ភ្ជាប់​ទៅ​គេហទំព័រ​ទាក់ទង

កម្មករ​កាត់​ដេរ​ធ្វើ​កូដកម្ម​ទាមទារ​ដំណើង​ប្រាក់​ឈ្នួល


កម្មករ​ធ្វើ​បាតុកម្ម​ប្រឆាំង​ការ​រំលោភ​សិទ្ធិ​ការងារ។

ក្រុម​កម្មករ​កាត់​ដេរ​សម្លៀក​បំពាក់​ បាន​ធ្វើកូដកម្ម​ឈាន​ដល់​ថ្ងៃទីពីរ​ហើយ ​ដើម្បី​ទាម​ទារ​ប្រាក់​ឈ្នួល​រហូត​ដល់​៩៣​ដុល្លារ​អាមេរិក​។

លោក អាត់​ ធន់​ ប្រធាន​សហភាព​ការងារ​កម្ពុជា​ ដែល​ជាអ្នក​ផ្ដួចផ្ដើម​ឲ្យ​មាន​កូដ​កម្ម​នេះ​បាន​និយាយ​ថា​ ចំនួន​កម្មករ​ចូល​រួម​ធ្វើកូដ​កម្ម​បាន​កើន​ឡើង​រហូត​ដល់៤៥%​បើ​ប្រៀប​ធៀប​កាល​ពី​ថៃចន្ទ។​ ក៏ប៉ុន្តែ​សមាគម​កាត់​ដេរ​កម្ពុជា​បាន​និយាយ​ថា ចំនួន​កម្មករ​បានថយ​ចុះដោយ​កន្លែង។ ការ​ធ្វើ​កូដ​កម្ម​ថៃ្ងទី​ពីរ​នេះ ​មិន​មាន​អំពើ​ហិង្សា​កើត​ឡើង​រវាង​ក្រុម​កម្មករ និង​អាជ្ញាធរ​ទេ។

«ការទាមទារ​ថ្ងៃនេះ ​គឺ​មិនមែន​តែ​សម្រាប់​យើងទេ ​គឺ​សម្រាប់​កូនយើង​ សម្រាប់​ខ្លួន​យើង សម្រាប់​កូនចៅ​យើង​ ក្រោយៗ​មកទៀត»។

នៅតាម​បណ្តោយ​ផ្លូវ​ជាតិ​លេខ២ ពី​ទីក្រុង​ភ្នំពេញ​ឆ្ពោះ​ទៅ​ខេត្ត​កណ្តាល កម្មករ​កាត់ដេរ​ជាច្រើន​រាប់​ស៊ិប​នាក់ នៅ​តាម​បណ្តា​រោងចក្រ​មួយ​ចំនួន​ បាន​បន្ត​ធ្វើ​កូដកម្ម​របស់​ខ្លួន​ឈាន​ដល់​ថ្ងៃ​ទីពីរ​ហើយ ។

ក្រុម​កម្មករ បាន​ចាក់​ឧគ្ឃោសនាសព្ទ​បំពង​សំឡេង និង​ចង​បដា​ជា​ច្រើន​ផ្ទាំង នៅ​តាម​បណ្តា​រោងចក្រ​មួយ​ចំនួន​ ដើម្បី​ទាមទារ​ឲ្យ​ដំឡើង​ប្រាក់​បៀវត្សរ៍​រហូតដល់​៩៣ដុល្លារ​អាមេរិក​ក្នុង​មួយខែ​ ក្រោម​ការ​ឃ្លាំ​មើល​ពី​កម្លាំង​សមត្ត្ថកិច្ច​ប្រដាប់​ដោយ​អាវុធ​ជាច្រើន​រាប់សិប​នាក់។​ ក៏​ប៉ុន្តែ​ពុំ​ទាន់​មាន​របាយការណ៍​ អំពី​អំពើ​ហិង្សា និង​ការប៉ះទង្គិច​គ្នារ​វាង​ក្រុមកម្មករ​ និង​អាជ្ញាធរ​មាន​សមត្តកិច្ចទេ។

កញ្ញា​ម៉ាង សារី​ អាយុ​៣០ឆ្នាំ​ ជា​កម្មករ​កាត់ដេរ​សម្លៀកបំពាក់​មួយ​នៅ​ក្រុមហ៊ុន​ Golden Brother Investment ​បាន​ថ្លែងប្រាប់វីអូអេ​សំឡេង​សហរដ្ឋអាមេរិក​ថា នៅថ្ងៃនេះ​ មាន​ការ​ចូល​រួម​របស់​ក្រុម​កម្មករ​ ប្រហែល​ជាង​៣០០នាក់។ កញ្ញា​បានឲ្យ​ដឹង​ទៀតថា​ កម្មករ​មិន​ចូល​ធ្វើការ​ទេ​ នៅ​ក្នុង​រយៈពេល​ប៉ុន្មាន​ថ្ងៃ​ខាងមុខ​នេះ ពីព្រោះគេ​ចង់​ទាមទារ​ឲ្យ​ក្រុម​កម្មករ​ទាំងអស់​មាន​ប្រាក់ឈ្នួល​សមរម្យ។ កញ្ញាថ្លែង​ដូច្នេះ​ថា៖

«គោល​បំណង​ដែល​ធ្វើហ្នឹង ធ្វើ​ដើម្បី​ទាមទារ​ប្រាក់ខែ​ពី​៧៥​ឡើង​ទៅ​ដល់​៩៣ដុល្លារ។ មាន​លុយ​អតីតភាព​១០ដុល្លារ ​ហើយ​លុយ​មួយឆ្នាំ​ពីរ​ដុល្លារ​ថែម»។

កំពុង​តែ​ឈរ​នៅ​មុខ​រោងចក្រ​របស់​ខ្លួន​អ្នកស្រី​ខិន សាវង ​អាយុ​៣៣ឆ្នាំ​ បាន​និយាយ​ថា ​បច្ចុប្បន្ន​ ប្រាក់​បៀវត្សរ៍​របស់​កម្មករ​មិនអាច​ចំណាយ​គ្រប់គ្រាន់​សម្រាប់​ជីវភាព​របស់​ពួកគេ​ទេ។ អ្នកស្រី​និយាយ​បណ្តើរ​ បាន​បង្ហាញ​បង្កាន់ដៃ​បើក​ប្រាក់​បណ្តើរ។ អ្នកស្រី​និយាយថា នៅខែ​នេះអ្នកស្រី​ទទួល​បាន​ប្រាក់​បៀរវត្សរ៍​តែ​៥៤ដុល្លារ​ប៉ុណ្ណោះ​។ អ្នកស្រី​បាន​និយាយ​ទៀត​ថា ប្រាក់​ខែ​ទាំង​នេះ​មិន​អាច​ធ្វើ​ឲ្យ​ជីវភាព​របស់​យើង​រស់​នៅ​បាន​សមរម្យ​ឡើយ ។ អ្នកស្រី​ថ្លែង​ថា៖

«ការទិញ​ម្ហូប​អាហារ​ប្រចាំ​ថ្ងៃហ្នឹង ​ធម្មតា​លុយ​តិច​ យើង​ត្រូវ​រិះថាំ ​អាច​ជួប​វិបត្តិ​ពេល​ដែលយើង​មាន​ជំងឺខ្វះ​ជីវជាតិ​ យើង​មិនអាច​មាន​កម្លាំង​ធ្វើការ​គ្រប់គ្រាន់​ទេ ឧស្សាហ៍​ឈឺ យើង​ត្រូវការ​លុយ​ព្យាបាល​ជម្ងឺ​ទៀត»។

សហព័ន្ឋ​សហជីព​ សមាគម ​និង​សហភាព​រោងចក្រ​កាត់ដេរ​ចំនួន​១៣​ បាន​ប្រកាស​ធ្វើ​កូដកម្មចំនួន​ប្រាំថ្ងៃ​ ហើយ​ក្រោយ​មក​មិន​បាន​កំណត់​រយៈពេល​ទេ ដើម្បី​ទាមទារ​ប្រាក់​ជីវភាព​ឲ្យ​បាន​សមរម្យ​ រហូត​ដល់​៩៣ដុល្លារ​ ប្រាក់​អតីតភាព​ការងារ​មួយឆ្នាំ​ពីរដុល្លារ​ ប្រាក់​ម៉ោង​បន្ថែម​សម្រាប់​បាយ​ប្រចាំ​ថ្ងៃ មួយម៉ោង​១០០០រៀល ​និង​ប្រាក់​ការងារ​ទៀងទាត់​មួយខែ​១០ដុល្លារ។

លោក​អាត់ ធន ​ប្រធាន​សហភាព​ការងារ​កម្ពុជា​ បាន​និយាយថា ​ការ​ចូល​រួម​របស់​ក្រុម​កម្មករ​ បាន​កើន​ឡើង​ប្រមាណ​៤៥% ​បើ​ធ្វើការ​ប្រៀប​ធៀប​កាលពី​ថ្ងៃ​ចន្ទ។ លោក​បាន​បញ្ជាក់ថា ​នៅថ្ងៃ​អង្គារ៍នេះ​ ក្រុម​កម្មករ​ចូល​រួម​ប្រមាណ​ជាង​១០ម៉ឺននាក់​ និង​ចំនួន​១០៣​រោងចក្រ ​នៅក្នុង​ចំណោម​រោងចក្រ​សរុប​ចំនួន​ជាង៣០០។ លោក​អាត់​ ធន​ បន្ថែម​ថា៖

«គឺការ​ធ្វើនេះ ​យើង​អត់​ទៀងទេមក​ដល់​ពេលនេះ ​គឺ​ខ្ញុំ​សូម​និយាយ​ថា បើ​មាន​ការចរចា​គ្នាណាមួយ​សមរម្យ​នោះ​ គឺ​យើង​អាច​ឈប់​មុនក៏ថា​បាន។ ហើយ​បើសិន​ជា​គ្មាន​ការជជែក​ពិភាក្សា​គ្នា​ទេ គឺវា​អាច​នឹង​លើស​ពីការ​កំណត់​ថ្ងៃ​របស់​យើង»។

លោក​ជាតិ ខេមរា ​មន្រ្តី​ជាន់ខ្ពស់​នៃ​សមាគម​រោងចក្រ​កាត់ដេរ​កម្ពុជា​ បាន​មាន​ប្រសាសន៍​ថា​ ការ​ចួល​រួម​របស់​ក្រុម​កម្មករ​មាន​ការ​ថយចុះ​នៅ​កន្លែង​មួយ​ចំនួន។ លោក​ឲ្យ​ដឹង​ថា ការទាមទារ​របស់​កម្មករ​នឹង​ធ្វើឲ្យ​ពួកគេ​ខាតបង់​ផល​ប្រយោជន៍។ លោក​បន្តថា៖

«យើង​មិនចង់​ឲ្យ​គាត់​ធ្វើ​អ្វី​ដែល​មិន​ស្រប​ទៅតាម​នីតិ​វិធី​ទេ​ ហើយ​ធ្វើ​ឲ្យ​ជីវភាព​ច្របូក​ច្របល់​ នៅ​ក្នុង​សន្តិសុខ​សាធារណៈ​ ឬ​ក៏​របៀប​របប​សង្គម​ យើង​អត់ចង់​ឃើញ​អញ្ចឹង​ទេ​ យើង​ចង់​ឲ្យ​ឃើញ​មាន​ការ​របៀប​រៀបរយ ​ស្ងាត់ស្ងៀម​ដំណើការ​ល្អ ដើម្បី​កុំឲ្យ​ប៉ះពាល់​ទៅ​ដល់​ផលប្រយោជន៍​និយោជក​ ក៏ដូចជាផល​ប្រយោជន៍​កម្មករ​នយោជិត​ទូទៅ» ។

លោក​អ៊ុំ មាន ​រដ្ឋលេខាធិការ​ក្រសួង​ការងារ ​មិន​អាច​ស្នើសុំដើម្បី​សេចក្តី​អត្ថាធិប្បាយ​បំភ្លឺ​បាន​ទេ។ ចំណែក​លោក​ខៀវ សាវុធ ​អនុ​ប្រធាន​នាយកដ្ឋាន​វិវាទ​ការងារ​របស់​ក្រសួង​ការងារ​បាន​បដិសេធការ​ធ្វើ​អត្ថាធិប្បាយ​ណា​មួយជុំវិញ​ការ​ធ្វើកូដកម្ម​របស់​ក្រុម​កម្មករ​ទេ៕

XS
SM
MD
LG