ភ្ជាប់​ទៅ​គេហទំព័រ​ទាក់ទង

តុលាការ​រាជធានី​ភ្នំពេញ​បាន​ចេញ​ដីកា​ចាប់​ខ្លួន​លោក​សម​​រង្ស៊ី


លោក​សម​ រង្ស៊ី​ មេដឹកនាំ​គណបក្ស​ជំទាស់​នៅ​ក្នុង​ប្រទេស​កម្ពុជា នៅ​ក្នុង​បន្ទប់​ផ្សាយ​ វីអូអេ​ សម្លេង​សហរដ្ឋ​អាមេរិក​ ក្នុង​រដ្ឋធានី​វ៉ាស៊ីនតោន​​​។

តុលាការ​រាជធានី​ភ្នំពេញ​បាន​ចេញ​ដីកា​ចាប់​ខ្លួន​លោកសមរង្ស៊ី មេដឹក​នាំ​គណបក្ស​ប្រឆាំង​ចំពោះការ​ផ្សព្វ​ផ្សាយ​ផែនទី​ព្រំដែន​ ក្លែងក្លាយ​រវាង​ប្រទេស​កម្ពុជានិង​ប្រទេស​វៀតណាម ​នៅ​លើ​គេហទំព័រគណបក្ស​របស់​លោក​នៅ​ដើម​ឆ្នាំ​នេះ។

រដ្ឋាភិបាល​បាន​ប្តឹង​លោក​សមរង្ស៊ីទៅ​តុលាការ​រាជធានី​ភ្នំពេញ ​អំពី​ការ​ផ្សព្វ​ផ្សាយ​ព័ត៌មាន​មិន​ពិត​ដែល​មាន​ទោស​ជាប់​ពន្ធនាគាររយៈពេល៣ឆ្នាំ និងការ​ក្លែង​ឯកសារ​សាធារណៈដែល​មាន​ទោស​ជាប់​ពន្ធនាគារ​ជាង១៥ឆ្នាំ។

លោកសម រង្ស៊ីបាន​ផ្សព្វ​ផ្សាយផែនទី​នៅ​លើ​គេហទំព័រ​គណបក្ស​ប្រឆាំង​របស់​លោក កាលពីខែ​កុម្ភៈដោយអះអាងថា ប្រទេស​កម្ពុជា​បាន​បាត់​បង់​ដី​ដោយការ​ឈ្លាន​ពាន​របស់​ប្រទេស​វៀតណាម។ ផែនទីនៅលើគេហទំព័រនេះ គឺ​ជាផែនទីត្រឹមត្រូវ និងជួយការពារបូរណភាព​ទឹក​ដីកម្ពុជា។ ផែនទី​នេះឆ្លុះ​បញ្ចាំងពីព្រំដែនរបស់ប្រទេស​កម្ពុជាដែលបាន​យក​ទៅតម្កល់​នៅអង្គការ​សហ​ប្រជាជាតិ។

ផែនទី​នេះត្រូវ​បាន​ផ្សព្វ​ផ្សាយ​នៅលើគេហទំព័រ បន្ទាប់ពីលោកសមរង្ស៊ី ត្រូវបានគេរកឃើញ​ទោស​កំហុស​នៅក្នុងខែមករា​ ​អំពីការ​ដក​តម្រុយបង្គោលព្រំដែនរបស់គណៈកម្មការព្រំដែន​ចម្រុះ​កម្ពុជាវៀតណាម ដែល​ក្រុម​អ្នក​ភូមិបាន​និយាយថា ពួក​គាត់បាន​បាត់​បង់ដីដោយការ​រំលោភរបស់អាជ្ញាធរ​វៀតណាម។

លោក អឿង សៀង ចៅក្រមស៊ើប​សួរនៃតុលាការក្រុង​ភ្នំពេញបាន​បញ្ជាក់នៅក្នុង ដីកា​បង្គាប់​ឱ្យ​ចាប់​ខ្លួន ចុះថ្ងៃទី២៨ ខែឧសភា ឆ្នាំ២០១០ ដែលបាន​ផ្សព្វ​ផ្សាយដល់ប្រព័ន្ធព័ត៌មាន​នៅ​ថ្ងៃអង្គារ​នេះថា «យើង​សម្រចឱ្យ​ចាប់​ខ្លួនឈ្មោះសមរង្ស៊ី និងបញ្ជាដល់កងកម្លាំង​សាធារណៈឱ្យស្រាវ​ជ្រាវរក​ចាប់ និងឱ្យនាំ​ខ្លួនបុគ្គលសមរង្ស៊ីនេះមកប្រគល់ជូនសាលា​ ដំបូងរាជធានី​ភ្នំពេញដើម្បីចាត់​ការតាមផ្លូវច្បាប់»។

លោក ជួង ជូងី មេធាវីរបស់លោកសម រង្ស៊ី បាន​ថ្លែងថា លោកបាន​ទទួលដីកា​ចាប់​ខ្លួននេះហើយលោកសមរង្ស៊ីបាន​ដឹងពី ដីកា​ចាប់​ខ្លួននេះហើយ។ លោក​ថ្លែង​ដូច្នេះ​ថា៖

«ខ្ញុំបាន​ថត​ចម្លងដីកាចាប់​ខ្លួន និងដីកា​បង្គាប់ឱ្យ​នាំ​ខ្លួនពី​តុលាការបានមកហើយ។ខ្ញុំមានវិធីរបស់​ខ្ញុំក្នុងការការពារសិទ្ធិរបស់​កូន​ក្តីខ្ញុំ ប៉ុន្តែខ្ញុំមិនអាចបក​ស្រាយបានទេ។»

លោក គី តិច មេធាវីរបស់រដ្ឋាភិបាល បាន​សុំ​ឱ្យតុលាការផ្តន្ទាទោស​លោកសម រង្ស៊ីតាមផ្លូវច្បាប់​ ​បើតុលាការរកឃើញទោស​កំហុសរបស់លោកសមរង្ស៊ី ដូចការ​ចោទ​ប្រកាន់មែននោះ។ លោក​គី​ តិច​ បន្ត​ថា៖

«ខ្ញុំ​គ្រាន់​តែបញ្ជាក់ឱ្យ​ខ្លីថា ការដែលលោកសមរង្ស៊ីធ្វើឡើងនេះ គឺជាការ​ច្នៃ​ប្រឌិតរបស់គាត់។ តាមអ្នក​បច្ចេកទេសបាន​ឱ្យ​ដឹងថា គាត់បាន​បំប្លែង (ផែនទី)។ ការបំប្លែងរបស់គាត់​នេះធ្វើ​ឱ្យបង្គោល​ព្រំដែន​ខុសពីកន្លែងពិត ដែលគណៈកម្មការកិច្ចការ​ព្រំដែនកំពុងតែធ្វើការនៅ​ឡើយ។»

លោក វ៉ា គឹមហុង ប្រធាន​គណៈកម្មការព្រំដែនរបស់រដ្ឋាភិបាល បាន​បញ្ចាក់ក្នុងលិខិតជូន​តុលាការចុះថ្ងៃទី២៦ ខែ​ឧសភា ឆ្នាំ​២០១០ថា ផែនទីដែលលោកសម រង្ស៊ីបាន​ផលិត និងបានធ្វើការ​ផ្សព្វ​ផ្សាយជាផែនទីមួយមិនត្រឹម​ត្រូវ។

លោក សម រង្ស៊ី មេ​ដឹក​នាំគណបក្សប្រឆាំង ដែលកំពុង​និរទេស​ខ្លួននៅ​ក្នុងទី​ក្រុង ​ប៉ារីសបាន​បញ្ចាក់​ប្រាប់ ​វីអូអេ ពីទីក្រុងប៉ារីសថា ផែនទីនៅលើគេហទំព័រគណបក្សរបស់លោក​ ​ជួយការពារទឹកដី​កម្ពុជាពីការឈ្លាន​ពានរបស់ប្រទេស​វៀតណាម។

«ខ្ញុំ​អត់ចាប់អារម្មណ៍​នឹងដីកា​ចាប់​ខ្លួនខ្ញុំនេះទេ ពី​ព្រោះរឿង​នេះ មិន​មែនរឿងបុគ្គលសម រង្ស៊ី ឬរឿងគណបក្សសមរង្ស៊ីទេ ជារឿងប្រទេស​កម្ពុជាតទល់ជាមួយ​នឹងប្រទេស​វៀតណាម ពីព្រោះ​ប្រទេស​វៀតណាមកំពុង​តែ​លេប​ត្របាក់ទឹក​ដី​ប្រទេស​កម្ពុជា។ ដូច្នេះរឿង​នេះជារឿងខ្មែរទាំង​អស់គ្នា ក្នុងការ​ការពារបូរណភាពទឹកដីប្រទេស​កម្ពុជារបស់យើង។»

លោក​ សម រង្ស៊ីបាន​ថ្លែងថា តំណាង​រាស្ត្រគណបក្ស​សម រង្ស៊ីចំនួន២៦រូបប្តឹងទៅ​អង្គការ​សហ​ប្រជាជាតិប្រឆាំង​នឹង​ប្រទេស​វៀតណាម។

XS
SM
MD
LG