លោកចាន់ សុវ៉េត មន្ត្រីសិទ្ធិមនុស្សដ៏ល្បីល្បាញក្នុងប្រទេសកម្ពុជាបានទទួល មរណភាពនៅរសៀលថ្ងៃពុធនេះ ដែលគេសន្និដ្ឋានជំហានដំបូងថា ដោយសារ ខ្យល់គរ។ លោកចាន់ សុវ៉េតត្រូវគេដឹងថា លោកបានប្រឹងប្រែងធ្វើកិច្ចការច្រើន ក្នុងរយៈពេលប៉ុន្មានថ្ងៃចុងក្រោយនេះ មុនពេលដែលមានការប្រារព្ធទិវាសិទ្ធិមនុស្ស១០ធ្នូ។
លោកនី ចរិយា ប្រធានផ្នែកស៊ើបអង្កេតនៃសមាគមអាដហុក ដែលជាការិយាល័យលោកចាន់ សុវ៉េតធ្វើការបានថ្លែងថា៖
«ការស្លាប់នេះ បើតាមការរៀបរាប់របស់គ្រួសារគាត់គឺក្រោយពេលដែលគាត់មក ពីសង្កេតការណ៍ការរៀបចំទិវាសិទ្ធិមនុស្ស១០ធ្នូព្រឹកនេះ គាត់ក៏ថា ខ្យល់អញ្ចឹង ទៅ ហើយគាត់ក៏សម្រាក ហើយពេលដែលគាត់ដឹងខ្លួនមកវិញគឺបាត់មាត់បាត់ក ហើយ»។
អនុប្រធានស៊ើបអង្កេតនៃអង្គការអាដហុក លោកចាន់ សុវ៉េតអាយុ៥១ឆ្នាំបាន បម្រើកិច្ចការជាអ្នកការពារសិទ្ធិមនុស្សតាំងពីឆ្នាំ១៩៩៦ម្ល៉េះ ដែលលោកនី ចរិយា បានចាត់ទុកថា ជាមនុស្សសំខាន់ ជាមនុស្ស មានឧត្តមគតិខ្ពស់ លះបង់ខ្ពស់ ក្នុងការធ្វើកិច្ចការការពារសិទ្ធិមនុស្សដើម្បីជួយដល់ពលរដ្ឋរងគ្រោះជាច្រើននៅ ទូទាំងប្រទេស។ លោកចរិយាបានបន្ថែមថា៖
«គាត់មានការលះបង់ខ្ពស់ណាស់ សូម្បីតែថ្ងៃរៀបអាពាហ៍ពិពាហ៍របស់គាត់ហើយត្រូវទៅស៊ើបអង្កេតក៏គាត់មិនបានឈប់សម្រាកដែរ។ នេះជាអ្នកការពារ សិទ្ធិមនុស្ស។ អញ្ចឹងហើយបានជាយើងសោកស្តាយធំមែនទែន រឿងបាត់បង់ លោកសាវ៉េតនេះ»។
លោកចាន់ សុវ៉េតត្រូវគេដឹងថា ធ្លាប់បានទទួលរងការគំរាមកំហែងពីលោក នាយករដ្ឋមន្ត្រីហ៊ុន សែន និងការចោទប្រកាន់របស់តុលាការពីបទជួយក្រុម មួយដែលលោកនាយករដ្ឋមន្ត្រីហ៊ុន សែនចាត់ទុកថា ជាក្រុមប៉ុនប៉ងបង្កើត អបគមន៍និងផ្តួលរំលំរដ្ឋាភិបាលរបស់លោក កាលពីចុងឆ្នាំ២០១២។ តែលោក សុវ៉េតធ្លាប់បានបញ្ជាក់ថាពួកគេជាជនរងគ្រោះ ដោយសារការរំលោភដីធ្លី នៅខេត្តក្រចេះ។
លោកនី ចរិយាបានអះអាងថា ក្រុមមន្ត្រីសិទ្ធិមនុស្ស ជាពិសេសសមាគមអាហុក កំពុងមានទុក្ខសោកខ្លាំងណាស់ដែលបាត់បង់លោកចាន់ សុវ៉េតថ្ងៃនេះ។
លោកអំ សំអាត សកម្មជនសិទ្ធិមនុស្សដ៏សកម្មម្នាក់ទៀតមកពីអង្គការលីកាដូ បាននិយាយថា លោកចាន់ សុវ៉េតជាដៃគូធ្វើការដ៏ល្អ ជាការបាត់បង់មនុស្សដែលសំខាន់សម្រាប់វិស័យសិទ្ធិមនុស្ស។
«លោកមានវីរភាពនិងស្នាដៃជាច្រើនក្នុងការបំពេញការងារទាក់ទងនឹងការងារ ការពារសិទ្ធិមនុស្ស ទោះបីជាមានការគំរាមកំហែង មានការចោទប្រកាន់តាមផ្លូវ តុលាការយ៉ាងណាក៏ដោយ ក៏លោកមិនមានការរួញរា នៅតែជួយដល់ប្រជា ពលរដ្ឋ ដែលរងគ្រោះដោយសារការរំលោភសិទ្ធិមនុស្ស ការរំលោភដីធ្លី ហើយ នេះគឺជាធនធានមនុស្សដ៏សំខាន់មួយសម្រាប់ជួយប្រទេសជាតិ សម្រាប់ជួយ ការពារសិទ្ធិសេរីភាពរបស់ពលរដ្ឋ»។
លោកអំ សំអាតបានបន្តថា លោកចាន់ សុវ៉េតបានជួយពលរដ្ឋដែលរងការ រំលោភដីធ្លីច្រើន មុនការប្រារព្ធទិវាសិទ្ធិមនុស្ស១០ធ្នូ អញ្ចឹងហើយបានធ្វើឲ្យ សុខភាពលោកមានការចុះខ្សោយ ជាមួយគ្នាពេលដែលលោកបានចូលរួមប្រារព្ធទិវាសិទ្ធិមនុស្ស១០ធ្នូ រហូតដល់ម៉ោងជិត១រសៀលទៀត។
ក្រុមមន្ត្រីសិទ្ធិមនុស្សបានអំពាវនាវដល់មិត្តភក្តិ និងអ្នកស្រឡាញ់រាប់អានលោក សុវ៉េតឲ្យជួយផ្តត់ផ្គង់ថវិកាដល់គ្រួសារដើម្បីរៀបចំពិធីបុណ្យសពលោក។ លោកសំអាតបានអះអាងថា អ្នកការពារសិទ្ធិមនុស្សនេះនៅសល់តែស្នាដៃប៉ុណ្ណោះ។
លោកហ្វ៊ីល រ៉បប៊ឺតសុន (Phil Robertson) នាយករងអង្គការសិទ្ធិមនុស្ស Human Rights Watch ប្រចាំតំបន់អាស៊ី បានហៅលោកចាន់ សុវ៉េតថា ជាអ្នកការពារ សិទ្ធិមនុស្សនាំមុខ ដ៏ឆ្នើម ហើយបានទុកកេរតំណែលជាគម្រូដល់អ្នកជំនាន់ ក្រោយយ៉ាងច្រើន។
«លោកគឺជាតួអង្គសំខាន់ ដែលធ្វើកិច្ចការសិទ្ធិមនុស្សរាប់ឆ្នាំ លើបញ្ហាសិទ្ធិមនុស្សជាច្រើនផ្នែកនៅទូទាំងប្រទេសកម្ពុជា ហើយគឺជាមនុស្សសំខាន់ក្នុងការ នាំឲ្យក្មេងៗខ្មែរជំនាន់ក្រោយយកចិត្តទុកដាក់អំពីសិទ្ធិមនុស្សនិងស្វាគមន៍សិទ្ធិមនុស្ស»។
លោកចាន់ សុវ៉េតបានស្លាប់ចោលកូនបីនាក់របស់លោក ហើយបើតាមក្រុមមន្ត្រី សិទ្ធិមនុស្សបានឲ្យដឹងថា នឹងមានមនុស្សម្នារជាច្រើននឹងទៅចូលរួមមរណទុក្ខ សពលោកចាន់ សុវ៉េតនៅថ្ងៃព្រហស្បតិ៍ស្អែកនេះ។ សពរបស់លោកចាន់ សុវ៉េតត្រូវគេរាយការណ៍មកថា នឹងយកទៅតម្កល់នៅវត្តគល់ទទឹង សង្កាត់ព្រៃថ្មី ខណ្ឌច្បារអំពៅដើម្បីបូជានៅប៉ុន្មានថ្ងៃខាងមុខទៀត៕
