ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

រដ្ឋា​ភិបាល​ខ្មែរ​មាន​​ប្រតិកម្ម​ខ្លាំង​ៗ​ចំពោះ​លិខិត​របស់​នាយក​រដ្ឋ​មន្ត្រី​ថៃ​ផ្ញើ​ទៅអ.ស.ប.


ភ្នំពេញ៖ ប្រមុខ​ដឹក​នាំ​រដ្ឋា​ភិបាល​ខ្មែរ​ បាន​បញ្ចេញ​ប្រតិកម្ម​ខ្លាំង​ៗ​ចំពោះ​លិខិត​របស់​នាយក​រដ្ឋ​មន្ត្រី​ថៃ​ផ្ញើ​ទៅ​អង្គការ​សហ​ប្រជាជាតិ​ដែល​បាន​លើក​ឡើង​ថា​ ​កម្ពុជា​ជាអ្នក​ឈ្លាន​ពាន​ដែន​ដី​របស់​ថៃ។​ ប្រមុខ​រដ្ឋា​ភិបាល​ខ្មែរ​បាន​ហៅ​ការ​លើក​ឡើង​បែប​នេះ​ថា​ រឿង​គួរ​ឲ្យ​អស់​សំណើច។

នាយក​រដ្ឋ​មន្ត្រី​ខ្មែរ ​លោកហ៊ុន សែន​ បាន​ថ្លែង​នៅ​ថ្ងៃ​ព្រហស្បតិ៍​នេះ​ថា​ ​ការ​លើក​ឡើង​របស់​លោក​នាយក​រដ្ឋមន្រ្តី​ថៃ​ Abhisit Vejjajiva​ ​ដែល​ថា​ ​កម្ពុជា​បាន​ទន្ទ្រាន​ចូល​ដែនដី​របស់​ថៃ​នោះ ​គឺ​ជា​រឿង​គួរ​ឲ្យ​អស់​សំណើច។

ប្រមុខ​ដឹកនាំ​រដ្ឋា​ភិបាល​កម្ពុជា​បាន​ថ្លែង​បែប​នេះ​ ​នៅ​ក្នុង​ពិធី​បិទ​កិច្ច​ប្រជុំ​មួយ​ក្នុង​ទីក្រុង​ភ្នំពេញ​ស្តី​ពី​វិធាន​ការ​ការពារ​តំបន់​ជុំវិញ​បឹង​ទន្លេសាប។

«គេ​និយាយ​ថា​ ​កម្ពុជា​ឈ្លាន​ពាន​ថៃ។​ វា​ជា​រឿង​គួរ​ឲ្យ​សំណើច​ខ្លាំង​ណាស់។ ​នរណា​ឈ្លាន​ពាន​នរណា?​ នរណា​បាន​លើក​កង​ទ័ព​ចូល​មក​ក្នុង​ថ្ងៃ​១៥ ​កក្កដា ឆ្នាំ​២០០៨​ ​ហើយ​ឥឡូវ​នៅសល់​១០​នាក់។​ ម៉េច​មិន​និយាយ​ផង?​ ​អា​កងទ័ព​ដែល​ចុះ​មក​ឈ្លាន​ពាន​ទឹក​ដី​គេ​ ​មិន​និយាយ​ផង»។

ប្រតិកម្ម​របស់​លោក​នាយក​រដ្ឋមន្ត្រី​ហ៊ុន សែន​នេះ​បាន​ធ្វើ​ឡើង​ ​បន្ទាប់​ពី​នាយក​រដ្ឋ​មន្រ្តី​ថៃ​ ​លោក Abhisit Vejjajiva​ ​បាន​សរសេរ​លិខិត​ពីរ​ច្បាប់​កាល​ពី​ថ្ងៃ​អង្គារ​ ទី​១០​ ខែ​សីហា​នេះ​ ​ផ្ញើ​ទៅ​មហា​សន្និបាត​ និង​ក្រុម​ប្រឹក្សា​សន្តិសុខ​អង្គការ​សហ​ប្រជាជាតិ​ ដើម្បី​ឆ្លើយតប​បំភ្លឺ​ចំពោះ​លិខិត​របស់​នាយក​រដ្ឋ​មន្រ្តី​កម្ពុជា​ ដែល​បាន​លើក​ឡើង​ដោយ​ផ្អែក​តាម​បណ្តាញ​សារ​ព័ត៌មាន​ថៃ​ថា​ ​ប្រទេស​ថៃ​បាន​គំរាម​ប្រើប្រាស់​កម្លាំង​យោធា ​ដើម្បី​ដោះ​ស្រាយ​បញ្ហា​ជម្លោះ​ព្រំដែន​ជាមួយ​កម្ពុជា​នោះ។

នៅ​ថ្ងៃ​នេះ​ ​លោក​ហ៊ុន​ សែន​បាន​ថ្លែង​ថា​ ​ការ​គំរាម​ប្រើប្រាស់​កម្លាំង​យោធា​ជាមួយ​កម្ពុជា​នេះ ​ជា​ការ​ប្រមាថ​ដ៏​ធំ​ដល់​ប្រជាជន​កម្ពុជា​ ដោយ​សារ​កន្លង​មក​ ​មិន​ធ្លាប់​មាន​នាយក​រដ្ឋ​មន្រ្តី​ថៃ​ណា​ម្នាក់​ហ៊ាននិយាយ​បែប​នេះ​ទេ។

«តាំង​ពី​សម័យ​ដើម​រហូត​មកដល់​ពេល​នេះ​ ​មិន​ទាន់​មាន​នាយក​រដ្ឋ​មន្ត្រីណា​ម្នាក់​ហ៊ាន​និយាយ​ថា​ ប្រើ​កម្លាំង​យោធា​ ប្រើ​កម្លាំង​ទាហាន​ជាមួយ​កម្ពុជា​ទេ​ គឺ​មាន​តែ​មួយ​គត់​ គឺ​ឯក​ឧត្តម​ Abhisit Vejjajiva។ ​ជា​ការប្រមាថ​ដ៏​ធំ​ ​មិន​មែន​ចំពោះ​តែ​ជាតិ​សាសន៍​កម្ពុជា​ទេ​ ​ក៏​ប៉ុន្តែ​ទៅ​លើ​ធម្មនុញ្ញ​សហ​ប្រជាជាតិ»។

លោក ​Abhisit Vejjajiva​ បាន​សរសេរ​នៅ​ក្នុង​លិខិត​របស់​លោក​ថា​ ​បញ្ហា​ជម្លោះ​ព្រំដែន​រវាង​ប្រទេស​កម្ពុជា​និង​ថៃ ​កើត​ឡើង​ដោយសារ​ការ​ចូល​ទន្ទ្រាន​របស់​កម្ពុជា​ទៅលើ​ដែន​ដី​របស់​ថៃ។

លោក Abhisit ក៏​បាននិយាយថា​ លោក​នាយក​រដ្ឋ​មន្រ្តី​កម្ពុជា​ដក​ស្រង់​សម្តី​របស់​លោក​តាម​បណ្ដាញ​ព័ត៌មាន​របស់​ថៃ​នោះ ​គឺជា​ជា​ការ​ស្រង់​សម្តី​របស់​លោក​មិនបានត្រឹមត្រូវ យល់​ច្រឡំ​និងខុស​បរិបទ។

ប៉ុន្តែ​លោក​ហ៊ុន សែន​ នៅ​ថ្ងៃ​នេះ ​នៅតែ​ចាត់​ទុក​ថា​ ​ការ​ដែល​លោក​ Abhisit Vejjajiva ​មិន​ទទួល​ស្គាល់​សម្តី​របស់​ខ្លួន​នោះ​គឺ​ជា​ការ​ទម្លាក់​កំហុស​ទៅ​លើ​បណ្ដាញ​ព័ត៌​មាន​របស់​ថៃ​ ​ដូច​ដែល​រដ្ឋ​មន្រ្តី​ការ​បរទេស​ថៃ ​កាស៊ីត​ភារម្យាបាន​ធ្វើ​កន្លង​មក។

មន្រ្តី​ស្ថាន​ទូត​ថៃ​ប្រចាំ​ទីក្រុង​ភ្នំពេញ ​មិន​អាច​ទាក់​ទង​សុំ​ការ​អត្ថាធិប្បាយ​ណាមួយ​បាន​ទេ​នៅ​ថ្ងៃ​ព្រហស្បតិ៍​នេះ។

ចំណែក​លោក ​Panitan ​Watanayakorn​ អ្នក​នាំ​ពាក្យ​រដ្ឋាភិបាល​ថៃ​ ​បាន​បដិសេធ​មិន​ធ្វើ​អត្ថាធិប្បាយ​ទេ​ ដោយ​លោក​មាន​ប្រសាសន៍​ប្រាប់​VOA​ ពី​ទីក្រុង​បាង​កក​ថា​ ​លោក​កំពុង​ជាប់​ប្រជុំ។

តែ​ទោះ​យ៉ាង​ណា​ក៏ដោយ​ លោក​ហ៊ុន សែន​ចង់​ឲ្យ​មាន​ការ​ចូលរួម​ពី​សំណាក់​អង្គការ​សហ​ប្រជាជាតិ ​ឬ​ពី​សមាគម​ប្រជាជាតិ​អាស៊ី​អគ្នេយ៍​ដែល​ហៅកាត់​ថា​ អាស៊ាន​ ដើម្បី​ដោះ​ស្រាយ​ជម្លោះ​ព្រំដែន​រវាង​កម្ពុជា​និង​ថៃ​ ដែល​អូស​បន្លាយ​ពេល​អស់​ជាង ​២​ឆ្នាំ​កន្លង​មក​នេះ​ ​ហើយ​ដែល​បាន​បណ្តាល​ឲ្យ​ទាហាន​នៃ​ភាគី​ទាំង​សងខាង​ស្លាប់​និង​របួស​នៅ​ក្នុង​ការ​ប៉ះ​ទង្គិច​គ្នា​ដោយ​អាវុធ ​ជាច្រើន​លើក​ច្រើន​សារ​មក​ហើយ​នោះ៕

XS
SM
MD
LG