បន្ទាប់ពីបានចេញពីពន្ធនាគារលោកព្រំ ជា និង អ្នកស្រីមាស ស្រី បានអំពាវនាវដល់រដ្ឋាភិបាលកម្ពុជាឱ្យប្រគល់ដីស្រែរបស់ពួកគាត់វិញបន្ទាប់ពីបានចោទប្រកាន់ថាដីស្រែទាំងនោះបានបាត់បង់ដោយសារវៀតណាមរំលោភយក។
រយៈពេលតែប៉ុន្មានម៉ោងប៉ុណ្ណោះបន្ទាប់ពីបានដោះលែងចេញពីពន្ធនាគារឲ្យមានសេរីភាពឡើងវិញលោកព្រំ ជា និងអ្នកស្រីមាស ស្រី បានអំពាវនាវដល់រដ្ឋាភិបាលកម្ពុជាឲ្យប្រគល់ដីស្រែរបស់ពួកគេ ដែលបានបាត់បង់ដោយសារតែការបោះបង្គោលព្រំដែនរវាងប្រទេសកម្ពុជា និងប្រទេសវៀតណាម។
លោកព្រំ ជា អាយុ ៤១ឆ្នាំ និងអ្នកស្រីមាស ស្រី អាយុ៤០ឆ្នាំ ត្រូវបានសាលាឧទ្ឋរណ៍នៃប្រទេសកម្ពុជា បានលើកលែងការចោទប្រកាន់កាលពីថ្ងៃពុធ ដោយសារតែតុលាការពុំបានរកឃើញថា ពួកគេមានការជាប់ពាក់ព័ន្ឋនិងការដកតម្រុយបង្គោលព្រំដែនរវាងប្រទេសកម្ពុជានិងប្រទេសវៀតណាម។ ក៏ប៉ុន្តែ សាលាឧទ្ឋរណ៍បានតម្កល់ករណីលោកសម រង្ស៊ី ឲ្យជាប់ពន្ឋនាគាររយៈពេលពីរឆ្នាំដដែល។
លោកព្រំ ជា បានមានប្រសាសន៍ថា លោកនៅតែបន្តការទាមទាររបស់លោក ដើម្បីទាមទារដីស្រែរបស់លោកឲ្យបានត្រឡប់មកវិញ។
លោកព្រំ ជា មានដីស្រែសរុបចំនួនប្រាំមួយហិចតា ដែលមានទីតាំងនៅភូមិកោះក្បានកណ្តាល ខាងជើង ស្រុកចន្ទ្រា ខេត្តស្វាយរៀង នៅត្រង់តម្រុយបង្គោលព្រំដែនលេខ១៨៤។
លោក បានមានប្រសាសន៍ថា៖ «ខ្ញុំក្រោយពីចេញពីពន្ធនាគារមក ខ្ញុំសំណូមពរឲ្យរាជរដ្ឋាភិបាល លោកផ្តល់នូវដីស្រែចំការរបស់ពួកខ្ញុំ ឲ្យបានធ្វើស្រែ ធ្វើចំការវិញ»។
ចំណែកអ្នកស្រីមាស ស្រី ដែលមានដីទំហំចំនួនពីរហិចតាកន្លះ នៅត្រង់តម្រុយបង្គោលព្រំដែន លេខ១៨៥ បាននិយាយថា អ្នកស្រីបានតវ៉ាកន្លងមកនេះ ដើម្បីប្រទេសជាតិតែប៉ុណ្ណោះ មិនមែនសម្រាប់បុគ្គលរបស់អ្នកស្រីតែម្នាក់ទេ។
អ្នកស្រីបាននិយាយទៀតថា រដ្ឋាភិបាលត្រូវតែប្រគល់ដីស្រែរបស់អ្នកស្រីត្រឡប់មកវិញ។
«បុគ្គលខ្លួនខ្ញុំខ្លួនឯងជាអ្នកធ្វើ ខ្ញុំក្រោកឈរខ្លួនឯង ខ្ញុំអត់ខ្លាចទេ មួយឆាកជីវិតខ្ញុំ ខ្ញុំជាប់គុក លើកនេះលួចប្លន់គេខ្ញុំតូចចិត្ត បើជាប់គុករឿងប្រទេសជាតិខ្ញុំអត់តូចចិត្តទេ មួយគ្រាប់ងាប់មួយគ្រាប់រស់មិនតូចចិត្តទេ ខ្ញុំតស៊ូឡើងអញ្ចឹង»។
ការទទួលទាមទាររបស់លោកព្រំ ជា និងអ្នកស្រីមាស ស្រី នេះ បានកើតមានឡើងនៅក្នុងសនិ្នសីទកាសែតមួយដែលរៀបចំឡើងនៅក្នុងទីស្នាក់ការគណបក្សសម រង្ស៊ី នៅព្រលប់ថ្ងៃព្រហស្បតិ៍នេះ ក្រោយពីពួកគេបានចាកចេញពីពន្ធនាគារ។
សមាជិក គណបក្សសម រង្ស៊ី ចំនួនប្រាំពីររូប បានទៅទទួលលោកព្រំ ជា និងអ្នកស្រីមាស ស្រី ចេញពីពន្ឋនាគារខេត្តកណ្តាល។
លោកយឹម សុវណ្ណ អ្នកតំណាងរាស្រ្តនិងជាអ្នកនាំពាក្យគណបក្សសម រង្ស៊ី បានមានប្រសាសន៍ ថា រដ្ឋាភិបាលត្រូវតែប្រគល់ដីស្រែត្រឡប់ទៅឲ្យពួកគេវិញ។
លោក បញ្ជាក់ថា៖ «មិនមែនត្រូវចាប់អ្នកទាំងអស់ដាក់ពន្ធនាគារទេ ខ្ញុំមិនដែលឃើញមានប្រទេសណាមួយដែល ក្រោកឡើងតស៊ូការពារទឹកដីរបស់ខ្លួន ការពារជាតិរបស់ខ្លួន ត្រូវបានអ្នកនយោបាយ ជាពិសេស គណបក្សកាន់អំណាចនៅប្រទេសនេះ ចាប់ដាក់ពន្ឋនាគារ។ នេះជារឿងមួយគួរឲ្យអៀនខ្មាស់»។
លោកជាម យៀប មន្រ្តីជាន់ខ្ពស់និងជាអ្នកតំណាងរាស្រ្តគណបក្សប្រជាជនកម្ពុជា បាននិយាយថា ប្រទេសកម្ពុជា និងប្រទេសវៀតណាម នៅតែពុំទាន់កំណត់ព្រំដែនឲ្យបានច្បាស់លាស់នៅឡើយទេ ដូច្នេះវាជាការលំបាក ដែលកំណត់ថា ទីតាំងណាស្ថិតនៅក្នុងប្រទេសកម្ពុជា និងទីតាំងណាមួយស្ថិត នៅក្នុងប្រទេសវៀតណាមនោះ។
«យើងមិនទាន់ដឹងថាត្រង់ណាៗទេ លុះត្រាតែប្រទេសទាំងពីរសម្រេចចុងក្រោយ ជាពិសេសគណៈកម្មាធិការជាតិដែលកំណត់ព្រំដែនកម្ពុជា វៀតណាម ចុងក្រោយយ៉ាងណាៗ នោះទៅតាមបច្ចេកទេសរបស់គាត់ទេ»។
លោកព្រំ ជា និងអ្នកស្រីមាស ស្រី កាលពីថ្ងៃទី២៧ ខែមករា កន្លងទៅនេះ ត្រូវតុលាការខេត្តស្វាយ រៀងបានកាត់ទោសជាមួយនឹងលោកសម រង្ស៊ី ឲ្យជាប់ពន្ឋនាគារក្នុងម្នាក់ៗរយៈពេលមួយឆ្នាំពីបទធ្វើឲ្យខូចខាតដោយចេតនានូវតម្រុយបង្គោលព្រំដែនលេខ១៨៥រវាងប្រទេសកម្ពុជានិងប្រទេសវៀតណាម៕