ភ្ជាប់​ទៅ​គេហទំព័រ​ទាក់ទង

គណៈ​រដ្ឋ​មន្ត្រី​លុប​ចោល​ការ​ប្រជុំ​ដោយសារ​នាយក​រដ្ឋ​មន្ត្រី​ផ្ទុក​មេ​រោគAH1N1


គណៈ​រដ្ឋមន្ត្រី​បាន​លុប​ចោល​កិច្ច​ប្រជុំ​ប្រចាំ​សបា្តហ៍​របស់​ខ្លួន​នៅ​ថ្ងៃ​សុក្រ​នេះ​ក្រោយ​ពី​លោក​នាយក​រដ្ឋមន្ត្រី​ហ៊ុន សែន​ ​ត្រូវ​បាន​ក្រុម​គ្រូពេទ្យ​រក​ឃើញ​ថា មាន​ផ្ទុក​មេរោគ​ផ្តាសាយ​​ប្រភេទ​ថ្មី​AH1N1។

គណៈរដ្ឋមន្ត្រី​បាន​លុប​ចោល​កិច្ច​ប្រជុំ​ប្រចាំ​សបា្តហ៍​របស់​ខ្លួន​ នៅ​ថ្ងៃសុក្រ​នេះ ​ក្រោយ​ពី​លោក​នាយក​រដ្ឋមន្ត្រី​ហ៊ុន សែន​ ដែល​ជា​អ្នក​ដឹកនាំ​កិច្ច​ប្រជុំ​នោះ​ត្រូវ​បាន​ក្រុម​គ្រូពេទ្យ​រក​ឃើញ​ថា មាន​ផ្ទុក​មេរោគ​ផ្តាសាយប្រភេទ​ថ្មី AH1N1។

លោក ​ផៃ ស៊ីផាន អ្នក​នាំ​ពាក្យ​នៃ​ទី​ស្តី​ការ​គណៈ​រដ្ឋ​មន្រ្តី បាន​បញ្ជាក់​ថា គណៈ​រដ្ឋ​មន្រ្តី​បាន​លុប​ចោល​កិច្ច​ប្រជុំ​ប្រចាំ​សប្តាហ៍មែន​ ប៉ុន្តែមិន​បាន​បញ្ជាក់​អំពី​មូលហេតុ​លំអិត​ទេ ដោយ​គ្រាន់​តែ​ថា ទីស្តីការគណៈ​រដ្ឋ​មន្រ្តី​ បាន​ទទួល​ចំណារ​មួយ​ពី​លោក​នាយក​រដ្ឋ​មន្រ្តី ហ៊ុន សែន ឲ្យ​លើក​ការ​ប្រជុំ​នេះ​ដោយ​គ្មាន​ពេល​កំណត់។

ក្រសួង​សុខាភិបាល កាល​ពី​ថ្ងៃ​អង្គារ៍​ដើម​សប្តាហ៍​នេះ បាន​ចេញ​សេចក្តី​ជូន​ដំណឹង​ជា​បន្ទាន់​មួយ​ថា បន្ទាប់​ពី​កិច្ច​ប្រជុំ​គណៈ​រដ្ឋ​មន្ត្រី​កាល​ពី​ថ្ងៃ​សុក្រ​ទី២៥ មាន​លេច​ឡើង​នូវ​ឧប្បត្តិហេតុ​នៃ​ជម្ងឺ​គ្រុន​ផ្តាសាយ AH1N1 ដែល​បាន​ឆ្លង​ទៅ​លោក​នាយក​រដ្ឋ​មន្រ្តី​ហ៊ុន សែន ហើយ​តម្រូវ​ឲ្យ​ចាត់​វិធានការ​ពិនិត្យ​រូប​លោក​ជា​បន្ទាន់។ លោក​នាយករដ្ឋ​មន្ត្រី និង​មន្រ្តី​រដ្ឋា​ភិបាល​ចំនួន​៥​រូប​ផ្សេង​ទៀត​ត្រូវ​បាន​រក​ឃើញ​ថា មាន​ផ្ទុក​មេរោគ​ផ្តាសាយ AH1N1 ដែល​បាន​សម្លាប់​មនុស្ស​ចំនួន​ប្រាំមួយ​នាក់​រួច​មក​ហើយក្នុង​ប្រទេស​ កម្ពុជា។

ជំងឺ​នេះ​បាន​នាំ​ឲ្យ​លោក​នាយក​រដ្ឋ​មន្រ្តី​ហ៊ុន សែន មិន​បាន​ចូល​រួម​ក្នុង​ពិធី​ខួប​កំណើត​លើក​ទី​៥៩​របស់​គណបក្ស​ប្រជាជន​ កម្ពុជា និង​លុប​ចោល​កម្ម​វិធី​សំខាន់ៗ​មួយ​ចំនួន​ទៀត។

លោក ​ផៃ ស៊ីផាន បាន​មាន​ប្រសាសន៍​ថា នៅ​ថ្ងៃ​សុក្រ​នេះ សុខភាព​របស់​លោក​នាយក​រដ្ឋ​មន្រ្តី​ហ៊ុន សែន មាន​លក្ខណៈ​ល្អ​ប្រសើរ​ឡើង​វិញ​ហើយ។ ក៏ប៉ុន្តែ​លោក​ពុំ​ដឹង​ថា លោក​នាយក​រដ្ឋ​មន្រ្តី​ហ៊ុន សែន និង​ចូល​មក​បម្រើការ​ងារ​នៅ​ពេល​ណា​នៅ​ឡើយ​ទេ។

សេចក្តីប្រកាស​ព័ត៌មាន​របស់​នាយក​ដ្ឋាន​ទប់​ស្កាត់​ជម្ងឺ​ឆ្លង​នៃ​ ក្រសួង​ សុខាភិបាល​បាន​ឲ្យ​ដឹង​ថា គិត​ចាប់​ពី​ថ្ងៃ​ទី​២៤​ខែ​មិថុនា​នេះ មាន​មនុស្ស​ឆ្លង​មេរោគ​ជម្ងឺ​គ្រុន​ផ្តាសាយ AH1N1 ចំនួន​៥៩១​នាក់ ហើយ​មេរោគ​នេះ​បាន​ឆ្លង​រាត​ត្បាតនៅ​ក្នុង​ខេត្ត​ក្រុង​ចំនួន​១៥ក្នុង​ ចំណោម​ខេត្ត​ក្រុង​ទាំង​២៤​នៃ​ប្រទេស​កម្ពុជា។

XS
SM
MD
LG