ភ្ជាប់​ទៅ​គេហទំព័រ​ទាក់ទង

សេចក្តី​ព្រាង​ថវិកា​ជាតិ​ឆ្នាំ​២០១១​កំណត់​ការ​ចំណាយ​ផ្នែក​សង្គម​កិច្ច​ច្រើន​ជាង​ការពារ​ជាតិ


អគារ​​ថ្មី​នៃ​​ទី​ស្តីការ​គណៈរដ្ឋមន្ត្រី​នៅ​ក្នុង​រាជធានី​ភ្នំពេញ​ ដែល​ជា​ជំនួយ​របស់​ប្រទេស​ចិន។

រដ្ឋាភិបាល​កម្ពុជាបាន​យល់ព្រម​លើ​សេចក្តី​ព្រាងច្បាប់​ថវិកា​ជាតិ​ឆ្នាំ​២០១១ ​ដែល​មាន​ចំនួន​លើស​ឆ្នាំ​២០១០​ច្រើន​រយ​លាន​ដុល្លារ​អាមេរិក​ បង្កើន​ការ​ចំណាយ​លើ​វិស័យ​សង្គម​កិច្ច​ច្រើន​ជាង​វិស័យ​ការពារ​ជាតិ​និង​សន្តិសុខ។ រដ្ឋាភិបាល​កម្ពុជា ​បាន​ហៅ​សេចក្តី​ព្រាង​ច្បាប់​ថវិកា​ជាតិ​នេះ​ ថា​ជា​ឧបករណ៍​នយោបាយ​ដ៏​មាន​សារៈសំខាន់​បំផុត​ សម្រាប់​បន្ត​អនុវត្ត​ផែនការ​យុទ្ធសាស្ត្រ​អភិវឌ្ឍន៍​ជាតិ​គោល​នយោបាយ​ជំរុញ​ផលិតផល​ស្រូវ​ និង​ការនាំចេញ​អង្ករ​ ជំរុញ​កំណើន​សេដ្ឋកិច្ច​ឱ្យ​ខ្ពស់​ និង​បង្កើន​បាន​គុណភាព​ សេវា​សាធារណៈ​ជូន​ដល់​ប្រជាពលរដ្ឋ​កាន់​តែ​ប្រសើរ​ឡើង។

នៅ​ថ្ងៃសុក្រនេះ​ គណៈ​រដ្ឋមន្ត្រី​កម្ពុជា​ បាន​យល់ព្រម​លើ​សេចក្តី​ព្រាង​ច្បាប់​ថវិកា​ជាតិ​ចំនួន​ជាង​២.៣៤៥​លាន​ដុល្លារ​អាមេរិក​សម្រាប់​ឆ្នាំ​២០១១ ដោយ​បង្កើន​ចំណាយ​ទៅលើ​វិស័យ​អប់រំ​ សុខាភិបាល​ និង​ការពារ​ជាតិ។

សេចក្តី​ព្រាង​ច្បាប់​ថវិកា​ជាតិ​ឆ្នាំ​២០១១​ចំនួន​២.៣៤៥​លាន​ដុល្លារ​អាមេរិក បាន​កើនឡើង​ចំនួន​ ៤៤៥​លាន​ដុល្លារ​អាមេរិក ពី​ថវិកា​ជាតិ​ឆ្នាំ​២០១០​ ដែល​មាន​ចំនួន​១.៩០០​លាន​ដុល្លា​អាមេរិក។

ការ​ចំណាយ​សម្រាប់​វិស័យ​ការពារ​ជាតិ​ និង​សន្តិសុខ​ មាន​ចំនួន​ជាង​២៩៨​លាន​ដុល្លារ​អាមេរិក​នៅ ក្នុង​ថវិកា​ជាតិ​ឆ្នាំ​២០១១ ​ពី​ចំនួន​២៧៦​លាន​ដុល្លារ​អាមេរិក​នៅ​ក្នុង​ឆ្នាំ​២០១០ ដោយ​ក្រសួង​ការពារ​ ជាតិ​ទទួល​បាន​១៨៥​លាន​ដុល្លារ​អាមេរិក​ក្នុង​ឆ្នាំ​២០១១​ ពី​ចំនួន​១៦០​លាន​ដុល្លារ​អាមេរិក​នៅ​ក្នុង​ ឆ្នាំ​២០១០ ​និង​ក្រសួង​មហា​ផ្ទៃ​ទទួល​បាន​ចំនួន​១១១​លាន​ដុល្លារ​អាមេរិក​នៅ​ក្នុង​ឆ្នាំ​២០១១​ ពី​ចំនួន​ ១១០​លាន​ដុល្លារ​អាមេរិក​នៅ​ក្នុង​ឆ្នាំ២០១០។ ក្រសួង​អប់រំ​មាន​ចំនួន​២១៨​លាន​ដុល្លារ​អាមេរិក​ នៅ ក្នុង​ឆ្នាំ​២០១១ ​ពី​ចំនួន​១៩៨​លាន​ដុល្លារ​អាមេរិក​នៅ​ក្នុង​ឆ្នាំ​២០១០។ ក្រសួង​សុខាភិបាល​មាន​ចំនួន

១៦៥​លាន​ដុល្លារ​អាមេរិក​នៅ​ក្នុង​ឆ្នាំ​២០១១ ​ពី​ចំនួន​១៤៤​លាន​ដុល្លារ​អាមេរិក​នៅ​ក្នុង​ឆ្នាំ​២០១០។

លោក​ផៃ ស៊ីផាន ​រដ្ឋលេខាធិការ ​និង​ជា​អ្នក​នាំ​ពាក្យ​ទី​ស្តីការ​គណៈរដ្ឋមន្ត្រី ​បាន​ថ្លែង​ថា​ គ្រប់​វិស័យ​ របស់​រដ្ឋាភិបាល​បាន​ទទួល​កំណើន​បន្តិច​បន្តួច​ទាំង​អស់​ ហើយ​វិស័យ​សង្គមកិច្ច​មាន​កំណើន​ច្រើន​ ជាង​ វិស័យ​ការអភិវឌ្ឍន៍ពារ​ជាតិ​ និង​សន្តិសុខ​នៅ​ក្នុង​ឆ្នាំ​២០១១ ​បើ​ប្រៀធៀប​នឹង​ឆ្នាំ២០១០។

លោក​ផៃ ស៊ីផាន​ បាន​បញ្ជាក់​ថា​ក្រសួង​កសិកម្ម​មាន​កំណើន​ប្រមាណ​១៣​ភាគរយ​ ក្រសួង​ធនធាន​ ទឹក​មាន​កំណើន​ជាង​១៣ភាគរយ​ និង​ក្រសួង​អភិវឌ្ឍន៍​ជនបទ​មាន​កំណើន​៣,៥​ភាគរយ​ នៅ​ក្នុង​ ឆ្នាំ​២០១១។

«វិស័យ​ការពារ​ជាតិ ​និង​សន្តិសុខ​មាន​កំណើន​៨,៥​ភាគរយ​ បើ​យើង​ប្រៀបធៀប​ជាមួយ​នឹង​វិស័យ​ សង្គម​កិច្ច​មាន​១៥,២​ភាគរយ។ ក្រសួង​សុខាភិបាល​មាន​កំណើន​១៥,៧​ភាគរយ។ ក្រសួង​អប់រំ​មាន​ កំណើន​១១​ភាគរយ»។

សេចក្តី​ថ្លែង​ការណ៍​របស់​ទី​ស្តីការ​គណៈរដ្ឋមន្ត្រី​ បាន​បញ្ជាក់ថា​សេចក្តី​ព្រាង​ថវិកា​ជាតិ​ឆ្នាំ​២០១១​នេះ​ជា​ឧបករណ៍​នយោបាយ​ដ៏​មានសារៈ​សំខាន់​បំផុត​ ដើម្បី​អនុញ្ញាត​ឱ្យ​រាជរដ្ឋាភិបាល​បន្ត​អនុវត្ត​ផែនការ​យុទ្ធសាស្ត្រ​ អភិវឌ្ឍន៍​ជាតិ​ គោល​នយោបាយ​ជំរុញ​ផលិតផល​ស្រូវ ​និង​ការនាំចេញ​អង្ករ​ និង​កម្ម វិធី​កំណែ​ទម្រង់​រដ្ឋ​សំខាន់ៗ​ ព្រម​ទាំង​ធានា​ឱ្យ​បាន​នូវការ​ធ្វើ​ឱ្យ​កំណើន​សេដ្ឋកិច្ច​ខ្ពស់​ឡើង​វិញ​ និង​បង្កើន​បាន​គុណភាព​សេវា​សាធារណៈ​ជូន​ដល់​ប្រជាពលរដ្ឋ​កាន់​តែ​ប្រសើរ​ឡើង។

សេចក្តី​ថ្លែងការណ៍​នេះ​ថា​ កំណើន​សេដ្ឋកិច្ច​កម្ពុជា​ត្រូវ​បាន​ព្យាករ​ថា​នឹង​កើន​ឡើង​ដល់​ប្រាំមួយ

ភាគរយ​នៅក្នុង​ឆ្នាំ​២០១១​ អតិផរណា​ស្ថិត​ក្នុង​រង្វង់​៤,៥​ភាគរយ​ និង​អត្រា​ប្តូរប្រាក់​ក្នុង​រង្វង់​៤.១០០​ រៀល ​ក្នុង​មួយ​ដុល្លារ​អាមេរិក ​ព្រម​ទាំង​ជំរុញ​ការ​កាត់​បន្ថយ​ភាព​ក្រីក្រ៕

XS
SM
MD
LG