ភ្ជាប់​ទៅ​គេហទំព័រ​ទាក់ទង

កម្ពុជា​ច្រាន​ចោល​ការទាមទារ​របស់​ក្រុម​សិទ្ធិ​មនុស្ស​លើ​បញ្ហា​ជនជាតិ​វីហ្គ័រ


បុរស​​ជន​ជាតិ​ភាគ​តិច​ Uighur ម្នាក់​កំពុង​មើល​បដា​ផ្សាយ​ឃោសនា​របស់​រដ្ឋាភិបាល​ចិន​ក្នុង​ទី​ក្រុង​ Hotan ប្រទេស​ចិន។

មន្រ្តី​ជាន់ខ្ពស់​សំខាន់ៗ​របស់​រដ្ឋាភិបាល​កម្ពុជា​នៅ​ថ្ងៃអង្គារ៍​នេះ​បាន​បញ្ចេញ​ប្រតិកម្ម​រិះគន់​រួម​គ្នា​ពាក់ព័ន្ធ​ទៅ​នឹង​សេចក្តី​ថ្លែងការណ៍​របស់​អង្គការ​ឃ្លាំមើល​ការរំលោភ​សិទ្ធិមនុស្ស​អន្តរជាតិ​មួយ​ដែល​មាន​ឈ្មោះ​ថា​ Human Rights Watch​ ថា​មាន​ភាព​លំអៀង​និង​ទម្លាក់​ការទទួលខុសត្រូវ​មកលើ​រដ្ឋាភិបាល​កម្ពុជា។

កាល​ពី​ថ្ងៃសុក្រ​សប្តាហ៍​មុន​នេះ​ពី​បូរី​ញ៉ីវយ៉ក​សហរដ្ឋ​អាមេរិក​ អង្គការ ​Human Rights Watch​បាន​ចេញសេចក្តី​ថ្លែងការណ៍​មួយ​ដោយ​បាន​ដាក់​ចំណង​ជើងថា​ប្រទេស​ចិន​ត្រូវតែ​ទទួលខុសត្រូវ​ចំពោះ​ការបាត់​ខ្លួន​ជនជាតិ​ចិន​ភាគតិច​វីហ្គ័រ (Uighur)។

អង្គការ​ដដែល​នេះ​បាន​និយាយថា​រយៈពេល​មួយ​ឆ្នាំ​បន្ទាប់​ពី​ជនជាតិ​ចិន​ភាគតិចវីហ្គ័រ​ចំនួន​២០​នាក់​ដែល​បាន​ចាប់​បញ្ជូន​ចេញ​ដោយ​បង្ខំ​ពី​ប្រទេស​កម្ពុជា រដ្ឋាភិបាល​ចិន​បាន​ព្យាយាម​លាក់កំបាំង​នូវ​ព័ត៌មាន​ទាំង​នេះ។

អង្គការ ​Human Rights Watch​ បាន​ស្តី​បន្ទោស​ដល់​ប្រទេស​កម្ពុជា​ថា​ការចាប់បញ្ជូន​ចេញ​នូវ​ជនជាតិ​ចិន​ភាគតិចវីហ្គ័រ​ទៅ​កាន់​ប្រទេស​ចិន​ថា​បាន​ទទួល​រង​នូវ​សម្ពាធ​ពី​រដ្ឋាភិបាល​ចិន​ ហើយ​កម្ពុជា​មិន​បាន​គោរព​ ទៅ​តាម​សន្ធិសញ្ញា​ក្រុង​ហ្សឺណែវ​ដែល​ប្រទេស​កម្ពុជា​បាន​ចុះ​ហត្ថលេខា​តាំង​ពី​ឆ្នាំ១៩៥១។

លោក​កុយ គួង ​អ្នកនាំពាក្យ​ក្រសួង​ការបរទេស​កម្ពុជា​បាន​និយាយ​ថា​កម្ពុជា​និ​ងចិន​មាន​អធិបតេយ្យ​ភាព​របស់​ខ្លួន​រៀងៗ​ខ្លួន​ ដូច្នេះ​គ្មាន​ប្រទេស​ណាមួយ​ដាក់​ការគៀប​សង្កត់​មកលើ​ប្រទេស​ណាមួយ​ទេ។

លោក​បាន​មាន​ប្រសាសន៍​ថា​កម្ពុជា ​ជា​សមាជិក​អនុសញ្ញា​ក្រុង​ហ្សឺណែវ​ មែន​ ក៏ប៉ុន្តែ​កម្ពុជា​មាន​ច្បាប់​អន្តោ​ប្រវេសន៍​របស់​ខ្លួន​ផងដែរ។

«ពួក​អ្នក​ទាំងនោះ​ស្ថិត​នៅ​ក្នុង​ប្រទេស​កម្ពុជា​ គឺ​ស្ថិត​នៅ​ក្រោម​អធិបតេយ្យភាព​ពេញលេញ​របស់​កម្ពុជា។ តែ​ពេល​អ្នក​ទាំង​នោះ​ស្ថិត​នៅក្នុង​ប្រទេស​ចិន​គឺ​ស្ថិត​នៅក្រោម​អធិបតេយ្យភាព​ពេលលេញ​របស់​ប្រទេស​ចិន។ ដូច្នេះ​កម្ពុជា​ ក៏​មិនមាន​អ្វី​សួរ​ដេញដោល​ទៅ​ជ្រៀតជ្រែក​កិច្ចការ​ផ្ទៃក្នុង​ចិន​ហើយ​ចិន​ក៏គ្មាន​កាតព្វកិច្ច​អ្វី​រាយការណ៍​ជូន​ប្រទេស​កម្ពុជា​វិញដែរ»។

រហូត​មក​ដល់​ពេល​នេះ​អស់​រយៈពេល​មួយ​ឆ្នាំ​គត់ ​បន្ទាប់ពី​ជនជាតិ​ចិន​ភាគតិចវីហ្គ័រ​ត្រូវ​បាន​ចាប់​បញ្ជូន​ចេញពី​ប្រទេស​កម្ពុជា​ក្រោយ​ពី​ពួកគេ​បាន​ស្នាក់នៅ​ក្រោមការ​មើលថែ​ពី​អង្គការ​សហប្រជាជាតិ​ទទួល​បន្ទុក​ជនភៀស​ខ្លួន​ដែល​ហៅ​កាត់​ថា ​UNHCR ​អស់​រយៈពេល​ចំនួន​មួយខែ។

លោក​ខៀវ កាញារីទ្ធ ​អ្នកនាំពាក្យ​រដ្ឋាភិបាល​កម្ពុជា​ បាន​និយាយថា ​អង្គការ​ឃ្លាំមើល​ការរំលោភ​សិទ្ធិមនុស្ស​នេះ​មិន​គួរ​ទម្លាក់​កំហុស​មកលើ​រដ្ឋាភិបាល​កម្ពុជា​តែ​ម្នាក់ឯង​ទេ។

«ជា​ផ្លូវច្បាប់​យើង​ត្រូវ​ប្រគល់​ឲ្យគេ។ ​ប្រទេស​ចិន​និង​កម្ពុជា ​មាន​ចំណង​ទាក់ទង​នឹងគ្នា។ ​អញ្ចឹង​កម្ពុជា​គ្មាន​ហេតុផលអ្វី​ថា​មិន​បញ្ជូន​គេ​ទៅវិញ។ ​អញ្ចឹង​សូម​កុំ​ទម្លាក់​រឿង​ហ្នឹង​មក​លើ​កម្ពុជា​ទាំងអស់​នោះ។ ដោះ​ស្រាយ​មិនចេញ​ឲ្យ​គេ​លាង​គូថ​ខ្លួន​ឯង​ម្តេច​កើត»។

លោក​ឧត្តមសេនីយ៍ឯក​ខៀវ សុភ័គ ​អ្នក​នំាពាក្យ​ក្រសួង​មហាផ្ទៃ​បាន​មាន​ប្រសាសន៍​ថា​ ការបញ្ជូន​ចេញជនជាតិ​ចិន​ភាគតិច​វីហ្គ័រ ​គឺ​យើង​អនុវត្ត​ទៅតាម​ច្បាប់​របស់​ប្រទេស​កម្ពុជា។

កាលពី​ឆ្នាំ​ទៅ​ជនជាតិ​ចិន​វីហ្គ័រ​ចំនួន​២១រូប​បាន​ភៀស​ខ្លួន​ចេញ​ពី​ខេត្ត​ស៊ីនជាង ​(Xingiang)​ ដែល​ជា​តំបន់ រំជើប​រំជួល​មួយ​របស់​ប្រទេស​ចិន​រួច​ហើយ​បាន​មក​ស្នាក់​នៅ​ក្នុង​ប្រទេស​កម្ពុជា​ក្រោម​ការគ្រប់គ្រង​របស់ អង្គការ​សហ​ប្រជា​ជាតិ​ទទួល​បន្ទុក​ជន​ភៀសខ្លួន។

លោក​ចាន់ សាវ៉េត​ មន្រ្តី​ឃ្លាំមើល​ការរំលោភ​សិទ្ធិ​មនុស្ស​របស់​សមាគម​សិទ្ធិ​មនុស្ស​ ADHOC ​បាន និយាយ​ថា​រដ្ឋាភិបាល​កម្ពុជា​អាច​សុំ​ការពន្យល់​ពី​រដ្ឋាភិបាល​ចិន​ថាតើ​សេចក្តីសុខ​របស់​ជនជាតិ​ចិនវីហ្គ័រ​ទាំង​២០រូប​ នឹង​ទៅ​ជា​យ៉ាង​ណា​ក្នុង​នាម​ជា​ប្រទេស​មាន​ទំនាក់ទំនង​ល្អ​ជាមួយ​គ្នា។

«គឺ​យើង​នៅ​តែ​មាន​ការទទូច​ស្នើ​សុំ​ឲ្យ​រដ្ឋាភិបាល​យើង​នេះ​បង្កើន​ការគោរព​ច្បាប់​ដែល​ខ្លួន​បាន​ចុះ​ហត្ថលេខា​ទទួល​ស្គាល់​មិនអាច​ធ្វើឲ្យ​ខុស​ពី​ច្បាប់​ហ្នឹង​បានទេ។ ហើយ​បើសិន​ជា​ការអនុវត្ត​ផ្ទុយ​នឹង​ច្បាប់ អន្តរជាតិ​ដែល​យើង​បាន​ទទួល​ស្គាល់​ហើយ​យើង​នៅតែ​ប្រព្រឹត្ត​នូវ​អំពើ​រំលោភ​សិទ្ធិ​មនុស្ស​ វា​ធ្វើឲ្យ​មានការ​ រិះគន់​ហើយ។​ ហើយ​ការរិះគន់​នេះ​វា​ធ្វើឲ្យ​ប៉ះពាល់​ដល់​កិត្តិយស​របស់​ប្រទេស​យើង»។

កាលពី​សបា្តហ៍​មុន ​លោក​នាយក​រដ្ឋមន្រ្តី​ហ៊ុន សែន ​បាន​ទៅ​បំពេញ​ទស្សនកិច្ច​ជាផ្លូវការ​នៅក្នុង​ប្រទេស​ចិន​ ដោយ​ពាំនាំ​មក​វិញ​នូវ​ប្រាក់​ជំនួយ​និង​ទឹកប្រាក់​វិនិយោគប្រមាណ​៦០០​លាន​ដុល្លារ​សហរដ្ឋ​អាមេរិក។

លោក​កុយ គួង ​បាន​មាន​ប្រសាសន៍​ថា​រដ្ឋាភិបាល​កម្ពុជា​មិនបាន​និយាយ​ជាមួយ​រដ្ឋាភិបាល​ចិន​អំពី ជនជាតិ​ចិនវីហ្គ័រ​ទេ​នៅ​ពេល​ដែល​លោក​នាយក​រដ្ឋមន្រ្តី​ហ៊ុន សែន​ បាន​ទៅ​បំពេញ​ទស្សនកិច្ច​ជាផ្លូវការ​ នៅ​ក្នុង​ប្រទេស​ចិននោះ៕

XS
SM
MD
LG