លោកនាយករដ្ឋមន្ត្រីហ៊ុន សែន បានព្យាយាមបញ្ចប់ជម្លោះការងាររវាងថៅកែរោងចក្រនិងសហជីព ដើម្បីបញ្ចៀសការខូចខាតផលប្រយោជន៏ផ្នែកឧស្សាហកម្មកាត់ដេរនៅកម្ពុជា។ អំពីនេះផ្តល់ឲ្យលោកនាយករដ្ឋមន្ត្រីហ៊ុន សែន នូវផលចំណេញទាំងផ្នែកសេដ្ឋកិច្ច និងនយោបាយ។ ដោយមានការផ្លាស់ប្តូរចរឹកនយោបាយរបស់លោកនាយករដ្ឋមន្ត្រីហ៊ុន សែន ពីការរិះគន់មកការសម្រុះសម្រួលការធ្វើកូដកម្មទាមទារដំឡើងប្រាក់ឈ្នួលរបស់កម្មករនេះ ក្រុមអ្នកវិភាគបាននិយាយនៅថ្ងៃសុក្រនេះថា លោកនាយករដ្ឋមន្ត្រីហ៊ុន សែន បានប្រើយុទ្ធសាស្ត្រដំណោះស្រាយឈ្នះឈ្នះ ដើម្បីបញ្ចៀសការខូចខាតដល់ផលប្រយោជន៍ឧស្សាហកម្មសំលៀកបំពាក់ដ៏ធំរបស់ប្រទេសកម្ពុជា។
លោកអ៊ំ សំអាត ប្រធានផ្នែកស៊ើបអង្កេតនៃអង្គការសិទ្ធិមនុស្សលីកាដូ បានបញ្ជាក់ថា លោកនាយករដ្ឋមន្ត្រីហ៊ុន សែន កំពុងតែផ្លាស់ប្តូរចរឹកនយោបាយរបស់លោកពីការគាំទ្រថៅកែរោងចក្រមកគាំទ្រកម្មករ ដែលកាយវិការនេះអាចជាការឆ្លៀតឱកាសមួយសម្រាប់ការចំណេញនយោបាយពីជម្លោះការងារនេះក្នុងការទាក់ទាញសំឡេងគាំទ្ររបស់កម្មករចំពោះនយោបាយរបស់លោក ខណៈដែល ការបោះឆ្នោតនឹងចូលមកដល់នៅក្នុងឆ្នាំ២០១២ និងឆ្នាំ២០១៣។ លោកសំអាតថ្លែងដូច្នេះថា៖
«ជាធម្មតា អ្នកនយោបាយធ្វើអ្វីក៏តែងតែឆ្លៀតកេងយកផលចំណេញនយោបាយ នៅក្នុងជម្លោះនោះផងដែរ»។
រោងចក្រ១៧បានដាក់ពាក្យបណ្តឹងប្រឆាំងនឹងមេដឹកនាំសហជីព ដោយនិយាយថា ការធ្វើកូដកម្ម កាលពីខែកញ្ញាខុសច្បាប់។ រោងចក្រទាំងនេះមិនបានអនុញ្ញាតឱ្យតំណាងកម្មករចំនួន១៥០នាក់ចូលធ្វើការទេ ដោយរង់ចាំសេចក្តីសម្រេចរបស់តុលាការ។
លោក នី ចរិយា ប្រធានផ្នែកស៊ើបអង្កេតនៃសមាគមសិទ្ធិមនុស្សអាដហុក បានថ្លែងថា ការផ្លាស់ប្តូរនេះជាចំណុចចាប់ផ្តើមដ៏ល្អមួយសម្រាប់ផលប្រយោជន៍របស់កម្មករ ដែលមានការយកចិត្តទុកដាក់ពីលោកនាយករដ្ឋមន្ត្រីហ៊ុន សែន។ លោកបន្តថា៖
«ខ្ញុំជឿថា ប្រាកដជាមានការបោះបង់ចោលពាក្យបណ្តឹង ហើយនិងធ្វើការដកពាក្យបណ្តឹងចេញពីតុលាការវិញ។ អ្វីដែលជាប្រសាសន៍របស់សម្តេចនាយករដ្ឋមន្ត្រីអាចនឹងធ្វើឱ្យតុលាការឈប់បន្តពាក្យបណ្តឹង ឬក៏និយោជកដកពាក្យបណ្តឹងដែលខ្លួនបានប្តឹងទៅតុលាការចេញវិញដែរ»។
សហជីព និងថៅកែរោងចក្រកំពុងស្វែងរកវិធី ដើម្បីរារាំងការធ្វើកូដកម្មនៅពេលអនាគត។ ការធ្វើកូដកម្មរយៈពេលបួនថ្ងៃ បានធ្វើឱ្យរោងចក្រខាតបង់អស់ប្រហែល១៥លានដុល្លារអាមេរិក និងបានបណ្តាលឱ្យអ្នកបញ្ជាទិញនៅអាមេរិកអំពាវនាវឱ្យមានដំណោះស្រាយ។
ប្រទេសកម្ពុជាមានគណៈកម្មាធិការប្រឹក្សាការងារមកពីរដ្ឋាភិបាល សហជីព និងសមាគមរោងចក្រកាត់ដេរ ដែលមានតួនាទីដោះស្រាយជម្លោះការងារ លក្ខខណ្ឌការងារ ការដំឡើងប្រាក់ឈ្នួល ឬប្រាក់រង្វាន់ផ្សេងៗ និងការពារសិទ្ធិកម្មករ។ ប៉ុន្តែមិនសូវមានប្រសិទ្ធិភាពទេ ព្រោះសហជីពទាំងអស់នៅកម្ពុជាមិនអាចធ្វើការរួមគ្នាបានទេ ដោយសារសហជីពមួយចំនួនមាននិន្នាការគាំទ្រគណបក្សនយោយបាយ និងមួយចំនួនទៀតអព្យាក្រឹត។ នេះបើយោងតាមមន្ត្រីសហជីព។
លោកអាត់ ធន់ ប្រធានសហភាពការងារកម្ពុជា បានបញ្ជាក់ថា យន្តការដោះស្រាយជម្លោះការងារនេះមិនទាន់មានប្រសិទ្ធិភាពដោយសារតែនិន្នាការនយោបាយ និងប្រយោជន៍បុគ្គល។ លោកថ្លែងថា៖
«លោកនាយករដ្ឋមន្ត្រី ចង់បានការគាំទ្រពីមហាជន និងកម្មករ ហើយមិនចង់ឃើញជម្លោះតទៅទៀត ពីព្រោះវាអាចធ្វើឱ្យវឹកវរដល់បញ្ហាសេដ្ឋកិច្ចកម្ពុជាដោយសារជម្លោះ។ កុំឱ្យមានបញ្ហាដល់ វិបត្តិសេដ្ឋកិច្ច និងការចូលមកវិនិយោគទុន កុំឱ្យមានបញ្ហាជម្លោះនេះកាន់តែរីកធំអន្តរាយតទៅ ទៀត»។
លោកជា មុន្នី ប្រធានសហជីពសេរីកម្មករនៃព្រះរាជាណាចក្រកម្ពុជា បានថ្លែងថា ថៅកែរោងចក្រជាមនុស្សសំខាន់ក្នុងការដោះស្រាយរាល់ជម្លោះការងារ ប៉ុន្តែគ្រប់ភាគីត្រូវមានកាតព្វកិច្ចរួមគ្នាដើម្បីបញ្ជៀសជម្លោះការងារដែលជាចំណុចដ៏សំខាន់បំផុតសម្រាប់លើកទឹកចិត្តដល់អ្នកបញ្ជាទិញ។ លោកបន្តថា៖
«កម្ពុជាមិនសម្រួលកូដកម្ម ឬបាតុកម្មរបស់កម្មករ ក្នុងការផ្តល់ប្រាក់ឈ្នួល ឬប្រាក់រង្វាន់ផ្សេងៗ ឬ លក្ខខណ្ឌការងារមិនបានល្អទេ។ អ្នកបញ្ជាទិញអាចបញ្ឈប់ការបញ្ជាទិញពីកម្ពុជា និងបែរជាទៅបញ្ជាទិញនៅប្រទេសជិតខាង។ កម្ពុជានឹងជួបបញ្ហា ពីព្រោះកម្ពុជាយកវិស័យកាត់ដេរ ជាអាទិភាព»។
លោក យឹម សេរីវឌ្ឍនៈ មន្ត្រីសម្របសម្រួលគម្រោងថ្នាក់ជាតិផ្នែកអប់រំកម្មករ និយោជិតរបស់អង្គការពលកម្មអន្តរជាតិ បានថ្លែងថា កង្វះយន្តការសមស្របនិងឆ្លើយតបទាន់ពេលវេលា សម្រាប់ដោះស្រាយជម្លោះគូរតែត្រូវបានពង្រឹង ដើម្បីជៀសវាងជម្លោះនៅកន្លែងធ្វើការ។ លោកថ្លែងដូច្នេះថា៖
«ទស្សនៈរបស់សម្តេចនាយករដ្ឋមន្ត្រី គឺជាការចូលរួមចំណែកនៅក្នុងការបន្ធូរបន្ថយភាពតានតឹងនៅក្នុងឧស្សាហកម្មកាត់ដេរនេះ។ ពួកគាត់ចូលរួមនៅក្នុងការអនុវត្តសិទ្ធិកូដកម្មរបស់គាត់ដើម្បីឆ្លើយតបទៅនឹងលក្ខខណ្ឌការងារ ឬស្ថានភាពសេដ្ឋកិច្ចសម្រាប់ការរស់នៅសមស្របរបស់គាត់នោះ ខ្ញុំគិតថា គួរតែមានការលើកទឹកចិត្តឱ្យមានដកពាក្យបណ្តឹងទាំងអស់នោះ ដើម្បីធានានូវការអនុវត្តសិទ្ធិសេរីភាពរបស់កម្មករ និងសហជីពកាន់តែប្រសើរស្របតាមអនុសញ្ញាអន្តរជាតិ»។
លោកខេន លូ អគ្គលេខាធិការសមាគមរោងចក្រកាត់ដេរកម្ពុជាបានថែ្លងថា សមាគមរោងចក្រកាត់ដេរមិនទាន់បានផ្អាក់ករណីបណ្តឹងនៅតុលាការទេ ប៉ុន្តែសមាគមបានជម្រាបទៅសមាជិករបស់ខ្លួនអំពីសំណើរបស់លោកនាយករដ្ឋមន្ត្រីហ៊ុន សែន។ លោកបន្តថា៖
«សំណើរបស់លោកនាយករដ្ឋមន្ត្រី យើងកោះហៅសមាជិករបស់យើង។ ប៉ុន្តែជាធម្មតាវានៅតែ អាស្រ័យទៅលើសមាជិក ថាតើពួកគេចង់ពិចារណាដកករណីពាក្យបណ្តឹងទាំងអស់ចេញពី តុលាការឬយ៉ាងណា។ គ្មាននរណាអាចបង្ខំឱ្យពួកយើងដកករណីពាក្យបណ្តឹងពីតុលាការទេ»។
លោកខេន លូ បានបន្តថា ការបញ្ជៀសជម្លោះគឺជាកិច្ចការដ៏សំខាន់ណាស់ ដើម្បីជៀសវាងការបាត់បង់ផលប្រយោជន៍របស់ភាគីទាំងពីរ ជាពិសេសរោងចក្រមិនអាចផលិត កម្មករមិនបានទទួលប្រាក់ឈ្នួលុ៕