ភ្ជាប់​ទៅ​គេហទំព័រ​ទាក់ទង

គណៈប្រតិភូ​សហគមន៍​អឺរ៉ុប​បដិសេធ​ព័ត៌មាន​ថា​ខ្លួន​ស៊ើប​អង្កេត​ក្រុម​ហ៊ុន​ឯកជន​មួយ


អ្នក​ភូមិ​នៅ​ខេត្ត​កំពង់​ស្ពឺ​តវ៉ា​ប្រឆាំង​នឹង​ក្រុមហ៊ុន​ ភ្នំពេញ Sugar អំពី​រឿង​រំលោភ​ដី​ធ្លី។

គណៈប្រតិភូ​របស់​សហគមន៍​អ៊ឺរ៉ុប​បាន​បដិសេធ​ភ្លាមៗ​ថា ខ្លួន​មិន​បាន​ឲ្យ​សហគមន៍​អឺរ៉ុប​ផ្តួចផ្តើម​ការស៊ើប​អង្គេត​ទៅលើ​ក្រុមហ៊ុន​ណា ដែល​ជាប់ពាក់ព័ន្ឋ​នឹង​ការរំលោភ​សិទ្ឋិមនុស្ស និង​រំលោភ​ដីធ្លី​ទេ។ ការ​បញ្ចេញ​ប្រតិកម្ម​របស់​គណៈប្រតិភូ​សហគមន៍​អឺរុប​នេះ បាន​កើត​ឡើង​ក្រោយពី​កាសែត​ក្នុងស្រុក​មួយ បាន​ដក​ស្រង់​សម្តី​របស់​លោក រ៉ាហ្វែល ដូឆៅ ម៉ូណេណូ​ (Rafael Dochao Moneno)​ ភារធារី​របស់​សហគមន៍​អឺរ៉ុប​ប្រចាំ​ប្រទេស​កម្ពុជា​ថា ​លោក​បាន​និយាយថា សហគមន៍​អ៊ឺរ៉ុប ​បាន​ប្រកាស​ឲ្យ​មាន​ការស៊ើប​អង្គេត​ទៅលើ​ក្រុមហ៊ុន​របស់​លោក​ឧកញ្ញ៉ា​លី យ៉ុងផាត់​។

ក្រុមហ៊ុន​របស់​លោក​ឧញ្ញ៉ា​លី យ៉ុងផាត់ ​បាន​ចុះ​ពិធីសារ​ស្ករស​ជាមួយ​សហគមន៍​អឺរ៉ុប​ ក្នុងការ​នាំ​ស្ករស​ចេញ​ទៅកាន់​ទីផ្សារ​សហគមន៍​អឺរ៉ុប ដែល​គេ​រំពឹង​ថា ពិធីសារ​នេះនឹង​ជំរុញ​ការ​នាំ​ស្ករស​ទៅ​កាន់​ទីផ្សារ​សហគមន៍​អឺរ៉ុប​ ហើយ​អាច​កើនឡើង​ទ្វេដង​នៅ​ឆ្នាំ២០១២។

ក្រុមហ៊ុន​របស់​លោក​ឧកញ្ញ៉ា​លី យ៉ុងផាត់ ​សមាជិក​ព្រឹទ្ឋសភា​ដ៏​មាន​ឥទ្ឋិពល​មួយរូបខាង​គណបក្សប្រជាជន​កម្ពុជា​បាន​ទទួល​ដី​សម្បទាន​សេដ្ឋកិច្ច​ពី​រដ្ឋាភិបាល​រាប់ម៉ឺន​ហិកតាដើម្បី​ដាំ​ដើម​អំពៅ​នៅក្នុង​ខេត្ត​ចំនួន​បី គឺ​ខេត្ត​ឧត្តមានជ័យ​ កោះកុង​ និង​កំពង់ស្ពឺ។ ឥឡូវ​នេះ​ក្រុមហ៊ុន​នេះ​ ត្រូវ​បាន​ប្រជាពលរដ្ឋ​ចោទប្រកាន់​ថា បាន​រំលោភ​សិទ្ឋិមនុស្ស​ និង​រំលោភ​ដីធ្លី​តាម​រយៈ​ការដាំ​អំពៅ​នេះ។

គណៈប្រតិភូ​សហគមន៍​អឺរ៉ុប កាលពី​ថ្ងៃ​សុក្រ​ បាន​ជួប​ប្រាស្រ័យ​ជាមួយនឹង​មន្រ្តី​អង្គការ​ក្រៅ​រដ្ឋាភិបាល​ និង​ប្រជាពលរដ្ឋ​មកពី​តំណាង​សហគមន៍​នៃ​ខេត្ត​ទាំងបី ​ដែល​ទទួល​រង​នូវ​ផល​ប៉ះពាល់​នេះ។

លោករ៉ាហ្វែល ដូឆៅ ម៉ូណេណូ បាន​ថ្លែង​ប្រាប់​វីអូអេ ​សំឡេង​សហរដ្ឋអាមេរិក​តាមរយៈ​សារ​អេឡិចត្រូនិច ថា លោក​បាន​បដិសេធ​ថា ​សហគមន៍​អ៊ឺរ៉ុប​មិន​បាន​ផ្តួចផ្តើម​ការ​ស៊ើបអង្គេតទេ។ ក៏ប៉ុន្តែ​គណៈ​ប្រតិភូ​សហគមន៍​អឺរ៉ុប នឹ​ងប្រមូល​រាល់​ព័ត៌មាន​ពី​ប្រភព​ផ្សេងៗ​ទាំងអស់ ​ដើម្បី​ផ្តល់​ជូន​ទីស្នាក់ការ​សហគមន៍​អឺរ៉ុប​នៅ​ទីក្រុង​Brussels ​ប្រទេស​ប៊ែលហ្សិក។

រាល់​បញ្ហា​ទាំងអស់នេះ ​លោក​សេង សុខហេង ​តំណាង​សហគមន៍​មកពី​ខេត្ត​ឧត្តមានជ័យ​ បាននិយាយ​ថា​ សហគមន៍​របស់​លោក​ចង់​ឲ្យ​សហគមន៍​អឺរ៉ុប​ធ្វើការ​ស៊ើបអង្គេត​ទៅលើ​ក្រុមហ៊ុន​របស់​លោក​ឧកញ្ញ៉​លី យ៉ុងផាត់ មុន​នឹង​ទទួលយក​ផលិតផល​ស្ករស​ចេញពី​ក្រុមហ៊ុន​នេះទៅកាន់​ទីផ្សារ​របស់​សហគមន៍​អ៊ឺរ៉ុប។ លោក​បាន​មាន​ប្រសាសន៍​ថា​ក្រុមហ៊ុន​នេះ កំពុង​រំលោភ​បំពាន​យ៉ាង​ធ្ងន់ធ្ងរ​ទៅ​លើ​សិទ្ឋិ​ដីធ្លី​របស់​ប្រជាពលរដ្ឋ។ លោក​មាន​ប្រសាសន៍​ថា៖

«ក្រុមហ៊ុនដែល​លក់​ផលិតផល​ទៅ​អ៊ឺរ៉ុប​នោះ គឺ​គាត់​កំពុងតែ​មាន​ការរំលោភ​ដីធ្លី​ប្រជាពលរដ្ឋ ​និង​ការ​រំលោភ​សិទ្ឋិមនុស្ស​អញ្ចឹង ​EU ​គាត់​បាន​ គាត់​ទទួល​ទិញ​ក្រុមហ៊ុន​ទាំង​ឡាយណា ​ដែល​គោរព​នូវ​សិទ្ឋិ​មនុស្ស​ ដែល​មិន​រំលោភ​ដីធ្លី​ប្រជាពលរដ្ឋ ​មិន​ប្រើ​ហឹង្សា​ទៅលើ​ប្រជាពលរដ្ឋ​»។

ចំណែក​លោក​អាន ហៃយ៉ា​ តំណាង​សហគមន៍​មកពី​ខេត្ត​កោះកុង​ បាន​និយាយថា​ ប្រជាពលរដ្ឋនៅ​ខេត្ត​កោះកុងចំនួន​២៥០​គ្រួសារ ​កំពុងតែ​បាត់បង់​ដីធ្លី​ចំនួន​ជាង​១.៧០០ហិកតាដោយសារ​តែ​ក្រុមហ៊ុន​កោះកុង​ SUGAR ​រំលោភ​យក។ លោក​បន្ត​ថា៖

«នៅក្នុង​នោះ បាន​ប៉ះពាល់​ដីធ្វើឲ្យ​ប្រជាពលរដ្ឋ​បាត់បង់​ដី ដោយសារ​ក្រុមហ៊ុន​ទទួល​ការ​សម្បទាន​ពី រាជរដ្ឋាភិបាល។ នៅក្នុង​នោះ មាន​ប្រជាពលរដ្ឋ​ជាង​២០០គ្រួសារ ​ដី​ជាង១៧០០ហិតា»។

អ្នកស្រី​ឈាង គឹមស៊ុន​ តំណាង​ក្រុមហ៊ុន​ភ្នំពេញ​និង​កំពង់ស្ពឺ​ SUGAR​ បាន​បដិសេធ​ការចោទ​ប្រកាន់​នេះ។ អ្នកស្រី​បាន​មាន​ប្រសាសន៍​ថា ក្រុមហ៊ុន​របស់​អ្នកស្រី​ពុំ​បាន​រំលោភ​សិទ្ឋិមនុស្ស​ និង​រំលោភ​សិទ្ឋិ​ដីធ្លីទេ ​ហើយ​អ្នកស្រី​បាន​និយាយថា ​ក្រុម​ហ៊ុន​អ្នកស្រី​ធ្វើ​អ្វីៗ​ទាំងអស់​ដោយ​គោរព​តាមផ្លូវច្បាប់។

XS
SM
MD
LG