ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

អតីត​កង​ទ័ព​ខ្មែរ​ក្រហម​ស្វាគមន៍​សាលក្រម​ឌុច


ភ្នំពេញ៖ អតីត​កង​ទ័ព​ខ្មែរ​ក្រហមនៅតំបន់​ភ្នំវល្លិ៍​បាន​សារទរ​ចំពោះ​អង្គជំនុំ​ជម្រះ​របស់​សាលា​ក្ដី​ខ្មែរ​ក្រហម​ ដែល​បាន​សម្រេចកាត់ទោស​លោក​កាំងហ្កេចអៀវ​ ហៅឌុច​ឲ្យជាប់​ពន្ឋនា​គារ​រយះពេល៣៥ឆ្នាំ។ ក៏ប៉ុន្កែ​បាន​ហៅ​ការ​សម្រេចទោស​នេះ​ តិចតួច​ពេក​ ​ដោយ​បា្រថ្នា​ចង់​ឲ្យ​ដាក់​ទោស​ឌុច​អស់​មួយ​ជីវិត។​ ​ការ​អះអាង​នេះ​បាន​ធ្វើ​ឡើង​នៅពេល​ដែល​អតីត​កងទ័ព​ខ្មែរក្រហម​នៅភ្នំ​វល្លិ៍​ ៥ រូប​បានធ្វើ​ដំណើរ​មក​ក្រុង​ភ្នំពេញ ​ដើម្បី​ធ្វើសន្និសីទ​កាសែត​រឿង​រំលោភ​ដីធ្លី។

អតីត​កងទ័ព​ខ្មែរ​ក្រហម​ នៅ​តំបន់​ភ្នំ​វល្លិ៍​ខេត្ត​កំពត បាន​ប្រកាស​ស្វាគមន៍​ចំពោះ​អង្គ​ជំនុំជម្រះ​របស់​សាលាក្តី​ខ្មែរ​ក្រហម​ ដែល​បាន​ប្រកាស​សាលក្រម​ឲ្យ​លោក​កាំង ហ្កេកអ៊ាវ​ ហៅ​ឌុច​ អតីត​មេ​គុក​ទួល​ស្លែង​ ឲ្យ​ជាប់​ពន្ធនាគារ​យៈពេល​៣៥​ឆ្នាំ​ពីបទ​ជាប់​ពាក់ព័ន្ធ​នឹង​ការ​សម្លាប់​មនុស្ស​អស់​ជាង​ ១២០០០​នាក់​ នៅក្នុង​ការ​គ្រប់គ្រង​របស់​លោក​ ​ចន្លោះពី​ឆ្នាំ​១៩៧៥​ ដល់​ឆ្នាំ​១៩៧៩។

ការ​ប្រកាស​របស់​ពួក​អតីត​កងទ័ព​ខ្មែរ​ក្រហម​នេះ​ បាន​ធ្វើឡើង​បន្ទាប់​ពី​អតីត​កងទ័ព​ខ្មែរ​ក្រហម​នៅ​តំបន់​ភ្នំ​វល្លិ៍​ចំនួន​ប្រាំរូប​បាន​មក​កាន់​ទីក្រុង​ភ្នំពេញ ​ដើម្បី​ធ្វើ​សន្និសីទ​កាសែត​មួយ​ពី​រឿង​រំលោភ​ដីធ្លី​ ហើយ​ស្រប​ពេល​នឹង​សាលាក្តី​ខ្មែរ​ក្រហម​ប្រកាស​សាលក្រម​លោក​កាំង ហ្កេចអៀវ​ ​ហៅ​ឌុច។

បន្ទាប់​ពី​អាន​សាលក្រម​អស់​រយៈពេល​ជាង​មួយ​ម៉ោង​ ​លោក​និល ណុន ​ប្រធាន​ចៅក្រម​ជំនុំជម្រះរបស់​សាលា​ដំបូង ​បាន​ប្រកាសដាក់​ទោស​លោក​កាំង ហ្កេកអ៊ាវ ​ហៅឌុច ​ឲ្យ​ជាប់​ពន្ធនាគារ​រយៈ​ពេល​ ៣៥​ ឆ្នាំ​ពីបទ​ឧក្រិដ្ឋកម្ម​ប្រឆាំង​មនុស្សជាតិ​ និង​ការ​រំលោភ​បំពាន​យ៉ាង​ធ្ងន់ធ្ងរ​ទៅ​លើ​អនុសញ្ញា​ក្រុង​ហ្សឺណែវ ​នៅឆ្នាំ​១៩៤៩។

សេចក្តី​សម្រេច​នេះ​ក៏​បាន​បន្ធូរ​បន្ថយ​ទោស​រយៈ​ពេល​ប្រាំឆ្នាំ​ ដោយសារ​តែ ​ឌុច ​បាន​សហការជា​មួយ​នឹង​សាលាក្តី​ក្នុង​ការ​បំភ្លឺ ​និង​ផ្តល់​ភស្តុតាង​នានា​ ​ហើយ​ក្នុង​រយៈពេល​ផ្តន្ទាទោស​នេះ​ ​ តុលាការ​ក៏​បាន​គិត​បញ្ចូល​ផងដែរ​ នូវ​ពេល​ដែល​ឌុច​បាន​ជាប់​ឃុំឃាំង​នៅក្នុង​ពន្ធនាគារ​យោធា​ពីថ្ងៃ​ទី​១០ ខែ​ឧសភា​ឆ្នាំ១៩៩៩​ រហូតដល់​ខែ​កក្កដា​ ឆ្នាំ​២០០៧ ​និង​ក៏​បាន​គិត​បញ្ចូល​ផងដែរ​ នូវ​ពេល​ដែល​ឌុច ត្រូវ​យក​មក​ឃុំឃាំងនៅក្នុង​សាលាក្តី​ខ្មែរ​ក្រហម​ ​តាំងពី​ឆ្នាំ២០០៧​រហូត​មកដល់​បច្ចុប្បន្ន​នេះ។​ ​ដូច្នេះ​សរុប​ទៅ​ លោក​កាំង ហ្កេកអ៊ាវ​ ​ហៅ ឌុចត្រូវ​ជាប់​ពន្ធនាគារ​រយៈពេល​តែ​១៩​ឆ្នាំ​តែប៉ុណ្ណោះ។

លោក​ ឃុត ឃាន ​អតីត​កងទ័ព​ខ្មែរ​ក្រហម ​នៅ​កងពល​ធំ​លេខ​១៣០​ប្រចាំ​តំបន់​ភ្នំ​វល្លិ៍ ​ដែល​មាន​តួ នាទី​ជា​មេបញ្ជា​កង​វីរសេនា​ធំ ​បាន​ប្រាប់​ VOA​ សំឡេង​សហ​រដ្ឋ​អាមេរិក​ថា​ ​សាលក្រម​របស់​ឌុច នៅ​ថ្ងៃ​នេះ​មាន​សារៈ​សំខាន់​ខ្លាំង​ណាស់​សម្រាប់​ជន​រងគ្រោះ​ ដែល​បាន​ស្លាប់​បាត់​បង់​ជីវិត។

លោក​បាន​មាន​ប្រសាសន៍​ថា​ ​បើ​ពិនិត្យ​ទៅលើ​ទោស​ដែល​ឌុច​បាន​ប្រព្រឹត្ត​ មិន​គួរ​ដាក់​ទោស​ឲ្យ ឌុច​ ជាប់​ពន្ធនាគារ​តិច​ពេក​ទេ។​ ឌុច​គួរតែ​សម​ទទួល​ទោស​អស់​មួយ​ជីវិត។

«បែប​បទ​នៃ​ការ​សម្លាប់​រង្គាល​ហ្នឹង​ ​ឃើញ​ថា​ ​មិន​គួរ​ណា​បន្ថយ​ ​ដាក់​ទោស​តិច​ពេក​ទេ។​ បើ​យើង​គិត​ តាម​បទ​ឧក្រិដ្ឋ​ ​ វា​ត្រូវ​មួយ​ជីវិត។​ ​ប៉ុន្តែ​ការ​យល់​ឃើញ​របស់​លោក​ចៅ​ក្រម​ ​ ខ្ញុំ​ក៏​មិន​ហ៊ាន​ថា​ ​ម៉េច​ដែរ»។

ចំណែក​លោក​ទិត្យ ​ញន ​អាយុ​៦២ឆ្នាំ​ អតីត​ប្រធាន​វរសេនា​តូច​នៃ​កងពល​ធំ​លេខ​៤០៥វិញ​ ​បាន​ហៅ​ការ​ប្រកាស​សាលក្រម​នេះ​ថា ​អាច​ទទួល​យក​បាន។

«អានេះមក​អំពី​អំពើ​ប្រព្រឹត្ត​របស់​តា​ឌុច​ ការ​ប្រព្រឹត្ត​នេះ​ ខ្ញុំ​មិន​ធ្លាប់​ដឹង​ទេ។ ក៏ប៉ុន្តែ​បើសិន​ជា​តុលាការ​ស្រាវជ្រាវ​ឃើញ​ថា​ រឿងរ៉ាវ​នេះ​ ​វា​ប្រាកដ​ហើយ​ កាត់ទោស​ ​អាហ្នឹង​ ​ខ្ញុំ​មិន​សោកស្តាយ​ចំពោះ​តាឌុច​ទេ»។

ចំណែក​ឯ​អតីត​កងទ័ព​ខ្មែរ​ក្រហម​ចំនួន​បីរូប​ផ្សេងទៀត​ មិន​ហ៊ាន​ធ្វើ​អត្ថាធិប្បាយ​ចំពោះ​ការ​ប្រកាស​សាលក្រម​នេះ​ទេ​ ​ក៏ប៉ុន្តែ​ពួកគេ​បាន​គាំទ្រការ​ប្រកាស​សាលក្រម​របស់​ឌុច។

លោក​កាំង ហ្កេកអ៊ាវ​ ហៅឌុច​ នឹង​ត្រូវ​បន្ត​ការ​កាត់ទោស ​នៅក្នុង​សំណុំ​រឿង​០០២ ​ដែល​គ្រោង​នឹង​ធ្វើ​នៅ​ដើម​ឆ្នាំ​២០១១​ ជាមួយ​នឹង​មេ​ដឹកនាំ​កំពូលៗ​ចំនួន​បួន​រូប​ផ្សេង​ទៀត ​ដែល​រួមមាន​ លោក​ខៀវ សំផន​ អតីត​ប្រមុខ​រដ្ឋ​ក្នុង​របប​កម្ពុជា​ប្រជាធិបតេយ្យ​ លោក​នួន ជា ​អតីត​ប្រធាន​រដ្ឋសភា ​លោក​ អៀង សារី អតីត​រដ្ឋមន្រ្តី​ក្រសួង​ការបរទេស​ និង​លោកស្រី​អៀង​ ធីរិទ្ធ​ ភរិយា​របស់​លោក​អៀង សារី អតីត​រដ្ឋ​មន្រ្តី​ក្រសួង​សង្គមកិច្ច៕

XS
SM
MD
LG