ភ្ជាប់​ទៅ​គេហទំព័រ​ទាក់ទង

គណបក្ស​ប្រជាជន​កម្ពុជា​បដិសេធ​ថា​​ខ្លួន​មិន​បាន​បង្កើត​ចារកម្ម​ក្នុង​គណបក្ស​ប្រឆាំង​ទេ


អ្នកគាំទ្រ​គណបក្ស​សម រង្ស៊ី​ ងើយ​ស្វាគម​អ្នកមើល​ពីលើ​នៅ​ជិត​ផ្សារ​មួយ​ក្នុង​​ទីក្រុង​ភ្នំពេញ​ ក្នុងកំឡុង​ពេល​ការប្រជុំគ្នា​​ឃោសនា​បោះឆ្នោត​ ក្នុង​ឆ្នាំ​២០០៨។

មន្ត្រី​គណបក្ស​ប្រជាជន​កម្ពុជា​ហៅ​ការ​ផ្សព្វផ្សាយ​ឯកសារ​សម្ងាត់​អំពី​ការ​ជ្រើសរើស​មន្ត្រី​គណបក្ស​សម​ រង្ស៊ី​ឱ្យធ្វើ​ជា​ចារបុរស​របស់​ខ្លួន​ធ្វើ​ចារកម្ម​ក្នុង​គណបក្ស​សម រង្ស៊ី​នោះ​ថា​ ​ជា​ការ​បង្កាច់​បង្ខូច​គណបក្ស​ប្រជាជន​កម្ពុជា។​ គណបក្ស​សម រង្ស៊ី​បាន​និយាយ​ថា​ ​ការ​លេច​ធ្លាយ​ឯកសារ​សម្ងាត់​របស់​គណបក្ស​ប្រជាជន​កម្ពុជា​នេះ​បាន​បង្ហាញ​ពី​ចេតនា​នយោបាយ​មិនល្អ​មកលើ​គណបក្ស​សម រង្ស៊ី។

នៅ​ថ្ងៃច័ន្ទនេះ​លោក​ង៉ោ សុវណ្ណ ​ទីប្រឹក្សា​របស់​លោក​នាយករដ្ឋមន្ត្រី​ហ៊ុន សែន​បាន​បដិសេធ​ឯកសារសម្ងាត់​លេចធ្លាយ​ដែល​បាន​បង្ហាញ​ពី​មន្ត្រី​ក្រុមប្រឹក្សា​ឃុំ​ចំនួន​២៦​នាក់​របស់​គណបក្ស​សម រង្ស៊ី​នៅ​ ក្នុង​ខេត្តកំពត​ ​និង​ខេត្ត​តាកែវ​ធ្វើ​ចារកម្ម​បម្រើ​គណបក្ស​គ្រប់គ្រង​អំណាច។

លិខិត​ចុះ​ថ្ងៃ​ទី២១ ​ខែធ្នូ ​ឆ្នាំ២០១០​មាន​ហត្ថលេខា​របស់​លោក​ង៉ោ សុវណ្ណ​ ​ទីប្រឹក្សា​របស់​លោក​នាយក​រដ្ឋមន្រី​ហ៊ុន សែន។ លិខិតនេះ​បាន​បង្ហោះ​នៅ​លើ​គេហទំព័រ​ KI-media ​កាលពី​ថ្ងៃអាទិត្យស្តីពី​ដំណឹង​ប្រឆាំង​នឹង​រដ្ឋាភិបាល​ ​ដោយ​ចោទប្រកាន់​ថា​ ​គណបក្ស​គ្រប់គ្រង​អំណាច​គឺ​គណបក្ស​ប្រជាជន​កម្ពុជា​ (CPP)​ បាន​ជ្រើសរើស​មន្ត្រី​គណបក្ស​សម រង្ស៊ី ​ប្រកប​ដោយ​ជោគជ័យ​ ​ឲ្យ​ធ្វើ​ជា​ភ្នាក់ងារ​មុខ​ពីរ​នៅ​ក្នុង​ខេត្ត​កំពត​ និង​ខេត្ត​តាកែវ​ ​ជាថ្នូរ​នឹង​ប្រាក់​ប្រមាណ​៣០​ដុល្លារ​អាមេរិក​ក្នុង​មួយ​ខែ។

លិខិត​នេះ​បាន​កត់​សម្គាល់​ថា​ ​មន្ត្រី​ក្រុម​ប្រឹក្សា​ឃុំ​ចំនួន​១៦​នាក់​របស់​គណបក្ស​សម រង្ស៊ី ​នៅ​ក្នុង​ខេត្ត កំពត​ ​និង​១០​នាក់​ផ្សេង​ទៀត​នៅ​ក្នុង​ខេត្ត​តាកែវ​ បាន​ធ្វើ​ការងារ​នេះ​ជាថ្នូរ​នឹង​ប្រាក់​ប្រមាណ​៣០​ដុល្លារ​អាមេរិក​ក្នុង​មួយ​ខែ។ លោក​នាយក​រដ្ឋមន្ត្រី​ហ៊ុន សែន​បាន​ចុះ​ហត្ថលេខា​នៅ​លើ​យុទ្ធសាស្ត្រ​ជ្រើសរើស​ចារកម្ម​នៅ​ក្នុង​គណបក្ស​សម រង្ស៊ី​នេះ​នៅ​ថ្ងៃ​ទី២៣ ​ខែធ្នូ​ឆ្នាំ២០១០។

លោក​ង៉ោ សុវណ្ណ ​ទីប្រឹក្សា​របស់​លោក​នាយករដ្ឋមន្ត្រី​ហ៊ុន សែន​ ​បាន​ថ្លែង​ថា​ ​លោក​មិនបាន​ដឹង​ពី​ឯកសារនេះ​ទេ​ ​ហើយ​លោក​មិនបាន​ធ្វើ​ឯកសារ​នេះ​ទេ។

លោក​ង៉ោ សុវណ្ណ​បាន​បញ្ជាក់​ថា​ ​វា​ជាការ​បង្កាច់​បង្ខូច​ ​ដើម្បី​កេង​ចំណេញ​នយោបាយ​ ​ហើយ​លោក កំពុង​ពិនិត្យ​មើល​ឯកសារ​ ​ពីព្រោះ​គេអាច​ក្លែងក្លាយ​ឯកសារ ​និង​ហត្ថលេខា​របស់​លោក។

«ខ្ញុំ​សូម​បដិសេធ​ទាំងស្រុង​ថា​ ​ខ្ញុំ​អត់​មាន​បាន​ធ្វើ​របាយ​ការណ៍​បែប​នេះ​ទេ។ ​នេះ​គ្រាន់​តែ​ជា​ការ​បង្កើត ព្រឹត្តិ​ការណ៍​របស់​គេប៉ុណ្ណោះ​ ហើយ​បើ​ជា​របាយ​ការណ៍​របស់​ខ្ញុំ​ ​ហើយ​ខ្លឹមសារ​នៃ​ការងារ​សម្ងាត់​បែប​ នេះ​ ​ខ្ញុំ​មិន​អាច​ធ្វើ​ឱ្យ​បែក​ការណ៍​បាន​ទេ​ ​ហើយ​សួរថា​ ​តើ​គណបក្ស​សម រង្ស៊ី​រក​មធ្យោបាយ​ណា​ដើម្បី យក​ឯកសារ​នេះ​កើត?​ បើ​ជា​ឯកសារ​សម្ងាត់​មិនអាច​បែក​ការណ៍​បាន​ទេ»។

លោក​យឹម សុវណ្ណ​ ​អ្នក​នាំពាក្យ​គណបក្ស​សម រង្ស៊ី​ ​បាន​ថ្លែង​ថា​ ​ឯកសារ​សម្ងាត់​លេច​ធ្លាយ​របស់ គណបក្ស​ប្រជាជន​កម្ពុជា​នេះ​បាន​បង្ហាញ​ពី​ចេតនា​នយោបាយ​មិនល្អ​មក​លើ​គណបក្ស​សម រង្ស៊ី។

«យើង​ត្រូវ​ស៊ើប​អង្កេតព័ត៌មាន​បន្ថែមទៀតដើម្បី​ពិភាក្សា​គ្នា​លើ​ករណីនេះ​ ​ពីព្រោះ​យើង​មាន​យន្តការ​ប្រជា​ធិបតេយ្យ​ផ្ទៃក្នុង។​ មុន​យើង​ធ្វើ​សេចក្តី​សម្រេច​អ្វីមួយ​ ​យើង​ត្រូវតែ​ពិភាក្សា​ ​និង​សួរ​នាំ​គ្នា​ជាមួយ​ ក្រុម​ប្រឹក្សា​ខេត្ត​ ​និង​ក្រុម​ប្រឹក្សា​ស្រុក​ ​ដើម្បី​ឱ្យ​មាន​ព័ត៌មាន​គ្រប់គ្រាន់»។

លោក​ហែម នេន​ ជំទប់​ទី២​ឃុំ​ស្តេចគង់​ខាងលិច​ខាង​គណបក្ស​សម រង្ស៊ី​ នៅក្នុង​ស្រុក​បន្ទាយមាស​ ខេត្ត​កំពត​ ​បាន​ថ្លែងថា​ ​លោក​មិន​បាន​ដឹក​អំពី​ការ​ចូល​ធ្វើ​ជា​ចារកម្ម​ឱ្យ​គណបក្ស​ប្រជាជន​កម្ពុជា​ជាថ្នូរ​នឹង​ប្រាក់​ប្រមាណ​៣០​ដុល្លារ​អាមេរិក​ក្នុង​មួយ​ខែ​នេះ​ទេ។

«ការណ៍​ពិត​របស់​ខ្ញុំ​ ​ខ្ញុំអត់​ក្បត់​ពី​គណបក្ស​សម រង្ស៊ី​ទេ​ ​ពីព្រោះ​ខ្ញុំ​បម្រើ​គោល​នយោបាយ​ឱ្យ​គណបក្ស​សម រង្ស៊ី។ ​តែ​រាល់​ថ្ងៃ​ ​ខ្ញុំជាប់​ក្នុង​រដ្ឋាភិបាល។​ ខ្ញុំ​បម្រើ​រដ្ឋាភិបាល​ ​តែ​ការងារ​បក្ស​ ​ខ្ញុំ​នៅ​ដដែល។​ ខ្ញុំ​អត់​មាន​អ្នកណា​មក​ទិញ​ ​អូសទាញ​ខ្ញុំ​បាន​ទេ»។

សមាជិក​គណបក្ស​ប្រឆាំង​តែងតែ​ចុះ​ចូល​ជាមួយ​គណបក្ស​គ្រប់គ្រង​អំណាច​មុន​ការ​បោះឆ្នោត​ចូល​មក​ដល់។ ​ប្រទេស​កម្ពុជា​នឹង​ធ្វើ​ការ​បោះឆ្នោត​ក្រុម​ប្រឹក្សាឃុំ-សង្កាត់​ និង​ព្រឹទ្ធសភា​នៅ​ក្នុង​ឆ្នាំ​២០១២៕

XS
SM
MD
LG