ភ្ជាប់​ទៅ​គេហទំព័រ​ទាក់ទង

រដ្ឋា​ភិបាល​តែង​តាំង​ឯក​អគ្គ​រាជ​ទូត​ថ្មី​បីនាក់


ឯក​អគ្គ​រាជ​ទូត​កម្ពុជា​តែង​តាំង​ថ្មី​ចំនួន​៣រូប​ នឹង​ជួប​ជា​មួយប្រធាន​រដ្ឋ​សភា​លោក​ហេង ​សំរិន​ នៅ​ សប្តាហ៍​ក្រោយ​នេះ ​ដើម្បី​ស្វះ​ស្វែង​រក​ការ​ណែ​នាំ​យោបល់​ពីប្រធាន​រដ្ឋ​សភា​សម្រាប់​ជា​មូលដ្ឋាន​គ្រឹះ​បំពេញ​បេសក​កម្ម​ការ​ទូត​របស់​អស់​លោក​នៅ​បរទេស។

ឯក​អគ្គ​រាជ​ទូត​ថ្មី​ទាំង​៣​រូប​នេះ​នឹង​ជួប​សម្តែង​ការ​គួរ​សម​ជា​មួយ​ប្រធាន​រដ្ឋ​សភា​លោក​ ហេង ​សំរិន​ នៅ​ថ្ងៃ​ទី​១៨ ​ខែ​ឧសភា​នេះ។​ តាម​ទម្លាប់​ឯក​អគ្គ​រាជ​ទូត​តែង​តាំង​ថ្មី​ត្រូវ​សុំ​ការ​ណែ​នាំ​ពី​ព្រះ​មហា​ក្សត្រ​ ​ប្រធាន​ព្រឹទ្ធ​សភា ​ជា ស៊ីម ប្រធាន​រដ្ឋ​សភា ​ហេង ​សំរិន ​ ​នាយក​រដ្ឋ​មន្ត្រី ​ហ៊ុន ​សែន​ និង​រដ្ឋ​មន្ត្រីក្រសួង​ការ​បរទេស ​មុន​ពេល​ចេញ​ដំណើរ​ទៅ​បំពេញ​បេសក​កម្ម​ការ​ទូត​នៅ​បរទេស។

ឯក​អគ្គ​រាជ​ទូត​ថ្មី​ទាំង​៣​រូប​នេះ​ រួម​មាន​លោក​ស្រី ​ហៃ ​សុន្នារិន្ទ ​ប្រធាន​ផ្នែកកិ​ច្ច​ការ​ប្រទេសនិយាយ​ភាសា​បារាំង​នៃ​ក្រសួង​ការ​បរទេស​ ត្រូវ​បាន​តែង​តាំង​ជា​ឯក​អគ្គ​រាជ​ទូត​ប្រចាំ​នៅ​ប្រទេស​គុយបា​ជំនួសលោក​ ប្រេស ​ម៉ានូឡា។ ​លោក​ ថៃ​ វណ្ណា ​ប្រធាន​នាយក​ដ្ឋាន​បុគ្គ​លិក​នៃ​ក្រសួង​ការ​បរទេស​ត្រូវ​បាន​តែង​តាំង​ជា​ឯក​អគ្គ​រាជ​ទូត​ប្រចាំ​នៅ​សហ​ព័ន្ធ​រុស្ស៊ី​ជំនួស​លោក​ ខៀវ​ ថវិកា​ និង ​លោក ​ហើស​ សេរីធន​ ប្រធាន​នាយក​ដ្ឋាន​កិច្ច​ការ​អាស៊ី​សម្រាប់​ទំនាក់​ទំនង​ទ្វេ​ភាគី​ជា​មួយ​ប្រទេស​ជាសមាជិក​អាស៊ាន​នៃ​ក្រសួង​ការ​បរទេស​ ត្រូវ​បាន​តែង​តាំង​ជា​ឯក​អគ្គ​រាជ​ទូត​ប្រចាំ​នៅ​ប្រទេស​ហ្វី​លីពីន​ ជំនួស​លោក​ អ៊ិន​ ម៉យ។

លោក ​កួយ ​គួង ​អនុ​រដ្ឋ​លេខាធិ​ការ​ និង​ជា​អ្នក​នាំ​ពាក្យ​ក្រសួង​ការ​បរទេស ​បាន​ថ្លែង​ថា​ ឯក​អគ្គ​រាជទូត​ថ្មី​ទាំង​៣​រូប​នេះ ​មាន​បទ​ពិសោធន៍​ខាង​កិច្ច​ការ​ទំនាក់​ទំនង​ការ​ទូត ​និង​ការ​ងារ​ទូត​គ្រប់​គ្រាន់​ និងបាន​បម្រើ​ការ​នៅ​ក្នុង​ក្រសួង​ការ​បរទេស​តាំង​ពី​ទស​វត្ស​ឆ្នាំ​១៩៨០។

"លោក​ត្រូវ​ទៅ​ជំនួស​ឯក​អគ្គ​រាជ​ទូត​ចាស់។​ ឯក​អគ្គ​រាជ​ទូត​ថ្មី​ទាំង​៣​រូប​នេះ​មាន​បទ​ពិសោធន៍យូរ​ឆ្នាំ​ទាំង​កិច្ច​ការ​បរទេស ​កិច្ច​ការ​ទំនាក់​ទំនង​បរទេស ​និង​កិច្ចការ​ទូត​ដែល​មាន​បទ​ពិសោធន៍ច្រើន​ណាស់"។

លោក​ ឈាង​ វុន​ ប្រធាន​គណៈ​កម្មការ​កិច្ច​ការ​បរទេស ​សហ​ប្រតិ​បត្តិ​ការ​អន្តរ​ជាតិ ​និង​ព័ត៌មាន​នៃរដ្ឋ​សភា​ខាង​គណ​បក្សប្រជាជនកម្ពុជាបាន​ថ្លែង​ថា ​ លោក​ ហេង​ សំរិន​ ប្រធាន​រដ្ឋ​សភា​ នឹង​ណែ​នាំ​ឱ្យ​ឯក​អគ្គ​រាជ​ទូត​គ្រប់​រូប​ឱ្យ​ខិត​ខំ​ប្រឹង​ប្រែង​ការ​ពារ​កិត្តិយស​របស់​ប្រទេស​ជាតិ ​ធ្វើ​ទំនាក់​ទំនង​ល្អ​ជា​មួយ​ម្ចាស់​ប្រទេស​ ការ​ពារ​សិទ្ធិ​របស់​ប្រជា​ពល​រដ្ឋ​ខ្មែរ​ ដែល​រស់​នៅ​បរទេស ​ ធ្វើ​ទំនាក់​ទំនង​ល្អ​ជា​អ្នក​ វិនិ​យោគ​របស់​ប្រទេស​ដែល​ខ្លួន​តាំង​នៅ​ និង​ទាក់​ទាញ​អ្នក​វិនិយោគ​ឱ្យ​មក​បណ្តាក់​ទុន​នៅ​កម្ពុជា។

លោក​ ឈាង​ វុន ​បាន​បញ្ជាក់​ថា​ ទំនាក់​ទំនង​និង​កិច្ច​សហ​ប្រតិ​បត្តិ​ការ​វិនិយោគ​នេះ​ មាន​សារៈ​ សំខាន់​ណាស់​ ពីព្រោះ​យើង​ត្រូវ​ការ​វិនិយោគ​មក​ជួយ​ធ្វើ​ការ​អភិវឌ្ឍ​ប្រទេស​ជាតិ​របស់​យើង​ ដើម្បីបង្កើត​ការ​ងារ​ជូន​ប្រជា​ពល​រដ្ឋ​របស់​យើង។

"ប្រទេស​របស់​យើង​ត្រូវ​ការ​ទុន​និង​ធនធាន។ ​ដូច្នេះ​កិច្ច​សហ​ប្រតិ​បត្តិ​ការ​ល្អ​ជា​មួយ​ប្រទេសដែល​យើង​តាំង​នៅ ​ដើម្បី​ឱ្យ​ប្រទេស​នោះ​ជួយ​យើង​ជា​ជំនួយ​មាន​សំណង​ក្តី​ និង​ជំនួយ​ឥត​សំណង​ក្តី​ គឺមាន​សារៈ​សំខាន់​ណាស់។ ​យើង​ត្រូវ​ជំរុញ​ឱ្យ​អ្នក​វិនិយោគ​ឯកជនមក​វិនិយោគ​នៅ​កម្ពុជា​ ពីព្រោះជំនួយ​មិន​អាច​ឋិតថេរ​យូរ​អង្វែង​ទៅ​កើត​ទេ។​ ប៉ុន្តែ​វិនិយោគ​ទុន​ឯក​ជន​បង្កើត​ការ​ងារ​ឱ្យ​ប្រជា​ពល​រដ្ឋ​យើង ​គឺ​ជា​ការងារ​យូរ​អង្វែង​សម្រាប់​ប្រទេស​ជាតិ​យើង​រស់​ជា​អ្នក​ជា​បាន"។

លោក​ហៃ វណ្ណា ​ដែល​បាន​តែង​តាំង​ជា​ឯក​អគ្គ​រាជ​ទូត​ថ្មី​ ប្រចាំ​នៅ​សហ​ព័ន្ធ​រុស្ស៊ី ​បាន​ថ្លែង​ថា ​ពួក​លោក​នឹង​ទទួល​យក​ការ​ណែនាំ ​និង​បទ​ពិសោធន៍​ល្អ​ពី​លោក ​ហេង ​សំរិន ​នៅ​ពេល​លោក​ចូល​ជួប​ជា​មួយ​ប្រធាន​រដ្ឋ​សភា​នៅ​សប្តាហ៍​ក្រោយ​នេះ។

XS
SM
MD
LG