ភ្ជាប់​ទៅ​គេហទំព័រ​ទាក់ទង

យុទ្ធនាការ​​ត្រៀម​ចំពោះ​គ្រោះ​មន្តរាយ​ត្រូវ​រៀប​ចំ​ឡើង​នៅ​ខេត្ត​កំពង់ធំ


ខេត្ត​ចំនួន​១៣​​ត្រូវ​​រង​ការ​លិច​ទឹក​ជំនន់​ចាប់​តាំង​ពី​ថ្ងៃ​ចន្ទ។

គណៈ​កម្មាធិការ​ជាតិ​គ្រប់គ្រងគ្រោះ​មហន្តរាយ​ រួម​ជា​មួយ​បណ្តា​អង្គការ​ក្រៅ​រដ្ឋាភិបាល​អន្តរជាតិ​ចំនួន​១០ បាន​បើក​យុទ្ធនាការ​រួម​គ្នា​មួយ ​ដើម្បី​ផ្សព្វផ្សាយ​ដល់​ប្រជា​ពលរដ្ឋ​ ជា​ពិសេស​សហគមន៍​ក្រីក្រ​ដែល​ងាយ​រង​គ្រោះ​ ឲ្យ​ស្វែង​យល់​អំពី​វិធី​សាស្រ្ត​បង្ការ​គ្រោះ​ភ័យ​នៃ​គ្រោះ​មហន្តរាយ​ធម្មជាតិ ​ដែល​អាច​កើត​ឡើង​ជា​យថាហេតុ។ យុទ្ធនាការ​ផ្សព្វផ្សាយ​អំពី​វិធានការ​កាត់​បន្ថយ​គ្រោះ​មហន្តរាយ​នេះ ត្រូវ​បាន​គេ​រៀបចំ​ឡើង​នៅ​ក្នុង​ខេត្ត​កំពង់ធំ​ កាល​ពី​ថ្ងៃ​ពុធ។

មន្រ្តី​រដ្ឋាភិបាល​និង​អង្គការ​ក្រៅ​រដ្ឋាភិបាល​អន្តរជាតិរួម​មាន​អង្គការ​ទស្សនៈ​ពិភពលោក អង្គការ​ ActionAid​ ជា​ដើម បាន​លើក​ឡើងថា​ប្រជា​សហគមន៍​ក្រីក្រ​កម្ពុជា ចាំបាច់​ត្រូវ​តែ​ត្រៀមវិធានការ​បង្ការ​គ្រោះ​ភ័យ​នៃ​គ្រោះ​មហន្តរាយ​ឲ្យ​បាន​រួច​ជា​ស្រេច ដើម្បី​បញ្ជៀស​ផល​ប៉ះពាល់​ធ្ងន់ធ្ងរ​នៃ​គ្រោះ​មហន្តរាយ​ធម្មជាតិ​ណា​មួយ​ដែល​អាច​កើត​មាន​នៅ​ក្នុង​ប្រទេស។

លោក ញឹម វណ្ណដា អនុប្រធាន​ទី១​នៃ​គណៈ​កម្មាធិការ​ជាតិ​គ្រប់គ្រង​គ្រោះ​មហន្តរាយ បាន​មាន​ប្រសាសន៍​នៅ​ក្នុង​ទិវា​អន្តរជាតិ​សម្រាប់​ការ​កាត់​បន្ថយ​គ្រោះ​មហន្តរាយ​ដែល​ត្រូវ​បាន​ប្រារព្វ​ឡើង​នៅ​ក្នុង​ខេត្ត​កំពង់ធំ​កាល​ពី​ថ្ងៃពុធ​ទី​១៣ ខែ​តុលា​នេះ​ថា ថ្វី​ត្បិត​តែ​ស្ថានភាព​ភូមិសាស្រ្ត​របស់​ប្រទេស​កម្ពុជា​ មាន​លក្ខណៈ​អំណោយ​ផល​ក្នុង​ការ​ទប់ទល់​នឹង​គ្រោះ​មហន្តរាយ​ធម្មជាតិ​មួយ​ចំនួន​ក៏​ដោយ​ ក៍​ប្រជា​សហគមន៍​នៅ​តាម​មូលដ្ឋាន​ត្រូវ​តែ​ត្រៀម​បង្ការ​ទុក​ជា​មុន​ចំពោះ​បាតុភូត​គ្រោះ​មហន្តរាយ​ធម្មជាតិ​ណា​មួយ​នោះ។

«យើង​ដឹង​ហើយ​ថា​ប្រទេសកម្ពុជា​មាន​ជួរ​ភ្នំ​ព័ទ្ធ​ជុំវិញ គិត​ថា​មិន​អាច​នឹង​កើត​មាន​ឡើយ​ខ្យល់​ព្យុះ​ទីហ្វុង​ឬ​ព្យុះ​ធ្ងន់ធ្ងរ​ ប៉ុន្តែ​ជាក់​ស្តែង​នៅ​ក្នុង​ឆ្នាំ​២០០៩​ ព្យុះ​កេតសាណា​បាន​បោក​បក់​មក​លើ​ព្រះ​រាជាណាចក្រ​កម្ពុជា​ បង្ក​ការ​ខូចខាត​និង​បាត់​បង់​សរុប​ជាង​១៣០​លាន​ដុល្លារ​សហរដ្ឋ​អាមេរិក។ ដូចនេះ​ហើយ​ យើង​បាន​កំណត់​នូវ​ទិស​ស្លោក​ថា ​សហគមន៍​របស់​ខ្ញុំ​ត្រៀម​ជា​ស្រេច​ដើម្បី​ជា​សហគមន៍​មួយ​មាន​សមត្ថភាព​ទប់ទល់​បាន​ទៅ​នឹង​គ្រោះ​មហន្តរាយ​ព្រោះ​នៅពេល​ដែល​មូលដ្ឋាន​សហគមន៍​ខ្សោយ​និង​ទ្រុឌ​ទ្រោម​ខាង​សេដ្ឋកិច្ច​និង​បរិស្ថាន​ នោះ​គ្រោះ​មហន្តរាយ​នឹង​យាយី​ដល់​សហគមន៍​ជា​ពុំខាន» ។

កាល​ពី​ថ្ងៃទី​២៦​ខែ​កញ្ញា​ឆ្នាំ​មុន​ ឥទ្ធិពល​នៃ​ខ្យល់​ព្យុះ​កេតសាណា​បាន​បក់​បោក​មក​លើ​ប្រទេស​កម្ពុជា​ដោយ​បណ្តាល​ឲ្យ​មនុស្ស៤៣​នាក់​ស្លាប់​និង​របួស​ធ្ងន់​៨៧​នាក់ នេះ​បើ​យោង​តាម​គណៈ​កម្មាធិការ​ជាតិ​គ្រប់គ្រង​គ្រោះ​មហន្តរាយ។ ដោយ​ឡែកខេត្ត​កំពង់​ធំ​នេះ​ ជា​ខេត្ត​ដែល​រង​ផល​ប៉ះពាល់​ធ្ងន់​ធ្ងរ​ជាង​គេ​ដោយ​មាន​មនុស្ស​៩នាក់បាន​ស្លាប់​នៅ​ក្នុង​គ្រោះ​មហន្តរាយ​នោះ​ ហើយ​ផ្ទះ​របស់​ប្រជាពលរដ្ឋ​ជាង​៥០០​រយ​ខ្នង​ត្រូវ​បាន​បំផ្លាញ​ និង​រង​ការ​ខូច​ខាត​ធ្ងន់​ធ្ងរ​ដោយ​សារ​ទឹក​ជំនន់​ដែល​បណ្តាល​មក​ពី​ឥទ្ធិពល​នៃ​ខ្យល់​ព្យុះ​នោះ។

លោក ឈុន ឈន់ អភិបាល​ខេត្ត​កំពង់ធំ​ មាន​ប្រសាសន៍​ថា​ គ្រោះ​មហន្តរាយ​ដូច​ជា​ខ្យល់​ព្យុះ​និង​ទឹក​ជំនន់​ដែល​បាន​កើត​ឡើង​កន្លង​មក​នៅ​ក្នុង​ខេត្ត​របស់​លោក​នេះ​ បាន​ធ្វើ​ឲ្យ​ប៉ះពាល់​យ៉ាង​ខ្លាំង​ដល់ការ​អភិវឌ្ឍ​ក្នុង​ខេត្ត​របស់​លោក។

«កត្តា​ទាំង​នេះ​ហើយ​បាន​ជា​ធ្វើឲ្យ​ការ​អភិវឌ្ឍ​របស់​ខេត្ត​មាន​ការ​យឺតយ៉ាវ​ពីព្រោះ​វា​បាន​បំផ្លាញ​នូវ​ហេដ្ឋា​រចនា​សម្ព័ន្ធ ​ដំណាំ​រួម​ផ្សំ​និង​ដំណាំ​ស្រូវ​ ដំណាំ​កសិ​ឧស្សាហកម្ម​ ផ្ទះ​សម្បែង​ អនាម័យ​ សុខភាព​និង​ជីវិត​របស់​បងប្អូន​ប្រជាពលរដ្ឋ។»

ប្រទេស​កម្ពុជា​ជា​ប្រទេស​ដែល​ងាយ​រងគ្រោះ​បំផុត​មួយ​ពីគ្រោះ​មហន្តរាយ​ធម្មជាតិ​ដូច​ជា​ទឹក​ជំនន់​និង​គ្រោះ​រាំង​ស្ងួត​ជា​ដើម ដោយសារ​ប្រទេស​នេះ ក៏​ដូចជា​បណ្តារ​ប្រទេស​ក្រី​ក្រី​បំផុត​ផ្សេង​ទៀត​ដែរ​ ពុំ​ទាន់​មាន​លទ្ធភាព​គ្រប់​គ្រាន់​ក្នុង​ការ​បង្ការ​និង​ឆ្លើយ​តប​ប្រកប​ដោយ​ប្រសិទ្ធិភាព​ទៅ​នឹង​បាតុភូត​ធម្មជាតិ​ប្រកប​ដោយ​គ្រោះ​ថ្នាក់​ទាំង​នេះ​នៅ​ឡើយ​ទេ។

លោក យុន​ ស៊ីណា ប្រធាន​កម្មវិធី​កិច្ចការ​ការងារ​មនុស្សធម៌​និង​ជំនួយ​សង្រ្គោះ​បន្ទាន់​ នៃ​អង្គការ​ទស្សនៈ​ពិភពលោក​ ឬ World Vision មាន​ប្រសាសន៍​ថា​ វិធានការ​បង្ការ​គ្រោះ​មហន្តរាយ ​គួរ​តែ​ត្រូវ​បាន​ដាក់​បញ្ចូល​ទៅ​ក្នុង​ផែន​ការ​អភិវឌ្ឍ​មូលដ្ឋាន​ដើម្បី​ធានា​ថា ប្រជា​ពលរដ្ឋ​ដែល​ងាយ​រងគ្រោះ​ដោយ​សារ​គ្រោះ​ធម្មជាតិ​ផ្សេងៗ​នេះ អាច​មាន​លទ្ធភាព​ត្រៀម​ខ្លួន​ជា​មុន​ចំពោះ​គ្រោះ​មហន្តរាយ ​ដែល​អាច​កើត​មាន​ទៅ​លើ​ពួក​គេ​នោះ។

«ឧទាហរណ៍​មុន​ពេល​ទឹក​ជំនន់​ តើ​គាត់​ត្រូវ​ធ្វើ​អ្វី ត្រៀម​ទឹក​ស្អាត​ គាត់​ត្រូវ​ត្រៀម​ចំណី​អាហារ​ ឬក៏​ធ្វើ​កន្លែង​ដើម្បី​កុំ​ឲ្យ​កូន​ក្មេង​វា​ធ្លាក់​ទឹក​ ឬ​ក៏ ត្រូវ​កំណត់​ទី​ទួល​សុវត្ថិភាព។ល។ អញ្ចឹង​ពេល​មាន​គ្រោះ​មហន្តរាយ​កើត​ឡើង​ គឺ​គាត់​ប្រើ​ប្រាស់​វិធានការ​ ផែនការ​របស់​គាត់​ហ្នឹង។ អញ្ចឹង​ជា​ផ្នែក​មួយ​នៃ​ការ​ត្រៀម​បង្ការ​ ហើយ​យើង​លើក​ទឹក​ចិត្ត​ឲ្យ​វិធាន​ការ​ត្រៀម​ ត្រូវ​បាន​បញ្ជ្រាប​ទៅ​ក្នុង​ផែនការ​អភិវឌ្ឍ»។

លោក​ អាឡូយសៀស ចេម (Aloysius James) នាយក​គ្រប់គ្រង​គម្រោង​កាត់​បន្ថយ​គ្រោះ​មហន្តរាយ​ និង​ការ​បន្សាំ​ទៅ​នឹង​ការ​ប្រែប្រួល​អាកាសធាតុ​នៃ​អង្គការ ​ActionAid បាន​មាន​ប្រសាសន៍​ថា វា​ជា​ការ​ល្អ​ប្រសើរ​ហើយ​ក្នុង​ការ​បង្កើន​ការ​យល់​ដឹង​របស់​ប្រជា​សហគមន៍​ក្នុង​ការ​ត្រៀម​ខ្លួន​ជា​មុន​ ដើម្បីបង្ការ​ផល​ប៉ះពាល់​ធ្ងន់​ធ្ងរ​នៅ​ពេល​មាន​គ្រោះ​មហន្តរាយ​ណា​មួយ​កើត​ឡើង​នោះ​ ក៏​ប៉ុន្តែ​ លោក​អាឡូយ​សៀស​ មាន​ប្រសាសន៍​បន្ថែម​ថា ការ​ត្រៀម​របស់​សហគមន៍​តែ​ឯកឯង​គឺ​មិន​ទាន់​គ្រប់​គ្រាន់​នៅ​ឡើយ​ទេ ពោល​គឺ​ត្រូវ​មាន​ការ​ត្រៀម​បង្ការ​ជា​ស្រេច​ផងដែរ​ពី​សំណាក់​រដ្ឋាភិបាល​មូលដ្ឋាន​រហូត​ដល់​រដ្ឋាភិបាល​ថ្នាក់​ជាតិ​ ដើម្បី​ឆ្លើយ​តប​ឲ្យ​ទាន់​ពេល​វេលា​នៅ​ពេល​ដែល​មាន​គ្រោះ​មហន្តរាយ​ណា​មួយ​កើត​ឡើង​នោះ។

«បើ​យើង​និយាយ​អំពី​យន្តការ​នោះ​ គឺ​នៅ​មិន​ទាន់​គ្រប់​គ្រាន់​នៅ​ឡើយ​ ដូច្នេះ​ការ​ចូលរួម​របស់​ស្ថាប័ន​និង​ការ​រៀបចំ​របស់​ស្ថាប័ន​គឺ​មាន​សារៈ​សំខាន់​ណាស់ ​គឺ​ដើម្បី​ឲ្យ​សហគមន៍​មាន​សមត្ថភាព​អាច​ឆ្លើយតប​បាន​ ដូច្នេះ​ស្ថាប័ន​នីមួយៗ​ឧទារហណ៍​ដូច​ជា​ខាង​សុខាភិបាល​ កសិកម្ម ឬ​គណៈកម្មាធិការ​គ្រប់គ្រង​គ្រោះ​មហន្តរាយត្រូវ​តែ​ត្រៀម​រៀបចំ​ជា​ស្រេច ដើម្បី​ឆ្លើយតប​នឹង​មុខ​សញ្ញា​ឬ​គ្រោះ​ថ្នាក់​ទាំង​ឡាយ​ណា​ដែល​កើត​នៅ​សហគមន៍។»

លោក អាឡូយសៀស ចេម​ មាន​ប្រសាសន៍​បន្ថែម​ថា​ ដូច្នេះ​ស្ថាប័ន​ដែល​ពាក់ព័ន្ធ​គួរ​តែ​ធ្វើការ​ជាមួយ​អាជ្ញាធរ​និង​សហគមន៍​មូលដ្ឋាន​ដើម្បី​ឲ្យ​ដឹង​ថា ​តើ​វិធានការ​ត្រៀម​បង្ការ​គ្រោះ​មហន្តរាយ​បែប​ណា​ដែល​មាន​ប្រសិទ្ធិភាព​សម្រាប់​សហគមន៍​ប្រភេទ​ណា​នោះ។

យ៉ាង​ណាក៏​ដោយ​ អ្នកស្រី ប៉ាច​ ម៉ៅ វ័យ​៤៧​ឆ្នាំ​ ប្រជាពលរដ្ឋ​ម្នាក់​នៅ​ក្នុង​ភូមិ​ជាំ​ ឃុំ​តាំង​ក្រសៅ​ ស្រុក​ប្រាសាទ​សម្បូរ​ ដែល​បាន​រងគ្រោះ​ដោយ​ទឹក​ជំនន់​កាល​ពី​ឆ្នាំ​មុន​ បាន​មាន​ប្រសាសន៍​ថា ពី​មុន​អ្នក​ស្រី​មិន​ដឹង​ថា​តើ​ត្រូវ​ដោះ​ស្រាយ​យ៉ាង​ដូច​ម្តេច​ទេ​ នៅ​ពេល​ជួប​ប្រទះ​នូវ​គ្រោះ​ទឹក​ជំនន់​នោះ​ ប៉ុន្តែ​ពេល​នេះ​ អ្នក​ស្រី​បាន​យល់​ដឹង​ខ្លះហើយ​អំពី​វិធានការ​ត្រៀម​ជា​មុន​ចំពោះ​បាតុភូត​គ្រោះ​ធម្មជាតិ​ដែល​អាច​នឹង​កើត​ឡើង​នៅ​ពេល​ខាង​មុខ​ទៀត​នោះ។

«ពេល​មាន​គ្រោះ​មហន្តរាយ​ដូច​ជា​គ្រោះ​ទឹក​ជំនន់​ យើង​ត្រូវ​រត់​រក​ទី​ជម្រក​កន្លែង​ទួល​មាន​សុវត្ថិភាព»។

អ្នក​ស្រី​ ប៉ាច ម៉ៅ​ មាន​ប្រសាសន៍​បន្ថែម​ថា អ្នក​ស្រី​នឹង​ផ្សព្វផ្សាយ​បន្ត​អំពី​វិធានការ​ត្រៀម​បង្ការ​គ្រោះភ័យ​នេះ​ដល់​អ្នក​ភូមិ​របស់​អ្នក​ស្រី​ដែរ​ ដើម្បី​ឲ្យ​ពួកគេ​អាច​ត្រៀម​ខ្លួន​ជា​ស្រេច​ដូច​អ្នកស្រី​ដែរ​សម្រាប់​ទប់​ទល់​ទៅ​នឹង​គ្រោះ​មហន្តរាយ​ដែល​អាច​នឹង​កើត​មាន​ឡើង​ជា​យថាហេតុ​នៅ​ពេល​ណា​មួយ​នោះ៕

XS
SM
MD
LG