ភ្ជាប់​ទៅ​គេហទំព័រ​ទាក់ទង

វិនិយោគិន​បារាំង​ចង់​ពង្រីក​ការ​រកស៊ី​នៅ​កម្ពុជា​ ​ក្នុង​ទិវា​ប្រទេស​បារាំង


រថយន្ត​ដឹក​ប្រេ​ង​សាំងតូតាល់​ដែល​ជា​ក្រុម​ហ៊ុនប្រេង​​សាំង​បារាំង​។

ភ្នំពេញ៖ សហគមន៍​អ្នក​ជំនួញ​របស់​ប្រទេស​បារាំង​ គ្រោង​នឹង​រៀបចំ​ទិវា​ប្រទេស​បារាំង​ដ៏ធំ​មួយ​ជា​លើក​ដំបូង​នៅ​ក្នុង​ប្រទេស​កម្ពុជា​ ​ក្នុង​រយៈ​ពេល​ប្រាំថ្ងៃ​ ​ចាប់​ពី​ចុង​សប្ដាហ៍​នេះ​ទៅ។​ ទិវា​នេះជា​ឱកាស​នៃ​ការ​សម្លឹង​រក​ច្រក​ពង្រីក​ការ​រកស៊ី​របស់​ពួក​គេ​នៅ​ក្នុង​ប្រទេស​កម្ពុជា​ផង​ដែរ។

ក្រុមហ៊ុន​សំខាន់ៗ​របស់​ប្រទេស​បារាំង​សរុប​ចំនួន​៣៥​គ្រោង​នឹង​ធ្វើ​ពិធី​តាំង​ពិព័រណ៍​ដ៏​ធំ​មួយ​នៅ​ក្នុង​ទីក្រុង​ភ្នំពេញ​ ​នៅ​ចុង​សប្ដាហ៍​នេះ​ ​ដើម្បី​អបអរ​ទិវាសួស្ដី​ឡាហ្វ្រង់​ឬសួស្ដី​ប្រទេស​បារាំង​ ក្នុង​គោល​ដៅ​ដើម្បី​ជំរុញ​ការ​ពង្រីក​ពាណិជ្ជ​កម្ម​ទ្វេភាគី​ និង​បង្កើន​ទំនាក់​ទំនង​វប្បធម៌។​ ​នេះ​បើ​យោង​តាម​ការ​អះអាង​របស់​ក្រុម​មន្ដ្រី​ស្ថានទូត​បារាំង​ ​នៅ​ថ្ងៃ​ច័ន្ទ​នេះ។

នៅ​ក្នុង​ព្រឹតិ្ត​ការណ៍​រយៈ​ពេល​មួយ​សប្ដាហ៍នេះ​ គឺ​គិតចាប់​ពី​ថ្ងៃ​សុក្រ​ទី២៩​ ខែ​តុលា​ រហូត​ដល់​ថ្ងៃ​ទី៧​ ខែវិច្ឆកា​នេះ​ ​ក្រុមហ៊ុន​បារាំងទាំង​នោះ​នឹង​បង្ហាញពី​ផលិត​ផល​របស់​ពួក​គេ​ដែល​នាំ​ចូល​មក​កាន់​ទីផ្សារ​ក្នុង​ប្រទេស​កម្ពុជា​ ​មាន​ការ​ប្រឡង​ធ្វើ​ម្ហូប​ ​មាន​ការ​រៀបចំ​ប្រគុំ​តន្ដ្រី ​និង​ការ​រៀបចំ​អាហារ​ពេល​ល្ងាច​ផង​ដែរ។

លោក​ដូមីនិក ​ម៉ាស ​ភារធារី​ស្ដីទី​អម​ស្ថានទូត​បារាំង​ប្រចាំ​ក្រុង​ភ្នំពេញ​ ​មាន​ប្រសាសន៍​ក្នុង​សន្និសីទ​សារ​ព័ត៌មាន​កាល​ពី​ព្រឹកមិញ​ថា​ ​នេះ​គឺជា​ការ​រៀបចំ​សម្រាប់​បង្កើត​ជា​ទិវា​សេដ្ឋ​កិច្ច​ផង​ ​និង​វប្បធម៌​ផង។

"គោល​បំណង​គឺថា​ដើម្បី​ពង្រឹង​ទំនាក់ទំនង​ពាណិជ្ជ​កម្ម​រវាង​ប្រទេស​បារាំង ​និង​ប្រទេស​កម្ពុជា​ ​ហើយ​នៅក្នុង​ប៉ុន្មាន​ថ្ងៃ​នៃ​សប្ដាហ៍​នេះ ​គឺជា​មធ្យោបាយ​មួយ​សម្រាប់​ពួក​យើង​ដើម្បី​ពង្រឹង​ការ​ផ្លាស់​ប្ដូរ​វប្បធម៌​គ្នា​ផង​ដែរ"។

ទិវា​ប្រទេស​បារាំង ​ឬ​ហៅថា​ ​សួស្ដី​ឡាហ្វ្រង់​នេះ​ ​ធ្វើ​ឡើង​ស្រប​ពេល​ដែល​ប្រទេស​កម្ពុជា​ត្រូវ​ប្រារព្ធ​បុណ្យ​ឯករាជ្យ​ជាតិ​ ​នៅ​ថ្ងៃទី​៩ វិច្ឆិកា​ ដែល​ជា​ទិវា​ឯករាជ្យ​ដណ្ដើម​បាន​ពី​ប្រទេស​បារាំង​កាល​ពី​ឆ្នាំ​១៩៥៣​ ​បន្ទាប់​ពី​បារាំង​ដាក់​អាណានិគម​អស់​រយៈ​ពេល​៩០​ឆ្នាំ។

ក្រុមហ៊ុន​ដែល​ចូល​រួម​នឹង​ធ្វើ​សកម្ម​ភាព​ផ្សេងៗ​គ្នា​នៅ​ទីតាំង​សរុប​ចំនួន​៣៣​កន្លែង​ស្ទើរ​គ្រប់​ជ្រុង​នៃ​ប្រជុំ​ជន​ទីក្រុង​ភ្នំពេញ​ ​ក្នុង​ឱកាស​ទិវា​សួស្ដី​ឡាហ្វ្រង់​នេះ។

ក្រុមហ៊ុន​បារាំង​បាន​នាំ​ផលិត​ផល​នានា​ចូល​មក​កាន់​ទីផ្សារ​ប្រទេស​កម្ពុជា​កាល​ពី​ឆ្នាំ​ ២០០៩​សរុប​ចំនួន​៥០​លានអឺរ៉ូ ​ឬ​ស្មើ​នឹង​៧០​លាន​ដុល្លារ។ ​ផលិតផល​ដែល​នាំ​ចូល​ពី​ប្រទេស​បារាំង​ ​សំខាន់​ជាង​គេ​ គឺ​ថ្នាំពេទ្យ ​និង​គ្រឿង​សម្អាង​កាយ។​ ដោយ​ឡែក​ការ​នាំ​ចេញ​របស់​កម្ពុជា​ឆ្ពោះ​ទៅ​កាន់​ទៅ​ផ្សារ​បារាំង​ ​រួម​មាន​សម្លៀក​បំពាក់ ​និង​ផលិត​ផល​កសិកម្ម ​ដែល​មាន​ទំហំ​ទឹកប្រាក់​សរុប​ចំនួន​៨២​លាន​អឺរ៉ូ ​កាល​ពី​ឆ្នាំ​មុន​ ​ឬ​ស្មើ​នឹង​ជិត​ ១១៥​លាន​ដុល្លារ​អាមេរិក។

លោក​ដូមីនិក ម៉ាស​មាន​ប្រសាសន៍​ថា​ ​ក្រុមហ៊ុន​បារាំង​នឹង​ស្វែងរក​ឱកាស​វិនិយោគ​បន្ថែម​ទៀត​នៅ​ប្រទេស​កម្ពុជា​ ​ក្នុង​ឱកាស​នៃ​ទិវា​សួស្ដី​ឡាហ្វ្រង់​នេះ។

លោក​ស្រី​ អាលីន ពែរ៉ែត​(Aline Perrette)​ទីប្រឹក្សា​រង​ផ្នែក​សេដ្ឋ​កិច្ច​អម​ស្ថានទូត​បារាំង​មាន​ប្រសាសន៍​ថា​ ​ទីក្រុង​ភ្នំពេញ​នឹង​ក្លាយ​ជា​ទីក្រុង​នាំមុខ​មួយ​ដែល​ត្រូវការ​វិនិយោគិន​កាន់តែ​ច្រើន​បន្ថែម​ទៀត​ ​ហើយ​នឹង​ត្រូវ​ការ​ផលិត​ផល​ពី​ប្រទេស​បារាំង​ផង​ដែរ។

បច្ចុប្បន្ន​មាន​ក្រុមហ៊ុន​បារាំង​សរុប​ប្រមាណ​ជា​៥០​ក្រុមហ៊ុន​កំពុង​រកស៊ី​បណ្ដាក់ទុន​នៅ​ក្នុង​ប្រទេស​កម្ពុជា​ ​ក្នុង​នោះ​មាន​ក្រុមហ៊ុន​ធំៗ​ ​ដូចជា​ក្រុមហ៊ុន​សាងសង់ ​និង​គ្រប់គ្រង​ព្រលាន​យន្ដហោះ​ ​ក្រុមហ៊ុន​ប្រេង​ឥន្ធនៈ ​និង​ក្រុមហ៊ុន​វិនិយោគ​ផ្នែក​កសិកម្ម​ជាដើម៕

XS
SM
MD
LG