ភ្ជាប់​ទៅ​គេហទំព័រ​ទាក់ទង

តុលាការ​ផ្ដន្ទាទោសអ្នក​​ជាប់ចោទពី​បទ​ប៉ុនប៉ង​បំផ្លាញ​រូបសំណាក​មិត្តភាព​កម្ពុជា​វៀតណាម


ស្តូប​មិត្តភាព​កម្ពុជា​-វៀតណាម​នៅ​ជិត​ព្រះ​បរម​រាជ​វាំង​ក្នុង​ក្រុង​ភ្នំពេញ​ជា​រូប​សំណាក​ដ៏​ចម្រូង​ចម្រាស់​មួយ ​ដោយ​​​ពលរដ្ឋ​ខ្មែរ​​មួយ​ចំនួន​ចាត់​ទុក​រូប​សំណាក​នេះ​ថា​តំណាង​ឲ្យ​ឥទ្ធិពល​របស់​ប្រទេស​វៀតណាម​មក​លើ​ប្រទេស​កម្ពុជា។

នៅ​ថ្ងៃនេះ​ ​តុលាការ​ក្រុង​ភ្នំពេញ​បាន​ផ្ដន្ទា​ទោស​បុរស​ម្នាក់​ក្រោម​ការ​ចោទ​ប្រកាន់​ពី​ការ​បាន​ប៉ុនប៉ង​បំផ្លាញ​រូប​សំណាក​មិត្តភាព​កម្ពុជា​ វៀតណាម។​ បុរស​ជាប់​ចោទ​ឆ្លើយ​ថា​ ​លោក​ត្រូវ​តុលាការ​សម្រេច​ដាក់​ទោស​ធ្ងន់ធ្ងរ​ពេក។

ចៅក្រម​សាលាដំបូង​រាជធានី​ភ្នំពេញ​ ​លោក​អ៊ឹម សំអាត​បាន​សម្រេច​ដាក់​ទោស​លោក​សោម ឯក​នៅ​ថ្ងៃ​ពុធ​នេះ​ឲ្យ​ជាប់​ពន្ធនាគារ​ចំនួន​១៨ឆ្នាំ​ពី​បទ​ផ្សំ​គំនិត​ក្នុង​អំពើ​ភេរវ​កម្ម​ ​ប៉ុនប៉ង​កម្ទេច​ស្ដូប​មិត្តភាព​កម្ពុជា​ វៀតណាម​ក្នុង​ក្រុង​ភ្នំពេញ​មិន​បាន​សម្រេច​កាល​ពី​ខែ​កក្កដា ​ឆ្នាំ២០០៧។

ការ​ផ្ដន្ទា​ទោស​នេះ​ធ្វើ​ឡើងដោយ​យោង​តាម​មាត្រា​ទី​១ ​ទី​២ ​ទី​៣ ​និង​ទី​៤​នៃ​ច្បាប់​ស្ដីពី​ភេរវ​កម្ម​ និង​ច្បាប់​ស្ដីពី​ការ​គ្រប់គ្រង​អាវុធ​ជាតិផ្ទុះ​និង​គ្រាប់​រំសេវ។

ក៏​ប៉ុន្ដែទោស​នេះ​ត្រូវ​កាត់​បន្ថយ​មក​ត្រឹម​១៦ឆ្នាំ​ ៦​ខែ​វិញ​ ​បន្ទាប់​ពី​តុលាការ​បាន​រក​ឃើញ​ថា​ ​ជន​ជាប់ចោទ​ត្រូវ​បាន​ដាក់​ក្នុង​ការ​ឃុំឃាំង​លើស​នីតិ​វិធី​ច្បាប់​កំណត់។

លោក​សោម ឯក​ អតីត​មេដឹកនាំ​រណសិរ្ស​រួបរួម​ជាតិ​ខ្មែរ​ ​បាន​ប្រកាស​ប្រាប់​ក្រុម​អ្នក​យក​ព័ត៌មាន​ថា​ ការ​ផ្ដន្ទាទោស​រូប​លោក​ធ្ងន់ធ្ងរ​ណាស់​ ​ហើយ​លោក​មិន​អាច​ទទួល​យក​បាន​ទេ។

លោក​អ៊ឹម សុជាតិ​ មេធាវី​របស់​លោក​សោម ឯក​ ហៅទី តូ​ ​បាន​ប្រកាស​នៅ​ក្រោយ​ពេល​ប្រកាស​សាលក្រម​ថា​ ​លោក​នឹង​ប្ដឹង​ឧទ្ធរណ៍​ ​ដោយ​លោក​យល់​ឃើញ​ថា​ ​តុលាការ​ក្រុង​ភ្នំពេញ​មិន​មាន​ភស្ដុតាង​គ្រប់គ្រាន់​សម្រាប់​ដាក់​ទោស​លើ​កូន​ក្ដី​លោក​ឡើយ។

“គ្មាន​ភស្ដុតាង​ដាក់​បន្ទុក​ ​គ្មាន​សាក្សី​មក​បំភ្លឺថា​ ​កូន​ក្ដី​ខ្ញុំ​ជាប់​ពាក់​ព័ន្ធ​នឹង​អំពើ​ហ្នឹង​ទេ​ ​ក្រៅ​ពី​លើក​ឡើង​ពី​បញ្ហា​ជំនុំ​ជម្រះ​លើក​មុន"។

លោក​សោម ឯក​ត្រូវ​បាន​ចាប់​ខ្លួន​ដោយ​អាជ្ញាធរ​ប៉ូលិស​កម្ពុជា​នៅក្នុង​ខេត្ត​បន្ទាយមានជ័យ​នៅ​ខែមករា​ ឆ្នាំ២០០៩​ ​គឺ​ជាង​មួយឆ្នាំ​ក្រោយ​ពី​ការ​ដាក់​បង្កៃ​រំសេវ​ប៉ុនប៉ង​ធ្វើ​ឲ្យ​ស្ដូប​មិត្ដភាព​កម្ពុជា-វៀតណាម។​ ស្ដូប​នេះបង្ហាញ​ពី​ការ​កាន់​កាំភ្លើង​រួមគ្នា​រវាង​កងទ័ព​កម្ពុជា ​និង​កងទ័ព​វៀតណាម​ សម្រាប់​ជា​និមិត្ត​រូប​នៃ​ការ​ប្រយុទ្ធ​ផ្ដួល​រំលំ​របប​ពួក​ខ្មែរក្រហម។​ ស្ដូប​ប្រវត្តិ​សាស្ដ្រ​នេះ​ត្រូវ​សាងសង់​នៅ​លើ​សួន​ច្បារ​មុខ​វត្ត​បទុមវតី្ដ ​ក្បែរ​ព្រះ​បរម​រាជវាំង។​ អាជ្ញាធរ​បាន​រក​ឃើញ​ថា​ ​មាន​រំសេវ​ផ្ទុះ​ប្រមាណ​ជា​១០​គីឡូក្រាម​នៅ​ពេល​នោះ​ បន្ទាប់​ពី​គីប​រំសេវ​ច្នៃនោះ​ផ្ទុះ​បាន​បន្ដិច​ ​ហើយ​មិន​បណ្ដាល​ឲ្យ​មាន​ការ​ខូចខាត​ធំដុំ​ ឬ​ក៏​គ្រោះថ្នាក់​ដល់​ជន​ស៊ីវិល​ណា​ម្នាក់​ឡើយ។

នៅ​ក្នុង​ការ​កាត់ទោសកាល​ពី​ខែ​សីហា​កន្លង​ទៅ​ ​លោក​សោម ឯក​បាន​សារភាព​ប្រាប់​ចៅក្រម​ ជំនុំ​ជម្រះ​ថា​ ​លោក​បាន​ទទួល​ប្រាក់​ឧបត្ថម្ភ​ពី​ជនជាតិ​ខ្មែរ​មួយ​ចំនួន​នៅ​សហ​រដ្ឋ​អាមេរិក​ ​នៅ​ប្រទេស​កាណាដា ​និង​នៅ​ប្រទេស​អូស្ដ្រាលី ​ដើម្បី​ធ្វើ​សកម្ម​ភាព​នៅ​ក្នុង​ប្រទេស​កម្ពុជា។

ក្នុង​ចំណោម​អ្នក​ឧបត្ថម្ភ​ទាំងនោះ​ ​មាន​លោក​ថាច់ សាង​ ​អតីត​តំណាង​រាស្ដ្រ​គណបក្ស​ហ៊្វុនស៊ីនប៉ិច​ផង​ដែរ។​ ក៏​ប៉ុន្ដែ​តុលាការ​បាន​ប្រកាស​លើក​លែង​ការ​ចោទ​ប្រកាន់​លោក​ថាច់ សាង​ ​រួម​ជាមួយ​នឹង​ មនុស្ស​មួយ​ចំនួន​ទៀត​ដែល​ត្រូវ​បាន​លើក​ឡើង​ថា​ ​បាន​ជាប់​ពាក់​ព័ន្ធ​នោះ៕

XS
SM
MD
LG