ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

តុលាការ​បាន​ចោទប្រកាន់​អតីត​មន្ត្រី​ប៉ូលិស​ជាន់ខ្ពស់ពីបទ​ពុករលួយ​គ្រឿងញៀន


លោក​ ហ៊ុន ហ៊ាន អតីត​ស្នង​ការ​ប៉ូលិស​ខេត្ត​បន្ទាយ​មាន​ជ័យ ស្ថិត​នៅ​ក្នុង​ចំណោម​​មន្ត្រី​ប៉ូលិស​៤​នាក់​ដែល​ត្រូវ​បាន​ចោទ​ប្រកាន់​ពី​បទ​​ស៊ីសំណូក​​ពាក់​ព័ន្ធ​នឹង​ករណី​គ្រឿង​ញៀន។
លោក​ ហ៊ុន ហ៊ាន អតីត​ស្នង​ការ​ប៉ូលិស​ខេត្ត​បន្ទាយ​មាន​ជ័យ ស្ថិត​នៅ​ក្នុង​ចំណោម​​មន្ត្រី​ប៉ូលិស​៤​នាក់​ដែល​ត្រូវ​បាន​ចោទ​ប្រកាន់​ពី​បទ​​ស៊ីសំណូក​​ពាក់​ព័ន្ធ​នឹង​ករណី​គ្រឿង​ញៀន។

អតីត​មន្ត្រី​ប៉ូលិស​បួននាក់​ត្រូវបាន​ចោទ​ប្រកាន់​ពីបទ​ស៊ី​សំណូក​ពាក់ព័ន្ធ​នឹង​ករណី​គ្រឿងញៀន​ ​និងត្រូវ​បាន​ដាក់​ឃុំឃាំង​នៅ​ពន្ធនាគារ​តាម​ខេត្ត​ផ្សេងៗ​គ្នា។ ​ជនសង្ស័យ​ទាំងបួន​នាក់​នេះ​អាច​ប្រឈម​នឹង​ការ​ជាប់​ពន្ធនាគារ​រហូត​ដល់​ប្រាំពីរ​ឆ្នាំ​ បើ​តុលាការ​រក​ឃើញ​ទោស​ដូចការ​ចោទ​ប្រកាន់​មែន​នោះ។​ អង្គការសិទ្ធិ​មនុស្ស​កំពុង​ឃ្លាំមើល​ដំណើរ​ការ​នីតិវិធី​របស់​តុលាការ​សម្រាប់​ជន​សង្ស័យ​ទាំងនេះ។

នៅ​ថ្ងៃ​ច័ន្ទនេះ​ តុលាការ​ខេត្ត​បន្ទាយ​មានជ័យ​បាន​ចោទប្រកាន់​អតីត​មន្ត្រី​ប៉ូលិស​ជាន់ខ្ពស់​ចំនួន​បួន នាក់​អំពី​បទ​ប្រព្រឹត្ត​អំពើ​ពុករលួយ​ពាក់ព័ន្ធ​នឹង​ករណី​គ្រឿងញៀន​ បន្ទាប់​ពី​ត្រូវបាន​ចាប់ខ្លួន​ជា​បន្តបន្ទាប់​ នៅ​ក្នុង​ខែ​មករា​នេះ។

លោក​ឧត្តម​សេនីយ៍​ឯក​ ម៉ឹក ដារ៉ា​ ​អតីត​អគ្គ​លេខាធិការ​នៃ​អាជ្ញាធរ​ជាតិ​ប្រឆាំង​គ្រឿងញៀន​ លោក ឧត្តម​សេនីយ៍ត្រី​ ហ៊ុន ហ៊ាន​ ​អតីត​ស្នងការ​ប៉ូលិស​ខេត្ត​បន្ទាយ​មានជ័យ​ លោក​ឈៀង សុន ​អតីត​ស្នងការ​រង​ប៉ូលិស​ខេត្ត​បន្ទាយ​មានជ័យ​ទទួល​បន្ទុក​ព្រហ្មទណ្ឌ ​និង​លោក​ជា ឡេង​ អតីត​ប្រធាន​ការិយាល័យ​នៃ​មន្ទីរ​ប្រឆាំង​គ្រឿងញៀន​ក្រសួង​មហាផ្ទៃ​ ​ត្រូវបាន​ចោទប្រកាន់​អំពី​បទ​ស៊ី​សំណូក​ពាក់ព័ន្ធ​នឹង​ករណី​គ្រឿងញៀន​ ដោយ​តុលាការ​ខេត្ត​បន្ទាយ​មានជ័យ។

លោក​តន់ សីហតេជះ​ ​ព្រះរាជ​អាជ្ញា​អម​សាលា​ដំបូង​ខេត្ត​បន្ទាយ​មានជ័យ​ ​បាន​ថ្លែងប្រាប់​ VOA ​ថា​ តុលាការ​បាន​សម្រេច​ឃុំខ្លួន​ជន​សង្ស័យ​ទាំងបួន​នាក់​នៅ​ពន្ធនាគារ​តាម​ខេត្ត​ផ្សេងៗ​គ្នា។

«ឥឡូវ​ ​យើង​បាន​ចោទ​អតីត​ប៉ូលិស​៤នាក់​អំពី​បទ​ស៊ី​សំណូក​ពាក់ព័ន្ធ​នឹង​ករណី​គ្រឿងញៀន​តាម​មាត្រា​៣៨​នៃ​ច្បាប់​ព្រហ្មទណ្ឌ​អន្តរ​កាល។ ​បើតុលាការ​រកឃើញ​ថា​ មាន​ពិរុទ្ធ​គ្រប់គ្រាន់​ ជន​សង្ស័យ​ទាំងនេះ​នឹង​ជាប់ទោស​ដាក់​ពន្ធនាគារ​ពីបី​ឆ្នាំ​ទៅ​ប្រាំពីរ​ឆ្នាំ»។

ក្រុម​មន្ត្រី​តុលាការ​ និង​អង្គការ​សិទ្ធិមនុស្ស​ ​បាន​បញ្ជាក់​ថា​ លោក​ម៉ឹក ដារ៉ា​ត្រូវ​ឃុំខ្លួន​នៅ​ពន្ធនាគារ​ ព្រៃស​ លោក​ជា ឡេង​ ​នៅ​ពន្ធនាគារ​ខេត្ត​បន្ទាយ​មានជ័យ​ លោក​ហ៊ុន ហ៊ាន ​និង​លោក​ឈៀង សុន​ នៅ​ពន្ធនាគារ​ខេត្ត​សៀមរាប។

លោក​ស៊ុំ ចាន់គា​ ​មន្ត្រី​សម្របសម្រួល​នៃ​អង្គការ​សមាគម​សិទ្ធិ​មនុស្ស ​Adhoc​ ​ប្រចាំ​ខេត្ត​បន្ទាយ​មាន ជ័យ​ ​បាន​ថ្លែង​ថា​ អង្គការ​ Adhoc ​កំពុង​តាម​ឃ្លាំមើល​ដំណើរការ​នីតិវិធី​របស់​តុលាការ​ចំពោះ​ប៉ូលិស​ទាំង​បួននាក់​ដែល​បាន​ជាប់​សង្ស័យ​អំពើ​ពុករលួយ​ពាក់ព័ន្ធ​នឹង​គ្រឿងញៀន​នេះ។

«យើង​នឹង​ឃ្លាំមើល​ ​មិន​ឱ្យ​អ្នក​ណា​មួយ​ប៉ះពាល់​ដល់​រូបរាងកាយ​របស់​គាត់ ​ឬ​ការរើសអើង​ដល់​គាត់ ដែល​ដាក់​ឃុំខ្លួន​បណ្តោះ​អាសន្ន​នៅ​ពន្ធនាគារ។ ​អញ្ចឹង​យើង​ត្រូវ​ពិនិត្យ​មើល​ទៅ​លើ​សន្តិសុខ​ សមភាព​នៃ​អ្នក​ជាប់ឃុំ​ទាំង​អស់គ្នា​ និង​ដំណើរ​ការ​នីតិវិធី»។

នៅ​ក្នុង​ខែវិច្ឆិកា​ អង្គភាព​ប្រឆាំង​អំពើ​ពុករលួយ​បាន​ចាប់ខ្លួន​លោក​តុប ច័ន្ទសេរីវុធ​ ​អតីត​ព្រះរាជ​អាជ្ញា​អម​តុលាការសាលា​ដំបូង​ខេត្ត​ពោធិសាត់​ដែល​ត្រូវ​បាន​ចោទ​ប្រកា​ន់​ពីបទ​ពុករលួយ​ ​បង្ខាំង​មនុស្ស​ខុស​ច្បាប់​ និង​ការ​ជំរិត​ទារប្រាក់។​ នៅ​ក្នុង​ខែ​មករានេះ​ ​អង្គភាព​ប្រឆាំង​អំពើ​ពុករលួយ​បាន​បន្ត​ចាប់​ខ្លួន​មន្ត្រី​ប៉ូលិស​បួននាក់​ដែល​រួមមាន​មន្ត្រី​ជាន់ខ្ពស់​ទទួល​បន្ទុក​ប្រឆាំង​គ្រឿងញៀន​ ត្រូវ​បាន​ចោទប្រកាន់​អំពី​បទ​ស៊ីសំណូក​ពាក់ព័ន្ធ​នឹង​ករណី​គ្រឿងញៀន។

លោក​ហ៊ុន ហ៊ាន ​អតីត​ស្នងការ​ប៉ូលិស​ខេត្ត​បន្ទាយ​មានជ័យ​ធ្លាប់​បាន​ធ្វើ​ជា​អង្គរក្ស​របស់​លោក​ស ខេង ​រដ្ឋមន្ត្រី​ក្រសួង​មហាផ្ទៃ ​និង​លោក​ម៉ឹក ដារ៉ា​ ធ្លាប់​បាន​ធ្វើជា​ស្នងការ​រង​ប៉ូលិស​ខេត្ត​បាត់ដំបង​ ដែល​គេ​មើលឃើញ​ជាយូរ​មក​ហើយ​ថា​ ជា​មូលដ្ឋាន​សម្រាប់​គាំទ្រ​ដល់​លោក​ស ខេង​ ​រដ្ឋមន្ត្រី​ក្រសួង​មហាផ្ទៃ។

បន្ទាប់​ពី​ការ​ចាប់​ឃុំឃាំង​មន្ត្រី​ប៉ូលិស​ជាន់ខ្ពស់​មក​ ​កាល​ពី​ថ្ងៃ​សៅរ៍​នៅ​ក្នុង​ខេត្ត​ព្រៃវែង​ លោក​រដ្ឋមន្ត្រី​ក្រសួង​មហាផ្ទៃ​ស ខេង បាន​បដិសេធ​ថា​ មាន​ការ​ប៉ុនប៉ង​ចាប់​ខ្លួន​សមាជិក​នៃ​ភាគី​គណបក្ស​គ្រប់គ្រង​អំណាច​ដែល​មាន​ទំនាក់ទំនង​ជាមួយ​លោក។ លោក​បាន​ថ្លែងថា​ ប្រជា​ពលរដ្ឋ​គ្រប់រូប​គឺ​ទទួល​ខុសត្រូវ​ចំពោះ​មុខ​ច្បាប់៕

XS
SM
MD
LG