ភ្ជាប់​ទៅ​គេហទំព័រ​ទាក់ទង

សាលាក្តី​ខ្មែរក្រហមជ្រើស​រើសបាន​ចៅក្រម​ស៊ើបអង្កេតថ្មី


អង្គជំនុំជំរះ​វិសាមញ្ញ​តុលាការ​កម្ពុជា។

វ៉ាស៊ីនតោនៈ សាលា​ក្តីខ្មែរ​ក្រហម​ដែល​ចូល​រួម​ដោយ​អង្គការ​សហ​ប្រជា​ជាតិ​នៅ​ថ្ងៃពុធ​នេះ​បាន​តែង​តាំង​លោក​ Siegfried ​Blunk​ ជនជាតិ​អាល្លឺម៉ង់​ជា​សហ​ចៅក្រម​ស៊ើប​អង្កេត​ថ្មី​ ជំនួស​ លោក​ Marcel ​Lemond​ ដែល​បាន​ប្រកាស​លា​លែង​ឈប់​ពី​មុខ​ដំណែង​ កាល​ពីខែ​កញ្ញា​។​ នេះ​ បើ​តាម​សេចក្តី​ប្រកាស​ព័ត៍មាន​របស់​សាលា​ក្តី​ខ្មែរ​ក្រហម​។

លោក​ Blunk ​បាន​បំពេញ​ការងារ​ជា​ចៅ​ក្រម​ស៊ើប​អង្កេត​បម្រុង​តាំង​ពី​ឆ្នាំ​២០០៨​ ក្រោយ​ពី​ធ្លាប់​បាន​បម្រើ​កិច្ចការ​ជា​ចៅ​ក្រម​ក្នុង​តុលាការ​កូន​កាត់​នៃ​ប្រទេស​ទីម័រ​ ខាងកើត​ដែល​បង្កើត​ឡើង​ដោយ​អង្គការ​សហ​ប្រជា​ជាតិ​។​ លោក​ Blunk​ បាន​ទទួល​ការ​បណ្តុះ​ បណ្តាល​ផ្នែក​ច្បាប់​នៅ​សាកល​វិទ្យាល័យ​ Munich​ ហើយ​បច្ចុប្បន្នកំពុង​សរសេរនិក្ខេបបទ​ថ្នាក់​បណ្ឌិត​ស្តី​ពី​នីតិ​វិធី​អន្តរជាតិ​។​ លោក​ Blunk​ ក៏​ធ្លាប់​ត្រូវ​តែង​តាំង ​ជា​ព្រះរាជអាជ្ញានៅ​ឆ្នាំ​១៩៧២ ​និង​ចៅក្រម​នៅ​ឆ្នាំ​១៩៧៧​ ក្រៅ​ពី​ធ្លាប់​បម្រើការងាររយៈ​ពេល​២៦​ឆ្នាំ​ ជា​ចៅក្រម​លើ​សំណុំ​រឿងក្តី​បណ្តឹង​រដ្ឋប្បវេណី​ និង​រឿង​ក្តីព្រហ្មទណ្ឌ​។

បើ​តាម​សេចក្តី​ប្រកាស​ព័ត៍មាន​របស់​សាលា​ក្តី​ខ្មែរ​ក្រហម​បានបញ្ជាក់​ថា​ ព្រះ​មហាក្សត្រ​ នរោត្តម​ សីហមុនី​ បាន​ឡាយ​ព្រះហស្ថ​លេខា​តែង​តាំង​លោក​ Siegfried ​Blunk​ ​ជា​សហ​ចៅក្រម​ស៊ើប​អង្កេត​អន្តរជាតិ​ថ្មី​ សម្រាប់​អង្គ​ជំនុំ​ជម្រះ​វិសាមញ្ញ​ក្នុង​តុលាការ​កម្ពុជា​។​ សេចក្តី​ប្រកាស​ព័ត៍មាន​ដដែល​បាន​បន្ថែម​ថា​ លោក​ Blunk​ និង​ចាប់​ផ្តើម​ធ្វើ ​កិច្ចការ​របស់​លោក​ពី​ថ្ងៃ​ពុធ​ ទី១​ធ្នូ​ ហើយ​លោក​ Laurent ​Kasper-Ansernet​ មក​ពី​ប្រទេស​ស្វីស​ត្រូវ​តែង​តាំង​ជា​ចៅក្រម​អន្តរជាតិ​បម្រុង។

ការ​ចូល​បម្រើការងារ​របស់​សហ​ចៅក្រម​ស៊ើប​អង្កេត​ថ្មី​ចំ​ពេល​ដែល​ប្រទេស​កម្ពុជា​ និង​អង្គការ​សហ​ប្រជាជាតិ​ស្ថិត​ក្នុងការ​ប្រទាញ​ប្រទង់​គ្នា​រឿង​ចោទ​ប្រកាន់​ជន​សង្ស័យ​៥នាក់​ថ្មី​ បន្ថែម​ទៀត​ជា​អតីតកម្មាភិបាល​ខ្មែរ​ក្រហម​ ដែល​ភាគី​កម្ពុជា​ និង​រដ្ឋាភិបាល​ បាន​ជំទាស់​។​ លោក ​ឡុង​ បញ្ញា​វុធ​ មន្ត្រី​កម្មវិធី​នៃ​អង្គការ​គំរោង​យុត្តិធម៍​នៅកម្ពុជា​បាន​អះអាង​ថា​ការ​ចូល​កាន់​ដំណែង​របស់​លោក​ Blunk គឺ​ជា​ការ​ទន្ទឹង​រង់​ចាំ​ និង​ជា​ការ​ដែល​គេ​ត្រូវ​តាម​ឃ្លាំ​មើល​អំពី​ដំណើរ​ការ​ ទៅ​មុខ​ជា​ពិសេស​ទាក់​ទង​នឹង​សំណុំ​រឿង​លេខ​ ០០៣ ​និង ​០០៤​។

«បុគ្គ​លិក​ថ្មី​មក​ដល់ ​យើង​អាច​និយាយ​បាន​ថា​វា​អាច​នឹង​មាន​ល្បឿន​ថ្មី ​ឬ​មួយ​ ក៏​យុទ្ធ​សាស្រ្ត​ថ្មី​ទាក់​ទង​នឹង​ការ​ស៊ើប​អង្កេត​លើ​សំណុំ​រឿង​០០៣​និង​០០៤ ​ដែល​ យើង​រង់​ចាំ​មើល​ទាំង​អស់​គ្នា​ ក្រោយ​ពេល​គាត់​ចាប់​ពី​ថ្ងៃ​ហ្នឹង​ទៅ​គឺ​ គាត់​ធ្វើ​ កិច្ចការ​ពេញ​សិទ្ធិ​នៅ​សាលា​ក្តី​ខ្មែរ​ក្រហម​ យើង​ក៏​ឃើញ​ថា​មាន​ ការ​រីក​ចម្រើន​ដែរ​ ទាក់​ទង​ទៅ​នឹង​ផ្នែក​ការពារ​ក្តី​ ដែល​បាន​តែង​តាំង​មេធាវី​ជាតិ​ម្នាក់​ ឱ្យធ្វើ​ជា​មេធាវី​ដើម្បី​ការពារ​ក្តី​សំណុំ​រឿង​០០៣ និង០០៤ ​តែ​ជា​ការ​គួរ​ឱ្យសោក​ស្តាយ​ដែល​ សហ​ចៅ​ក្រម​ស៊ើប​អង្កេត​មិន​ទាន់​សរសេរ​លិខិត​ទទួល​ស្គាល់​ជា​មេធាវី»។

លោក​ បញ្ញា​វុធ​បាន​បន្ថែម​សេចក្តី​ថា​សំណុំ​រឿង​លេខ​០០៣​ និង​០០៤គួរ​តែ​ មាន​ការ​រីក​ចម្រើន​ផ្នែក​ស៊ើប​អង្កេត​ ដោយ​សារ​ថា​សហ​ចៅក្រម​ស៊ើប​ អង្កេត​ពុំ​ មាន​ជាប់​រវល់​និង​សំណុំ​រឿង​លេខ​០០២ដែល​ត្រូវ​បញ្ចប់​ហើយ​នោះ​។

សាលា​ក្តីខ្មែរ​ក្រហម​ដែល​បាន​ស៊ើប​អង្កេត​ចប់​ករណី​សំណុំ​រឿង​លេខ​ ០០២ ​ប៉ុន្មាន​ខែ​មក​ហើយ​នោះ ​គ្រោង​នឹង​កាត់​ទោស​សំណុំ​រឿង​លេខ​ ០០២​ ដែល​មាន​អតីត​មេដឹក​នាំ​ខ្មែរ​ក្រហម​កំពូលៗ​៤នាក់​ នៅ​ដើម​ឆ្នាំ​ខាង​មុខ​ពី​បទ​ឧក្រិដ្ឋកម្ម​សង្រ្គាម​ ប្រល័យ​ពូជ​សាសន៍​ ប្រឆាំង​នឹង​មនុស្ស​ជាតិ​ ដែល​ទាក់​ទង​នឹង​ការសម្លាប់​រង្គាល​ពលរដ្ឋ​ខ្មែរ​ជិត​២​លាន​នាក់​ក្នុង​ទសវត្សរ៍​១៩៧០​។

អ្នក​ឃ្លាំ​មើល​សាលាក្តី​ខ្មែរ​ក្រហម​ខ្លះ​ទៀត​និយាយ​ថា​មូលហេតុ​ពិត​ប្រាកដ​នៃ​ការ​លា​ឈប់​ពី​មុខ​តំណែង​បន្ត​បន្ទាប់​របស់​បុគ្គលិក​អង្គការ​សហ​ប្រជា​ជាតិ​ ជា​ព្រះរាជ​អាជ្ញា ​និង​ចៅ​ ក្រម​ មិន​ត្រូវ​គេ​ទំលាយ​ ឱ្យដឹង​នូវផល​វិបាក​យ៉ាង​ណា​ជា​សាធារណៈ​ នោះ​ ហើយ​ ដែល​ជា​រឿង​ដ៏​ស្មុគ​ស្មាញ​ និង​ធ្វើ​ឱ្យសាលា​ក្តី​ប្រឈម​មុខ​និង​ឧបសគ្គ​ មិន​អាច​រក​ដំណោះ​ស្រាយ​សមរម្យ​បាន​៕

XS
SM
MD
LG