ប្រជាពលរដ្ឋនៅក្នុងខេត្តប៉ៃលិន បានអះអាងថា អតីតមេដឹកនាំខ្មែរក្រហមកំពូលៗគឺជាអ្នកស្នេហាជាតិ ហើយមិនមែនជាឃាតករសម្លាប់ប្រជាពលរដ្ឋខ្មែរប្រមាណ២លាននាក់នោះទេ។ ដូច្នេះ ពួកគេបានស្នើឲ្យសាលាក្តីខ្មែរក្រហមស្រាវជ្រាវរកភស្តុតាងបន្ថែមទៀតជុំវិញសំណុំរឿងក្តីលេខ០០២ដែលជាប់ពាក់ព័ន្ធនឹងអតីតមេដឹកនាំកំពូលៗទាំងនោះ ដើម្បីស្វែងរកអ្នកទទួលខុសត្រូវពិតប្រាកដ។
ក្នុងដំណើរប៉ាក់ប៉ើកៗ លោក ផង់ ភឿន កំពុងដើរចេញពីអគារសាលាខេត្តប៉ៃលិន បន្ទាប់ពីបានចូលរួមក្នុងវេទិកាសាធារណៈមួយដែលគេរៀបចំឡើងនៅទីនេះ កាលពីសប្ដាហ៍មុន។
ដោយពិការជើងស្តាំដោយសារជាន់ម៉ីននៅពេលប្រយុទ្ធគ្នាជាមួយកងទ័ពរដ្ឋាភិបាលក្នុងឆ្នាំ១៩៨៨ លោកផង់ ភឿន បច្ចុប្បន្នវ័យ៤៩ឆ្នាំគឺជាអតីតទាហានខ្មែរក្រហមម្នាក់ ដែលរស់នៅក្នុងភូមិបរហ៊ុយត្បូង សង្កាត់បរយ៉ាខា ក្រុងប៉ៃលិន។
លោក ផង់ ភឿន បានមានប្រសាសន៍នៅក្នុងបទសម្ភាសន៍មួយជាមួយ VOA ថា អតីតមេដឹកនាំខ្មែរក្រហមមិនមែនជាអ្នកសម្លាប់ប្រជាជនកម្ពុជាប្រមាណ២លាននាក់នោះទេ។ តែផ្ទុយទៅវិញ លោកអះអាងថា ពួកគេគឺជាអ្នកស្នេហាជាតិ និងជាអ្នកការពារទឹកដី ពីការរំលោភបំពានពីសំណាក់បរទេសទៅវិញទេ។
«ខ្មែរក្រហមធ្វើដើម្បីស្នេហាជាតិ អត់មានការសម្លាប់មនុស្ស សម្លាប់អីទេ ព្រោះតស៊ូគឺស្នេហាជាតិតាំងពីអតីតព្រោះអី ទាហានខ្មែរក្រហម មេៗមួយចំនួនហ្នឹង គាត់ធ្វើដឹងតែស្នេហាជាតិ ការពារជាតិ ការពារប្រជាជន។ គាត់មិនមែនអតីតជា លោភលន់ ចង់កាប់សម្លាប់ប្រជាពលរដ្ឋអីទេ។ »
កាលពីថ្ងៃទី១៦ ខែកញ្ញា សហចៅក្រមស៊ើបអង្កេតនៃសាលាក្តីខ្មែរក្រហមបានចោទប្រកាន់ជាផ្លូវការ និងបញ្ជូនមេដឹកនាំកំពូលៗនៃរបបខ្មែរក្រហមចំនួន៤រូប ទៅជំនុំជម្រះក្តី ពីបទអំពើប្រល័យពូជសាសន៍ ឧក្រិដ្ឋកម្មប្រឆាំងមនុស្សជាតិ និងបទល្មើសផ្សេងៗមួយចំនួនទៀត រួមមានមនុស្សឃាត ការធ្វើទារុណកម្មនិងការធ្វើទុក្ខបុកម្នេញខាងសាសនាជាដើម។
ជនជាប់ចោទទាំងបួននាក់នេះ រួមមាន លោក ខៀវ សំផន អតីតប្រមុខរដ្ឋ របស់ខ្មែរក្រហម លោក នួន ជា អតីតប្រធានសភា លោក អៀង សារី អតីតឧបនាយករដ្ឋមន្រ្តី និងជារដ្ឋមន្រ្តីការបរទេស និងភរិយារបស់គាត់គឺ លោកស្រី អៀង ធិរិទ្ធ អតីតរដ្ឋមន្រ្តីសង្គមកិច្ចរបស់ខ្មែរក្រហម។
ការកាត់ទោសជនជាប់ចោទទាំងបួននាក់នៅក្នុងសំណុំរឿងលេខ០០២នេះ គ្រោងនឹងចាប់ផ្តើមធ្វើនៅដើមឆ្នាំក្រោយ បន្ទាប់ពីសំណុំរឿងលេខ០០១ ដែលជាប់ពាក់ព័ន្ធនឹងអតីតមេគុកទួលស្លែង លោកកាំង ហ្កេកអ៊ាវ ហៅឌុចត្រូវបានបិទបញ្ចប់ជាស្ថាពររួចហើយនោះ។
មានប្រជាជនខ្មែរប្រមាណ២លាននាក់បានស្លាប់និងត្រូវបានសម្លាប់យ៉ាងអាណោចអធម៌នៅក្នុងរបបកម្ពុជាប្រជាធិបតេយ្យឬសម័យខ្មែរក្រហមនៅចន្លោះឆ្នាំ១៩៧៥ដល់១៩៧៩ ក្រោមការគ្រប់គ្រងរបស់បងធំទី១ ប៉ុល ពត និងអតីតមេដឹកនាំកំពូលៗដែលកំពុងរង់ចាំការកាត់ទោសទាំងនេះ។
ប៉ុន្តែ សម្រាប់លោក ផង់ ភឿនវិញ អតីតមេដឹកនាំខ្មែរក្រហមកំពូលៗទាំង៤នេះ នៅតែជាអ្នកស្នេហាជាតិ និងជាអ្នកការពារទឹកដីដដែល បើទោះជាលោកបានបាត់បង់សមាជិកគ្រួសារមួយចំនួននៅក្នុងរបប៣ឆ្នាំ ៨ខែនិង២០ថ្ងៃនោះក៏ដោយ។
លោកផង់ ភឿន អតីតទាហានខ្មែរក្រហមនៅក្នុងខេត្តប៉ៃលិននេះបានលើកឡើងថា ការសម្លាប់រង្គាលអាយុជីវិតប្រជាជនខ្មែររាប់លាននាក់នោះគឺកើតឡើងដោយសារអំពើក្បត់របស់ថ្នាក់ក្រោមតែប៉ុណ្ណោះ។
«ខ្មែរក្រហមធ្វើដើម្បីជាតិ កងទ័ពធ្វើដើម្បីជាតិ ប៉ុន្តែ អ្នកក្បត់ហ្នឹងគឺក្បត់ផ្សេងពីកងទ័ពដែលខ្ញុំធ្វើហ្នឹង។ កងទ័ពដឹងតែស្នេហាជាតិ តែអ្នកក្បត់នៅខាងក្រោម។»
ទោះបីជារបបកម្មុយនីសខ្មែរក្រហមបានដួលរលំទៅនៅឆ្នាំ១៩៧៩ហើយក៏ដោយ ក៏ខេត្តប៉ៃលិន នៅតែជាមូលដ្ឋានដ៏រឹងមាំបំផុតមួយរបស់ខ្មែរក្រហម រហូតដល់ឆ្នាំ១៩៩៦ ជាពេលដែលភាគីខ្មែរក្រហមដឹកនាំដោយលោក អៀង សារី បានព្រមចុះចាញ់ហើយបានចុះចូលជាមួយរដ្ឋាភិបាល។
បច្ចុប្បន្ន ភាគច្រើនក្នុងចំណោមប្រជាពលរដ្ឋជាង៧ម៉ឺននាក់ដែលរស់នៅក្នុងខេត្តនេះ គឺជាអតីតកម្មាភិបាលនិងកងទ័ពខ្មែរក្រហម។
លោក ម៉ី មគ្គ អភិបាលរងខេត្តប៉ៃលិន មានប្រសាសន៍នៅក្នុងបទសម្ភាសន៍មួយថា សាលាក្តីខ្មែរក្រហម គួរតែធ្វើការស្រាវជ្រាវរកភស្តុតាងឲ្យបានល្អិតល្អន់បន្ថែមទៀតនៅក្នុងករណីលេខ០០២នេះ ដើម្បីផ្តល់យុត្តិធម៌ដ៏ត្រឹមត្រូវមួយ សម្រាប់អតីតមេដឹកនាំកំពូលៗទាំងបួននៃរបបខ្មែរក្រហមនោះ ដោយលោកចាត់ទុកថា ពួកគេក៏ជាជនរងគ្រោះនៅក្នុងរបបកម្ពុជាប្រជាធិបតេយ្យនោះផងដែរ។
«បើកាត់ទោស មេត្តារកយុត្តិធម៌ឲ្យបានច្បាស់ទី១។ ទី២គឺស៊ើបអង្កេតឲ្យបានកាត់តែទូលំទូលាយ ដូចជាឯកឧត្តម ខៀវ សំផនអីរវៃទូរស័ព្ទ ចាត់ចែងការងារ រដ្ឋបាល ឃើញគាត់ដូចមិនមានអីទេ ព្រោះរបបជំនាន់ហ្នឹងស្ថិតក្នុងរបបកម្មុយនីស គឺស្ថិតនៅក្រោមលេខាធិការបក្សជាអ្នកចាត់ចែងការងារនិងសម្រេច គ្មាននរណាហ៊ានក្អកបានទេ អ្នកដទៃទៀតគឺធ្វើ។»
លោក Andrew Cayley សហព្រះរាជអាជ្ញាអន្តរជាតិនៃសាលាក្តីខ្មែរក្រហម មានប្រសាសន៍ថា សហចៅក្រមស៊ើបអង្កេតនៃសាលាក្តីខ្មែរក្រហមបានរកឃើញភស្តុតាងគ្រប់គ្រាន់ហើយដើម្បីបញ្ជាក់ថា ជនជាប់ចោទទាំងបួននាក់នោះ ពិតជាបានប្រព្រឹត្តអំពើឧក្រិដ្ឋដូចដែលបានចោទប្រកាន់នោះ។
យោងតាមដីកាដំណោះស្រាយឬដីកាបញ្ជូនរឿងទៅជំនុំជម្រះរបស់សហចៅក្រមស៊ើបអង្កេត សម្រាប់សំណុំរឿងលេខ០០២ ភស្តុតាងនៅក្នុងសំណុំរឿងនេះ រួមមាន៖ កំណត់ហេតុជាលាយលក្ខណ៍អក្សរនៃការសួរចម្លើយជនជាប់ចោទចំនួន៤៦ និងការស្តាប់ចម្លើយសាក្សីនិងដើមបណ្តឹងរដ្ឋប្បវេណីចំនួនជាង១.០០០ និងឯកសារចំនួនជាង១១.០០០នាក់ ឯកសារដែលពាក់ព័ន្ធនឹងអង្គហេតុនៃសំណុំរឿងនេះ។
លោក Andrew Cayley មានប្រសាសន៍បន្ថែមទៀតថា ដូច្នេះ វាអាស្រ័យលើចៅក្រមជំនុំជម្រះប៉ុណ្ណោះ ដែលជាអ្នកសម្រេចថាតើជនជាប់ចោទទាំងបួនគឺ លោកនួន ជា លោក ខៀវ សំផន លោក អៀង សារី និងលោកស្រី អៀង ធិរិទ្ធ នឹងត្រូវមានទោសឬគ្មាននោះ៕