ភ្ជាប់​ទៅ​គេហទំព័រ​ទាក់ទង

គ្រួសារ​អតីត​យុទ្ធជន​នឹង​ទទួល​បាន​ដី​សម្បទាន


ដី​កសិកម្ម​​មួយ​កន្លែង​នៅ​ក្នុង​ប្រទេស​កម្ពុជា។

រដ្ឋាភិបាល​កម្ពុជា​គ្រោង​នឹង​ផ្តល់​ដី​សម្បទាន​សង្គមកិច្ច​ដល់​ក្រុម​គ្រួសារ​អតីត​យុទ្ធជន​ជិត​៣.០០០​គ្រួសារ​នៅ​ពេល​ខាង​មុខ​នេះ ដែល​ជា​ផ្នែក​មួយ​ក្នុង​ការ​កាត់​បន្ថយ​ភាពក្រីក្រ។

លោក សារ៉េត បូរាមី​ អគ្គ​លេខាធិការង​អចិន្រ្តៃយ៍​នៃ​គណៈកម្មាធិការ​ជាតិ​ផ្តល់​ដី​សម្បទាន​សង្គមកិច្ច​ ថ្នាក់ជាតិ​បាន​មានប្រសាសន៍​នៅ​ថ្ងៃ​អង្គារ៍​នេះ​ថា​ រដ្ឋាភិបាល​កម្ពុជា​គ្រោង​នឹង​ផ្តល់​ដី​សម្បទាន​សង្គមកិច្ច​ ដល់​ក្រុម​គ្រួសារ​យោធិន​ចូល​និវត្តន៍​ចំនួន​២.៤៧៩​គ្រួសារ​នា​ពេល​ខាង​មុខ​នេះ។ លោក​បូរាមី ​បាន​មាន​ប្រសាសន៍​ទៀតថា ​ក្រុមគ្រួសារ​ដែល​គ្មាន​ដី​អាច​ដាក់ពាក្យ​ស្នើសុំ​លំនៅដ្ឋាន ​និង​ដី​កសិកម្ម​បាន។ លោក​បាន​មាន​ប្រសាសន៍ថា​ ដី​សម្រាប់​សាង​សង់​លំនៅដ្ឋាន​ដែល​នឹង​ត្រូវ​ផ្តល់​គឺ​មាន​ទំហំ​ចាប់ពី​១.០០០ម៉ែត្រ​ការ៉េ​ ដល់១.៦០០​ម៉ែត្រ​ការ៉េ។ ចំណែក​ដី​កសិកម្ម​វិញ​ ចាប់ពី​២​ហិចតា​ រហូត​ដល់​៥​ហិចតា​ទៅ​តាម​លទ្ធភាព​ដី។ លោក​ថ្លែង​ដូច្នេះ​ថា៖

«ក្រសួងពីរ ​គឺ​ក្រសួង​ការពារជាតិ​និង​ក្រសួង​មហាផ្ទៃ​ នៅក្នុង​តួលេខ ​ដែល​ខ្ញុំបាន​ពីក្រសួង​ខាង​លើ​ជាង​២.០០០​។ ក្រសួង​ការពារជាតិ​មាន​ចំនួន​១.៣៦៩នាក់​ ឬ​ក៏គ្រួសារ​ យើង​និយាយ​ជាគ្រួសារ​តែម្តង​ ហើយ​ក្រសួង​មហាផ្ទៃ​មាន​ចំនួន​១.១០០​គ្រួសារ​ បាន​ចូលក្នុង​បញ្ជី​ឈ្មោះដែល​ត្រូវ​បាន​ទទួល​ដី​សម្បទាន​សង្គមកិច្ច»។

ការ​បែង​ចែក​ដី​សម្បទាន​សង្គម​កិច្ច​នេះ ​ត្រូវ​បាន​ធ្វើ​ឡើង​តាមរយៈ​គោលការណ៍​របស់​រដ្ឋាភិបាល​ ដើម្បី​កាត់​បន្ថយ​ភាពក្រីក្រ។ ប្រជាពលរដ្ឋ​គ្រប់​រូប ​ដែល​ពុំ​មាន​ដី​ពិត​ប្រាកដ​អាច​ដាក់​ពាក្យ​ស្នើ​សុំ​ទៅ តាម​ភូមិ​ឃុំ​របស់​ខ្លួន ​ដើម្បី​ទទួល​ដី​សម្បទាន​សង្គមកិច្ច​ពី​រដ្ឋាភិបាល។ នេះ​បើ​តាម​ការ​បញ្ជាក់​របស់ លោក​សារ៉េត បូរមី។

លោក​ បូរមី ​បាន​មាន​ប្រសាសន៍​ទៀត​ថា ​រដ្ឋាភិបាល​មាន​ដី​ចំនួន​១៦​ ខេត្ត​ក្រុង​សរុប​ទំហំ​ដី ១៣០.០០០​ហិចតា​សម្រាប់​ធ្វើ​ការ​បែង​ចែក​ដល់​ប្រជាពលរដ្ឋ​ក្រីក្រ ​យោធិន​ និង​មន្រ្តី​ប៉ូលីស​ចូល​និវត្តន៍។ លោក​មាន​ប្រសាសន៍​ថា៖

«មក​ដល់​ពេលនេះ​ តួលេខ​ដែល​ត្រូវ​បែង​ចែក​គឺ​៦.៥០០​គ្រួសារ ​តាម​ផែនការ។ ក៏​ប៉ុន្តែ​វាអាស្រ័យ​លើ​លទ្ឋភាព​ថវិកា ​ដែល​យើង​បែងចែក ​ហើយ​និង​លទ្ឋភាព​ដី​ដែល​យើងរក។ តួលេខនេះ​ ក៏​នៅ​តែ​ចាត់ទុក​តួលេខ​ផ្លូវការ ​ត្រូវ​ធ្វើការ​បែងចែក ​ប៉ុន្តែ​យើង​បែងចែក​ដោយ​ការ​បង្ហាញ​ដី​គាត់​ឲ្យ​ឃើញ​ថា ​យើង បែក​ចែក​អញ្ចឹង។ ក៏ប៉ុន្តែ​ការ​អភិវឌ្ឍ​ទីតាំង​អាស្រ័យ​លើ​លទ្ឋភាព​ថវិកា​ដែលមាន»។

ចំណែក​អ្នកស្រី​ នន់ ភានី​ អ្នក​នាំ​ពាក្យ​ក្រសួង​រៀបចំ​ដែនដី​នគរូបនីយកម្ម ​និង​សំណង់ ​បាន​មាន ប្រសាសន៍​ថា ​រដ្ឋាភិបាល​មាន​គោលការណ៍​បែង​ចែក​ដី​សម្បទាន​សង្គមកិច្ច​ទៅ​ឲ្យ​៦.០០០​គ្រួសារ​ក្នុង​មួយ​ឆ្នាំ។

លោកស្រី​បាន​មាន​ប្រសាសន៍​ទៀត​ថា​ ការ​ផ្តល់​ដី​សម្បទាន​សង្គមកិច្ច​នេះ​ធ្វើ​ឡើង​សម្រាប់​អ្នក​ដែល​គ្មាន​ដី​ពិតប្រាកដ​តែ​ប៉ុណ្ណោះ។ លោក​ស្រី​ថ្លែង​ថា៖

«ទើប​តែ​ចាប់​ផ្តើម​អនុវត្ត​ក្នុង​ឆ្នាំ២០១០​នេះទេ។ ចាប់​ផ្តើម​លើក​គម្រោង​អនុវត្ត​ក្នុង​ឆ្នាំ២០១០​នៅ ពេល​ដែល​យើង​មាន​ចំនួន​ទិន្នន័យ​ច្បាស់សាល់ ហើយ​ដីយើង​បាន​មាន​មុខសញ្ញា​នៅ​ក្នុង​១៦​ខេត្ត​ហើយ​នៅ​តែ​សំអាត​ដី​អភិវឌ្ឍន៍​ដី​ដើម្បី​ចែក​ជូន​គាត់​ទេ»។

កម្មវិធី​ផ្តល់​ដីសម្បទាន​សង្គមកិច្ច​ដែល​បាន​ប្រកាស​កាលពី​ខែមករា​ ឆ្នាំ២០១០​កន្លង​ទៅនេះ​ មាន​គោលបំណង​ផ្តល់​ទីតាំង​សារជាថ្មី​ដល់​ក្រុម​គ្រួសារ​កងទ័ព​ស្របច្បាប់​ប្រមាណ​២៣.៥០០​គ្រួសារ​ក្នុង​រយៈពេល​បួនឆ្នាំ ​ដោយ​ចាប់ផ្តើម​ពី​ឆ្នាំ២០១០ ​ដល់​ឆ្នាំ២០១៣។

កម្មវិធី​នេះ​បែងចែក​ដី​សង្គមកិច្ច​ដល់​ក្រុមគ្រួសារ​អតីត​យុទ្ធជន​មកពី​ក្រសួង​ការពារជាតិ​ចំនួន​ ១៥.០០០​គ្រួសារ​ ក្រសួង​មហាផ្ទៃ​ចំនួន​៥.៥០០​គ្រួសារ ​និង​៣.០០០គ្រួសារ​ទៀត​មកពី​ក្រសួង​សង្គមកិច្ច​ និង​អតីត​យុទ្ធជន។

លោក​ អ៊ូច ឡេង​ មន្រ្តី​ដីធ្លី​របស់​សមាគម​សិទ្ធិមនុស្ស​ អាដហុក (ADHOC) បាន​និយាយ​ថា ​លោក​សូម​ស្វាគមន៍​ចំពោះ​គោលការណ៍​របស់​រដ្ឋាភិបាល​ក្នុងការ​បែងចែក​ដី​សង្គមកិច្ចនេះ​ ក៏ប៉ុន្តែ​កន្លង​មក​តាម​ការ​អង្គេត​របស់​សមាគម​អាដហុក​បាន​រកឃើញ​ថា​ មិនមាន​ការ​ចុះ​សម្រុង​គ្នា​ក្នុង​ការ​បែង​ចែក​ដី​សម្រាប់​អ្នក​ដែល​តាំង​ទីលំនៅ​ថ្មី​ និង​អ្នក​ដែល​តាំង​ទីលំ​នៅ​ចាស់។ លោក​មាន​ប្រសាសន៍​ថា៖

«ដីខ្លះ ​ក៏យើង​ពិនិត្យ​ឃើញ​ថា​ មិន​បាន​ដល់​ខាង​ប្រជាជន ​ដែល​គាត់​មិន​មាន​ដី​ពិតប្រាកដ​ បែរ​ជា​ទៅ​ខាង​ក្រុម​គ្រួសារ​ផ្សេង​ដែល​មកពី​ភ្នំពេញ ​ឬក៏​ក្រុម​គ្រួសារ​មកពី​បណ្តា​ខេត្ត​ផ្សេងៗ​ទៅ​វិញ។ ត្រង់​នេះ​ ហើយ​ដែល​ធ្វើ​ឲ្យ​បង្ក​លក្ខណៈ​ដី​សម្បទាន​សង្គមកិច្ច​នេះ ​មាន​ការ​ប្រទាញ​ប្រទង់​ មាន​ការប្រទូសរ៉ាយ រវាង​អ្នក​ភូមិ​ចាស់​គាត់​រស់​នៅ​តាំងពី​យូរ​ណាស់​មក​ហើយ​ ធ្វើ​ឲ្យ​មាន​ការ​ប្រទូសរ៉ាយ​គ្នា»។

យោង​តាម​របាយការណ៍​របស់​សមាគម​សិទ្ធិ​មនុស្ស​ អាដហុក​ បាន​ឲ្យ​ដឹង​ថា ​គណៈកម្មាការ​ផ្តល់ ដី​សម្បទាន​សង្គមកិច្ច​របស់​រដ្ឋាភិបាល​ មាន​គម្រោង​ផ្តល់ដី​សម្បទាន​ទំហំ​១៣៣.១៤៥ហិចតា​ នៅ​ក្នុង ខេត្ត​ចំនូន​១៦​ នៅ​លើ​ទីតាំង​ចំនួន​៤៩​កន្លែង។ រហូត​មកដល់​ពេលនេះ​រដ្ឋាភិបាល​បាន​ធ្វើការ​សិក្សា កំណត់​អត្តសញ្ញាណ ​និង​ស្រង់​ទិន្នន័យ​បាន​ចំនួន​៣៣​កន្លែង ​គឺ​ស្មើ​នឹង​៧១.២៤៦​ហិចតា ​និង​ផ្តល់​ដី សម្បទាន​សង្គមកិច្ច​ទំហំ​៣៦.៩១៧​ហិចតា ​សម្រាប់​១៤.៧៩១គ្រួសារ៕

XS
SM
MD
LG