ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

តុលាការ​ក្រុង​ភ្នំពេញ​ផ្អាក​ការបង្ខំ​លោកស្រី​មូរ សុខហួរ ឲ្យ​បង់​ប្រាក់​ពិន័យ​


ភ្នំពេញ៖ តុលាការ​ក្រុង​ភ្នំពេញ បាន​ដក​ថយ​មួយ​ជំហាន​នៅថ្ងៃ​សុក្រ​នេះ ដោយ​សុខចិត្ត​ផ្អាក​មួយ​រយៈ​នៅ​ក្នុង​ការ​បង្ខំ​ឲ្យ​លោកស្រីមូរ សុខហួរ ​តំណាងរាស្រ្ត​គណបក្ស​ជំទាស់​សម រង្ស៊ី បង់​ប្រាក់​ចូល​ថវិកា​ជាតិ​ បន្ទាប់​ពី​លោកស្រី​ត្រូវ​បាន​តុលាការ​កាត់​ឲ្យ​ចាញ់​ក្តី​លោកនាយករដ្ឋមន្រ្តី​ហ៊ុន សែន និងបន្ទាប់​ពី​កំហិត​ឲ្យ​បង់​ប្រាក់​នេះ បាន​ផុត​ថ្ងៃ​កំណត់​កាលពីម្សិលមិញ។ ក៏ប៉ុន្តែ​មេធាវី​របស់​លោក​នាយក​រដ្ឋ​មន្ត្រីហ៊ុន សែន បាន​ជំរុញ​ឲ្យ​រដ្ឋ​សភា​កាត់​ប្រាក់ខែ​របស់​លោកស្រី​មូរ សុខហួរ ដើម្បី​សង​ជម្ងឺ​ចិត្ត​លោក​ហ៊ុន សែន។

លោក​សុខ រឿន ព្រះរាជអាជ្ញា​រង​តុលាការ​ក្រុង​ភ្នំពេញ​មាន​ប្រសាសន៍ថា​ លោក​បាន​ជូនដំណឹង​អំពីការ​ផ្អាក​នេះ ​ទៅ​កាន់​លោកស្រី​មូរ សុខហួរ ហើយ​នៅថ្ងៃ​នេះ ដោយសារ​តែ​លោកស្រី​ត្រូវ​បង់​ប្រាក់​ពិន័យ​ ចំនួន​ពីរ​នៅក្នុង​ពេល​តែមួយ។ លោក​សុខ រឿន មាន​ប្រសាសន៍ថា​ បើយោង​ទៅតាម​ក្រម​នីតិ​វិធី​ព្រហ្មទណ្ឌ​មាត្រា៥៣៣ ​ព្រះរាជ ​អាជ្ញា​មាន​សិទ្ឋិ​ផ្អាក​ការ​បង្ខំ​ទារ​សំណង​នៅក្នុង​ករណី​បែបនេះ។ លោក​បាន​ថ្លែង​ថា៖

«វា​សម្រេច​ទីមួយ​ ផ្អាក​ការអនុវត្ត​បញ្ជា​បង្ខំ​ដល់​រូបកាយ​ជា​បណ្តោះអាសន្ន​ទុក​ឲ្យ​តុលាការ​អនុវត្ត ​ដោយ​បង្ខំ​ទារ​ប្រាក់​សំណង​ជម្ងឺ​ចិត្ត​ជាមុន​ ដោយ​ផ្អែក​តាម​មាត្រា៥៣៣​ ករណី​ប្រជែង​គ្នា ប្រាក់​សំណង​ជម្ងឺ​ ចិត្ត​ត្រូវ​មាន​អទិភាព​ទទួល​សង​មុនគេ»។

លោក​សុខ សំអឿន នាយក​ប្រតិបត្តិ​នៃ​អង្គការ​ក្រុម​អ្នកច្បាប់​ការពារ​សិទិ្ឋ​កម្ពុជា ​មាន​ប្រសាសន៍​ថា ការ​សម្រេច​ចិត្ត​នេះ គឺជា​ការ​បន្ទន់​ជំហរ​មួយ​របស់​តុលាការ​ក្រុងភ្នំពេញ ​ហើយ​វា​គឺជា​គំរូ​ដ៏ល្អ​មួយ​សម្រាប់​ ការអនុវត្ត​នៅថ្ងៃ​ខាងមុខ។

លោកស្រី​មូរ សុខហួរ តំណាងរាស្ដ្រ​ខេត្តកំពត​ត្រូវ​តុលាការ​កំពូល​សម្រេច​កាលពី​ដើម​ខែមិថុនា​ ឆ្នាំ២០១០​នេះ ឲ្យ​លោកស្រី​ចាញ់​ក្ដី​លោកនាយករដ្ឋមន្រ្តី​ហ៊ុន សែន ពីបទ​បរិហាកេរ្តិ៍។ តុលាការ​បាន​ពិន័យ​ លោកស្រី​ឲ្យ​បង់​ប្រាក់​ចំនួន១៦លាន​៥សែន​រៀល​ ឬ​ស្មើនឹង​ប្រមាណជា​៤.០០០​ដុល្លារ​អាមេរិក ដែល​ក្នុង​ចំនួន​នេះ ប្រមាណ ​ជា​២.០០០​ដុល្លារអាមេរិក​ត្រូវ​បង់​ចូល​ជា​ថវិកា​ជាតិ និង​នជិត​២.០០០​ដុល្លា​រទៀត​ត្រូវ​បង់​សង​ជា​ជំងឺ​ចិត្ត​ដល់​លោកនាយករដ្ឋមន្រ្តី​ហ៊ុន សែន។

យោងតាម​លិខិត​ជូនដំណឹង​របស់​ចៅក្រម​ជា សុខហៀង​ នៃ​តុលាការ​ក្រុង​ភ្នំពេញ​ ផ្ញើជូន​លោក​ ព្រះរាជអាជ្ញា​សុខ រឿន​ កាល​ពី​ថ្ងៃព្រហស្បតិ៍​ម្សិលមិញ​បាន​ឲ្យ​ដឹង​ថា ​លោក​គី តិច មេធាវី​លោក​នាយក​រដ្ឋ​មន្រ្តី​ហ៊ុន សែន បាន​ស្នើ​ឲ្យ​តុលាការ​ក្រុងភ្នំពេញ​ធ្វើ​សំណើ​ទៅ​កាន់​រដ្ឋសភា​ជាតិ​ ដើម្បី​កាត់​ប្រាក់ខែ​ លោក​ស្រី​មូរ សុខហួរ សម្រាប់​ជា​ការ​សង​ជំងឺ​ចិត្ត​ដល់​កូន​ក្តី​របស់​លោក។

លោក​ជាម យៀប ប្រធាន​គណៈកម្មាការ​ហិរញ្ញវត្ថុ ​និង​ធនាគារ​របស់​រដ្ឋសភា​មាន​ប្រសាសន៍​ថា រហូត​មកទល់​ល្ងាច​ថ្ងៃសុក្រ​នេះ នៅ​មិនទាន់​មាន​សំណើ​ពី​តុលាការ​ក្រុង​ភ្នំពេញ​ដើម្បី​ស្នើសុំ​កាត់​ប្រាក់​ខែ​លោកស្រី​មូរ សុខហួរ នៅឡើយ។

ដោយ​ឡែក​លោកស្រី​មូរ សុខហួរ មា​នប្រសាសន៍ថា លោកស្រី​នៅ​តែ​ប្រកាន់​ជំហរ​មិន​ព្រម​បង់​លុយនេះទេ ដោយ​សំអាងថា​ តុលាការ​ខ្មែរ​មិន​ឯករាជ្យ។ លោក​ស្រី​មាន​ប្រសាសន៍​ដូច្នេះ​ថា៖

«ជំហរ​ខ្ញុំ​នៅដដែល​ គឺ​ខ្ញុំ​មិនបាន​ប្រព្រឹត្តិ​អ្វី​ខុស​ទេ។ ចង់​បង្ខំ​ឲ្យ​ខ្ញុំ​បង់​ឥឡូវ បង្ខំ​ចាប់​ខ្លួន​ខ្ញុំ​ ជំហរ​ខ្ញុំ​នៅ​ដដែល»។

ជាមួយ​គ្នា​នេះដែរ​ លោក​យឹម សុវណ្ណ​ អ្នកនាំពាក្យ​គណបក្ស​សម រង្ស៊ី មាន​ប្រសាសន៍​ថា ​គណបក្សរបស់​លោក​គាំទ្រ​ការ​សម្រេច​ចិត្ត​របស់​លោកស្រី​មូរ សុខហួរ។ ទោះ​ជា​យ៉ាង​ណា​លោក​ជាម យៀប ​ប្រធាន​គណៈកម្មការ​ហិរញ្ញវត្ថុ​ និង​ធនាគារ​មក​ពី​គណបក្ស​ប្រជាជន​កម្ពុជា មាន​ប្រសាសន៍​ថា ​ការ​សម្រេច​ចិត្ត​កាត់​ប្រាក់​ខែ​លោក​ស្រី​មូរ សុខហួរ នៅ​ក្នុង​រដ្ឋសភា​អាច​នឹង​ធ្វើ​ទៅ​បាន​លុះណាតែ​មាន​ការ​យល់​ព្រម​ពី​លោកស្រី​មូរ សុខហួរ​ ផងដែរ។

XS
SM
MD
LG