រដ្ឋមន្រ្តីចំនួន៤នាក់ ក្នុងនោះមានរដ្ឋមន្រ្តីក្រសួងយុត្តិធម៌ផងដែរ ត្រូវបានលោកនាយករដ្ឋមន្រ្តី ហ៊ុន សែន ស្នើផ្លាស់ប្តូរ ដែលរដ្ឋសភាបានអនុម័តយល់ស្របនៅព្រឹកថ្ងៃចន្ទនេះ។
នៅក្នុងលិខិតមួយច្បាប់ចុះថ្ងៃទី២៧ ខែមីនា ដាក់ទៅរដ្ឋសភា រដ្ឋមន្រ្តីទាំង៤នាក់ ដែលត្រូវដោះដូរនោះ មាន លោក អង្គ វង្សវឌ្ឍានា រដ្ឋមន្រ្តីក្រសួងយុត្តិធម៌ លោក ត្រាំ អ៊ីវតឹក រដ្ឋមន្រ្តីក្រសួងប្រៃសណីយ៍ និងទូរគមនាគមន៍ លោក ពេជ្រ ប៊ុនធិន រដ្ឋមន្រ្តីក្រសួងមុខងារសាធារណៈ និងលោក ហ៊ឹម ឆែម រដ្ឋមន្រ្តីក្រសួងធម្មការ និងសាសនា។ ទោះត្រូវរុះរើពីតំណែងរដ្ឋមន្រ្តីប្រចាំក្រសួង ពួកគេទាំង៤នាក់ត្រូវបានតែងតាំងជាទេសរដ្ឋមន្រ្តីទទួលបន្ទុកបេសកកម្មពិសេស។
បើតាមលិខិតនោះ លោក អង្គ វង្សវឌ្ឍានា ត្រូវបានដាក់ជំនួសដោយ លោក កើត រិទ្ធ។ លោក ត្រាំ អ៊ីវតឹក ត្រូវជំនួសដោយលោក ជា វ៉ាន់ដេត ដែលបច្ចុប្បន្នជាតំណាងរាស្រ្តខេត្តតាកែវ។ លោក ពេជ្រ ប៊ុនធិន ត្រូវជំនួសដោយលោក ព្រុំ សុខា ដែលជារដ្ឋលេខាធិការប្រចាំការនៃក្រសួងមុខងារសាធារណៈ។ ចំណែកលោក ហ៊ឹម ឆែម ត្រូវជំនួសដោយលោក ឈិត សុខុន ដែលជាអតីតអភិបាលខេត្តព្រះសីហនុ និងបច្ចុប្បន្នជារដ្ឋលេខាធិការទីស្តីគណៈរដ្ឋមន្រ្តី។
ក្នុងសន្និសីទសារព័ត៌មានមួយនៅវិមានរដ្ឋសភានៅព្រឹកថ្ងៃចន្ទនេះ លោក ហ៊ុន សែន បញ្ជាក់ថា នេះជាការដោះដូរ ដើម្បីតម្រូវការចាំបាច់ និងធានាប្រសិទ្ធភាពការងារ ដោយសារពួកគេមានវ័យចំណាស់ ហើយរដ្ឋាភិបាលត្រូវធ្វើកំណែទម្រង់វិស័យយុត្តិធម៌ និងមុខងារសាធារណៈ។ លោកបញ្ជាក់ថា កម្ពុជាស្ថិតក្នុងដំណាក់កាលឌីជីថល ដូច្នេះតម្រូវឲ្យរដ្ឋមន្រ្តី«រហ័សរហួស និងគំនិតផ្តួចផ្តើម [និងបំពេញការងារ]ឲ្យទាន់ពេលវេលា»។
លោក ព្រាប កុល នាយកប្រតិបត្តិអង្គការតម្លាភាពកម្ពុជា មានប្រសាសន៍ថា កន្លងទៅ ពលរដ្ឋកម្ពុជាបានបាត់បង់ជំនឿលើប្រព័ន្ធយុត្តិធម៌នៅកម្ពុជា ដែលក្នុងនោះមានទំនាស់ដីធ្លី អំពើពុករលួយ និងអំពើអយុត្តិធម៌សង្គមជាដើម។ លោកបន្តថា ក្រសួងយុត្តិធម៌ចាំបាច់ត្រូវមានថ្នាក់ដឹកនាំថ្មី ដែលលោករំពឹងតាំងពី៦ឆ្នាំមុន។ លោកថារដ្ឋមន្រ្តីក្រសួងសុខាភិបាល លោក ម៉ម ប៊ុនហេង ក៏គួរត្រូវបានផ្លាស់ប្តូរផងដែរ។
អតីតតំណាងរាស្ត្រមកពីគណបក្សសង្គ្រោះជាតិ លោក អ៊ូ ចន្ទរ័ត្ន បានថ្លែងប្រាប់ VOA នៅថ្ងៃចន្ទនេះថា ការផ្លាស់ប្តូររដ្ឋមន្រ្តី«ជារឿងធម្មតានិងល្អ» តែលោកចោទសំណួរអំពីប្រសិទ្ធភាពការងារ នៅពេលមានការផ្លាស់ប្តូរ។
លោកបានថ្លែងថា៖ «កន្លងមកយើងក៏ឃើញមានការផ្លាស់ប្តូរមួយចំនួនដែរ ប៉ុន្តែប្រសិទ្ធភាពការងារ យើងមិនឃើញសូវមានប្រសិទ្ធភាពសម្រាប់ខ្ញុំសង្កេតឃើញអ៊ីចឹង»។
លោកបន្តថា គួរតែមានការផ្តល់ឱកាសដល់ក្មេងៗជំនាន់ក្រោយឲ្យបានច្រើន ដោយសារចាស់ៗបានបំពេញការងារនេះច្រើនឆ្នាំមកហើយ។
លោកមានប្រសាសន៍ថា៖ «ដូច្នេះគួរតែផ្តល់ឱកាសដល់អ្នកជំនាន់ក្រោយៗទៀត ដែលមានសក្តានុពល មានសមត្ថភាពខ្ពស់ ហើយអាចនឹងមានការយល់ដឹងច្រើន ហើយភាពស្អាតស្អំអី សីលធម៌អី អាចនឹងមានអ្នកពូកែជាង និងយល់ដឹងច្រើន»៕