ភ្ជាប់​ទៅ​គេហទំព័រ​ទាក់ទង

តុលាការ​ខេត្ត​កំពង់​ឆ្នាំង​ផ្ដន្ទា​ទោស​សកម្ម​ជន​សិទ្ធិ​មនុស្ស


​ពលរដ្ឋ​ធ្វើ​ការ​តវ៉ា​នៅ​ក្នុង​ជម្លោះ​ដី​ធ្លី​មួយ។ ថ្វី​បើ​ពលរដ្ឋ​ជា​ភាគី​ផ្ទាល់​នៅ​ក្នុង​ទំនាស់​បែប​នេះ​ក្តី ក៏​​សមកម្ម​ជន​ការពារ​សិទ្ធិ​មនុស្ស​ដែល​ការពារ​ពលរដ្ឋ​ដែល​ត្រូវ​គេ​ជម្លៀស​ចេញ​នោះ​ ងាយ​នឹង​ត្រូវ​រង​ការ​គំរាម​កំហែង​និង​ប្តឹង​ផង​ដែរ។

តុលាការ​ខេត្ត​កំពង់ឆ្នាំង​ ​នៅ​ថ្ងៃនេះ​ ​បាន​ផ្ដន្ទាទោស​សកម្មជន​សិទ្ធិ​មនុស្ស​ម្នាក់​ដោយ​បង្គាប់​ឲ្យ​បង់ប្រាក់​ពិន័យ​ចំនួន​១.០០០​ដុល្លារ។​ ការ​សម្រេច​ទោស​នេះ​ធ្វើឡើងបន្ទាប់ពី​សកម្មជន​សិទ្ធិ​មនុស្ស​រូបនេះត្រូវចោទ​ប្រកាន់​ពីបទ​បរិហារ​កេរ្ដិ៍​ក្រុមហ៊ុន​ឯកជន​មួយ​ ​ដែល​ត្រូវគេ​ដឹង​ថា​ ​ជា​របស់​ភរិយា​មន្ដ្រី​រដ្ឋាភិបាល​ម្នាក់។

លោក​សំ ចាន់គា​ ​អ្នក​សម្រប​សម្រួល​របស់​អង្គការ​ការពារ​សិទ្ធិ​មនុស្ស​ ADHOC ត្រូវ​តុលាការ​ខេត្ត​កំពង់​ឆ្នាំង​ផ្តន្ទា​ទោស​នៅ​ថ្ងៃអង្គារ​នេះ​ពីបទ​បរិហារ​កេរ្តិ៍​ក្រុមហ៊ុន​ឯកជន​មួយ​ ដែល​ត្រូវគេ​រាយការណ៍​ មកថា​ គឺជា​ក្រុមហ៊ុន​របស់​ភរិយា​មន្រ្តី​ជាន់ខ្ពស់​ម្នាក់​នៅក្នុង​រដ្ឋាភិបាល។

លោក​ចៅក្រម​សាន សុផាត​បាន​ប្រកាស​ថា​ ​តុលាការ​បាន​រកឃើញ​ថា​ ​លោក​សំ ចាន់គា ​មាន​កំហុសហើយ​បាន​សម្រេច​ផាក​ពិន័យ​ជាប្រាក់​ចំនួន​១.០០០.០០០​រៀល​ ​ឬស្មើនឹង​២៥០​ដុល្លារ​សហរដ្ឋ​អាមេរិក​ និង​បាន​តម្រូវ​ឲ្យ​បង់ប្រាក់​សង​ជំងឺ​ចិត្ត​ចំនួន​៣.០០០.០០០​រៀល​ ឬ​ស្មើនឹង​៧៥០​ដុល្លារ​ទៅ​ឲ្យ​ក្រុមហ៊ុន ​KCD ​ដែល​ត្រូវគេ​រាយការណ៍​មក​ថា​ ​គឺជា​ក្រុមហ៊ុន​របស់​លោក​ស្រី​ជា ខេង​ ​ភរិយា​ ​លោក​ស៊ុយ សែម​ ​រដ្ឋមន្រ្តី​ក្រសួង​ឧហ្សាហកម្ម​ថាមពល​និង​រ៉ែ។

លោក​សំ ចាន់គា​មាន​ប្រសាសន៍​ថា​ ​លោកនឹង​មិន​បង់ប្រាក់​ពិន័យ​និង​ប្រាក់​សង​ជំងឺចិត្ត​តាមការ​ បង្គាប់​របស់​តុលាការ​នោះ​ឡើយ​ ដោយលោក​អះអាង​ថា​ លោក​គ្មាន​កំហុស។

«យើង​មាន​ភស្តុតាង​ ​មានអ្វីៗ​គ្រប់គ្រាន់​ហើយ​ ​ហើយ​ខាង​នោះ​អត់មាន​អ្វី​ជា​ភស្តុតាង​សម្រាប់​ដាក់​បន្តុក​មក​លើ​យើងផង​ ​បែរ​ជា​គាត់​សម្រេច​អញ្ចឹង។ ​អញ្ចឹង​ខ្ញុំ​នឹង​ប្តឹង​ទៅ​ឧទ្ធរណ៍»។

លោក​សំ ចាន់គា​ត្រូវ​តុលាការ​ខេត្ត​កំពង់ឆ្នាំ​ចោទ​ប្រកាន់​កាលពី​ខែ​ឧសភា​ឆ្នាំ​២០១០​ ​បន្ទាប់ពី​លោក​បាន​ផ្តល់​បទសម្ភាសន៍​មួយ​ជាមួយ​វិទ្យុ​អាស៊ីសេរី​ទាក់ទង​ទៅ​នឹង​ការឈូសឆាយ​របស់​ក្រុមហ៊ុន​ KCD ​ទៅលើ​ដី​ប្រជាពលរដ្ឋ​ចំនួន​៦៤គ្រួសារ​ ដែល​កំពុងតែ​មាន​ទំនាស់​នៅក្នុង​ភូមិ​ឡពាង​ ​ស្រុក​កំពង់ត្រឡាច។

នៅក្នុង​បទសម្ភាសន៍​នោះ​ ​លោក​សំ ចាន់គាមាន​ប្រសាសន៍ថា​ ​ការ​ឈូសឆាយ​របស់​ក្រុមហ៊ុន​នៃ​គ្រួសារ​មន្រ្តី​ជាន់ខ្ពស់​នៅក្នុង​រដ្ឋាភិបាល​នេះ​ គឺជា​ទង្វើ​ខុសច្បាប់​ ​ត្បិត​តុលាការ​មិនទាន់​កាត់ក្តី​ទៅលើ​ ដី​ទំហំ១៤៨​ហិចតា ​ដែល​កំពុងតែ​ស្ថិត​នៅក្នុង​ការប្រទាញ​ប្រទុង​គ្នា​នោះ​នៅ​ឡើយ។

ប្រជា​ពលរដ្ឋ​ចំនួន​ពីររូប​ត្រូវបាន​ចោទប្រកាន់​ដូចគ្នា​ ​ក៏ប៉ុន្តែ​ម្នាក់​នៅ​ក្នុង​ចំណោម​នោះ​ត្រូវ​បាន​ លើក​លែង​ការចោទ​ប្រកាន់ ​និង​ម្នាក់ទៀត​ត្រូវ​កាត់ក្តី​ឲ្យ​បង់ប្រាក់​ពិន័យ​ និង​បង់ប្រាក់​សង​ជំងឺ​ចិត្ត​សរុប​ ចំនួន​១០​លានរៀល ​ឬស្មើនឹង​២.៥០០​ដុល្លារ​សហរដ្ឋ​អាមេរិក។

លោក​ផាត់ ពៅសៀង​ ​មេធាវី​របស់​ក្រុមហ៊ុន​ KCD​ បដិសេធ​មិន​ធ្វើ​អត្ថាធិប្បាយ​ចំពោះ​ការ​សម្រេច​ក្តី នេះ​ទេ។

ដោយ​ឡែក​ លោក​ថៃ ហ៊ី​ ដែល​ជាភាគី​តំណាង​ឲ្យ​ក្រុមហ៊ុន​ ​មិន​អាច​ទាក់ទង​បានទេ​ ដោយសារអ្នក​ទទួល​ទូរស័ព្ទ​និយាយ​ថា​ខ្លួន​មិនមែន​ជា​លោក​ថៃ ហ៊ី។

«មិនមែន​ទេ​ ខ្ញុំ​ផ្សេង​ទេ។ ​ខ្ញុំ​ត្រូវ​ក្មួយ​គាត់​ទេ»។

យ៉ាងណា​ក៏ដោយ​ ​លោក​ចាន់ សាវ៉េត​ ​ប្រធាន​ផ្នែក​ស៊ើបអង្កេត​ទៅលើ​ការ​រំលោភ​សិទ្ធិ​មនុស្ស​របស់​អង្គការ​ការពារ​សិទ្ធិ​មនុស្ស​ ADHOC​ ​លើក​ឡើង​ថា​ ​ការ​សម្រេចក្តី​នេះ​មិនអាច​ទទួល​យក​បាន​ទេ។​ហើយ​គឺជា​ការ​សម្រេច​ក្តី​ដ៏​គួរ​ឲ្យ​ព្រួយ​បារម្ភ​សម្រាប់​សកម្មជន​សិទ្ធិ​មនុស្ស។

គួរ​រំឭក​ថា​ ​នៅ​ក្នុង​រយៈ​ពេល​ប៉ុន្មាន​ឆ្នាំ​ចុង​ក្រោយ​នេះ​មាន​សកម្មជន​សិទ្ធិ​មនុស្ស​ចំនួន​បីរូប​ ​រួម​ទាំង​បុគ្គលិក​របស់​អង្គការ​សហ​ប្រជាជាតិ​ម្នាក់ ​គឺ​អង្គការ​កម្មវិធី​ស្បឿង​អាហារ​ពិភពលោក​ (World Food Programme)​ ត្រូវបាន​ចោទ​ប្រកាន់​ ដោយ​តុលាការ​កម្ពុជា​ ​ដោយសារតែ​ការបញ្ចេញ​មតិ​របស់​ពួក​គេ។

សកម្មជន​សិទ្ធិ​មនុស្ស​របស់​អង្គការ​ LICADHO​ ដែល​ចោទ​ប្រកាន់​ដោយ​តុលាការ​ខេត្ត​តាកែវ ​និង​បុគ្គលិក​អង្គការកម្មវិធី​ស្បឿង​អាហារ​ពិភពលោក ​ដែល​ចោទប្រកាន់​ដោយ​តុលាការ​ក្រុង​ភ្នំពេញ​ ​កំពុង​តែ​ស្ថិត​នៅ​ក្នុង​ពន្ធនាគារ​នៅ​ឡើយ៕

XS
SM
MD
LG