ភ្ជាប់​ទៅ​គេហទំព័រ​ទាក់ទង

លោក​ ហ៊ុន សែន ​ព្រមាន​ថា ​ រដ្ឋ​ប្រហារ​ទម្លាក់​លោក​នឹង​មាន​ការ​បង្ហូរ​ឈាម


ភ្នំពេញ៖ លោក​នាយក​រដ្ឋមន្ត្រី​ ហ៊ុន​ សែន​ នៅ​ថ្ងៃ​ច័ន្ទ​នេះ បាន​បង្ហាញ​មុខនៅ​ក្នុង​ខេត្ត​ស្វាយរៀង​ ដែល​ជា​ការ​បង្ហាញ​មុខជា​សាធារណៈ​លើក​ទី​បី ​ ​បន្ទាប់​ពី​លោក​មាន​ជំងឺ​ផ្ដាសាយ​ប្រភេទ​ថ្មី​AH1N1។​ ​ជំងឺ​នេះ​បាន​សម្លាប់​មនុស្ស​ចំនួន​៦​នាក់​ហើយ​នៅ​ក្នុង​ប្រទេស​កម្ពុជា​ និង​បាន​ឆ្លង​រាល​ដាល​ចំនួន​៦២៣​ករណី​ហើយ​រហូត​ដល់​ថ្ងៃទី​១៤​ខែ​កក្កដា​នេះ។

ក្នុង​ការ​បង្ហាញ​មុខ​លើក​នេះ​ ​លោក​បាន​ព្រមាន​ថា​ ​នឹង​មាន​ការ​បង្ហូរ​ឈាម​ ​ប្រសិន​បើ​មានការ​ប៉ុន​ប៉ង​ធ្វើ​រដ្ឋ​ប្រហារ​ទម្លាក់​លោក​ចេញ​ពីតំណែងនាយក​រដ្ឋ​មន្ត្រី​ ហើយ​លោក​បាន​ប្រកាស​ថា​ លោក​នឹង​ឈរ​ឈ្មោះ​សម្រាប់​បេក្ខ​ជននាយក​រដ្ឋ​មន្ត្រី​នៅ​ឆ្នាំ​២០១៣​និង​២០១៨​ខាង​មុខ​ទៀត។

ការ​បង្ហាញ​មុខ​ជា​លើក​ទី៣​របស់​លោក​នាយក​រដ្ឋមន្រ្តី​ហ៊ុន សែន​ បាន​ធ្វើ​ឡើង​នៅ​ក្នុង​ពិធីសម្ពោធន៍​អាគារ​សិក្សា​និង​ពិធី​ប្រគល់​សញ្ញាប័ត្រ​ដល់​និស្សិត​នៃ​សាកល​វិទ្យាល័យ​មួយ​ក្នុង​ខេត្ត​ស្វាយរៀង។ លោក​នាយករដ្ឋមន្រ្តី​ហ៊ុន សែន បាន​បង្ហាញ​មុខ​លើក​ទីមួយ​ នៅក្នុង​កិច្ច​ប្រជុំ​ប្រចាំ​សប្តាហ៍​ របស់​គណៈរដ្ឋមន្រ្តី​កាលពី​ថ្ងៃសុក្រ​សប្តាហ៍មុន​និង​ការ​បង្ហាញ​មុខ​ជាលើក​ទីពីរ​ នៅ​ក្នុង​ពិធី​បើក​សម្ពោធន៍​សមយុទ្ធ ​ចម្រុះ​ជាតិសាសន៍​ចំនួន២៦​ប្រទេស​ចូលរួម នៅក្នុង​ខេត្ត​កំពង់ស្ពឺ ។

លោក​នាយករដ្ឋមន្រ្តី​ហ៊ុន សែន ​បាន​មាន​ប្រសាសន៍​ នៅ​ថ្ងៃច័ន្ទ​នេះ​ថា អំឡុង​អវត្ត​មាន​របស់​លោក​មួយ​រយៈ​ដោយសារ​ជំងឺ​គ្រុន​ផ្តាសាយ​ថ្មី​AH1N1​នេះ​ ​ មាន​ការ​លើក​ឡើង​ពី​មន្រ្តី​គណបក្ស​ប្រឆាំង​ថា​ ​លោក​ត្រូវ​បាន​ចាប់​ឃុំ​នៅ​ក្នុង​ផ្ទះ​ និង​ជម្លៀស​ចេញ​ទៅក្រៅ​ប្រទេស។

លោក​នាយក​រដ្ឋមន្រ្តី​ហ៊ុន សែន ​បាន​លើកឡើង​ថា​ ​បើសិន​មាន​សកម្មភាព​បែប​នេះ​គឺជា​អំពើ​រដ្ឋ​ប្រហារ។ ​ហើយ​បើ​មាន​ការ​ប៉ុនប៉ង​ធ្វើ​រដ្ឋ​ប្រហារ ​ដើម្បី​ទម្លាក់​លោក​ចេញ​ពី​តំណែង​មែននោះ​ ​វានឹង​មាន​ការ​ផ្ទុះ​អាវុធ។

«ដំណើរ​ការ​ឃុំ​ក្នុង​ផ្ទះ​ ឬ​ចាប់ខ្លួន​នាយក​រដ្ឋមន្រ្តី​ មាន​ន័យ​ថា​ ​រដ្ឋ​ប្រហារ​យោធា​មួយ​ចាប់ផ្តើមហើយ។​ រដ្ឋាភិបាល​រលាយ​ហើយ​ ​ព្រោះ​តំណែង​នាយក​រដ្ឋមន្រ្តី​នៅ​ទំនេរ​ជា​ស្ថាពរ​ ​អញ្ចឹង​សង្រ្គាម​វា​ផ្ទុះ។ ​ហើយ​អ្នកណា​ថ្លើមធំ​ ក្បាល​ប៉ាន​ដែក​ហ៊ាន​ចាប់​ហ៊ុន សែន? ខ្ញុំចង់​សួរ។ ​មាន​តែ​ខ្ញុំ​ចាប់​គេ​ ​តែ​គេ​ចាប់ខ្ញុំ​ គឺគ្មាន​ទេ»។

គណបក្ស​សម រង្ស៊ី ​កាលពី​ថ្ងៃទី​៦​ខែ​កក្កដា​កន្លង​ទៅ​នេះ​ បាន​បើក​កិច្ច​ប្រជុំ​ ​ដើម្បី​ជជែក​អំពី​កិច្ចការ​ផ្ទៃ​ក្នុង​របស់​គណបក្ស ​និង​ប្រធានបទ​មួយ​ចំនួន​ទៀត។ កិច្ច​ប្រជុំ​នេះ​បាន​ជជែក​អំពី​សុខភាព​របស់​លោក​នាយក​រដ្ឋមន្រ្តី​ហ៊ុន សែន។

ការ​បើក​កិច្ច​ប្រជុំ​នេះ​ត្រូវ​បាន​លោក​នាយក​រដ្ឋមន្រ្តី​ហ៊ុន សែន​ ​អត្ថាធិប្បាយ​ថា​ ​ លោក​បានស្តាប់​ឮ​កិច្ច​ប្រជុំ​បន្ត​ផ្ទាល់​តាម​រយៈ​ទូរស័ព្ទ។​ លោក​នាយក​រដ្ឋមន្រ្តី​ហ៊ុន សែន​បាន​ព្រមាន​ដល់​គណបក្ស​ប្រឆាំង​ឲ្យ​ឈប់​ធ្វើ​អត្ថាធិប្បាយ​អំពី​សុខភាព​របស់​លោក។

«ខ្ញុំ​សូម​ផ្តាំ។​ ខ្ញុំ​ព្រមាន​ ព្រមាន​ឈប់​ឲ្យ​ពិភាក្សា​រឿង​... ​ មិនមែន​បិទ​សិទ្ធិ​លោក​ទេ​។ ​ចុះ​បើ​ឯក​ឧត្តម ​លោក​ជំទាវ​ដឹង​ថា គេ​ចាប់​នាយក​រដ្ឋមន្រ្តី​ ម៉េចក៏​មិន​បាតុកម្ម?​ ព្រោះ​រដ្ឋប្រហារ​វា​មក​ដល់​ហើយ»។

ចំណែក​លោក​យឹម សុវណ្ណ ​អ្នក​នាំពាក្យ​និង​ជា​អ្នក​តំណាង​រាស្រ្ត​គណបក្ស​ប្រឆាំង​មិន​បាន​ឆ្លើយ​តប​ទៅ​នឹង​ការ​លើក​ឡើង​របស់​លោក​នាយក​រដ្ឋ​មន្រ្តី​ហ៊ុន សែនទេ។

លោក​យឹម សុវណ្ណ បាន​មាន​ប្រសាសន៍​ថា​ ​ការ​ព្រមាន​នេះ​ គឺជា​សិទ្ធិ​របស់​លោក​នាយក​រដ្ឋមន្រ្តី។ លោក​ទុក​ឲ្យ​ប្រជា​ពលរដ្ឋ​ជា​អ្នក​សម្រេច​វិនិច្ឆ័យ​ទៅចុះ។

«ទុក​ឲ្យ​ប្រជា​ពលរដ្ឋ​ជា​អ្នកវិនិច្ឆ័យ​ ​ពីព្រោះ​ខ្ញុំ​ជឿ​ថា​ ​ប្រជា​ពលរដ្ឋ​ខ្មែរ​ទាំង​១៤​លាន​៥សែន​នាក់​ ចេះ​វិនិច្ឆ័យ​បាន​ត្រឹមត្រូវ»។

ក្នុង​ការ​បង្ហាញ​មុខ​លើក​ទីបី​ នៅ​ថ្ងៃច័ន្ទ​នេះ​ ​លោក​នាយក​រដ្ឋមន្រ្តី​ហ៊ុន សែន ​ក៏​បាន​ប្រកាស​ផងដែរ​ថា​ លោក​នឹង​ឈរ​ឈ្មោះ​ជា​បេក្ខជននាយក​រដ្ឋមន្រ្តី​នៅ​ឆ្នាំ២០១៣​ និង​២០១៨​ខាង​មុខ​ទៀត​ ហើយ​នឹង​ក្លាយ​ជា​នាយក​រដ្ឋមន្ត្រី​ ​ប្រសិនបើ​គណបក្ស​ប្រជាជន​កម្ពុជា​ឈ្នះ​ឆ្នោត៕

XS
SM
MD
LG