ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

មេដឹកនាំខ្មែរក្រហម​ក្នុង​រឿងក្តីលេខ​០០២​នឹង​ត្រូវ​បាន​កាត់ទោស​ជាក្រុម


មន្ដ្រី​ជាន់ខ្ពស់​សាលាក្ដី​ខ្មែរក្រហម​បាន​ឲ្យដឹង​ថា​ ក្រុម​អតីត​មេដឹកនាំ​ខ្មែរ​ក្រហម ​ដែល​កំពុង​ជាប់​ឃុំឃាំង​នឹង​ត្រូវ​ទទួល​ការ​កាត់​ទោស​ជា​ក្រុម។ សេចក្ដី​អះអាង​នេះ ធ្វើឡើង​បន្ទាប់​ពី​សហ​ព្រះរាជអជ្ញា​សាលាក្ដីខ្មែរ​ក្រហម​ បាន​បញ្ជូន​ដីកា​សន្និដ្ឋាន​ក្នុង​ករណី​០០២ ​ទៅ​កាន់​សហ​ចៅក្រម​ស៊ើបអង្កេត ។

លោក​ក្រាញ់ តូនី ​ប្រធាន​រដ្ឋបាល​ស្តីទី​នៃ​សាលាក្តី​ខ្មែរ​ក្រហម​មាន​ប្រសាស៍ នៅ​ថ្ងៃ​អង្ការ៍​ ទី​១៧ ខែ​សីហា​នេះ ​នៅក្នុង​ពិធី​ចែក​សៀវភៅ​សាលក្រម​ឌុច​ នៅ​ក្នុង​តុលាការ​ខេត្ត​កណ្តាលថា៖

«ករណី​០០២នេះ​ ចៅក្រុម​លោក​បាន​សម្រេចថា ​ជា​សវនការ​ដែល​មាន​លក្ខណៈ​សមូហភាព​ គាត់​កាត់​សេចក្តី​ទាំងអស់ ​ទាំងបួន​នាក់​តែ​ម្តង»។

កាលពី​ថ្ងៃច័ន្ទ​ម្សិលមិញ​ សហ​ព្រះរាជអាជ្ញា ​បាន​បញ្ជូន​ដីកា​សន្និដ្ឋាន​ចុងក្រោយ​របស់​ខ្លួន​នៅក្នុង​សំណុំ​រឿង​ក្តី​០០២នេះ ​ទៅ​កាន់​សហ​ចៅក្រម​ស៊ើបអង្គេត ​ដើម្បី​បើក​ផ្លូវ​ឆ្ពោះទៅ​រក​ការ​កាត់ទោស។ នៅ​ក្នុង​សំណុំរឿង​នេះ​ មាន​ជន​ជាប់ចោទ​ចំនួន​ប្រាំនាក់​ គឺនួន ជា ​ អៀង សារី ​ខៀវ សំផន​ និង​អៀង ធារិទ្ឋ​ ក៏​ប៉ុន្តែ​ឌុច​ ដែល​ជា​អតីត​ប្រធាន​គុក​ទួលស្លែង ​ឬ​មន្ទីរ​ស២១ ត្រូវ​បាន​សហ​ព្រះរាជ​អាជ្ញា​ដកចេញ​ពី​សំណុំ​រឿង​០០២នេះ​ ទោះ​ជា​យ៉ាង​ណា​ វាសនា​របស់ ​ឌុច ​ដែល​ត្រូវ​កាត់ទោស​ ឬ​ក៏​មិន​ត្រូវ​កាត់ទោស​ នៅក្នុង​សំណុំ​រឿង​០០២ ​និង​ត្រូវ​សម្រេច​ ដោយសហ​ចៅក្រម​ស៊ើបអង្គេត​ក្នុង​ដីកា​បញ្ជូន​រឿង​ទៅ​កាត់ ទោសនៅ​ខែក្រោយ​នេះ។

រីឯ​ជន​ជាប់ចោទ​ទាំង​បួននាក់​ ត្រូវ​ចោទប្រកាន់​ ចំពោះ​អំពើ​ឃោរឃៅ ​ដែល​បាន​បង្ក​ឲ្យ​ប្រជា​ពលរដ្ឋ​ខ្មែរ​យ៉ាង​តិច១.៧​លាន​នាក់បាត់បង់​ជីវិត​ នៅក្នុង​ចន្លោះ​ឆ្នាំ១៩៧៥ ​ដល់​ឆ្នាំ១៩៧៩។

លោក​ក្រាញ់ តូនី ​មាន​ប្រសាសន៍ ​នៅ​ចំពោះ​មុខ​មន្រ្តី​តុលាការ​ នៅក្នុង​ខេត្ត​កណ្តាល​ ថា​ការ​កាត់ទោសពួក​អតីត​មេដឹកនាំ​កំពូល​ខ្មែរ​ក្រហម​ទាំង​បួននាក់​រួមគ្នា​នេះ និង​អាច​ធ្វើឡើង​នៅចុង​ខែមីនា ​ឬ​ក៏​នៅ​ដើមខែមេសា​ ឆ្នាំ២០១១។

លោក​ឡាស អលសិន (Lars Olsen) ​មន្រ្តី​ផ្នែក​ទំនាក់ទំនង​កិច្ចការច្បាប់​របស់​សាលាក្តី​ខ្មែរក្រហម​ ពន្យល់​ថា ​ការ​កាត់ទោស​អតីត​ពួក​មេដឹកនាំ​ខ្មែរ​ក្រហម​ទាំង​បួននាក់ ​ជា​ក្រុម​រួមគ្នា​ ក៏​ដោយសារ​តែ​ពួកគេ​ភាគច្រើន​ត្រូវ​ចោទ ប្រកាន់​ពីបទ​ឧក្រិដ្ឋកម្ម​ដូចៗគ្នា ​មាន​គម្រោងការ​ឧក្រិដ្ឋកម្ម​ដូចគ្នា​ រួមទាំង​មានសាក្សី​និងភស្ថុតាង​ដូចគ្នា​ផង​ដែរ។

XS
SM
MD
LG