ភ្នំពេញ៖ ក្នុងដំណើរទស្សនកិច្ចមកកាន់ប្រទេសកម្ពុជានេះ លោកលោក វូ បាងហ្កូ (Wu Bangguo) ប្រធានសភាចិន បានប្រកាសលុបចោលបំណុលដែលប្រទេសកម្ពុជាបានជំពាក់ប្រទេសចិន។ ការប្រកាសនេះ ធ្វើឡើងបន្ទាប់ពីលោកបានជួបពិភាក្សាការងារជាមួយក្រុមមេដឹកនាំកម្ពុជា សំដៅពង្រឹងពង្រីកទំនាក់ទំនង និងកិច្ចសហប្រតិបត្តិការទ្វេភាគីរវាងប្រទេសជាតិទាំងពីរ។
នៅថ្ងៃព្រហស្បតិ៍នេះ ប្រទេសចិនបានសម្រេចលុបចោលបំណុលជាង៤លានដុល្លារអាមេរិក ដែលទំនងជារបបខ្មែរក្រហមបានជំពាក់ប្រទេសចិននៅក្នុងទសវត្សរ៍១៩៧០។
លោក វូ បាងហ្កូ ប្រធានសភាប្រជាជនចិន បានចុះហត្ថលេខាលើកិច្ចព្រមព្រៀងជាមួយលោក គាត ឈន់ រដ្ឋមន្ត្រីក្រសួងហិរញ្ញវត្ថុ និងសេដ្ឋកិច្ចកម្ពុជា ដើម្បីលុបចោលបំណុលចាស់ជាង៤លានដុល្លារអាមេរិក ដែលប្រទេសកម្ពុជាបានជំពាក់។
លោក វូ បាងហ្កូ បានជួបពិភាក្សាការងារដាច់ដោយឡែកពីគ្នាជាមួយព្រះមហាក្សត្រ នរោត្តម សីហមុនី លោកជា ស៊ីម ប្រធានព្រឹទ្ធសភា លោកហេង សំរិន ប្រធានរដ្ឋសភា និងលោកនាយករដ្ឋមន្ត្រីហ៊ុន សែន អំពីបញ្ហាទ្វេភាគី។
ក្រោយពីជំនួបរវាងលោកនាយករដ្ឋមន្ត្រីហ៊ុន សែន និងលោក វូ បាងហ្កូ នៅទីស្តីការគណៈរដ្ឋមន្ត្រី លោកខៀវ កាញារិទ្ធ រដ្ឋមន្ត្រីក្រសួងព័ត៌មាន បានថ្លែងប្រាប់ក្រុមអ្នករាយការណ៍ព័ត៌មានថា ប្រទេសចិនបានសម្រេចលុបចោលបំណុលដែលប្រទេសកម្ពុជាបានជំពាក់ប្រទេសចិន។
ក្រោយពីជំនួបរវាងលោកហេង សំរិន និងលោក វូ បាងហ្កូ លោក គាំ កុសល ប្រធានខុទ្ទកាល័យរបស់លោក ហេង សំរិន ប្រធានរដ្ឋសភា បានថ្លែងប្រាប់ក្រុមអ្នករាយការណ៍ព័ត៌មានយ៉ាងដូច្នេះថា៖
«ប្រទេសចិនបានសន្យាលុបបំណុល ដែលកម្ពុជាបានជំពាក់ចិន ហើយបង្វែរបំណុលនេះទៅជាការអភិវឌ្ឍន៍ប្រទេសជាតិ»។
នៅក្នុងឆ្នាំ ២០០២ ប្រទេសចិនបានលុបចោលបំណុលរបស់ប្រទេសកម្ពុជានៅក្នុងទសវត្សរ៍១៩៧០ ដែលត្រូវបានប៉ាន់ប្រមាណដោយក្រុមអ្នកការទូតថា មានតម្លៃរវាងពី៦០លានដុល្លារអាមេរិកទៅ ១០០០ លានដុល្លារអាមេរិក។
នៅក្នុងឆ្នាំ ២០០៥ ស្ថាប័នមូលនិធិរូបិយវត្ថុអន្តរជាតិ (IMF) បានលុបចោលបំណុល ៨២ លានដុល្លារអាមេរិក ដែលប្រទេសកម្ពុជាបានជំពាក់ស្ថាប័ននេះ។
ប្រទេសកម្ពុជាកំពុងធ្វើការចរចាជាមួយសហរដ្ឋអាមេរិកដើម្បីលុបចោលបំណុលជាង៤០០លានដុល្លារអាមេរិក ដែលរបបសាធារណរដ្ឋខ្មែររបស់លោកសេនាប្រមុខលន់ នល់បានជំពាក់សហរដ្ឋអាមេរិក នៅដើមទសវត្សរ៍១៩៧០។
ប្រទេសកម្ពុជាបានស្វះស្វែងរកការលុបចោលបំណុល១៥០០លានដុល្លារអាមេរិក ដែលរបបសាធារណរដ្ឋប្រជាមានិតកម្ពុជាបានជំពាក់អតីតសហភាពសូវៀតនៅក្នុងទសវត្សរ៍១៩៨០៕