ្យរដ្ឋបរទេសនូវព័ត៌មានជាអាទិ៍ដែលបង្កឲ្យមានការអន្តរាយដល់ការការពារជាតិ» តាមមាត្រា៤៤៥ នៃក្រមព្រហ្មទណ្ឌ ដែលប្រឈមនឹងការជាប់ទោស ពី៧ ទៅ១៥ឆ្នាំ។
អតីតអ្នកសារព័ត៌មានវិទ្យុអាស៊ីសេរីទាំងពីររូបត្រូវបានអាជ្ញាធរឃាត់ខ្លួនកាលពីយប់ថ្ងៃអង្គារទី១៤ ខែវិច្ឆិកា ឆ្នាំ ២០១៧ ក្នុងសណ្ឋាគារមួយកន្លែងនៅរាជធានីភ្នំពេញ ដោយសង្ស័យថា បានរាយការណ៍ព័ត៌មានបញ្ជូនទៅស្នាក់ការកណ្តាលវិទ្យុអាស៊ីសេរី នៅសហរដ្ឋអាមេរិក។
លោកនាយករដ្ឋមន្ត្រី ហ៊ុន សែន មិនបានពណ៌នាហេតុការណ៍នៃសកម្មភាពបង្ក្រាបលើអង្គភាពព័ត៌មានខាងលើនេះទេ តែលោកបានលើកសរសើរអ្នកសារព័ត៌មាន និងស្ថាប័នផ្សព្វផ្សាយមួយចំនួនធំនៅក្នុងប្រទេសកម្ពុជា។
លោក ហ៊ុន សែន បានចាត់ទុកថា សារព័ត៌មានទាំងនោះបានចូលរួម«យ៉ាងសកម្មជាមួយរដ្ឋាភិបាលក្នុងការផ្សព្វផ្សាយព័ត៌មានប្រកបដោយវិជ្ជាជីវៈអំពីស្ថានភាពនយោបាយ ការអភិវឌ្ឍ និងសភាពការណ៍ពិតនៅកម្ពុជា ចាប់តាំងពីដំណាក់កាលប្រទេសជាតិមានសង្គ្រាម និងដំណាក់កាលស្វែងរកសន្តិភាព រហូតដល់ប្រទេសបានទទួលសុខសន្តិភាពពេញលេញ និងមានការអភិវឌ្ឍនាពេលបច្ចុប្បន្ន»។
លោក ហ៊ុន សែន ក៏បានព្រមានអ្នកសារព័ត៌មាន មិនឲ្យធ្វើការផ្សព្វផ្សាយព័ត៌មានមិនពិត បំប៉ោងសភាពការណ៍រុញច្រានប្រទេសឲ្យធ្លាក់ក្នុងភាពវឹកវរ អស្ថិរភាពនយោបាយ បង្កឲ្យកើតមានជម្លោះប្រដាប់អាវុធជាមួយប្រទេសជិតខាង និងធ្វើឲ្យសង្គមកើតចលាចលឈានទៅរកការផ្តួលរំលំរាជរដ្ឋាភិបាលស្របច្បាប់ តាមរយៈចលនាបដិវត្តន៍ពណ៌ដែលជាអំពើខុសច្បាប់ មិនអាចអត់ឱនឲ្យបានឡើយ៕
