ភ្ជាប់​ទៅ​គេហទំព័រ​ទាក់ទង

រដ្ឋាភិបាល​ខ្មែរ​ព្រមាន​មន្រ្តី​សិទ្ឋិ​មនុស្ស​អ.​ស.ប.


ភ្នំពេញ៖ លោក​ហោ ណាំហុង ឧបនាយក​រដ្ឋមន្រ្តី​ និង​ជា​រដ្ឋមន្រ្តី​ក្រសួង​ការបរទេស​កម្ពុជា ​បាន​ព្រមាន​នៅ​ថ្ងៃព្រហស្បតិ៍នេះ​ថា រដ្ឋាភិបាល​កម្ពុជា​នឹង​ចាត់​វិធានការ​ទៅ​លើ​វត្តមាន​របស់​តំណាង​ការិយាល័យ​សិទ្ឋិ​មនុស្ស​របស់​អង្គការ​សហប្រជាជាតិ​នៅ​កម្ពុជា គឺ​លោក​គ្រិស្តូហ្វ ប៉េសូ​(Christophe Peschoux)។

សេចក្តី​ព្រមាន​នេះ ធ្វើ​ឡើង​មួយ​ថ្ងៃ​ប៉ុណ្ណោះ បន្ទាប់​ពី​លោក​គ្រិស្តូហ្វ ប៉េសូ បាន​ធ្វើ​សេចក្តី​អត្ថាធិប្បាយ​មួយ​ នៅ​ក្នុង​កាសែត​ ដឺ ខាមបូឌា ដេលី (The Cambodia Daily) ទាក់ទង​ទៅ​នឹង​ការ​ចាប់​ខ្លួន​ជនជាតិ​ថៃ​ចំនួន​ពីរ​នាក់ដោយ​អាជ្ញាធរ​ប៉ូលីស​កម្ពុជា​ ពី​បទ​ប៉ុនប៉ង​ដាក់​បំផ្ទុះ​គ្រាប់​បែក​នៅ​ទី​ស្នាក់ការរបស់​គណបក្ស​ជា​ដៃគូ នៅ​ក្នុង​រដ្ឋាភិបាល​ក្រុង​បាងកក​កាល​ពីខែមុន ដែល​អំពើ​នេះ ត្រូវបាន​រដ្ឋាភិបាល​កម្ពុជា​ចាត់​ទុក​ថា​ គឺ​ជា​អំពើ​ភេរវកម្ម ​ហើយ​ជនជាតិ​ថៃ​ទំាង​ពីរ​ ត្រូវ​បាន​រដ្ឋាភិបាល​កម្ពុជា​បញ្ជូន​ទៅ​ឲ្យ​អាជ្ញាធរ​ ប្រទេស​ថៃ​វិញ កាល​ពីថ្ងៃ​ចន្ទ័សប្តាហ៍​នេះ។

លោក​គ្រិស្តូហ្វ ប៉េសូ បាន​មាន​ប្រសាសន៍​នៅ​ក្នុង​កាសែត ដឺ ខាមបូឌា ដេលី ចេញ​ផ្សាយ​នៅ​ថ្ងៃ​ពុធ​ថា​ ការ​បញ្ជូន​ជន​សង្ស័យ​ជនជាតិ​ថៃ​ទាំង​ពីរ ដែល​ត្រូវ​ចាប់​ខ្លួន​ដោយ​អាជ្ញាធរ​កម្ពុជា​នោះ​ ធ្វើ​ឲ្យ​មាន​កង្វល់​ថា​ វា​ហាក់​បីដូច​ជា​មិន​បាន​ធ្វើ​ដោយ​នីតិ​វិធី​ត្រឹមត្រូវ ដែល​ធានា​ទៅ​លើ​ភាព​ត្រឹម​ត្រូវ​តាម​ច្បាប់​ និង​ការ​ការពារ​សិទ្ឋិ​ទៅ​លើ​ជន​សង្ស័យ​ទាំង​ពីរ​នាក់​នោះ​ទេ។

នៅ​ក្នុង​លិខិត​មួយ​ច្បាប់​ ផ្ញើ​ជូន​លោក​តំណាង​ការិយាល័យ​សិទ្ឋិ​មនុស្ស​អង្គការ​សហប្រជាជាតិ​ កាល​ពីថ្ងៃ​ព្រហស្បតិ៍​នេះ លោក​ហោ ណាំហុង បានព្រមាន​ថា សកម្មភាព​របស់​លោក​គ្រិស្តូហ្វ ប៉េសូ ​អាច​ធ្វើ​ឲ្យ​រដ្ឋាភិបាល​កម្ពុជា​ សម្រេចចិត្ត​ចំពោះ​វត្តមាន​របស់​លោក​នៅ​ក្នុង​ប្រទេស​កម្ពុជា។

លោក​ប្រមុខ​ការទូត​ខ្មែរ​បាន​រំឮក​បន្ថែម​ថា​ បេសកកម្ម​របស់​លោក​គ្រិស្តូហ្វ ប៉េសូ ក្នុង​នាម​ជា​តំណាង​ការិយាល័យ​សិទ្ឋិ​មនុស្ស​អង្គការ​សហប្រជាជាតិនៅកម្ពុជា​ គឺ​ដើម្បី​ធ្វើ​កិច្ច​សហ​ប្រតិបត្តិការ​ផ្នែក​បច្ចេកទេស​តែប៉ុណ្ណោះ។

លោក​ហោ ណាំហុង បាន​បញ្ជាក់​បន្ថែម​ទៀត​ថា ការ​បញ្ជូន​ខ្លួន​ជន​សង្ស័យ​ទៅ​ឲ្យ​អាជ្ញាធរ​ថៃ​អំពី​បទ​ភេរវកម្ម​ គឺ​ជា​សិទ្ឋិ​អធិបតេយ្យ​កម្ពុជា ​ហើយ​គឺជា​កិច្ច​ការ​ដែល​ទាក់ទង​ទៅ​នឹង​នយោបាយកម្ពុជា ដោយ​ផ្អែក​ទៅ​លើ​ភស្ថុតាង​ដែល​ប្រទេស​ថៃ បាន​ប្រគល់​ឲ្យ​ទាក់ទងនឹងជន​សង្ស័យ​ទាំងពីរ។

លោក​គ្រិស្តូហ្វ ប៉េសូ​ ​មិន​ធ្វើ​អត្ថាធិប្បាយ​អ្វី​មួយ​ឡើយ​ទាក់ទង​ទៅ​នឹង​សេចក្តី ​ព្រមាន​របស់​ក្រសួង​ការបរទេស​កម្ពុជានេះ។ នៅ​ក្នុង​ចម្លើយ​តាម​សារអេឡិចត្រូនិច​ លោក​គ្រិស្តូហ្វ ប៉េសូ គ្រាន់​តែ​បញ្ជាក់​ថា​ លោក​បាន​ទទួល​លិខិត​ព្រមាន​ពី​លោក​ហោ ណាំហុង​ រួច​ហើយ​នៅ​ថ្ងៃនេះ​ ក៏ប៉ុន្តែ​លោក​មិន​ចង់​ធ្វើ​អត្ថាធិប្បាយ​បន្ថែម​លើស​ពីនេះ​ទេ។

សូម​បញ្ជាក់​ថា កាល​ពី​ពេល​ថ្មីៗ​នេះ លោក​នាយករដ្ឋមន្រ្តី​ហ៊ុន សែន ​បាន​វាយ​ប្រហារ​ខ្លាំងៗ​ទៅ​លោក​អ្នករាយការណ៍​ពិសេស​ផ្នែក​សិទ្ឋិ​មនុស្ស​របស់​អង្គការ​សហប្រជាជាតិ​នៅ​កម្ពុជា​ គឺ​លោក​ស៊ុយ៉ា ស៊ុបិឌី (Surya Subedi) បន្ទាប់​ពី​លោក​ស៊ុយ៉ា ស៊ុបិឌី បាន​សម្តែង​ការ​ខកចិត្ត ​ដោយ​មិន​បាន​ជួប​រូប​លោក​នៅ​ក្នុង​អំឡុង​ពេល​បេសកកម្ម​រយៈពេល​១០ថ្ងៃ​របស់​លោក។ កាលពី​ពេល​កន្លង​ទៅលោក​ហ៊ុន សែន ​ធ្លាប់​បាន​ចាត់​ទុក​ថា​ បេសក​ជន​សិទ្ឋិ​មនុស្ស​របស់​អង្គការសហប្រជាជាតិ​ គឺ​ជា​ទេសចររយៈពេល​វែង​នៅ​កម្ពុជា​ ហើយ​លោក​នឹង​មិន​ពិចារណា​អំពី​ការ​បិទ​ទ្វារ​ការិយាល័យ​សិទ្ឋិ​មនុស្ស​របស់​អង្គការ​សហប្រជា​ជាតិ​នៅ​កម្ពុជា​នោះទេ។

XS
SM
MD
LG