លោកនាយករដ្ឋមន្ត្រី ហ៊ុន សែនបានធានាអះអាងនៅចំពោះមុខសហគមន៍ផ្តល់ជំនួយអន្តរជាតិ អំពីការជំរុញកំណែទម្រង់ ការប្រយុទ្ធប្រឆាំងនឹងអំពើពុករលួយ និងការប្រើប្រាស់ធនធានសហ ប្រតិបត្តិការឱ្យមានប្រសិទ្ធិភាព និងតម្លាភាព។
លោក ជន សក្តា ជូនសេចក្តីរាយការណ៍ដូចតទៅ៖
លោកនាយករដ្ឋមន្ត្រី ហ៊ុន សែនបានសន្យានឹងសហគមន៍ផ្តល់ជំនួយអន្តរជាតិថា លោកបានប្តេជ្ញា ធ្វើកំណែទម្រង់ និងប្រយុទ្ធប្រឆាំងនឹងអំពើពុករលួយ ខណៈដែលកិច្ចប្រជុំប្រទេសផ្តល់ជំនួយប្រចាំ ឆ្នាំ បានចាប់ផ្តើមពិភាក្សាគ្នាអំពីការសន្យាផ្តល់ជំនួយអភិវឌ្ឍន៍ដល់ប្រទេសកម្ពុជានៅថ្ងៃពុធនេះ។
តំណាងជាង១០០នាក់មកពីសហគមន៍ផ្តល់ជំនួយអន្តរជាតិ រួមមានសហរដ្ឋអាមេរិក ប្រទេសចិន ប្រទេសជប៉ុន សហគមន៍អឺរ៉ុប ស្ថាប័នហិរញ្ញវត្ថុអន្តរជាតិ អង្គការសហប្រជាជាតិ និងអង្គការអន្តរ ជាតិ ព្រមទាំងអង្គការមិនមែនរដ្ឋាភិបាលក្នុងស្រុក បានចូលរួមនៅក្នុងវេទិកាកិច្ចសហប្រតិបត្តិការ អភិវឌ្ឍន៍កម្ពុជាលើទី៣ ដែលពួកគេគ្រោងនឹងធ្វើការសន្យាផ្តល់ជំនួយដល់កម្ពុជា នៅចុងបញ្ចប់នៃ កិច្ចប្រជុំរយៈពេល២ថ្ងៃ។
លោកនាយករដ្ឋមន្ត្រី ហ៊ុន សែនបានអានសុន្ទរកថារយៈពេល១ម៉ោងថា រាជរដ្ឋាភិបាលបាន និង កំពុងតែបន្តជំរុញអនុវត្តយ៉ាងម៉ឹងម៉ាត់ និងធ្វើឱ្យកាន់តែស៊ីជជ្រៅ នូវកម្មវិធីកំណែទម្រង់នានា និង ពិចារណាកំណែទម្រង់ទាំងនេះថា ជាបញ្ហាស្លាប់រស់របស់ប្រទេសកម្ពុជា។
សហគមន៍អន្តរជាតិ និងអង្គការមិនមែនរដ្ឋាភិបាលតែងតែទាមទារឱ្យរដ្ឋាភិបាលកម្ពុជាធ្វើកំណែ ទម្រង់នានា ដើម្បីធានាដល់អភិបាលកិច្ចល្អ សំដៅជំរុញកំណើនសេដ្ឋកិច្ច ការអភិវឌ្ឍន៍ប្រកប ដោយចីរភាព និងការកាត់បន្ថយភាពក្រីក្រ។
លោកនាយករដ្ឋមន្ត្រី ហ៊ុន សែន បានបញ្ជាក់ថា យើងមានឆន្ទៈមោះមុត ឥតរាថយក្នុងការអនុវត្ត កំណែទម្រង់នេះ សំដៅឆ្ពោះទៅរកការពង្រឹងអភិបាលកិច្ចល្អ តាមរយៈកំណែទម្រង់រដ្ឋបាលសាធា រណៈ កំណែទម្រង់ការគ្រប់គ្រងហិរញ្ញវត្ថុសាធារណៈ កំណែទម្រង់ការគ្រប់គ្រងដីធ្លី កំណែទម្រង់ ច្បាប់ និងប្រព័ន្ធតុលាការ និងជាពិសេសការប្រយុទ្ធប្រឆាំងអំពើពុករលួយ។
"រាជរដ្ឋាភិបាលបានចាត់ទុកថា ការប្រយុទ្ធប្រឆាំងអំពើពុករលួយនៅតែជាអាទិភាពសំខាន់បំផុត មួយរបស់ខ្លួននៅក្នុងនីតិកាលទី៤នេះ។ រាជរដ្ឋាភិបាលនឹងជំរុញបង្កើនល្បឿននៃការអនុវត្តកម្ម វិធីកំណែទម្រង់របស់ខ្លួន"។
លោកស្រី Annette Dixon នាយិកាធនាគារពិភពលោកប្រចាំកម្ពុជា និងតំណាងដៃគូអភិវឌ្ឍន៍ នៅក្នុងវេទិកាកិច្ចសហប្រតិបត្តិការអភិវឌ្ឍន៍កម្ពុជាលើកទី៣នេះ បានបញ្ជាក់ថា យើងនឹងត្រូវធ្វើ ការពិភាក្សាបន្ថែមលើកំណែទម្រង់ជាគន្លឹះនានា ដែលរាជរដ្ឋាភិបាលកំពុងតែអនុវត្ត ជាពិសេសការធ្វើ វិមជ្ឈការ ការគ្រប់គ្រងហិរញ្ញវត្ថុសាធារណៈ និងការងារកំណែទម្រង់មន្ត្រីរាជការស៊ីវិល។
លោកស្រីបានបន្ថែមថា ការពង្រឹងបន្ថែមលើតម្លាភាព និងគណនេយ្យភាពនៅក្នុងការគ្រប់គ្រង ហិរញ្ញវត្ថុ និងធនធានធម្មជាតិរបស់ប្រទេសកម្ពុជា គឺជាមូលដ្ឋានគន្លឹះសម្រាប់ធានាការរីកលូត លាស់ប្រកបដោយចីរភាព។
ប្រទេសកម្ពុជាត្រូវស្វះស្វែងរកជំនួយទឹកប្រាក់១០០០លានដុល្លារអាមេរិកពីកិច្ចប្រជុំប្រទេសផ្តល់ ជំនួយនេះ ដែលការពិភាក្សាបានផ្តោតទៅលើផែនការយុទ្ធសាស្ត្រអភិវឌ្ឍន៍ជាតិរយៈពេល៥ឆ្នាំ ដែលមានតម្លៃទឹកប្រាក់ជាង៦០០០លានដុល្លារអាមេរិក។
លោកនាយករដ្ឋមន្ត្រី ហ៊ុន សែនបានបញ្ជាក់ថា កម្ពុជាមានការប្តេជ្ញាចិត្តខ្ពស់ក្នុងការប្រើប្រាស់ធន ធានសហប្រតិបត្តិការទាំងអស់នោះ ឱ្យបានប្រកបដោយប្រសិទ្ធិភាព និងភាពស័ក្តិសិទ្ធិបំផុត ដើម្បី ជំរុញកំណើន និងការកាត់បន្ថយភាពក្រីក្ររបស់ប្រជាពលរដ្ឋ។
"រាជរដ្ឋាភិបាលកម្ពុជា សូមផ្តល់នូវការធានាម្តងហើយម្តងទៀតចំពោះការប្រើប្រាស់ធនធាន សហប្រតិបត្តិការដែលផ្តល់ដោយដៃគូអភិវឌ្ឍន៍ ឱ្យបានប្រកបដោយប្រសិទ្ធិភាព តម្លាភាព និង គណនេយ្យភាព"។
នៅក្នុងឆ្នាំ២០០៩ ប្រទេសកម្ពុជាបានទទួលជំនួយប្រមាណ១០០០លានដុល្លារអាមេរិកពីសហគមន៍អន្តរជាតិ។
ពីទីក្រុងភ្នំពេញ ខ្ញុំ ជន សក្តា VOA សំឡេងស.រ.អ.៕