ភ្ជាប់​ទៅ​គេហទំព័រ​ទាក់ទង

ក្រុម​គ្រួសារ​មកសួរ​សុខទុក្ខ​ថៃ​ឆ្លង​ដែន​ខុសច្បាប់​៧នាក់


លោក​វីរ៉ា ស៊ុមក្វាមគីត(Veera Somkwamkid) ​មេដឹកនាំ​ក្រុម​បាតុករ​អាវលឿង​ ជា​មនុស្ស​ម្នាក់​ក្នុង​ចំណោម​អ្នក​ទាំង​៧​នាក់​ ដែល​បាន​​ឆ្លងដែន​​ដោយ​ខុសច្បាប់​ចូល​មកក្នុង​ប្រទេស​កម្ពុជា​នៅក្នុង​ខេត្ត​បន្ទាយ​មានជ័យ។

ភ្នំពេញ៖ ក្រុមគ្រួសារ​ជន​ជាប់ចោទ​ថៃ​ចំនួន​ប្រាំពីរ​រូប​ ដែល​រួមមាន​សមាជិក​សភា​តំណាងរាស្រ្ត​ខាង​គណបក្ស​ប្រជាធិបតេយ្យ​មួយរូប ​ត្រូវបាន​អនុញ្ញាត​ឲ្យ​ចូល​ជួបសួរ​សុខទុក្ខ​នៅក្នុង​ពន្ធនាគារ​ព្រៃស​ដោយ​មានការ​ហែរហម​ពី​មន្រ្តី​ស្ថានទូត​ថៃ​ប្រចាំ​ប្រទេស​កម្ពុជា​ចំនួន​បីរូប​ផ្សេងទៀត។

បន្ទាប់ពី​ជំនួប​អស់រយៈពេល​ប្រមាណ​ជិត​ពីរម៉ោង​ ក្រុម​គ្រួសារ​ជនជាប់​ចោទ​ជនជាតិ​ថៃ​ទាំងប្រាំពីរ​រូប​នេះ​មិនបាន​ផ្តល់​បទ​សម្ភាសណាមួយ​ដល់​អ្នកសារព័ត៌មាន​ទេ។

លោក​ ប៉ិច វិច្ឆិកា​ មេធាវី​ការពារក្តី​ឲ្យ​ជន​ជាប់ចោទ​មួយរូប​ក្នុង​ចំណោម​មេធាវី​ទាំងពីរ​រូប​បាន​មាន​ប្រសាសន៍​ថា​ ជំនួប​នេះ​ធ្វើឡើង​ជា​លក្ខណៈ​គ្រួសារ​តែប៉ុណ្ណោះ​ដោយ​មិនអាច​ធ្វើ​អត្ថាធិប្បាយ​លម្អិត​អំពី​លទ្ធផល​នៃ​ជំនួប​នេះ​បានទេ។

«នៅ​ក្នុង​ជំនួប​នេះ​ ខ្ញុំ​នៅ​ខាងក្រៅទេ។​ គាត់​ជាអ្នក​ចូលទៅ​ខាងក្នុង​ជាមួយអីៗ​គាត់​ជួប​គ្នា​គាត់​ជជែក​ភាសា​គាត់​ខ្ញុំ​ស្តាប់​អត់បាន​ទេ​ខ្ញុំ​នៅ​ខាងក្រៅ​ទេ»។

អាជ្ញាធរ​ខ្មែរ​ កាលពី​ថ្ងៃពុធ ​បាន​ចាប់ខ្លួន​ជនជាតិ​ថៃ​ចំនួន​ប្រាំពីររូប​ ដែល​នៅក្នុង​នោះ​រួមមាន​ លោក​ប៉ានីច វីគិតស្រេត (Panich Vikitsreth) ​សមាជិក​សភា​តំណាងរាស្រ្ត​ក្រុង​បាងកក​ខាង​គណបក្ស​ប្រជាធិបតេយ្យ​និង លោក​វីរ៉ា ស៊ុមក្វាមគីត (Veera Somkwamkid) ​មេដឹកនាំ​ក្រុម​បាតុករ​អាវលឿង​ ព្រមទាំង​អ្នក​ថតរូប​មួយ​ចំនួន​ទៀត ​ក្រោយពី​បាន​ឆ្លងដែន​ដោយ​ខុសច្បាប់​ចូល​មកក្នុង​ប្រទេស​កម្ពុជា​នៅក្នុង​ខេត្ត​បន្ទាយ​មានជ័យ។

តុលាការ​ក្រុងភ្នំពេញ​បាន​ចោទប្រកាន់​ជនជាតិ​ថៃ​ទាំងប្រំាពីរ​រូប​កាលពី​ថ្ងៃទី៣០​ ធ្នូ ​កន្លង​ទៅនេះ​ពីបទ​ឆ្លងដែន​ដោយ​ខុសច្បាប់​ចូល​ជ្រៅ​ក្នុង​ប្រទេស​កម្ពុជា​ តាមច្បាប់​អន្តោប្រវេសន៍​ រួចហើយបាន​បញ្ជូន​ខ្លួន​មក​ឃុំឃាំង​បណ្តោះអាសន្ន​នៅ​ពន្ធនាគារ​ព្រៃស។

លោក​ហេង ហាក់​ ប្រធាន​នាយកដ្ឋាន​ពន្ធនាគារ​របស់​ក្រសួង​មហាផ្ទៃ​បាន​និយាយថា ​ជនជាតិ​ថៃ​ទាំង​ប្រាំពីរ​រូបនេះ​ត្រូវបាន​ឃុំ​ខ្លួនដាច់​ដោយឡែកៗ​ពីគ្នា​ជាមួយ​នឹង​អ្នកទោស​ផ្សេងទៀត។

លោក​បាន​មាន​ប្រសាសន៍ថា​ពួកគេ​មាន​សុខភាព​ល្អ​ធម្មតាទេ។

«យើង​ឃុំ​ដូច​អ្នក​ទោស​ដទៃ ​គ្រាន់តែ​ថា ពួកគេ​មាន​បន្ទប់​នៅ​ដាច់​ដោយឡែក»។

កាសែតបាងកកប៉ុស្តិ៍ (​Bangkok Post) ​នៅ​ថ្ងៃច័ន្ទ​នេះ​ បាន​ស្តី​បន្ទោស​លោក​ប្រាវីត វង់ សុវ៉ុន (Prawit Wong suwon)​ រដ្ឋមន្រ្តី​ក្រសួង​ការពារជាតិ​ថៃ​ថា​ នៅ​ពីក្រោយ​ខ្នង​នៃការ​ចាប់ខ្លួន​ជនជាតិ​ថៃ​ទាំង​ប្រំាពីរ​រូប​នេះ។

កាសែត​ដដែល​បាន​និយាយ​ទៀតថា ​លោ​កអាប់ភី​ស៊ីត វីចាជីវ៉ា​ នាយក​រដ្ឋមន្រ្តីថៃគ្រោង​នឹង​ជួប​ជា​ផ្លូវការ​មួយ​ជាមួយនឹង​លោក​នាយករដ្ឋមន្រ្តី​ហ៊ុន សែន​ ខាង​សម​ភាគី​កម្ពុជា​ ដើម្បី​ស្នើសុំ​ឲ្យ​ដោះលែង​ជនជាតិ​ថៃ​ទាំងប្រាំ​ពីររូប​នេះ​ក្នុង​ពេល​ឆាប់ៗ​ខាង​មុខ។

ទោះ​ជាយ៉ាង​ណា​ក៏​ដោយ ​លោក​កុយ គួង ​អ្នក​នាំពាក្យ​ក្រសួង​ការបរទេស​កម្ពុជា ​និង លោក​ខៀវ កាញ៉ារីទ្ធ​ អ្នក​នំាពាក្យ​រដ្ឋាភិបាលបាន​មាន​ប្រសាសន៍​ថា​ លោក​ពុំទាន់​បាន​ទទួល​ព័ត៌មាន​នេះ​នៅឡើយ​ទេ។

លោក​ ហូ សិទ្ធី ​នាយក​ខុទ្ទកាល័យ​លោក​នាយករដ្ឋមន្រ្តី​ហ៊ុន សែន​ បាន​បដិសេធ​ពុំធ្វើ​អត្ថាធិប្បាយ។

«ប៉ុន្តែ​ខ្ញុំ​មិន​ដែល​និយាយ​រក​កាសែត​ហើយ​នឹងវិទ្យុ ​ទូរទស្សន៍​ទេ ​មិនបាច់សួរ។ ក្រោយ​មិន​បាច់​សួរ​ខ្ញុំ​ទេ​ អ្វី​ក៏ដោយ​ជាមួយ​កាសែត​ វិទ្យុ ​ទូរទស្សន៍»។

ក្រុម​បាតុករ​អាវលឿង​ ប្រមាណ​ជិត​១០០​នាក់​នៅ​ព្រលប់​ថ្ងៃច័ន្ទ​នេះ​ បាន​ធ្វើការ​តវ៉ា​មួយ​យ៉ាងធំ​នៅ​ពីមុខ​អគ្គ​កុងស៊ុល​កម្ពុជា​ប្រចាំខេត្ត​ស្រះកែវ​ប្រទេស​ថៃ​ដើម្បី​ស្នើសុំ​ឲ្យ​ដោះលែង​ជនជាតិ​ថៃទាំង​ប្រំាពីរ​រូបនេះ​ ដែល​កំពុង​ជាប់​ឃុំឃាំង​នៅក្នុង​ពន្ធនាគារ​ព្រៃស​ស្របពេល​នឹង​អាជ្ញាធរ​ថៃ​បាន​រាំងខ្ទប់​ប្រជាពលរដ្ឋ​ខ្មែរ​ប្រមាណ​ជាង​៦០នាក់​មិនឲ្យ​ឆ្លងដែន​ទៅ​ប្រទេស​ថៃ​ដោយ​ហេតុផល​សន្តិសុខ៕

XS
SM
MD
LG