ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

លោក​ហ៊ុន​សែន​ព្រមាន​កុំ​ឱ្យ​មាន​ការ​បះបោរ​របៀប​ដូច​នៅ​ប្រទេស​ទុយនីស៊ី


បាតុករ​ទុយនេស៊ី​ប្រមូល​ផ្តុំ​គ្នា​នៅ​ខាង​ក្រៅ​ក្រសួង​មហាផ្ទៃ​ក្នុង​ទី​ក្រុង​ទូនីស​កាល​ពី​ថ្ងៃ​ទី​២១​ខែ​មករា​ឆ្នាំ​២០១១។
បាតុករ​ទុយនេស៊ី​ប្រមូល​ផ្តុំ​គ្នា​នៅ​ខាង​ក្រៅ​ក្រសួង​មហាផ្ទៃ​ក្នុង​ទី​ក្រុង​ទូនីស​កាល​ពី​ថ្ងៃ​ទី​២១​ខែ​មករា​ឆ្នាំ​២០១១។

នាយក​រដ្ឋមន្ដ្រី​កម្ពុជា ​លោក​ ហ៊ុន សែន ​ដែល​ទទួល​រងការ​រិះគន់​ពី​ការក្ដោបក្ដាប់​អំណាច​យ៉ាង​យូរ​បាន​ព្រមាន​ជា​សាធារណៈ​កាលពី​ថ្ងៃព្រហស្បតិ៍​នេះ​ចំពោះ​ការប៉ុនប៉ង​ធ្វើ​រដ្ឋប្រហារ​ណាមួយ​ដើម្បី​ផ្ដួល​រំលំ​រូប​លោក។

ថ្លែង​នៅក្នុង​ពិធី​សម្ពោធ​មន្ទីរពេទ្យ​មួយ​ក្នុង​ខេត្ត​កំពង់ចាម ​លោក​ប្រមុខ​រដ្ឋាភិបាល​ខ្មែរ​បាន​លើកពី​អ្នក​នយោបាយ​ខ្មែរ​មួយ​ដោយ​លោក​មិន​បញ្ចេញឈ្មោះ​ចំៗ​ដោយ​បង្ហាញ​ថា​អ្នកន​យោបាយ​ដែល​កំពុង ស្នាក់​នៅ​ក្រៅ​ប្រទេស​នោះ​ បាន​ប៉ុនប៉ង​ញុះញង់​ឲ្យមាន​ការបះបោរ​រំលំ​អំណាច​របស់​លោក​តាម​របៀប​ការធ្វើ​រដ្ឋ​ប្រហារ​នៅ​ប្រទេស​ទុយនីស៊ី។ លោក​ហ៊ុន សែន ​បាន​ប្រកាស​ទុក​ជាមុន​ថា ​លោក​នឹង​ធ្វើ​ការ​បង្រ្កាប​ប្រសិន​បើ​មាន​ការ​បះបោរ​នោះ។

«ខ្ញុំសូម​ផ្តាំ​ទៅ​អ្នកឯង​ចង់​ឲ្យ​មាន​កុបកម្ម​បែប​ទុយនីស៊ី។​ ខ្ញុំ​នឹង​បិទ​ទ្វារ​វាយឆ្កែ​ (បង្ក្រាប) ​ហើយ​ពេល​នេះ​ប្រាប់​ឲ្យ​ហើយ​ កុំ​លេង។ បើ​អ្នកឯង​ប្រមូល​គ្នា​បាន​សូម​អញ្ជើញមក»។

កាលពី​ថ្ងៃទី១៣​ ខែ​មករា​នេះ ​ប្រជាពលរដ្ឋ​ប្រទេស​ទុយនីស៊ី​ ដែល​ស្ថិត​នៅក្នុង​ទ្វីប​អាហ្រ្វិក​បាន​ងើប​បះបោរ​បណ្តេញ​ប្រធានាធិបតី​របស់​ខ្លួន​ គឺលោក​ ហ្ស៊ីន អែល អាប់ឌីន អាលី (Zine El Abdine Ben Ali)​ ចេញពី​តំណែង​ដោយសារ​តែ​វិបត្តិ​អត់​ការងារធ្វើ​និង​ដោយសារ​តែ​អំពើ​ពុករលួយ។

លោក​ហ៊ុន សែន ​ដែល​កាន់កាប់​ តំណែង​នាយក​រដ្ឋមន្រ្តី​ចាប់តាំង​ពី​ឆ្នាំ១៩៨៥​មក​ គឺ​អស់​រយៈពេល​ ២៦​ឆ្នាំ​មកហើយ​ បាន​បង្ហាញ​ប្រតិកម្ម​បែបនេះ​ ដោយ​យោង​ទៅ​លើ​ការ​រិះគន់​ទៅលើ​រូបលោក​ទាក់ទង​ ទៅនឹង​ការកាន់​អំណាច​យ៉ាងយូរ​នៅក្នុង​ការផ្សាយ​មួយ​របស់​វិទ្យុ​អាស៊ី​សេរី​កាលពី​ថ្ងៃច័ន្ទ។

នៅក្នុង​ការផ្សាយ​នោះ ​ដោយ​មាន​ការ​ប្រៀបធៀប​ពី​ស្ថានភាព​នៃ​ការ​ងើបឡើង​បះបោរ​នៅ​ក្នុង​ប្រទេស​ទុយនីស៊ី ​ជាមួយ​នឹង​ស្ថានភាព​នៅក្នុង​ប្រទេស​កម្ពុជា​ដែល​អាច​វិវត្ត​ឈាន​ដល់​ដំណាក់កាល​ ដូច​គ្នា​នោះ។

លោក​ កឹម សុខា​ ប្រធាន​គណបក្ស​សិទ្ធិមនុស្ស​ដែល​ជា​គណបក្ស​ជំទាស់​មួយ​នៅក្នុង​រដ្ឋសភា​ថា​ លោក​មិនមាន​ការភ្ញាក់ផ្អើល​ចំពោះ​ការព្រមាន​របស់​លោក​នាយក​រដ្ឋមន្រ្តី​ខ្មែរ​នោះទេ។

«យើង​ដឹង​គាត់​ច្បាស់​ហើយ ​តាំងពី​ដើមមក។ កាល​ណា​និយាយ​អ្វី​ទៅ​ប៉ះពាល់​ដល់​សម្តេច​ក៏គាត់​តែង តែ​ប្រតិកម្ម​អញ្ចឹងឯង។ វាគ្មាន​អ្វី​ដែល​ថា​ យើង​ទៅ​ធ្វើ​អ្វី​គាត់​កើតទេ»។

ដោយឡែក​លោក​ចាន់ សាវ៉េត ​ប្រធាន​ផ្នែក​ស៊ើបអង្កេត​ទៅលើ​ការរំលោភ​សិទ្ធិមនុស្ស​របស់​អង្គការ​ការពារ​សិទ្ធិ​មនុស្ស​អាដហុក​លើក​ឡើង​ថា​ប្រជា​ពលរដ្ឋ​កម្ពុជា​មិនទាន់​មាន​ភាព​ក្លាហាន​គ្រប់គ្រាន់​សម្រាប់​ឈាន​ដល់​ដំណាក់កាល​ដូច​នៅ​ប្រទេស​ទុយនីស៊ី ​ដែល​គួរឲ្យ​ព្រួយ​បារម្ភ​នោះទេ។

«ខ្ញុំ​គិត​ថា ​ប្រជាជន​យើង​មិនអាច​ដូចជា​ប្រទេស​ទុយនីស៊ី​ ហើយ​យ៉ាង​ដូច្នេះ ​ខ្ញុំ​គិតថា​រដ្ឋាភិបាល​មិន គួរ​ភ័យ​ពី​រឿង​បញ្ហា​ហ្នឹ​ងទេ»។

ជាមួយ​គ្នានេះ​ លោក​ចាន់ សាវ៉េត ​ក៏បាន​លើកឡើង​ដែរថា​ ការងើបឡើង​របស់​ប្រជាពលរដ្ឋ​ នៅក្នុង​ប្រទេស​កម្ពុជា​មិនមែន​ជា​កត្តា​គួរឲ្យ​ធ្វេសប្រហែស​នោះទេ។ ដូច្នេះ​រដ្ឋាភិបាល​គួរតែ​យកចិត្ត​ទុកដាក់​ទៅលើ​ការ​បែងចែក​ការលូតលាស់​ផ្នែក​សេដ្ឋកិច្ច​ឲ្យ​បានស្នើៗគ្នា​រវាង​អ្នកក្រ​និង​អ្នកមាន​និង​ជំរុញ​ឲ្យ​មាន​ការយកចិត្ត​ទុកដាក់​ជាបន្ថែម​ទៀត​ទៅលើ​ការ​គោរព​សិទ្ធិមនុស្ស។

សូម​បញ្ជាក់ថា​ ថ្វី​បើ​លោក​ហ៊ុន សែ​ន កាន់កាប់​តំណែង​ជា​នាយក​រដ្ឋមន្រ្តី​រហូត​ទៅដល់​ឆ្នាំ២០១៣​គឺ​មានន័យថា​ រហូត​ទៅដល់​ចប់​អាណត្តិ​រដ្ឋាភិបាល​បច្ចុប្បន្ន។ ពោល​គឺ​តំណែង​នាយក​រដ្ឋមន្រ្តី​របស់​លោក ​និង​ឈាន​ទៅដល់​ឆ្នាំទី២៨។ ក៏ប៉ុន្តែ​កាលពី​ពេលថ្មីៗ​នេះ​ គណបក្ស​ប្រជាជន​កម្ពុជា​កំពុងកាន់​អំណាច​របស់​លោក​បាន​ប្រកាស​បេក្ខភាព​នាយក​រដ្ឋមន្រ្តី​របស់​លោក​ជាថ្មី​ម្តងទៀត​សម្រាប់​ការ បោះឆ្នោត​នៅពេល​ខាងមុខនេះ៕

XS
SM
MD
LG