ភ្នំពេញ៖ ក្រុមអ្នកជំនាញបានហៅលិខិតរបស់លោកនាយករដ្ឋមន្ត្រីហ៊ុន សែនជូនទៅអង្គការសហប្រជាជាតិនេះថា ជានយោបាយការទូតដ៏សំខាន់ ដើម្បីផ្តល់ព័ត៌មានដល់សហគមន៍អន្តរជាតិឱ្យជួយដឹងឮ និងយកចិត្តទុកដាក់លើបញ្ហាជម្លោះព្រំដែនរវាងកម្ពុជា-ថៃ និង ដាក់ការគាបសង្កត់ទៅលើភាគីថៃកុំឱ្យប្រើកម្លាំងកងទ័ពដោះស្រាយបញ្ហាព្រំដែន។ ចំណែកឯរដ្ឋាភិបាលថៃវិញ នឹងសរសេរលិខិតទៅអង្គការសហប្រជាជាតិដើម្បីពន្យល់ថា ប្រទេសថៃមិនបានរំលោភធម្មនុញ្ញអង្គការសហប្រជាជាតិទេ ហើយប្រទេសថៃប្រកាន់ខ្ជាប់នូវគោលការណ៍សន្តិសហវិជ្ជមាន និងច្បាប់ ដោយមិនផ្លាស់ប្តូរជំហរចង់សហប្រតិបត្តិការជាមួយប្រទេសជិតខាង និងចែករំលែកផលប្រយោជន៍រួមនោះទេ។
ក្រុមអ្នកវិភាគនៅកម្ពុជាបាននិយាយនៅថ្ងៃច័ន្ទនេះថា លិខិតរបស់លោកនាយករដ្ឋមន្ត្រីហ៊ុន សែន កាលពីថ្ងៃអាទិត្យ ជូនទៅក្រុមមេដឹកនាំជាន់ខ្ពស់់របស់អង្គការសហប្រជាជាតិអាចជាការប៉ុនប៉ងមួយដើម្បីទប់ស្កាត់ប្រទេសថៃ មិនឱ្យប្រើអំពើហិង្សាលើបញ្ហាជម្លោះព្រំដែននៅក្បែរប្រាសាទព្រះវិហារ។
កាលពីថ្ងៃអាទិត្យ លោកនាយករដ្ឋមន្ត្រីហ៊ុន សែនបានសរសេរលិខិតទៅជូនប្រធានក្រុមប្រឹក្សា សន្តិសុខអង្គការសហប្រជាជាតិ និងមហាសន្និបាតអង្គការសហប្រជាជាតិ ដោយអះអាងថា លោក នាយករដ្ឋមន្ត្រីថៃAbhisit Vejjajiva បានគំរាមប្រើកម្លាំងយោធាដើម្បីដោះស្រាយបញ្ហាជម្លោះព្រំដែន។
លោកឈាង វណ្ណារិទ្ធ ប្រធានវិទ្យាស្ថានខ្មែរសម្រាប់កិច្ចសហប្រតិបត្តិការ និងសន្តិភាព បានថ្លែងថា លិខិតរបស់លោកនាយករដ្ឋមន្ត្រីហ៊ុន សែន ទៅកាន់អង្គការសហប្រជាជាតិ ជាការផ្តល់ព័ត៌មានដល់សហគមន៍អន្តរជាតិឱ្យជួយដឹងឮ យកចិត្តទុកដាក់លើបញ្ហាជម្លោះព្រំដែនរវាងខ្មែរ-ថៃ និងគាបសង្កត់ទៅលើភាគីថៃកុំឱ្យប្រើអាវុធ។
«លិខិតនេះ ជាការឆ្លើយតប និងជាការផ្តល់សម្ពាធដល់ថៃ។ ប្រទេសកម្ពុជា ជាប្រទេសតូច មានតែប្រើយន្តការពហុភាគី ជាពិសេសអង្គការសហប្រជាជាតិ។ ដូច្នេះ នេះជានយោបាយការទូតមួយរបស់ប្រទេសកម្ពុជា ដើម្បីដាក់សម្ពាធទៅលើប្រទេសថៃកុំឱ្យប្រើអាវុធផ្តេសផ្តាស។ ខ្ញុំគិតថា នេះជាសញ្ញាប្រកាសអាសន្នមួយដល់ក្រុមប្រឹក្សាសន្តិសុខអង្គការសហប្រជាជាតិ ដើម្បីរាំងខ្ទប់បញ្ហាជម្លោះព្រំដែនកុំឈានទៅដល់ការធ្វើសង្គ្រាមនិងការបង្ហូរឈាម»។
ប្រទេសកម្ពុជា និងប្រទេសថៃនៅតែឈ្លោះប្រកែកគ្នាលើផ្ទៃដីទំហំ៤,៦គីឡូម៉ែត្រការរ៉េ នៅក្បែរប្រាសាទព្រះវិហារ ដែលត្រូវបានធ្វើជាកន្លែងបេតិកភ័ណ្ឌពិភពលោករបស់អង្គការUnesco ក្រោមការការពាររបស់ប្រទេសកម្ពុជានៅក្នុងឆ្នាំ២០០៨។ កងទ័ពរាប់ពាន់នាក់ពីភាគីទាំងពីរ បានប្រមូលផ្តុំគ្នានៅតំបន់ព្រំដែនដោយមានការវាយប្រយុទ្ធគ្នាជាច្រើនលើកដែលបានសម្លាប់ទាហានយ៉ាងតិច៨នាក់។
ជម្លោះប្រទេសទាំងពីរបានធ្វើឲ្យប៉ះពាល់ដល់ទំនាក់ទំនងការទូតកាលពីឆ្នាំ២០០៩ បន្ទាប់ពីលោកអតីតនាយករដ្ឋមន្ត្រីថៃ Thaksin Shinawatra ត្រូវបានតែងតាំងជាទីប្រឹក្សាសេដ្ឋកិច្ចរបស់រដ្ឋាភិបាលកម្ពុជា។
លោកជាង សុខា ប្រធានក្រុមការងារដើម្បីសន្តិភាព បានថ្លែងថា យើងបានអបអរសាទរលិខិតរបស់ លោកនាយករដ្ឋមន្ត្រីហ៊ុន សែនទៅកាន់អង្គការសហប្រជាជាតិសំដៅបញ្ជៀសអំពើហិង្សាប្រដាប់អាវុធរវាងខ្មែរ និងថៃ ដែលធ្វើឱ្យប៉ះពាល់ដល់ជីវភាព និងការផ្លាស់ប្តូរពាណិជ្ជកម្មរបស់ប្រជាពលរដ្ឋ នៅតាមបណ្តោយព្រំដែន។
«ខ្ញុំគិតថា លិខិតទៅអង្គការសហប្រជាជាតិជាជំហ៊ានឈានទៅរករបៀបនៃការដោះស្រាយមួយតាមសន្តិវិធី និងអាចជួយដោះស្រាយ ដោយមានអន្តរាគមន៍ពីអង្គការសហប្រជាជាតិ។ លិខិតនេះ ជាការពឹងពាក់សហគមន៍អន្តរជាតិឱ្យធ្វើទៅលើបញ្ហាជម្លោះខ្មែរ-ថៃ និងជាការជូនដំណឹងទុកជាមុន ទៅអង្គការសហប្រជាជាតិអំពីលទ្ធភាពដែលប្រទេសថៃអាចនឹងប្រើកម្លាំងយោធាឈ្លានពានបូរណភាពទឹកដីកម្ពុជា ហើយទៅថ្ងៃមុខ បើវាកើតមានអំពើហិង្សាប្រដាប់អាវុធ ដោយប្រការណាមួយ វាជារឿងមួយ ដែលគួរឱ្យសោកស្តាយដែរ»។
លោកនាយករដ្ឋមន្ត្រីហ៊ុន សែន បានថ្លែងនៅក្នុងពិធីផ្សព្វផ្សាយកម្មវិធីជាតិសម្រាប់ការអភិវឌ្ឍន៍តាមបែបប្រជាធិបតេយ្យនៅថ្នាក់ក្រោមជាតិថា លោកស្នើសុំឱ្យមានអន្តរាគមន៍របស់សហគមន៍អន្តរជាតិ អំពីបញ្ហាជម្លោះព្រំដែនកម្ពុជា និងថៃ។
«ក្រសួងការបរទេសឥឡូវរៀបចំលិខិតរួចឱ្យអស់ ត្រៀមចាំតែចុះព្រឹត្តិការណ៍ខែ ថ្ងៃ បញ្ចូនឱ្យក្រុមប្រឹក្សាអង្គការសហប្រជាជាតិ។ យើងត្រូវដំណើរការពីរទិស៖ ទីមួយទប់ទល់នឹងសង្គ្រាមឈ្លានពាន (របស់ថៃ) នៅក្នុងទឹកដីរបស់ខ្លួន និងទី២ សុំឱ្យក្រុមប្រឹក្សាសន្តិសុខអង្គការសហប្រជាជាតិកោះប្រជុំបន្ទាន់លើសភាពការណ៍ព្រំដែនកម្ពុជា និងថៃ»។
កាសែតបាងកកប៉ុស្តិ៏បានរាយការណ៍នៅថ្ងៃច័ន្ទនេះថា ក្រុមមន្ត្រីថៃកំពុងរៀបចំលិខិតឆ្លើយតបទៅអង្គការសហប្រជាជាតិ ដោយអះអាងថា ប្រទេសថៃមិនដែលផ្លាស់ប្តូរជំហររបស់ខ្លួនចង់ធ្វើកិច្ចសហប្រតិបត្តិការជាមួយប្រទេសជាប់ខាងរបស់ខ្លួន និងចែករំលែកផលប្រយោជន៍រួមនោះទេ៕