ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

គណ​បក្ស​កាន់​អំណាច​បញ្ចប់​កិច្ច​ប្រជុំ​គណៈ​កម្មាធិការ


ភ្នំពេញ៖ បន្ទាប់​ពីបើក​សន្និបាត​គណៈ​កម្មាធិការ​កណ្ដាល​អស់​រយៈពេល​ពីរ​ថ្ងៃ​រួច​មក​ ​នៅថ្ងៃ​នេះ ​គណបក្ស​ប្រជាជន​កម្ពុជា​ បាន​ជំរុញ​ការ​ការពារ​សន្ដិសុខ​ និង​អភិវឌ្ឈន៍​សេដ្ឋ​កិច្ច​ ដោយ​ធានា​អះអាង​ជា​បន្ថែម​ទៀត​ដល់​ការ​ផ្ដល់​ឱកាស​បេក្ខភាព​នាយក​រដ្ឋ​មន្រ្ដី​របស់​លោក​ហ៊ុន សែន។

គណបក្ស​ប្រជាជន​កម្ពុជា​របស់​លោក​នាយក​រដ្ឋមន្រ្តី​ហ៊ុន សែន​ នៅថ្ងៃ​ព្រហស្បតិ៍​នេះ​ បាន​លើក​ទិស​ដៅ​ផ្តោត​ទៅ​លើ​ការ​អភិវឌ្ឍ​សេដ្ឋកិច្ច​ សន្តិសុខ​ និង​ពង្រីក​សមាជិក​របស់​ខ្លួន​ឲ្យ​កាន់​តែ​ទូលំ​ទូលាយ​ថែម​ទៀត​ នៅ​ក្នុង​ស្រទាប់​យុវវ័យ​ជំនាន់​ក្រោយ។

នេះ​គឺជា​សេចក្តី​សម្រេច​របស់​គណបក្ស​កាន់​អំណាច​ដ៏​រឹងមាំ​មួយ​នេះ​ ​ក្រោយ​ពី​សន្និ​បាត​គណៈ​កម្មាធិការ​កណ្តាល​របស់​ខ្លួន​អស់​រយៈពេល​ពីរ​ថ្ងៃ​ ដែល​បាន​បញ្ចប់​នៅ​ថ្ងៃ​នេះ។

លោក​ខៀវ កាញារិទ្ធ ​អ្នកនាំពាក្យ​គណបក្ស​ប្រជាជន​កម្ពុជាបាន​ថ្លែង​ប្រាប់​អ្នក​កាសែត​ នៅ​ប៉ុន្មាន​ម៉ោង​មុននេះ​ថា​ ​ការ​លើក​ទិសដៅ​នេះ​គឺជា​ប្រយោជន៍​សម្រាប់​ការ​ដណ្តើម​យក​ជ័យជំនះ​នៅក្នុង​ការបោះ​ឆ្នោត​ជ្រើស​តាំង​តំណាង​រាស្រ្ត​ ដែល​នឹង​ប្រព្រឹត្ត​ទៅ​នៅ​ឆ្នាំ​២០១៣​ខាងមុខ​នេះ។

«យើង​ផ្តោត​គឺថា​ ការ​ពង្រីក​សមាជិក​បក្ស​ ​ ​ដោយ​ផ្តោត​ទៅលើ​យុវជន​ និង​យេនឌឺ។ ​គ្រប់​ភូមិ​ ឃុំ​ត្រូវតែ​មាន​សុវត្ថិភាព។ ​នេះ​គឺជា​ការ​សំខាន់​ណាស់ ដើម្បី​បង្ក​អារម្មណ៍​សន្តិសុខ​សម្រាប់​ប្រជាជន​ផង​ ​ក៏​ដូច​ធានា​ដល់មូលដ្ឋាន​នៃ​ការ​បង្កើន​បរិដ្ឋាន​បាន​ល្អ​សម្រាប់​ធុរកិច្ច​ និង​ការវិនិយោគ។​ ជា​គោលដៅ​ឈ្នះ​ផង​ ​ប៉ុន្តែ​សំខាន់​ធ្វើ​យ៉ាង​ណា​ក្តី ​ព្រោះ​ជា​គណបក្ស​មួយដែល​កាន់​អំណាច​ គឺ​ការ​ធានា​ឲ្យ​ប្រជាជន​មាន​សុវត្ថិភាព»។

មាន​សមាជិក​ចំនួន​៨៩៦​នាក់​ មកពី​ខេត្ត​ក្រុង​នានា​ ​រួមទាំង​កង​កម្លាំង​ប្រដាប់​អាវុធ​ផង​ បាន​ចូលរួម​នៅ​ក្នុង​សន្និបាត​គណៈ​កម្មាធិការ​កណ្តាល​របស់​គណបក្ស​ប្រជាជន​កម្ពុជា​នេះ។

នៅ​ក្នុង​សេចក្តី​ជូនដំណឹង​ក្រោយ​ពីសន្និបាត​ ​គណបក្ស​ប្រជាជន​កម្ពុជា​បាន​ធ្វើការ​ធានា​សារ​ជាថ្មី​ម្តង​ទៀត​ថា​ ​លោក​នាយក​រដ្ឋមន្រ្តី​ខ្មែរ​ ហ៊ុន សែន ​ដែល​ជា​អនុ​ប្រធាន​គណបក្ស​ ​នៅតែ​ជា​បេក្ខជន​នាយក​រដ្ឋ​មន្រ្តី​សម្រាប់​ការ​បោះឆ្នោត​ជ្រើស​តំាង​តំណាង​រាស្រ្ត​ ដែល​នឹង​មក​ដល់​នៅ​ក្នុង​រយៈ​ពេល​បីឆ្នាំ​ខាង​មុខ​នេះ។

បេក្ខភាព​នាយក​រដ្ឋមន្រ្តី​របស់​លោក​ហ៊ុន សែន ដែល​តែង​តែ​ក្លាយ​ទៅ​ជា​ប្រធាន​បទ​យ៉ាង​ក្តៅ​គគុក​ របស់​គណបក្ស​ប្រជាជន​កម្ពុជា​ នៅ​រាល់​ពេល​មុន​ការបោះឆ្នោត​មកដល់។

ជា​មួយ​គ្នា​នេះ​ដែរ​ ​គណបក្ស​កាន់​អំណាច​បាន​បង្ហាញ​ជំហរ​គាំទ្រ​ដល់​ការ​បោះ​បង្គោល​ព្រំដែន​ជាមួយ​ប្រទេស​វៀតណាម​ និង​ប្រទេស​ឡាវ​ ​ដោយ​បញ្ជាក់​ជំហរ​ថ្កោល​ទោស​ចំពោះ​ចេតនា​ណាមួយ​ ដែល​រារាំង​ការ​បោះ​បង្គោល​ព្រំដែន​នេះ។

គណបក្ស​ជំទាស់​បាន​ធ្វើ​ការ​តវ៉ា​ជា​ខ្លាំង​ចំពោះ​អ្វី​ដែល​ថា​ ​ការ​បោះ​បង្គោល​ព្រំដែន​ជា​មួយ​ប្រទេស​វៀតណាម​បាន​នំា​ឲ្យ​ប្រទេស​កម្ពុជា​បាត់បង់​ទឹកដី​ ​ហើយ​ដែល​មេ​ដឹកនាំ​គណបក្ស​ជំទាស់​លោក​សម រង្ស៊ី ​ត្រូវ​តុលាការ​របស់​ប្រទេស​កម្ពុជា​ផ្តន្ទា​ទោស​ឲ្យ​ជាប់​ពន្ធនាគារ​ចំនួន​ពីរ​ឆ្នាំ​ ​ដោយសារ​តែ​ការ​ប្រឆាំង​ទៅ​នឹង​បញ្ហា​នេះ។

លោក​យឹម សុវណ្ណ ​តំណាង​រាស្រ្ត​ និង​ជា​អ្នកនាំពាក្យ​គណបក្ស​សម រង្ស៊ី ​មាន​ប្រសាសន៍​ថា​ ​ថ្វីបើ​គណបក្ស​ប្រជាជន​កម្ពុជា​បាន​លើក​យុទ្ធសាស្រ្ត​របស់​ខ្លួន​ខាងលើ​ ​ក៏ប៉ុន្តែ​យុទ្ធសាស្រ្ត​នេះ​នឹង​មិនមែន​ជា​ការ​ព្រួយ​បារម្ភ​សម្រាប់​គណបក្ស​ជំទាស់​នៅ​ក្នុង​ការ​ប្រជែង​ដណ្តើម​សន្លឹក​ឆ្នោត​នោះ​ទេ។​ ​ផ្ទុយ​ទៅវិញ​លោក​យឹម សុវណ្ណ ​បាន​ស្តី​បន្តោសគណបក្ស​កាន់​អំណាច​ថា​ ​ជា​គណបក្ស​ដែល​រណប​បរទេស​ទៅវិញ។

«រដ្ឋាភិបាល​ទីក្រុង​ភ្នំពេញ​សព្វ​ថ្ងៃ​នេះ​ជា​រដ្ឋាភិបាល​ដែល​រណប​បរទេស​ ​ដូច្នេះ​វា​គ្រប់​គ្រាន់​ណាស់​ទៅ​ហើយ​សម្រាប់​ប្រជាជន​ខ្មែរ​ពិចារណា​នៅក្នុង​ការ​បោះ​ឆ្នោត​នា​ពេល​ខាងមុខ​នេះ»។

សូម​បញ្ជាក់​ថា​ ​នៅ​ក្នុង​ការ​បោះឆ្នោត​កាលពី​ខែ​កក្កដា​ឆ្នាំ២០០៨​ ​គណបក្ស​ប្រជាជន​កម្ពុជា​បាន​ទទួល​ជ័យជំនះ​យ៉ាង​ធំធេង​ គឺ​ដណ្តើម​បាន​អាសនៈ​ចំនួន​៩០ ​នៅក្នុង​រដ្ឋសភា ​ដែល​មាន​១២៣​អាសនៈ។

លោក​គល់ បញ្ញា ​នាយក​ប្រតិបត្តិ​នៃ​អង្គការ​ឃ្លាំមើល​ការ​បោះឆ្នោត​មួយ​ដែល​ហៅ​កាត់​ថា​ ​អង្គការ​ Comfrel​ បាន​កោត​សរសើរ​ចំពោះ​ការ​លើក​ទិសដៅ​សម្រាប់​ជ័យជំនះ​ នៅ​ក្នុង​ការ​បោះឆ្នោត​ខាងមុខ​របស់​គណបក្ស​ប្រជាជន​កម្ពុជា។ ​ក៏​ប៉ុន្តែ​លោក​បាន​ដាស់​តឿន​ថា​ ​គណបក្ស​ប្រជាជន​កម្ពុជា​ ដែល​កំពុង​តែ​កាច់​ចង្កូត​រដ្ឋាភិបាល ​គួរតែ​ផ្តោត​ការ​យក​ចិត្ត​ទុកដាក់​បង្កើន​កម្រិត​ជីវភាព​ប្រជាជន​ឲ្យ​បាន​ធូរធារ​ជា​បន្ថែម​ទៀត​ ​រួម​ទាំង​បើក​ទូលាយ​ដល់​សិទ្ធិសេរីភាព​របស់​ប្រជា​ពលរដ្ឋ​ និង​ធ្វើ​ឲ្យ​ប្រសើរ​ថែមទៀត​នូវប្រព័ន្ធ​យុត្តិធម៌​នៅក្នុង​ប្រទេស​ ​ដែល​កត្តា​ទាំង​នេះ​នឹង​ជួយ​លើក​ទឹកចិត្ត​ប្រជា​ពលរដ្ឋ​ម្ចាស់​ឆ្នោត​ រួមទាំង​ធ្វើ​ឲ្យ​ពួក​គេ​សប្បាយ​ចិត្ត​ថែម​ទៀត៕

XS
SM
MD
LG