អតីតប្រធានាធិបតីសហរដ្ឋអាមេរិកលោក Donald Trump នឹងមិនមានឈ្មោះនៅលើសន្លឹកឆ្នោតក្នុងការបោះឆ្នោតបឋមនៅក្នុងរដ្ឋ Colorado ទេ។ តុលាការកំពូលរបស់រដ្ឋនោះបានសម្រេចដូចនេះកាលពីថ្ងៃអង្គារម្សិលមិញ នៅក្នុងការសម្រេចដែលត្រូវបានគេពិនិត្យមើលដ៏ដិតដល់បំផុត នៅពេលមានការខំប្រឹងប្រែងប្រហាក់គ្នានៅក្នុងរដ្ឋផ្សេងៗទៀត ដើម្បីធ្វើកុំឱ្យលោកមានលក្ខណៈសម្បត្តិគ្រប់គ្រាន់សម្រាប់ឈរឈ្មោះម្តងទៀត។
បញ្ហានេះស្ថិតនៅក្នុងវិសោធនកម្មទី ១៤ របស់រដ្ឋធម្មនុញ្ញសហរដ្ឋអាមេរិក ហើយដែលផ្នែកនេះរារាំងពួកមន្ត្រីដែលបានទាក់ទិននៅក្នុង «កុប្បកម្ម ឬការបះបោរ» មិនឱ្យកាន់តំណែង។
តុលាការបាននិយាយថា ការសម្រេចរបស់ខ្លួននឹងត្រូវពន្យារពេលអនុវត្តរហូតដល់ថ្ងៃទី ៤ ខែមករា ឬរហូតដល់តុលាការកំពូលសហរដ្ឋអាមេរិកសម្រេចលើរឿងក្តីនេះ។ ក្រុមមន្ត្រីរដ្ឋ Colorado បាននិយាយថា ថ្ងៃទី៥ ខែមករា ជាពេលកំណត់សម្រាប់ការបោះពុម្ភសន្លឹកឆ្នោតសម្រាប់ការបោះឆ្នោតបឋមជ្រើសរើសបេក្ខជនរបស់គណបក្សនៅក្នុងរដ្ឋនោះ ដែលជាការប្រកួតប្រជែងពីរដ្ឋមួយទៅរដ្ឋមួយ ដែលគណបក្សសាធារណរដ្ឋនឹងប្រើប្រាស់ការជ្រើសរើសបេក្ខជនរបស់ខ្លួននេះ ដើម្បីប្រកួតប្រជែងនឹងលោក Biden នៅក្នុងការបោះឆ្នោតប្រធានាធិបតីឆ្នាំ ២០២៤។
តុលាការកំពូលរដ្ឋColorado បានសម្រេចដែលមិនធ្លាប់មានកាលពីពេលមុនដោយសំឡេងឆ្នោត ៤ ទល់នឹង ៣ ដែលសម្រេចអំពីតួនាទីរបស់លោក Trump នៅក្នុងការបះបោរថ្ងៃទី ៦ ខែមករា ឆ្នាំ ២០២១ នៅឯវិមានសភាសហរដ្ឋអាមេរិក ដោយនឹងមិនឱ្យលោក Trump មានលក្ខណៈសម្បត្តិកាន់តំណែងជាប្រធានាធិបតីទៀតទេ។ កាលពីដើមឆ្នាំនោះ ពួកអ្នកគាំទ្ររបស់លោកបានបង្អាក់ការបញ្ជាក់លើជ័យជម្នះរបស់លោក Biden ក្នុងការឈ្នះឆ្នោតឆ្នាំ ២០២០ លើលោក Trump ហើយបានឈានដល់អំពើហិង្សា។
ចៅក្រម Carlos Samour ដែលបានជំទាស់ប្រឆាំងបាននិយាយថា រដ្ឋាភិបាលមិនអាចរារាំងនរណាម្នាក់មិនឱ្យកាន់តំណែងដោយគ្មានឆ្លងកាត់ដំណើការច្បាប់ទេ។ លោក Trump មិនបានសារភាពទទួលទោសចំពោះការចោទប្រកាន់សហព័ន្ធពីការរៀបចំផែនការ ដើម្បីប្រែក្រឡាស់ការចាញ់ឆ្នោតរបស់លោក នៅក្នុងរឿងក្តីមួយដែលមិនទាន់បានកាត់ក្តីនៅឡើយ៕
ព័ត៌មានខ្លះនៃសេចក្តីរាយការណ៍នេះដកស្រង់ពីទីភ្នាក់ងារសារព័ត៌មាន AP និង Reuters។
