ក្រុមបណ្តាប្រទេសម្ចាស់ជំនួយនិងរដ្ឋាភិបាលកម្ពុជានឹងជួបប្រជុំក្រោមការស្រែកទាមទារពីអង្គការសង្គមស៊ីវិលនិងគណបក្សប្រឆាំងឱ្យបង្ហាញនូវការគ្រប់គ្រងធនធានធម្មជាតិនិងថវិកាឱ្យបានល្អ។
នៅក្នុងសេចក្តីប្រកាសព័ត៌មានដែលចេញផ្សាយមួយថ្ងៃមុនពេលកិច្ចប្រជុំដែលគ្រោងធ្វើនៅថ្ងៃពុធនិងថ្ងៃព្រហស្បតិ៍ លោក Gavin Hayman នាយកនៃការធ្វើយុទ្ធនាការរបស់អង្គការ Global Witness បានបញ្ជាក់ថា៖ “រដ្ឋាភិបាលកម្ពុជាបានធ្វើការសន្យារាប់ឆ្នាំមកហើយថា នឹងធ្វើការកែទម្រង់ប៉ុន្តែមិនមានអ្វីបានផ្លាស់ប្តូរសោះ”។
លោក Hayman ក៏បានបន្ថែមទៀតថា៖ “របាយការចុងក្រោយរបស់យើងបង្ហាញថា អ្នកនយោបាយជាន់ខ្ពស់ខ្មែរនៅតែមិនមានចេតនាក្នុងការបន្ធូរបន្ថយការប៊ឺតជញ្ជក់ធនធានធម្មជាតិរបស់ប្រទេសនេះបានទេ ហើយក្រុមម្ចាស់ជំនួយមិនអាចបន្តបិទភ្នែកតទៅទៀតបានឡើយ"។
អង្គការ Global Witness ក៏បានគូសបង្ហាញចំណុចមួយចំនួនដែលខ្លួនយល់ថា ជាអំពើពុករលួយនិងជាការបរាជ័យរបស់រដ្ឋាភិបាលខាងផ្នែកអភិបាលកិច្ចនារយៈពេល១៨ខែកន្លងមកនេះ ក្នុងនោះមានដូចជាការចំណាយប្រាក់ពីក្រុមហ៊ុនប្រេងTotal រាប់លានដុល្លារចូលក្នុងខ្ទង់"មូលនិធិសង្គម" ដោយមិនដឹងថា ចូលទៅកន្លែងណាពិតប្រាកដ ការរឹបអូសយកដីធ្លីពីជនក្រីក្រ ច្បាប់ប្រឆាំងអំពើរពុករលួយដែលមានភាពប្រទាំងប្រទើស និងអាជីវកម្មនាំខ្សាច់ចេញប្រព្រឹត្តដោយសេដ្ឋីខ្មែរពីររូបសិ្នទ្ធនឹងគណបក្សប្រជាជនកម្ពុជា។
ចំណែកគណបក្សសម រង្ស៊ីវិញបានចេញសេចក្តីថ្លែងការណ៍មួយស្នើសុំឱ្យម្ចាស់ជំនួយអន្តរជាតិផ្តោតការយកចិត្តទុកដាក់លើបញ្ហាអភិបាលកិច្ចល្អ កែប្រែប្រព័ន្ធបោះឆ្នោតដើម្បីធានាឱ្យប្រជាពលរដ្ឋបានចូលរួមបោះឆ្នោតគ្រប់ៗគ្នា បង្កើនសេវាព្យាបាលសម្រាប់ប្រជាពលរដ្ឋក្រីក្រ បន្ថយថ្លៃដើមក្នុងការផលិតផលិតផលកសិកម្ម ធ្វើឱ្យប្រសើរឡើងវិស័យអប់រំដែលនៅតែខ្វះខាតគ្រូនៅតំបន់ដាច់ស្រយ៉ាល និងការគ្រប់គ្រងថវិកាចំណូលឱ្យបានច្បាស់លាស់។
លោក យឹម សុវណ្ណ អ្នកនាំពាក្យនិងជាអ្នកតំណាងរាស្រ្តគណបក្ស សម រង្ស៊ីបានសម្តែងសុទិដ្ឋិនិយមថា ជារៀងរាល់ពេលដែលរដ្ឋាភិបាលលើកផែនការឡើងតែងតែល្អគួរឱ្យទទួលយកបាន ប៉ុន្តែការអនុវត្តគឺមិនបានដូចការលើកឡើងទេ។
“អនុសាសន៍របស់គណបក្សប្រឆាំងនៅពេលនេះគឺផ្តោតទៅលើការអនុវត្តរបស់រដ្ឋាភិបាល សរសេរបានល្អហើយ ប៉ុន្តែសូមអនុវត្តឱ្យបានល្អ។ បើមិនមានការអនុវត្តទេ ផែនការនិងក្លាយទៅជាអត់ផែនការទេ ប្រសិនបើមិនមានការអនុវត្តឱ្យបានត្រឹមត្រូវទៅតាមផែនការនោះ"។
កាលពីឆ្នាំមុនម្ចាស់ជំនួយបានសន្យាផ្តល់ប្រាក់ជិត១០០០លានដុល្លារដល់រដ្ឋាភិបាលកម្ពុជា ហើយយោងតាមប្រភពជិតស្និទ្ធនឹងការប្រជុំម្ចាស់ជំនួយឱ្យដឹងថា សម្រាប់ឆ្នាំនេះរដ្ឋាភិបាលគ្រោងនឹងស្នើសុំប្រាក់ប្រហាក់ប្រហែលគ្នានេះផងដែរ។
លោក ហង្សជួន ណារ៉ុន អគ្គលេខាធិការនៃក្រសួងសេដ្ឋកិច្ច និងហិរញ្ញវត្ថុបានប្រាប់វីអូអេសំឡេងសហរដ្ឋអាមេរិកតាមទូរស័ព្ទកាលពីល្ងាចថ្ងៃច័ន្ទថា លោកនឹងលើកយកពីលទ្ធផលនៃស្ថានភាពម៉ាក្រូសេដ្ឋកិច្ចដែលជាវិស័យមួយស្ថិតក្រោមការគ្រប់គ្រងរបស់លោក។
“យើងលើកជារួម គឺលើកពីស្ថានភាព ដែលបានអនុវត្តឆ្នាំកន្លងទៅនេះ។ ការគ្រប់គ្រងស្ថានភាពម៉ាក្រូសេដ្ឋកិច្ចបានល្អគឺថា បានខាងផ្នែកដៃគូអភិវឌ្ឍន៍គេបានធ្វើការកោតសរសើរយើងដែរ"។
ជារឿយៗ ម្ចាស់ជំនួយតែងតែស្នើឱ្យរដ្ឋាភិបាលកម្ពុជាយកចិត្តទុកដាក់លើបញ្ហាអភិបាលកិច្ចល្អ ច្បាប់ប្រឆាំងអំពើពុករលួយ និងការគ្រប់គ្រងធនធានព្រៃឈើប្រកបដោយតម្លាភាព៕