ភ្ជាប់​ទៅ​គេហទំព័រ​ទាក់ទង

ប្រជាសហគមន៍​តាម​ដង​ទន្លេ​សេសាន​ទទូច​ឲ្យ​ផ្អាក​គម្រោង​សង់​ទំនប់


លោក​ឈិត សំអាត ​នាយក​ប្រតិបត្តិ​អង្គការ​ NGO Forum​ និង​តំណាង​សហគមន៍​ខេត្ត​រតនគីរី។​

ក្រុម​អ្នក​ការពារ​ទន្លេ និង​តំណាង​អ្នកភូមិ​ដែល​រស់​នៅ​តាម​បណ្តោយ​ដង​ទន្លេ​សេសាន​ក្នុង​ខេត្ត​រតនៈគីរីបាន​ស្នើឲ្យ​រដ្ឋាភិបាល​កម្ពុជា​ផ្អាក​គម្រោង​សង់​ទំនប់​វារីអគ្គិសនី​សេសាន​ក្រោម​២​សិន ដើម្បី​បើកផ្លូវឲ្យ​មាន​ការ​សិក្សា​បន្ថែម​ទៀត​អំពី​ផល​ប៉ះពាល់នៃទំនប់​ទៅ​លើជីវភាព​រស់​នៅ​របស់​ពួកគេ។

របាយការណ៍​របស់​បណ្តាញ​សម្ព័ន្ធ​ទន្លេ​កម្ពុជា បាន​បង្ហាញថា យ៉ាង​ហោច​ណាស់​ ប្រជាពលរដ្ឋ​ចំនួន​ជាង៣ម៉ឺន​៨ពាន់​នាក់​ដោយ​រួម​ទាំង​ជនជាតិ​ដើម​យ៉ាង​ច្រើន​នៅ​ក្នុង​ភូមិ​យ៉ាង​តិច​ចំនួន​៨៦​ភូមិ​នៅ​តាម​ដង​ទន្លេ​សេសាន និង​ទន្លេ​ស្រែពក អាច​នឹង​បាត់​បង់​លទ្ធភាព​ទទួល​បាន​ធនធាន​ជលផល​ដ៏​ច្រើន​ពី​ទន្លេ​ទាំង​នេះ ដោយសារ​ទំនប់​ដែល​ស្ថិត​ក្នុង​ខេត្ត​ស្ទឹង​ត្រែង​នោះ​នឹង​រាំង​ស្កាត់​ការ​បម្លាស់ទី​របស់​ត្រី​ពី​ទន្លេមេគង្គ និង​ទន្លេ​សេកុង​ចូល​ទៅ​ទន្លេ​សេសាន និង​ទន្លេ​ស្រែពក។

ទន្លេ​សេសាន​ និងស្រែពក​គឺ​ជា​ដៃ​ដ៏​សំខាន់​របស់​ទន្លេ​មេគង្គ​ ហើយ​ប្រភព​ទឹក​ដែល​ហូរ​ចូល​ទន្លេ​ទាំង​នេះ​គឺ​ចេញ​មក​ពី​ខ្ពង់​រាប​កណ្តាល​ នៃ​ប្រទេស​វៀតណាម។

បើ​ផ្អែក​តាម​របាយការណ៍​វាយតម្លៃ​ផល​ប៉ះពាល់​បរិស្ថាន​សម្រាប់​គម្រោង​សង់ទំនប់​សេសាន​ក្រោម​២​នេះ ដែល​បាន​ធ្វើ​ឡើង​ដោយ​ក្រុមហ៊ុន​ពិគ្រោះ​យោបល់​កម្ពុជា​ឬ Key Consultants Cambodia​នៅ​កម្ពុជា កាលពីចុងឆ្នាំ២០០៨​បាន​ឲ្យ​ដឹង​ថា ទំនប់​នេះ​នឹង​ធ្វើ​ឲ្យ​ប្រជា​ពលរដ្ឋ​ប្រមាណ​៥.០០០​នាក់​នៅ​ក្នុង​ឃុំ​ចំនួន​បួន​ក្នុង​ស្រុក​សេសាន​ត្រូវ​ផ្លាស់​ទីលំនៅ​ដោយសារ​តែ​អាង​ស្តុក​ទឹក​នៃ​ទំនប់​នេះ​នឹង​ជន់​លិច​ដី​ស្រែ​របស់​អ្នក​ស្រុក​ទំហំ​ជាង៣ម៉ឺនហិកតា។

រដ្ឋាភិបាល​កម្ពុជា កាល​ពី​ខែ​មុនបាន​អនុម័ត​ឲ្យ​មាន​ការ​សង់​ទំនប់​វារីអគ្គិសនី​សេសាន​ក្រោម​២​នេះ ហើយ​ការ​សាង​សង់​ត្រូវ​បាន​គ្រោង​នឹងចាប់​ផ្តើម​នៅ​ចុង​ឆ្នាំ​នេះ។ ទំនប់​សេសាន​ក្រោម​២​ដែល​មាន​កម្ពស់​៧៥​ម៉ែត្រ ហើយ​អាច​ផលិត​ថាមពលអគ្គិសនី​កម្លាំង​៤០០​មេហ្គាវ៉ាត់​ដោយ​ត្រូវ​ចំណាយ​ថវិកា​អស់​ជាង៨០០​លាន​ដុល្លារ​អាមេរិក​នោះ​គឺ​ជា​គម្រោង​វិនិយោគ​រួម​គ្នា​រវាង​ក្រុម​ហ៊ុន​អគ្គិសនី​វៀតណាម (Electricity of Vietnam) ដែល​មាន​ភាគហ៊ុន​៥១% និង​ក្រុមហ៊ុន​Royal Group របស់​លោក​ឧកញ៉ា​គិត ម៉េង​ដែល​មាន​ភាគហ៊ុន​៤៩%។

លោក​មៀច មាន គឺ​ជា​អ្នក​សម្របសម្រួល​បណ្តាញ​ការពារ​បី​គឺ​ទន្លេ​សេសាន ស្រែ​ពក​និង​សេកុង​ដែល​មាន​មូលដ្ឋាន​នៅក្នុង​ខេត្តរតនៈគីរីនេះ។ លោក​បាន​មាន​ប្រសាសន៍​នៅក្នុង​ពិធី​បុណ្យ​ខួប​បណ្តាញ​ទន្លេ​ទាំង​បី​ក្នុង​ស្រុក​វ៉ើនសៃ​កាល​ពី​សប្តាហ៍​មុន​ថា ប្រជា​សហគមន៍​ដែល​ពឹង​អាស្រ័យ​លើ​ទន្លេសេសាន​នេះ​ចង់​ឲ្យ​មាន​ការ​សិក្សា​ឲ្យ​បានពេញ​លេញ​អំពី​ផល​ប៉ះពាល់​នៃ​ទំនប់មក​លើ​ជីវភាព​រស់នៅ​របស់​ពួក​គេ​ជា​មុន​សិន ហើយ​ទទូច​ឲ្យ​រដ្ឋាភិបាលពិចារណា​លើ​ជម្រើស​ផ្សេង​វិញ​ក្នុង​ការ​ទាញ​យក​ថាមពល​អគ្គិសនីនោះ។ លោក មៀច មាន​ថ្លែង​ថា៖

«តំណាង​សហគមន៍​យើង​ទាំង​អស់​ ស្នើ​ជូន​ទៅ​រាជ​រដ្ឋាភិបាល​ថា សូម​ឲ្យ​ផ្អាក​ការ​សាង​សង់ទំនប់​សេសាន​ក្រោម​២ ហើយ​សូម​ពិនិត្យ​មើ​ល​ទៅ​លើ​ផែនការ​អភិវឌ្ឍទំនប់​ផ្សេងៗ​វិញ​ក្នុង​ដំណាក់​កាល​ណា​មួយ»។

លោក មៀច មាន មាន​ប្រសាសន៍​បន្ថែមថា ការ​សាង​សង់​ទំនប់​សេសាន​ក្រោម​២​នេះ នឹង​បង្ក​ផលប៉ះពាល់​យ៉ាង​ធំធេង​មក​លើ​ជីវភាព​រស់​នៅ​របស់​ប្រជា​សហគមន៍​នៅ​តាម​ដង​ទន្លេ​នេះ។ លោក​បន្ត​ទៀត​ថា៖

«មូលហេតុ​ ដោយ​សារ​ទំនប់​នឹង​កាត់​ផ្តាច់ទន្លេ​ចំនួន​២ ហើយ​នឹង​លិច​ភូមិ​មិនត្រឹម​តែ​ភូមិ​ក្នុង​តំបន់​អាង​ស្តុកទឹក​ប៉ុណ្ណោះ​ទេ គឺ​ប្រជាពលរដ្ឋ​ចំនួន​ជាង​១០០​ភូមិ​នឹង​ត្រូវ​ទទួល​រង​ផល​ប៉ះ​ពាល់​ដោយ​សារ​ទំនប់ហ្នឹង»។

អ្នក​ស្រី ហ្វយ ស៊ុត តំណាង​សហគមន៍​រស់នៅ​តាម​ដង​ទន្លេទាំង​បី មាន​ប្រសាសន៍​ថា ប្រជា​សហគមន៍​របស់​អ្នក​ស្រីកន្លង​មក​បាន​រងគ្រោះ​ជា​ច្រើន​មក​ហើយ​ដោយសារ​ទឹក​ជំនន់ ​និង​ការ​ខូច​គុណភាពទឹក​ទន្លេ​ដែល​អ្នក​ស្រី​អះអាង​ថា​បណ្តាល​មក​ពី​ទំនប់​យ៉ាលីរបស់​វៀតណាម​ដែល​ត្រូវ​បាន​សង់​លើ​ទន្លេ​សេសាន​នេះដែរ​ ដែល​ស្ថិត​នៅ​ចម្ងាយ​៨០​គីឡូម៉ែត្រ​ពី​ព្រំដែន​កម្ពុជា។ ដូច្នេះ អ្នក​ស្រី​ ហ្វយ ស៊ុត មាន​ប្រសាសន៍​ថា ប្រជា​សហគមន៍​របស់​អ្នក​ស្រីមិន​ចង់​រង​គ្រោះដោយ​សារ​ការ​សង់​ទំនប់​វារី​អគ្គិសនី​សេសាន​ក្រោម​២​នេះ​ថែមទៀត​ទេ។ អ្នកស្រី​បាន​ប្រាប់​វីអូអេ​ខ្មែរ​ថា៖

«វា​ខាត​បង់​ទាំង​អាយុ​ជីវិត​សហគមន៍​ ដូច​ថា​អណ្តែត​ផ្ទះ អណ្តែង​គោ​ក្របីដូច​ជា​មាន់​ទា សត្វ​ពាហនៈ​យើងសព្វ​គ្រប់​បែបយ៉ាងគឺ​វា​អណ្តែត​ទៅ​ទាំង​អស់។ ដោយ​សារ​អញ្ចឹង​ហើយ​បាន​ជា​ពួក​យើង​ខ្ញុំ​មិន​ចង់​ឲ្យគាត់​អភិវឌ្ឍ​ទេ​ទំនប់​សេសាន​ក្រោម​២»។

បើ​តាម​គម្រោង​អគ្គិសនី​ដែល​ផលិត​បាន​នេះ​នឹង​ត្រូវ​យក​ទៅ​ផ្គត់​ផ្គង់​តំបន់​និង​ខេត្ត​ជិត​ខាង​ដូចជា​មណ្ឌលគីរី និង​ខេត្តរតនៈគីរី​នេះ​ជាដើម រួច​បញ្ជូន​បន្ត​ទៅ​វៀតណាម។

លោក ឈិត សំអាត នាយកប្រតិបត្តិ​នៃ​វេទិការ​អង្គការ​មិន​មែន​រដ្ឋាភិបាល​ស្តីពី​កម្ពុជា ​មាន​ប្រសាសន៍​ថា​ រដ្ឋា​ភិបាលគួរ​តែ​បញ្ជាក់​ឲ្យ​បាន​ច្បាស់​លាស់ជាមុន​សិន​អំពីវិធាន​ការ​របស់​ខ្លួន​ក្នុង​ការ​ដោះ​ស្រាយ​ផល​ប៉ះពាល់​ជីវភាព​រស់នៅ​របស់​សហគមន៍ និង​អត្ថប្រយោជន៍​ដែល​ពួកគេ​អាច​នឹង​ទទួល​បាន​ពី​ការសង់​ទំនប់​នេះ។ លោក​សំអាត​បាន​ប្រាប់​វីអូអេ​ថា៖

«គាត់​ត្រូវ​បញ្ជាក់​ថា តើ​ភ្លើងដែល​យើង​ទទួល​បាន​ហ្នឹង​ វា​ចំណេញ​ប៉ុន្មាន អំពី​ត្រី​ដែល​ប្រជាជន​ទទួល​បាន​ប៉ុន្មាន​ ពេល​ដែល​ទំនប់​សាងសង់​ហើយ តើ​គាត់​ទទួល​បាន​ប៉ុន្មាន។ យើង​មិន​ចង់​ថា ក្រុមហ៊ុន​សាងសង់ហើយ យើង​បាន​ទំនប់​វារី​អគ្គិសនី ហើយ​ភ្លើង​បាន​លក់​ទៅក្រៅ​ សួរ​ថា​តើ​ផល​ប្រយោជន៍​ប្រជាជន​គាត់​បាន​អី​ទេ អញ្ចឹង​ទាម​ទារ​ឲ្យ​មាន​ការ​បញ្ជាក់​ឲ្យច្បាស់​លាស់»។

អ្នក​សង់​ទំនប់​អះអាង​ថា គេអាច​សង់​ជណ្តើរ ​ឬ​ផ្លូវ​វៀង​ដើម្បី​ឲ្យ​ត្រី​អាច​ធ្វើ​ចរាចរណ៍​ចុះ​ឡើងបាន​ដើម្បី​បញ្ជៀស​ផលប៉ះពាល់​ដល់​ធនធាន​ជលផល​នៅ​ក្នុង​ទន្លេដែល​អាច​បណ្តាល​មក​ពី​ទំនប់នោះ។

ប៉ុន្តែលោក ឈិត សំអាត មាន​ប្រសាសន៍ថា វិធី​សាស្ត្រ​បែបនោះ​គ្មាន​ប្រសិទ្ធិភាព​ទេ ហើយ​បាន​ហៅ​វា​ថា​ជា​វិធី​សាស្ត្រ​ហួស​សម័យ​ទៅ​ហើយ។ លោក​បន្ត​ថា៖

«ត្រី​យើង​រាប់​រយ​ប្រភេទ។ តើ​មាន​ជណ្តើរ​ប៉ុន្មាន​ឲ្យ​គាត់​ដើរ​ គឺ​ថា​មិន​អាច​ទេ។ នេះ​គ្រាន់​តែ​ជា​លេស​មួយ​ទេ បើ​តាម​បទពិសោធ​ន៍​ពី​ប្រទេស​ផ្សេង​ៗ​ ត្រី​មិន​អាច​ឡើង​បាន​ទេ​ដូច​ជា​ជណ្តើរ​យន្ត​អីហ្នឹង​គឺ​មិន​អាច​ទេ»។

លោក ឧកញ៉ា គិត ម៉េង ប្រធាន​ក្រុមហ៊ុនរ៉ូយ៉ាល់គ្រុប(Royal Group) មិន​ធ្វើ​អត្ថាធិប្បាយ​ណា​មួយទេ​ជុំវិញ​ការ​ទាមទាររបស់​សហគមន៍​នេះ​ ដោយ​លោក​បាន​បង្វែរ​សំណួរ​ទៅ​ខាង​ក្រសួង​ឧស្សាហកម្ម​ រ៉ែ​ និង​ថាមពល​វិញ។

លោក ស៊ុយ សែម រដ្ឋ​មន្ត្រី​ក្រសួង​ឧស្សាហកម្ម រ៉ែ និងថាមពល មន្ត្រីពាក់​ព័ន្ធ​ជា​ច្រើន​ទៀត​នៃ​ក្រសួង​ឧស្សាហកម្ម ព្រម​ទាំង​លោក ខៀវ កាញារីទ្ធ អ្នក​នាំ​ពាក្យ​រដ្ឋាភិបាល​កម្ពុជា​ផង​ដែរ​មិន​អាច​ទាក់​ទងបានឬ​មិន​ធ្វើ​អត្ថាធិប្បាយ​ទេ​ជុំវិញ​គម្រោង​សង់​ទំនប់​វារី​អគ្គិសនី​សេសាន​ក្រោម​២នេះ។

យ៉ាង​ណា​ក៏​ដោយ អភិបាល​រង​ស្រុក​វើនសៃនៃ​ខេត្ត​រតនៈ​គីរី ​គឺ​អ្នក​ស្រី​ ខាំ ណាវ បាន​ថ្លែង​ថា រដ្ឋាភិបាល​ក៏​បាន​គិតគូរ​បញ្ចៀស​ផល​ប៉ះពាល់​សហគមន៍​នៅ​តាម​ដង​ទន្លេ​នេះដែរ។

ក្រៅ​ពី​គម្រោងសង់​ទំនប់​សេសានក្រោម​២ ​រដ្ឋាភិបាល​កម្ពុជា​ក៏​គ្រោង​សាងសង់ទំនប់​វារី​អគ្គិសនីជា​ច្រើន​ទៀត​ដើម្បី​ឆ្លើយ​តប​ទៅ​នឹង​តម្រូវ​ការ​ថាមពល​អគ្គិសនីដែល​កាន់​តែ​កើន​ឡើង​នៅ​ក្នុង​ប្រទេស។ ទំនប់​វារីអគ្គិសនី​ធំៗ​ចំនួន​២​ត្រូវ​បាន​គ្រោង​នឹង​សង់​នៅ​លើ​ទន្លេ​មេគង្គ​តែ​ម្តង​គឺ​ទំនប់​ស្ទឹងត្រែង​ក្នុង​ខេត្ត​ស្ទឹងត្រែង ​ដែល​មាន​កម្លាំង​ថាមពល​៩៨០ មេហ្គាវ៉ាត់​ និង​ទំនប់​សម្បូរ​ក្នុង​ខេត្ត​ក្រចេះ​ ដែល​មាន​កម្លាំង​ថាមពល​រហូត​ដល់​២.៦០០​មេហ្គាវ៉ាត់។

ប៉ុន្តែ កាល​ពី​ពេល​ថ្មីៗ​គម្រោង​ទំនប់​វារីអគ្គីសលើ​ដង​ទន្លេមេគង្គ​ក្នុង​ប្រទេស​ឡាវ គឺ​ទំនប់​សាយ៉ាបូរី​ត្រូវ​បាន​រដ្ឋាភិបាល​ឡាវ​ ប្រកាស​ផ្អាក​ការ​សាងសង់សិន​បន្ទាប់​ពី​មាន​ការ​ទាមទារ​ពី​សំណាក់​សហគមន៍ អង្គការក្រៅ​រដ្ឋាភិបាល និង​រដ្ឋាភិបាល​នៃ​ប្រទេស​ទន្លេ​មេគង្គ​ក្រោម​ឲ្យ​មាន​ការ​សិក្សា​បន្ថែម​ទៀត​អំពី​ផល​ប៉ះពាល់​ដែល​អាច​កើត​មាន​ឡើង​ដោយ​សារ​ការ​សាងសង់​ទំនប់​នោះ។

អ្នក​អាច​មើល​បាយការណ៍​ជា​វិដេអូ អំពីរឿងនេះនៅក្នុង​គេហ​ទំព័រwww.voacambodia.com ឬ​ youtube.com/voakhmerservice។

XS
SM
MD
LG