ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ក្រុមប្រឹក្សា​ឃុំ​ដែល​ការពារ​ពលរដ្ឋ​ត្រូវ​ដក​ចេញ​ពី​តំណែង


ពល​រដ្ឋ​ឃុំ​អមលាំង​ ខេត្ត​កំពង់ស្ពឺ ​ការពារ​ដី​របស់​ខ្លួន។​
ពល​រដ្ឋ​ឃុំ​អមលាំង​ ខេត្ត​កំពង់ស្ពឺ ​ការពារ​ដី​របស់​ខ្លួន។​

លោក ​យូ ថូ ​ដែល​ធ្លាប់​ជាប់​ពន្ធនាគារ​ដោយសារ​តែ​បាន​ចូល​រួម​តវ៉ា​ជាមួយ​ប្រជា​ពលរដ្ឋ​ឃុំ​អមលាំង​ ក្នុង​រឿង​ទំនាស់​ដីធ្លី​ជាមួយ​ក្រុមហ៊ុន​ភ្នំពេញ​Sugar​របស់​លោក​ឧកញ្ញ៉ា​ លី យ៉ុងផាត់​នោះ ​ត្រូវ​បាន​បណ្តេញ​ចេញពី​សមាជិក​ក្រុមប្រឹក្សា​ឃុំ​មកពី​គណបក្ស​ប្រជាជន​កម្ពុជា​ហើយ។​ ក្រុម​មន្រ្តី​សិទ្ធិ​មនុស្ស​បាន​និយាយ​ថា ​ ​ ការ​បណ្ដេញ​ចេញ​នេះ​និង​ធ្វើ​ឱ្យ​ប្រជាប្រីយ៍​ភាព​គណបក្ស​គ្រប់គ្រង​អំណាច​ចុះខ្សោយ។

លោក​ ហេង រស្មី ​រាយ​ការណ៍​ជូន​ដូច​ត​ទៅ៖

លោក​ស្រី​ អ៊ូច បូរ ​អ្នក​សម្របសម្រួល​របស់​សមាគម​សិទ្ធិ​មនុស្ស​ ADHOC​ប្រចាំ​ខេត្ត​កំពង់ស្ពឺ​ បាន​ បញ្ជាក់​នៅ​ថ្ងៃ​សុក្រ​នេះ​ថា ​ ​លោក​យូ ថូ ​អតីត​សមាជិក​ក្រុមប្រឹក្សា​ឃុំ​អមលាំង​ ខាង​កូតា​គណបក្ស​ប្រជាជន​កម្ពុជា ​ត្រូវ​បាន​ដកចេញ​ពី​មុខ​តំណែង​ក្រោយ​ពី​លោក​បាន​ចូលរួម​តវ៉ា​ប្រឆាំង​ជំទាស់​រឿង​វិវាទ​ដីធ្លី​មួយ​រវាង​ប្រជា​ពលរដ្ឋ​ឃុំ​អមលាំង​ និង​ក្រុមហ៊ុន​ភ្នំពេញ​SUGAR ​របស់​លោក​ឧកញ៉ាលី ​យ៉ុង​ ផាត់។

លោក​យូ ថូ ​អាយុ​៦៣​ឆ្នាំ​ និង​លោក​ឃឹម វុទ្ធី ​អាយុ​៣០ ​ត្រូវ​បាន​អាជ្ញាធរ​ខេត្ត​កំពង់ស្ពឺ​ចាប់​ខ្លួន​ កាល​ពី​ថ្ងៃ​ទី២០​ ​ខែ​ឧសភា​ ក្រោម​បទ​ចោទ​ប្រកាន់​ថា​ បាន​ញុះញ៉ង់​បង្ក​ឲ្យ​មាន​អគ្គីភ័យ​ និង​រំលោភ​កាន់ កាប់​អចនវត្ថុ។ ហើយ​ក្រោយ​មក​នៅ​ថ្ងៃ​ទី​២៩​ ខែឧសភា​ ដដែល​លោក​យូ ថូ ​និង​លោក​ឃឹម វុទ្ធី ​ត្រូវ​បាន​តុលាការ​ ដោះលែង​ឲ្យ​នៅ​ក្រៅឃុំ​ជា​បណ្តោះ​អាសន្ន។

នៅ​ក្នុង​លិខិត​មួយ​ច្បាប់ ​ដោយ​មាន​ចុះ​ហត្ថលេខា​ពី​លោក​ឡាយ កង​ ប្រធាន​ក្រុម​ប្រឹក្សា​ និង​ជា​ ប្រធាន​គណបក្ស​ប្រជាជន​កម្ពុជា​ប្រចាំ​ស្រុក​ថ្ពង​ ខេត្ត​កំពង់ស្ពឺ ​បាន​សម្រេច​ដក​ហូត​លោក​យូ ថូ ​ចេញ​ពី​សមាជិក​ក្រុម​ប្រឹក្សា​ឃុំ​អមលាំង​លេខ​រៀង​ទី៥ ​ដោយ​បាន​ចោទ​ប្រកាន់​ថា​ ​ លោក​យូ ថូ​ បាន​ធ្វើ​ឲ្យ​ខូចខាត​ដល់​ផល​ប្រយោជន៍​ និង​ដោយសារ​តែ​លោក​មិន​បាន​គោរព​វិន័យ​របស់​គណបក្ស។

លោក​យូ ថូ ​អតីត​ក្រុមប្រឹក្សា​ឃុំ​អមលាំង​ បាន​និយាយ​ថា ​លោក​មាន​ការ​សោកស្តាយ​ចំពោះ​ការ​ដកហូត​មុខតំណែង​នេះ។

លោក​បាន​មាន​ប្រសាសន៍​ទៀត​ថា​ ​លោក​ពុំ​បាន​ធ្វើ​ឲ្យ​ខូចខាត​ដល់​ផល​ប្រយោជន៍​គណបក្ស​ ប្រជាជន​ទេ។​ ហើយ​សកម្ម​ភាព​ដែល​លោក​បាន​ធ្វើ​កន្លង​មក​នេះ​ គឺ​ដើម្បី​ផល​ប្រយោជន៍​គណបក្ស​ប្រជាជន ​និង​ប្រជា​ពលរដ្ឋ​នៅ​ឃុំ​អមលាំង​តែ​ប៉ុណ្ណោះ។

"ធម្មតា​មនុស្ស​ពីរ​នាក់​ដណ្តើម​ដេក​កណ្តាល​គិត​ថា​ ​ខ្ញុំ​ដូច​ជា​មិន​ខុស​ទេ។​ ខ្ញុំ​ដូចជា​មិន​បាន​បំផ្លាញ​អី​ ទេ​ ​តែបើ​គាត់​មើល​ឃើញ​ថា​ ​ខ្ញុំ​បំផ្លាញ​អី ​នេះ​ជា​រឿង​របស់​គាត់​ណា៎។​ ​ខ្ញុំ​មិន​បាន​ធ្វើ​ឲ្យ​ប្រជា​ពលរដ្ឋ​ហ្នឹង ​ធ្វើ​ឲ្យ​ស្អប់​គណ​បក្ស​ ឬ​អី​ទេ។ ​ខ្ញុំ​គិត​ឃើញ​ថា​ ​ អ្វី​ដែល​ខ្ញុំ​ធ្វើ​ប្រជា​ពលរដ្ឋ​គាត់​ហាក់បី​ដូចជា​រឹតតែ​ស្រឡាញ់​គណ​បក្សឡើង"។

សមាជិក​ក្រុមប្រឹក្សា​ឃុំអម​លាំង​មាន​ចំនួន​៧​អាសនៈ​ ​ហើយ​នៅក្នុង​ការ​បោះឆ្នោត​ក្រុមប្រឹក្សា​ឃុំ​ សង្កាត់​អាណត្តិ​ទីមួយ​ ​គណបក្ស​ប្រជាជន​កម្ពុជា​ទទួល​បាន​៦​អាសនៈ​ ចំណែក​ការ​បោះឆ្នោត​ក្រុមប្រឹក្សា​ ឃុំ/សង្កាត់​អាណត្តិ​ទីពីរ​នេះ​ ​គណបក្ស​ប្រជាជន​កម្ពុជា​បាន​ក្តោប​ក្តាប់​អាសនៈ​ទាំង​៧​នេះ។

លោក​ឡាយ កង ​ប្រធាន​ក្រុមប្រឹក្សា ​និង​ជា​ប្រធាន​គណបក្ស​ប្រជាជន​កម្ពុជា​ប្រចាំ​ស្រុក​ថ្ពង​ បាន​បដិ សេធ​ពុំ​ធ្វើ​អត្ថាធិប្បាយ​លម្អិត​ទេ​ ដោយ​លោក​បាន​និយាយ​ថា​ នេះ​គឺ​ជា​កិច្ចការ​ផ្ទៃ​ក្នុង​របស់​គណបក្ស​ប្រជាជន​កម្ពុជា​តែ​ប៉ុណ្ណោះ។

"រឿង​នេះ​ជា​រឿង​ផ្ទៃ​ក្នុង​គណបក្ស​ ​ខ្ញុំ​មិន​អាច​ជម្រាប​បាន​ទេ​បាទ!"

លោក​ស្រី​ អ៊ូច បូរ ​អ្នក​សម្រប​សម្រួល​របស់​សមាគម​សិទ្ធិ​មនុស្ស​ADHOC​ វិញ​ បាន​និយាយ​ថា​ ​ការ​ ដក​ហូត​មុខ​តំណែង​លោក​យូ ថូ ​នេះ​ នឹង​ធ្វើ​ឲ្យ​ថយ​ឥទ្ធិពល​របស់​គ្រប់គ្រង​អំណាច។

"ពីព្រោះ​អី​ នៅ​ឃុំ​អមលាំង​ហ្នឹង​ អត់​អាច​មាន​គណបក្ស​ណា​ឈ្នះ​ឆ្នោត​ទេ​ ​មាន​តែ​គណបក្ស​ប្រជាជន​មួយ​ឈ្នះ​ឆ្នោត។​ ហើយ​នៅ​ពេល​ដែល​ឃោសនា​បោះឆ្នោត​ ​ខ្ញុំ​ទៅ​សង្កេត​ការណ៍ឃុំ​ហ្នឹង​ ឃើញ​តែ​គាត់​មួយ​មាន​ចលនា​ខ្លាំង​ជាង​គេ​ ដើរតួ​ឃោសនា​ឲ្យ​គណបក្ស​ហ្នឹង​ណាស់"។

លោក​យូ ថូ ​ធ្លាប់​ធ្វើ​ជា​សមាជិក​ក្រុមប្រឹក្សា​ឃុំ​អមលាំង​លំដាប់​ទី​៥​នេះ​ អស់​រយៈ​ពេល​ពីរ​អាណត្តិ​ មក​ហើយ​ ​ហើយ​លោក​ក៏​បាន​ធ្លាប់​ចូលរួម​ជាមួយ​និង​ប្រជា​ពលរដ្ឋ​ ដើម្បី​ប្រឆាំង​តវ៉ា​ជំទាស់​ទៅ​នឹង​ក្រុមហ៊ុន​ភ្នំពេញ​SUGAR​របស់​លោក​ឧកញ៉ាលី​ យ៉ុងផាត់​ សមាជិក​ព្រឹទ្ធ​សភា​ខាង​គណបក្ស​គ្រប់គ្រង​អំណាច​ដ៏​មាន​ឥទ្ធិពល​មួយ​រូប​ដែល​កំពុង​មាន​ទំនាស់​រឿង​ដីធ្លី​ដ៏​ស្រួចស្រាវ​នៅ​ក្នុង​ឃុំ​អមលាំង​នៅ​ឡើយ។

ប្រជា​ពលរដ្ឋ​ឃុំ​អមលាំង​បាន​ចោទ​ប្រកាន់​ក្រុមហ៊ុន​ភ្នំពេញ ​SUGAR​ ថា​ បាន​រំលោភ​យក​ដី​របស់​ពួក​ គេ​ ​ក្រោយ​ពី​ក្រុមហ៊ុន​នេះ​បាន​ទទួល​ដី​សម្បទាន​សេដ្ឋកិច្ច​ពី​រដ្ឋា​ភិបាល​ជាង​៨០០០​ហិកតា​សម្រាប់​ធ្វើ​ការ​អភិវឌ្ឍ​ដាំ​ដើម​អំពៅ ​នៅ​ក្នុង​ខេត្ត​កំពង់ស្ពឺ។

ពី​ទី​ក្រុង​ភ្នំពេញ​ ខ្ញុំ ​ហេង រស្មី ​VOA ​សម្លេង​សហ​រដ្ឋ​អាមេរិក៕

XS
SM
MD
LG