ភ្នំពេញៈ អង្គការសង្គមស៊ីវិល បានសម្តែងការមិនសប្បាយចិត្តចំពោះការបែងចែកថវិកាតិចតួចសម្រាប់វិស័យកសិកម្មនៅក្នុងសេចក្តីព្រាងច្បាប់ថវិកាជាតិឆ្នាំ២០១១ ដែលជាមូលដ្ឋានគ្រឹះសម្រាប់ជំរុញកំណើន និងការកាត់បន្ថយភាពក្រីក្រ។ គម្រោងថវិកាជាតិឆ្នាំ២០១១ បានបង្កើនថវិកាសម្រាប់វិស័យកសិកម្មលើសឆ្នាំ ២០១០ តែបីលានដុល្លារអាមេរិកប៉ុណ្ណោះ។ អ្នកជំនាញសេដ្ឋកិច្ច និងកសិកម្មបានផ្តល់អនុសាសន៍ដល់រាជរដ្ឋាភិបាលឱ្យបង្កើនថវិកាបន្ថែមទៀតដល់វិស័យកសិកម្ម។
នៅថ្ងៃអង្គារ៍នេះ អង្គការមិនមែនរដ្ឋាភិបាលបានរិះគន់រដ្ឋាភិបាលអំពីការបែងចែកថវិកាតែជាង២៤ លានដុល្លារអាមេរិកនៃថវិកាសរុបជាង២.៤០០លានដុល្លារអាមេរិក នៅក្នុងសេចក្តីព្រាងច្បាប់ថវិកា ជាតិឆ្នាំ២០១១ទៅឱ្យក្រសួងកសិកម្មដែលជាមូលដ្ឋានគ្រឹះសម្រាប់ជំរុញកំណើនសេដ្ឋកិច្ចជាតិ និងការកាត់បន្ថយភាពក្រីក្រនៅកម្ពុជា។
លោក ឈិត សំអាត នាយកវេទិកានៃអង្គការមិនមែនរដ្ឋាភិបាលស្តីពីកម្ពុជា បានថ្លែងពីទស្សនៈវិស័យ ស្តីពីសេចក្តីព្រាងច្បាប់ថវិកាជាតិឆ្នាំ២០១១ថា រាជរដ្ឋាភិបាលគួរផ្តល់អាទិភាពដល់វិស័យកសិកម្ម សំដៅធានាសន្តិសុខស្បៀង សម្រាប់ប្រជាកសិករ និងការកាត់បន្ថយភាពក្រីក្រតាមរយៈការបង្កើន ថវិកាបន្ថែមទៀតដល់វិស័យកសិកម្ម។
«ខ្ញុំសូមផ្តល់អនុសាសន៍មួយចំនួនចំពោះរាជរដ្ឋាភិបាល ដើម្បីឱ្យថវិកាជាតិរបស់ យើងបម្រើផលប្រយោជន៍របស់ប្រជាពលរដ្ឋក្រីក្រ។ រាជរដ្ឋាភិបាលកម្ពុជានិងរដ្ឋសភា គួរតែបែងចែកថវិកាបន្ថែមទៀតដល់វិស័យកសិកម្មជាពិសេសដោយមានសមាមាត្រទៅនឹងចំនួនបុគ្គលិក និងតម្រូវ ការជាក់ស្តែងនៅថ្នាក់ក្រោមជាតិ ដូចជា សេវាផ្សព្វផ្សាយបច្ចេកទេសកសិកម្ម ស្រាវជ្រាវ និងសិក្សា»។
រាជរដ្ឋាភិបាលកម្ពុជា បានបង្កើតគោលនយោបាយនាំអង្ករចេញឱ្យសម្រេចបានមួយលានតោនក្នុង មួយឆ្នាំនៅឆ្នាំ២០១៥។ ប្រជាពលរដ្ឋខ្មែរប្រមាណ៨៥ភាគរយរស់នៅក្រីក្រតាមតំបន់ជនបទ និង ប្រកបរបរកសិកម្មសម្រាប់ចិញ្ចឹមជីវិតប្រចាំថ្ងៃ។
កាលពីខែតុលា ប្រទេសកម្ពុជា និងប្រទេសចិនបានចុះហត្ថលេខាលើកិច្ចព្រមព្រៀងស្តីពីការនាំអង្ករកម្ពុជាទៅកាន់ប្រទេសចិនប្រកបដោយគុណភាព និងអនាម័យ។
លោក ច័ន្ទ សុផល ប្រធានសមាគមសេដ្ឋកិច្ចកម្ពុជា បានថ្លែងថា ការបែងចែកថវិកាសម្រាប់វិស័យ កសិកម្ម ដែលជួយដោយផ្ទាល់ដល់កសិករតូចតាចនោះនៅមានកម្រិតតិចនៅឡើយ។
«បើសិនជា វិស័យកសិកម្មបានថវិកា១០លានដុល្លារអាមេរិកបន្ថែមទៀត សម្រាប់មន្ត្រីកសិកម្មធ្វើការផ្សព្វផ្សាយកសិកម្មនិងជួយបម្រើកសិករតូចតាចប្រហែលជាបានទិន្នផល និងលទ្ធផលខ្ពស់មែនទែន ការបន្ថែមថវិកាត្រឹម១០លានដុល្លារអាមេរិកទៅ២០លានដុល្លារអាមេរិកនេះ មើលទៅមិនបញ្ហាចោទ ទេដោយសារយើងមានថវិកាបម្រុង១០០លានដុល្លារអាមេរិកក្នុងមួយឆ្នាំៗដែលយើងមិនទាន់បែងចែក»។
លោកជាម យៀប ប្រធានគណៈកម្មការសេដ្ឋកិច្ច និងហិរញ្ញវត្ថុនៃរដ្ឋសភា បានថ្លែងថារាជរដ្ឋាភិបាល ខំប្រឹងប្រែងលើកកម្ពស់វិស័យកសិកម្ម ដោយខំបង្កើនថវិកាសម្រាប់វិស័យកសិកម្មដល់ជាង២៤លាន ដុល្លារអាមេរិកក្នុងឆ្នាំ២០១១ពីចំនួនជាង២១លាន ដុល្លាអាមេរិកក្នុងឆ្នាំ២០១០។
«សេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០១១នេះ គឺជាមូលដ្ឋានគ្រឹះខាងសេដ្ឋកិច្ច របស់រដ្ឋាភិបាលកម្ពុជាក្នុងគោលបំណងធានាឱ្យបាននូវកំណើនសេដ្ឋកិច្ចប្រកបដោយចីរភាព និងការ ធានាឱ្យបាននូវការលើកកម្ពស់ វិស័យកសិកម្ម ការកាត់បន្ថយអត្រានៃភាពក្រីក្រឱ្យបានលើសពីមួយ ភាគរយក្នុងមួយឆ្នាំ»។
លោកយ៉ង់ សាំងកុមា ប្រធានមជ្ឈមណ្ឌលសិក្សា និងអភិវឌ្ឍន៍កសិកម្មកម្ពុជា បានថ្លែងថា ថវិកាជាង ២៤លានដុល្លារអាមេរិកនេះ មានចំនួនតិចតួចណាស់សម្រាប់វិស័យកសិកម្មដែលរាជរដ្ឋាភិបាលគួរ តែបង្កើនថវិកាបន្ថែមទៀត។
«យើងចង់ឃើញឱ្យថវិកាកើនឱ្យបានច្រើនសម្រាប់វិស័យកសិកម្មនៅមូលដ្ឋាន ដើម្បីឱ្យមានមន្ត្រីកសិ កម្មចុះធ្វើការងារជាមួយកសិករពន្យល់ណែនាំការងារបច្ចេកទេសមានការខ្វះខាតខ្លាំងមែនទែន»។
តាមការស្រាវជ្រាវរបស់ធនាគារពិភពលោក បានបង្ហាញថា ការចំណាយលើការផ្សព្វផ្សាយកសិកម្ម ទទួលបានផលចំណេញខ្ពស់។ បើចំណាយមួយដុល្លារធ្វើការផ្សព្វផ្សាយកសិកម្ម វាទទួលបានផល ចំណេញបួនដុល្លារមកវិញ៕