ភ្ជាប់​ទៅ​គេហទំព័រ​ទាក់ទង

ដំណាំ​កាហ្វេ​និង​ផលិត​កាហ្វេ​នៅ​កម្ពុជា​មិនមាន​ការ​គាំទ្រ


កាហ្វេ​ជា​ភេសជ្ជៈ​ពេញនិយម​​នៅ​​កន្លែង​​ធ្វើការ​​នៅ​ស.រ.អ.​ ​ ពិសារ​បន្ថយ​​ការ​​ងងុយ​​ដេក។​

ដំណាំ​កាហ្វេ​ ​និង​ការ​ផលិត​កាហ្វេ​ក្នុង​ប្រទេស​កម្ពុជា​នៅ​មិនទាន់​បាន​ទទួល​ការ​គាំទ្រ​នៅ​ឡើយ​ខណៈ​ពេល​ដែល​កាហ្វេ​បរទេស​បាន​ហូរ​ចូល​មក​យ៉ាង​ច្រើន។

នាង ​ធីតា វិន ​សូម​ជូន​សេចក្តី​ពិស្តារ​អំពី​រឿង​នេះ។

ប្រទេស​កម្ពុជា​បាន​កំពុង​ផលិត​កាហ្វេ​ដោយ​ខ្លួន​ឯង​ ​ក៏​ប៉ុន្តែ​គុណភាព​នៃ​ការ​ផលិត​មិនទាន់​ បាន​ឆ្លើយ​តប​ទៅ​នឹង​ទីផ្សារ​នៅ​ឡើយ​ ស្រប​ពេល​ដែល​ការ​ដាំ​កាហ្វេ​ក្នុង​ប្រទេស​នៅ​មាន​ចំនួន​តិចតួច​នៅ​ឡើយ​ ម្យ៉ាងវិញ​ទៀត​មន្រ្តី​ជំនាញ​របស់​រដ្ឋា​ភិបាល​បាន​អះអាង​ថា ​ដំណាំ​កាហ្វេ​មិនមែន​ជា​ដំណាំ​សក្តា​នុពល​នោះ​ទេ។

យោង​តាម​មន្រ្តី​នៃ​ក្រសួង​កសិកម្ម​បាន​ឱ្យ​ដឹង​ថា​ ​ផ្ទៃដី​ដែល​អាច​ដាំ​កាហ្វេ​បាន​នៅ​ក្នុង​ ប្រទេស​កម្ពុជា​មាន​ច្រើន​ពាន់​ហិចតា​ ​ក៏​ប៉ុន្តែ​រហូត​មក​ដល់​ពេល​នេះ​ផ្ទៃដី​ដែល​បាន​កំពុង​ដាំ​កាហ្វេ​មាន​តែ​២៣២​ហិចតា​តែ​ប៉ុណ្ណោះ​គឺ​មាន​នៅ​ខេត្ត​រតនៈគីរី​ចំនួន​១០០​ហិចតា​ មណ្ឌលគីរី​៤០​ហិចតា​ កោះកុង​ ៤៩​ហិចតា​ កំពត១​ហិចតា​ កំពង់ធំ​២​ហិចតា​ កំពង់ស្ពឺ​១៣​ហិចតា​ និង​កំពង់ចាម​២៦​ហិចតា។

លោក​គង់ ពុទ្ធារ៉ា​ ប្រធាន​នាយកដ្ឋាន​ស្ថិតិ​ព័ត៌មាន​នៃ​ក្រសួង​ពាណិជ្ជ​កម្ម​បាន​ឱ្យ​ដឹង​ថា​ ​កាហ្វេ​ផលិត​នៅ​ក្នុង​ប្រទេស​កម្ពុជា​សម្រាប់​ការ​នាំ​ចេញ​ ​និង​ធ្វើ​ចរាចរ​លក់ដូរ​នៅ​ក្នុង​ប្រទេស​មាន​ ចំនួន​តិចតួច​បំផុត​ ​បើ​ប្រៀបធៀប​ទៅ​នឹង​កាហ្វេ​ ​ដែល​បាន​នាំចូល​ពី​ក្រៅ​ប្រទេស។

លោក​បាន​ឱ្យ​ដឹង​បន្ថែម​ថា​ ​ការ​ដែល​កាហ្វេ​ផលិត​ក្នុង​ប្រទេស​មិនទាន់​ទទួល​បាន​ការ​គាំទ្រ​ពី​អ្នក​ប្រើប្រាស់​នោះ​បណ្តាល​មកពី​គុណភាព​មិនទាន់​បាន​ឆ្លើយ​តប​ទៅ​តាម​ស្តង់ដារ​នៅ​ឡើយ​ ​រីឯ​តម្លៃវិញ​ក៏មាន​តម្លៃ​ខ្ពស់​ជាង​កាហ្វេ​ដែល​បាន​នាំចូល​ដែរ។

«គុណភាព​យើង​អត់​ដូច​ការ​នាំចូល​របស់​គេ​ទេ​ ​មិន​អាច​ប្រឡង​ប្រណាំង​ជាមួយគុណភាព​នាំចូល​បាន​ទេ។ ​អ្នក​ប្រើប្រាស់​គេ​ត្រូវការ​រក​តែ​កាហ្វេ​ណា​ដែលឆ្ងាញ់​ មាន​គុណភាព។ ​តម្លៃ​យើង​អត់​ប្រតុំត្រសង​គ្នា​ទេ។ ​ឧបមាថា​ ​ស្នើ​គ្នា​ ​ក៏​គុណភាព​យើង​ចាញ់​គេ។​ ​ក៏​គេ​អត់​ប្រើ​របស់​យើង​ដែរ»។

ប្រទេស​កម្ពុជា​បាន​នាំ​កាហ្វេ​ចូល​មក​ពី​ប្រទេស​វៀតណាម​ ថៃ ​បារាំង​ អ៊ីតាលី ​អាមេរិច​ ម៉ាឡេស៊ី​ សាំងហ្គាពួរ ​កូរ៉េ​ខាងត្បូង​ និង​ប្រទេស​អូស្ត្រាលី​ជាដើម។

លោក​ គង់ពុទ្ធារ៉ា​បាន​ឱ្យ​ដឹង​បន្ត​ថា​ កាហ្វេ​ដែល​បាន​នាំ​ចូល​មក​ប្រទេស​កម្ពុជា​ក្នុង​ឆ្នាំ​២០០៩​មាន​ចំនួន​ជាង​៥៣៣៦៩​គីឡូក្រាម​ដែល​គិតជា​ទឹកប្រាក់​ប្រហែល​ជាង​៩៥០៥៩​ដុល្លារ​រ។ ​ ដូច្នេះ​អ្នក​និយម​ប្រើប្រាស់​កាហ្វេ​ក្នុង​ប្រទេស​កម្ពុជា​មាន​ចំនួន​តិចតួច​នៅ​ឡើយ។

លោក​បាន​បញ្ជាក់​ថា​ ​ការ​ដំណាំ​កាហ្វេ​មិនមែន​ជា​ដំណាំ​ដែល​មាន​សក្តានុ​ពល​សម្រាប់​ប្រទេស​កម្ពុជា​នោះ​ទេ។

លោក ​គិត សេង ​អនុ​រដ្ឋ​លេខាធិការ​នៃ​ក្រសួង​កសិកម្ម​ បាន​ឱ្យ​ដឹង​ថា​ ​ដំណាំ​កាហ្វេ​មិន​សូវ​មាន​ប្រជា​ពលរដ្ឋ​ដាំ​ ដោយសារ​ដំណាំ​នេះ​ចំណាយ​ពេលយូរ​ទើប​បាន​ផល។ ​ដូច្នេះ​ប្រជា​ពលរដ្ឋ​ចូលចិត្ត​ដាំ​ដំណាំ​ដែល​ឆាប់​បាន​ទទួល​ផល​ ​ដូចជា​ពោត​ ​សណ្តែក​ ល្ង​ និង​ដំឡូងមី​ជាដើម

«ដំណាំ​សណ្តែក​សៀង​ ដំណាំ​ដំឡូង​អី ប្រមូល​ផល​៦​ខែម្តង​ ​១ឆ្នាំម្តង។ ​វា​ចិញ្ចឹម​ឆ្នាំង​គាត់​ វិលជុំ​ ​តែ​បើ​សិន​ឱ្យ​គាត់​យក​អា​នេះ​ទៅ​វិនិយោគ​កាហ្វេ​ ​ចាំ៣​ទៅ៤​ឆ្នាំ​ទៀត។ ​គាត់​អត់​លុយ​ចាយ។​ គាត់​អត់​បាយ​ហូប​ ​ហើយ​វា​ជា​រឿង​មួយ​ពិបាក។ ​ជួន​កាល​ទីផ្សារ​កាហ្វេនេះ​ វា​មិន​ល្អ​ទៀត។​ ដូច​កន្លង​មក​ជួនកាល​ចុះ​ជួនកាល​ឡើង។ ​វា​មាន​បញ្ហា​ប្រឈម​ច្រើន​ចំពោះ​កាត់​ ​ទើប​គាត់​មិន​ដាំ»។

កង្វះ​គុណភាព​នៃ​ការ​ផលិត​ និង​ថែទាំ​ដំណាំ​ធ្វើ​ឱ្យ​ការ​ដាំដុះ​កាហ្វេ​ និង​ការ​ផលិត​មិន​មាន​ ភាព​រីក​ចម្រើន។

ទោះបីជា​យ៉ាង​ណា​ក៏​ដោយ​លោក​ហួន ​ស្រេង​ ម្ចាស់​សិប្ប​កម្ម​កាហ្វេ​ម៉ាក់​កាំហួយ​ណាំបាន​ឱ្យ​ដឹង​ថា​ គាត់​បាន​ទិញ​គ្រាប់​កាហ្វេ​ពី​ខេត្ត​រតនៈ​គីរី​មកលីង​ដោយ​ខ្លួន​ឯរួច​ធ្វើការ​វេច​ខ្ជប់​ដើម្បី​ដាក់​លក់​នៅ​តាម​ទីផ្សារ​អស់រយៈ​ពេល​៣០​ឆ្នាំ​កន្លង​មក​ ​ហើយ​ដែល​កាហ្វេ​នោះ​មាន​តម្លៃ​ចាប់​ពី​១៣០០០​រៀល​ដល់​២០០០០​រៀល​ក្នុង​១​គីឡូក្រាម។

លោក​បាន​ឱ្យ​ដឹង​ថា​ ​កាហ្វេ​ផលិត​ក្នុង​ប្រទេស​កម្ពុជា​មាន​គុណភាព​អាច​ល្អ​ជាង​កាហ្វេ​នាំចូល​មួយ​ចំនួន​ដែរ​ ​ក៏​ប៉ុន្តែ​លោក​បាន​ត្អូញត្អែរ​ដែរ​ថា​ ​កាហ្វេ​ផលិត​ក្នុង​ស្រុក​ពិបាក​រក​ទីផ្សារ​ ណាស់​ដោយសារ​កាហ្វេ​នាំ​ចូល​មាន​ចំនួន​ច្រើន​ ​ហើយ​កាហ្វេ​ខ្លះតម្លៃ​ទាប​ម្យ៉ាង​វិញ​ទៀត​ប្រជា​ ពលរដ្ឋ​មួយ​ចំនួន​តែង​តែ​គិត​ថា​ ​កាហ្វេ​នាំចូល​មាន​គុណភាព​ល្អ​ជាង​កាហ្វេ​ក្នុង​ស្រុក​ទោះបីជា​កាហ្វេ​នោះ​មាន​គុណភាព​អន់​ជាង​ក៏​ដោយ។

«គេ​ថា​ ​វៀតណាម​ឆ្ងាញ់។​ ​ឆ្ងាញ់នេះ​ខាង​វៀតណាម​គេ​មិនមែន​មាន​តែមួយ​ក្រុមហ៊ុន​នោះ​ទេ​ ​មាន​ច្រើន។ ​ជួនកាល​ក្រុមហ៊ុន​ខ្លះ​ក៏​ឆ្ងាញ់​ទៅ​ ​ហើយ​ខ្លះ​ក៏​មិន​ឆ្ងាញ់។​ ​ប៉ុន្តែ​គ្រាន់​ថា​ ​សតិអាម្មណ៍​វា​ខ្លាំង។

ជាមួយ​គ្នា​នេះ​ដែរ​លោក​ ឡាយ​ អ៊ីពិសិដ្ឋ​ សមាជិក​ព្រឹទ្ធ​សភា​និង​ជា​ម្ចាស់​ចម្ការ​កាហ្វេ​ដែល​ មាន​ចំនួន​ផ្ទៃ​ដីដាំ​កាហ្វេ​ច្រើន​ជាង​គេ​ក្នុង​ប្រទេស​កម្ពុជា​បាន​ឱ្យ​ដឹង​ថា​ ​គាត់​បាន​ដាំ​កាហ្វេ​អស់ ​រយៈ​ពេល​១០​ឆ្នាំ​កន្លង​មក​ហើយ​នៅ​ខេត្ត​រតនៈគីរី​ដែល​មុន​ដំបូង​ដាំ​ចំនួន​២០០​ហិចតា​ តែ​នៅ​ពេល​នេះ​នៅសស់​តែ​ ៨០​ហិចតា​តែ​ប៉ុណ្ណោះ​ដោយសារ​ពិបាក​ក្នុង​ការ​ថែទាំ។

លោក​បាន​ឱ្យ​ដឹង​បន្ត​ថា​ ក្នុង​រយៈពេល​មួយ​ឆ្នាំ​យ៉ាង​ហោច​ណាស់​ត្រូវការ​ចំណាយ​ថវិកា​ប្រហែល​៥​ម៉ឺន​ដុល្លារ​សម្រាប់​ចំណាយ​ទៅ​លើ​ការ​ថែទាំ​ ​ដូចជា​ស្រោច​ទឹក​ដាក់​ជីរ​ និង​ជួល​អ្នក​ជំនាញ​មក​ មើល​ជា​ប្រចាំ​ ​ដូច្នេះ​ដំណាំ​នេះ​ត្រូវការ​ចំណាយ​ដើម​ច្រើន​ណាស់​ ​ទើប​ប្រជា​ពលរដ្ឋ​ភាគ​ ច្រើន​មិន​សូវ​ចូល​ចិត្ត​ដាំ។

លោក​បាន​ឱ្យ​ដឹង​បន្ត​ថា ​ក្នុង​ផ្ទៃ​ដី​ចំនួន​៨០​ហិចតា​នេះ​បាន​ទិន្នផល​ក្នុង​១​ឆ្នាំ​ជិត​២០០​តោន​ ​ហើយ​តាម​ការ​ប៉ាន់​ស្មាន​របស់​លោក​ក្នុង​ប្រទេស​កម្ពុជា​ត្រូវ​មាន​គ្រាប់​កាហ្វេ​ចំនួន​ប្រហែល​ជា​៥០០​តោន​ ​ទើប​អាច​ផ្គត់ផ្គង់​ទីផ្សារ​ក្នុង​ប្រទេស​បាន។

កាហ្វេ​ផលិត​ក្នុង​ប្រទេស​កម្ពុជា​ភាគច្រើន​ការ​វេច​ខ្ចប់​មាន​លក្ខណៈ​សាមញ្ញ​ ធម្មតា​មិន​សូវ​មាន​ដាក់​ផ្លាក​សញ្ញា​ ​នោះ​ហើយ​កាហ្វេ​នេះ​ភាគ​ច្រើន​សម្រាប់​បម្រើ​តែ​ទីផ្សារ​ក្នុង​ប្រទេស​ប៉ុណ្ណោះ​ ដោយ​ការ​នាំចេញ​ទៅ​ក្រៅ​ប្រទេស​មាន​ចំនួន​តិចតួច​បំផុត​ពោល​គឺ​ក្នុង​ឆ្នាំ​២០០៩​មាន​ការ​នាំចេញ​បាន​ត្រឹមតែ​២៣៧​គីឡូ​ក្រាមទៅ​ប្រទេស​បារាំង៕

XS
SM
MD
LG